Awiya takayaɣ kajalaɣ ñɩŋga 8:1-66
8 Alɩwaatʋ ndʋ tɩ-taa lɛ, Salomɔɔ kpeɣli+ Izrayɛɛlɩ ɛzʋtʋyaa, cejewe ñʋndɩnaa kpeekpe, Izrayɛɛlɩ ɛjaɖɛ taa caanaa ɖɩsɩ ñʋndɩnaa.+ Pɔkɔɔ Wiyaʋ Salomɔɔ cɔlɔ Yeruzalɛm se pakpaɣ Yehowa ɛgbɛyɛ ɖʋʋ aɖakaɣ Daviid Tɛtʋ taa, pʋ-tɔbʋʋ se Siyɔŋ,+ nɛ pakpanɩ-kɛ.+
2 Izrayɛɛlɩ ɛyaa kpeekpe kpeɣli Salomɔɔ ɛsɩndaa kazandʋ* taa, Etanim* fenaɣ taa, pʋ-tɔbʋʋ se fenaɣ 7 ñɩŋga taa.+
3 Nɛ Izrayɛɛlɩ ɛzʋtʋyaa kpeekpe kɔɔ, nɛ cɔjɔnaa kʋsɩ Aɖakaɣ.+
4 Pakpanɩ Yehowa Aɖakaɣ, kediɣzaɣ kizinziku,+ nɛ wondu kiɖeɖetu ndʋ tɩɩwɛ kizinziku tɛɛ yɔ tɩ-tɩŋa. Cɔjɔnaa nɛ Leevi mba kpaɣnɩ pɩtɩŋa nɛ pakpana.
5 Wiyaʋ Salomɔɔ nɛ Izrayɛɛlɩ samaɣ* kpeekpe taa ñɩma, mba paayawa se pakatɩ-ɩ yɔ, paawɛ Aɖakaɣ ɛsɩndaa. Nɛ paawɛɛ nɛ palaɣ heŋ nɛ naŋ sakɩyɛ+ nɛ pataapɩzɩɣ se pakalɩ-ɩ yaa patɩlɩ ɩ-ñʋʋ.
6 Pʋwayɩ lɛ, cɔjɔnaa woni Yehowa ɛgbɛyɛ ɖʋʋ aɖakaɣ ko-lone taa,+ ɖɩɣa tɛ ɖooo pɩ-taa kuduyuu taa, Lone Kiɖeɖeye nɖɩ ɖɩkpaɖaa yɔ ɖɩ-taa, kerebimwaa keŋ tɛɛ.+
7 Nɛ kerebimwaa keŋ posi lone nɖɩ ɖɩ-taa pasɩ Aɖakaɣ yɔ ɖɩ-ñʋʋ yɔɔ, piyeba nɛ kerebimwaa huuzi Aɖakaɣ nɛ ka-ɖaŋ yɔɔ.+
8 Ðaŋ+ ɛnɩ ɩɖaɣlɩ siŋŋ nɛ ye ɛyʋ ɛwɛ Lone Kiɖeɖeye taa ɖooo pɩ-taa kuduyuu ɛsɩndaa yɔ, ɛpɩzɩɣ nɛ ɛna ɖaŋ ɛnɩ ɩ-nɔsɩ, ɛlɛ ye ɛyʋ ɛwɛnɩ awayɩ yɔ ɛɛpɩzɩɣ nɛ ɛna-sɩ. Nɛ ɩwɛ peeɖe halɩ nɛ sɔnɔ.
9 Nabʋyʋ taawɛɛ Aɖakaɣ taa nɛ pɩtasɩnɩ pɩtaahalanzɩ 2+ nzɩ Moyizi kaaɖʋ ka-taa+ Orɛɛbʋ egeetiye taa yɔ, alɩwaatʋ ndʋ Yehowa ɖʋ ɛgbɛyɛ+ nɛ Izrayɛɛlɩ samaɣ, kalɩnɩ Ejipiti ɛjaɖɛ taa lɛ.+
10 Cɔjɔnaa lɩnɩ lone kiɖeɖeye taa lɛ, ɛsɔmɩnʋʋ+ su Yehowa ɖɩɣa taa.+
11 Ɛsɔmɩnʋʋ ŋgʋ kɩ-yɔɔ lɛ, cɔjɔnaa taapɩzɩɣ se pasɩŋ nɛ pala pa-tʋmɩyɛ, mbʋ pʋyɔɔ yɔ Yehowa samtʋ kaasu Yehowa ɖɩɣa taa.+
12 Alɩwaatʋ ndʋ lɛ, Salomɔɔ yɔɔdɩ se: «Yehowa yɔɔdaa se ɛkaɣ caɣʋ cɩkpɛndʋʋ sɔsɔʋ taa.+
13 Manpɩzaa nɛ mama-ŋ ɖɩɣa ŋga kakʋyɩ siŋŋ yɔ, lone nɖɩ ɖɩkam camɩyɛ yɔ se ŋcaɣ ɖɩ-taa tam tam.»+
14 Nɛ wiyaʋ kɛzɩ ɛ-tɩ nɛ ɛha ɛsa nɛ Izrayɛɛlɩ samaɣ* kpeekpe, nɛ ɛpaɣzɩ-kɛ wazʋʋ; alɩwaatʋ ndʋ tɩ-taa lɛ, Izrayɛɛlɩ samaɣ kpeekpe ñasɩŋaa.+
15 Ɛyɔɔdaa se: «Pasa Izrayɛɛlɩ tɛ Ɛsɔ Yehowa, weyi ɛyɔɔdɩnɩ ɛ-maɣmaɣ ɛ-nɔɔ nɛ eheyi man-caa Daviid lidaʋ tɔm, nɛ ɛtɩŋnɩ ɛ-maɣmaɣ e-nesi yɔɔ nɛ eyele nɛ tɩla yɔ, ɛtɔm se:
16 “Kpaɣnɩ kɩyakʋ ŋgʋ malɩzɩ man-samaɣ Izrayɛɛlɩ Ejipiti taa yɔ, mantɩlɩzɩ tɛtʋ natʋyʋ Izrayɛɛlɩ cejewe kpeekpe taa se pama ɖɩɣa nɛ ma-hɩɖɛ wɛɛ peeɖe,+ ɛlɛ malɩzɩ Daviid se eɖiyi man-samaɣ Izrayɛɛlɩ.”
17 Nɛ man-caa Daviid kaasɔɔlɩnɩ ɛ-laŋɩyɛ pilim se ɛma ɖɩɣa ŋga keyeki nɛ Izrayɛɛlɩ tɛ Ɛsɔ Yehowa hɩɖɛ sɛɛ yɔ.*+
18 Ɛlɛ Yehowa heyi man-caa Daviid se: “Ŋŋsɔɔlɩnɩ ña-laŋɩyɛ pilim se ŋma ɖɩɣa ŋga keyeki nɛ ma-hɩɖɛ sɛɛ yɔ,* nɛ ŋlabɩ camɩyɛ se ŋsɔɔlɩ mbʋ ña-laŋɩyɛ taa.
19 Paa mbʋ yɔ, ŋŋkaɣ maʋ ɖɩɣa ŋga; ɛlɛ ña-maɣmaɣ ña-pɩyalʋ weyi pakaɣ-ŋ lʋlʋʋ yɔ,* ɛnʋ kaɣnɩ maʋ ɖɩɣa ŋga keyeki se ma-hɩɖɛ ɛsɛɛ yɔ.”*+
20 Yehowa yeba nɛ lidaʋ tɔm ndʋ ɛɛyɔɔdaa yɔ tɩla, mbʋ pʋyɔɔ yɔ mɛlɛɣzɩ man-caa Daviid lone taa nɛ mancaɣ Izrayɛɛlɩ kewiyaɣ kpelaɣ yɔɔ, ɛzɩ Yehowa kaayɔɔdʋʋ yɔ. Mama ɖɔɖɔ ɖɩɣa ŋga keyeki se Izrayɛɛlɩ tɛ Ɛsɔ Yehowa hɩɖɛ ɛsɛɛ yɔ,*+
21 nɛ mɔñɔɔzɩ lone naɖɩyɛ peeɖe se pasɩɩ Aɖakaɣ ŋga ka-taa nɛ ɛgbɛyɛ+ nɖɩ Yehowa ɖʋnɩ ɖɔ-cɔzɔnaa* alɩwaatʋ ndʋ ɛlɩzɩ-wɛ Ejipiti ɛjaɖɛ taa yɔ.»
22 Pʋwayɩ lɛ, Salomɔɔ sɩŋ Yehowa altaaru ɛsɩndaa Izrayɛɛlɩ samaɣ* kpeekpe ɛsɩndaa nɛ ɛkpazɩ e-nesi nɛ ɛsɔdaa,+
23 nɛ ɛyɔɔdɩ se: «Hayɩ Izrayɛɛlɩ tɛ Ɛsɔ Yehowa, Ɛsɔ nɔɔyʋ fɛyɩ ɛzɩ ña yɔ+ hayo ɛsɔdaa yaa tɛtʋ yɔɔ hadɛ cɩnɛ, nɛ ŋɖɔŋ ɛgbɛyɛ nɖɩ ŋɖʋwa yɔ ɖɩ-yɔɔ nɛ ŋwɩlɩɣ sɔɔlɩm siɣsiɣ ñɩmbʋ+ ña-lɩmɖʋyaa mba pɔɖɔŋ ñɛ-ɛsɩndaa nɛ pa-laŋɩyɛ pilim yɔ.+
24 Ŋɖɔm lidaʋ tɔm ndʋ ŋheyi man-caa, ña-lɩmɖʋyʋ Daviid yɔ tɩ-yɔɔ. Ŋyɔɔdɩ lidaʋ tɔm ndʋ nɛ ña-maɣmaɣ ñɔ-nɔɔ, nɛ sɔnɔ ŋtɩŋnɩ ña-maɣmaɣ ñe-nesi yɔɔ nɛ ŋyele nɛ tɩla.+
25 Nɛ lɛɛlɛɛyɔ lɛ, hayɩ Izrayɛɛlɩ tɛ Ɛsɔ Yehowa, ɖɔ lidaʋ tɔm ndʋ ŋheyi man-caa, ña-lɩmɖʋyʋ Daviid yɔ tɩ-yɔɔ, ŋŋyɔɔdaa se: “Ye ña-pɩyalaa ɩñɩtaa nɛ pɔcɔŋnɩ pɔ-ɖɔnɛ yɔɔ camɩyɛ nɛ pɔɖɔŋ mɛ-ɛsɩndaa, ɛzɩ ŋɖɔm mɛ-ɛsɩndaa yɔ, paa pɩɩla ɛzɩma yɔ, ña-lʋlʋʋ taa tʋ nɔɔyʋ kaɣ wɛʋ mɛ-ɛsɩndaa se ɛcaɣ Izrayɛɛlɩ kewiyaɣ kpelaɣ yɔɔ.”+
26 Nɛ lɛɛlɛɛyɔ lɛ, hayɩ Izrayɛɛlɩ tɛ Ɛsɔ, mentendi-ŋ, yele nɛ lidaʋ tɔm ndʋ ŋheyi man-caa, ña-lɩmɖʋyʋ Daviid yɔ, tɩla.
27 «Ɛlɛ toovenim taa lɛ, Ɛsɔ pɩzɩɣ nɛ ɛcaɣ tɛtʋ yɔɔ?+ Na! Ŋŋmakɩ ɛsɔdaa, ɛɛɛ, ɛsɔdaa kpeekpe;+ nɛ pɩcandɩnɩ ɖɩɣa kanɛ, ŋga mama-ŋ yɔ!+
28 Lɛɛlɛɛyɔ, kʋ nɩŋgbaŋʋʋ nɛ ŋnɩɩ ña-lɩmɖʋyʋ adɩma nɛ tenduu mbʋ etendiɣ-ŋ se ŋna ɛ-pʋtɔdɩyɛ yɔ, hayɩ mɛ-Ɛsɔ Yehowa, nɛ ŋwelisi kubuka ŋga ña-lɩmɖʋyʋ makɩ se ŋsɩnɩ-ɩ nɛ adɩma wena ɛwɛɛ nɛ ɛlakɩ ñɛ-ɛsɩndaa sɔnɔ yɔ.
29 Ñɛ-ɛsa ikuli nɛ acɔŋnɩ ɖɩɣa kanɛ kɔ-hɔɔlʋʋ taa ɖoo nɛ wɩsɩ, acɔŋnɩ lone nɖɩ ŋyɔɔdɩ ɖɩ-tɔm se: “Ma-hɩɖɛ kaɣ wɛʋ peeɖe”+ yɔ, nɛ ŋwelisi adɩma wena ña-lɩmɖʋyʋ haɣ ɛsa nɛ lone ɖɩnɛ nɛ ɛlakɩ yɔ.+
30 Nɛ ŋwelisi tenduu mbʋ ña-lɩmɖʋyʋ tendiɣ-ŋ se ŋna ɛ-pʋtɔdɩyɛ yɔ nɛ mbʋ ña-samaɣ Izrayɛɛlɩ haɣ ɛsa nɛ lone ɖɩnɛ nɛ katɩmɩɣ nɛ kɔpɔzʋʋ yɔ, nɛ ŋwelisini ɖooo ña-ɖɩjaɣyɛ taa ɛsɔdaa;+ ɛɛɛ, welisi nɛ ŋkpeɣ.+
31 «Ye ɛyʋ nɔɔyʋ ɛyʋsɩnɩ ɛyʋ lɛlʋ nɛ pɔpɔzɩ-ɩ se eɖuu* nɛ pʋyɔɔ lɛ ɛwɛɛ ɖuutu* tɛɛ, nɛ ye ɛwɛ ɖuutu* ndʋ tɩ-tɛɛ nɛ ɛkɔɔ ña-altaaru ɛsɩndaa ɖɩɣa kanɛ ka-taa yɔ,+
32 pʋbʋ lɛ, welisini ɖooo ɛsɔdaa nɛ ŋɖʋ nɔɔ tɔm ndʋ tɩ-taa nɛ ŋhʋʋ ña-lɩmɖʋyaa tɔm nɛ ŋkʋ ɛyʋ kɩdɛkɛdʋ tɔm se ɛɖɔ wɛɛ* nɛ ŋpɩsɩnɩ ɛ-ñʋʋ taa mbʋ ɛlaba yɔ, nɛ ŋɖezi weyi ɛfɛyɩnɩ kɩwɛɛkɩtʋ natʋyʋ yɔ ɛ-tɔm se tiɖewa* nɛ ŋhɛyɩ-ɩ ɛ-maɣmaɣ e-siɣsiɣ wɛtʋ nɔɔ taa.+
33 «Ye koyindu nɔɔyʋ ɛwabɩ ña-samaɣ Izrayɛɛlɩ mbʋ pʋyɔɔ yɔ pɛwɛɛ nɛ payʋsʋʋnɩ-ŋ,+ nɛ papɩsɩ ñɔ-cɔlɔ nɛ pasa ña-hɩɖɛ+ nɛ patɩmɩ ɖɩɣa kanɛ ka-taa nɛ petendi-ŋ se ŋna pa-pʋtɔdɩyɛ yɔ,+
34 pʋbʋ lɛ, welisini ɖooo ɛsɔdaa nɛ ŋkpeɣ ña-samaɣ Izrayɛɛlɩ kɩwɛɛkɩm nɛ ŋpɩsɩnɩ-wɛ ɛjaɖɛ nɖɩ ŋcɛlɩ pɔ-cɔzɔnaa yɔ ɖɩ-taa.+
35 «Ye ɛsɔdaa ɛɖɩɣaa nɛ tɛʋ ɛɛnɩɣ+ mbʋ pʋyɔɔ yɔ pɛwɛɛ nɛ payʋsʋʋnɩ-ŋ,+ nɛ paha pɛ-ɛsa nɛ lone ɖɩnɛ nɛ patɩmɩɣ nɛ pasaŋ ña-hɩɖɛ nɛ peyele pa-kɩwɛɛkɩm labʋ mbʋ pʋyɔɔ yɔ ŋluzi-wɛ* yɔ,+
36 pʋbʋ lɛ, welisini ɖooo ɛsɔdaa nɛ ŋkpeɣ ña-lɩmɖʋyaa, ña-samaɣ Izrayɛɛlɩ kɩwɛɛkɩm, mbʋ pʋyɔɔ yɔ ŋkaɣ-wɛ wɩlʋʋ+ nʋmɔʋ kɩbaŋʋ ŋgʋ kɩ-taa pɩwɛɛ se pɔɖɔ yɔ; nɛ ŋyele nɛ tɛʋ nɩɩ ñɛ-ɛjaɖɛ+ nɖɩ ŋha ña-samaɣ se ɖɩkɛ ka-ñɩm yɔ ɖɩ-taa.
37 «Ye ñɔɔsɩ ɛlɩ ɛjaɖɛ taa,+ yaa ɛyaa kɩzɩkʋ, helim miŋ ñɩmbʋ mbʋ piyeki nɛ tɔɔnasɩ wɩlɩɣ yɔ, tɔɔnasɩ kʋdɔŋ,+ kudoloŋ, yaa kudoloŋ ŋgʋ kɩtɔkɩ pɩdɩɩfɛyɩ yɔ;* yaa ye po-koyindinaa iwoba nɛ pɛñɛyɩ-wɛ paa pɛ-ɛjaɖɛ taa tɛtʋ* ndʋ lɛ tɩ-taa, yaa ye paa kʋñɔŋ ŋgʋ yaa kʋdɔŋ ŋgʋ kɩlɩwa yɔ,+
38 paa pɩtɩɩkɛ adɩma, paa pɩtɩɩkɛ pʋtɔdɩyɛ naʋ tenduu+ mbʋ ɛyʋ nɔɔyʋ yaa ña-samaɣ Izrayɛɛlɩ kpeekpe tendiɣ (mbʋ pʋyɔɔ yɔ paa weyi ɛsɩm wɩzasɩ nzɩ sɩwɛ ɛ-maɣmaɣ ɛ-laŋɩyɛ taa yɔ)+ alɩwaatʋ ndʋ pakpazɩɣ pe-nesi nɛ ɖɩɣa kanɛ kɔ-yɔɔ kiŋ yɔ,
39 pʋbʋ lɛ, welisini ɖooo ɛsɔdaa, ña-ɖɩjaɣyɛ taa,+ nɛ ŋkpeɣ+ nɛ ŋɖʋ ñɔ-nɔɔ tɔm ndʋ tɩ-taa; nɛ ŋhɛyɩ paa weyi lɛ ɛzɩ ɛ-lakasɩ kpeekpe pɔzʋʋ yɔ,+ mbʋ pʋyɔɔ yɔ ŋsɩm ɛ-laŋɩyɛ (ñe-ɖeke koŋ ñasɩmnɩ paa ɛyʋ weyi lɛ ɛ-laŋɩyɛ camɩyɛ),+
40 se pɩsa nɛ pese-ŋ sɔɔndʋ kɩyakɩŋ weyi payɩ pacakɩ ɛjaɖɛ nɖɩ ŋcɛlɩ ɖɔ-cɔzɔnaa yɔ ɖɩ-taa yɔ.
41 «Pɩtasɩ lɛ, ɛgɔm weyi ɛtɩkɛ ña-samaɣ Izrayɛɛlɩ taa tʋ nɛ ɛlɩɩnɩ ɖooo poliŋ ɛjaɖɛ naɖɩyɛ taa nɛ ɛkɔɔ ña-hɩɖɛ* yɔɔ yɔ+
42 (mbʋ pʋyɔɔ yɔ pakaɣ nɩʋ ña-hɩɖɛ sɔsɔɖɛ tɔm+ nɛ ñe-nesi ɖoŋ ñɩnzɩ nɛ ñe-nesi nzɩ ŋsezaa yɔ sɩ-tɔm), ye ɛkɔm nɛ ɛha ɛsa nɛ ɖɩɣa kanɛ nɛ ɛtɩmɩ yɔ,
43 pʋbʋ lɛ, welisini ɖooo ɛsɔdaa, ña-ɖɩjaɣyɛ taa,+ nɛ ŋla mbʋ payɩ ɛgɔm ɛnʋ ɛpɔzʋʋ-ŋ yɔ, nɛ pɩsa nɛ tɛtʋ yɔɔ ɛyaa samasɩ kpeekpe tɩlɩ ña-hɩɖɛ nɛ pese-ŋ sɔɔndʋ,+ ɛzɩ ña-samaɣ Izrayɛɛlɩ lakʋʋ yɔ, nɛ patɩlɩ se paya ña-hɩɖɛ ɖɩɣa kanɛ, ŋga mamawa yɔ kɔ-yɔɔ.
44 «Ye ŋtiyi ña-samaɣ se koyooni ko-koyindinaa, paa pɩtɩɩkɛ le,+ nɛ paha ɛsa nɛ tɛtʋ ndʋ ŋlɩzaa yɔ+ nɛ ɖɩɣa ŋga mamawa se keyele nɛ ña-hɩɖɛ sɛɛ yɔ*+ nɛ patɩmnɩ ña+ Yehowa yɔ,
45 pʋbʋ lɛ, welisini ɖooo ɛsɔdaa nɛ ŋnɩɩ pa-adɩma nɛ tenduu mbʋ petendiɣ-ŋ se ŋna pa-pʋtɔdɩyɛ yɔ, nɛ ŋhʋʋ pɔ-tɔm.
46 «Ye payʋsɩnɩ-ŋ (mbʋ pʋyɔɔ yɔ nɔɔyʋ fɛyɩ se ɛɛlakɩ kɩwɛɛkɩm),+ nɛ ŋkɔ-wɛ nɛ pana nɛ ŋɖʋzɩ-wɛ koyindu nesi tɛɛ, nɛ koyindinaa kpaɣ-wɛ nɛ pɛɖɛnɩ-wɛ yomiye taa pɛ-ɛjaɖɛ taa, paa pɩkɛ poliŋ taa yaa pɩ-cɔlɔ;+
47 nɛ pʋwayɩ pa-lɩmaɣza fe ɛjaɖɛ nɖɩ ɖɩ-taa powoni-wɛ yomiye taa yɔ,+ nɛ papɩsɩnɩ ñɔ-yɔɔ+ nɛ petendi-ŋ se ŋna pa-pʋtɔdɩyɛ alɩwaatʋ ndʋ pɛwɛ koyindinaa ɛjaɖɛ taa yɔ,+ nɛ pɔyɔɔdɩ se: “Ðɩlabɩ kɩwɛɛkɩm nɛ mbʋ pɩfɛyɩ ɖeu yɔ; ɖɩlabɩ kañatʋ lakasɩ,”+
48 nɛ papɩsɩnɩ ñɔ-yɔɔ nɛ pa-laŋɩyɛ pilim+ nɛ pa-kalɩzaɣ* pilim alɩwaatʋ ndʋ pɛwɛ po-koyindinaa mba pɛɖɛnɩ-wɛ yomiye taa yɔ pɛ-ɛjaɖɛ taa yɔ nɛ paha ɛsa nɛ pɛ-ɛjaɖɛ nɖɩ ŋcɛlɩ pɔ-cɔzɔnaa yɔ nɛ tɛtʋ ndʋ ŋlɩzaa yɔ nɛ ɖɩɣa ŋga mamawa se keyele nɛ ña-hɩɖɛ sɛɛ yɔ* nɛ patɩmɩɣnɩ-ŋ yɔ,+
49 pʋbʋ lɛ, welisini ɖooo ɛsɔdaa, ña-ɖɩjaɣyɛ taa,+ nɛ ŋnɩɩ pa-adɩma nɛ tenduu mbʋ petendiɣ-ŋ se ŋna pa-pʋtɔdɩyɛ yɔ, nɛ ŋhʋʋ pɔ-tɔm
50 nɛ ŋkpeɣ ña-samaɣ ŋga kayʋsɩnɩ-ŋ yɔ, ŋkpeɣ kɩwɛɛkɩm mbʋ palabɩ-ŋ yɔ pi-kpeekpe. Yele nɛ pɔ-tɔm la pʋtɔdɩyɛ po-koyindinaa nɛ paba na pa-pʋtɔdɩyɛ+
51 (mbʋ pʋyɔɔ yɔ pɛkɛ ña-samaɣ nɛ ña-ñɩm,+ samaɣ ŋga ŋlɩzɩnɩ Ejipiti yɔ,+ ŋga ŋlɩzɩnɩ miŋ kpou ŋgʋ kɩ-taa poyolusuu ñɩɣtʋ yɔ kɩ-taa yɔ).+
52 Ñɛ-ɛsa ikuli nɛ ŋna tenduu mbʋ ña-lɩmɖʋyʋ tendiɣ-ŋ se ŋna ɛ-pʋtɔdɩyɛ yɔ+ nɛ ña-samaɣ Izrayɛɛlɩ tenduu mbʋ ketendiɣ-ŋ se ŋna ka-pʋtɔdɩyɛ yɔ, nɛ ŋwelisiɣ alɩwaatʋ ndʋ payɩ payaɣ-ŋ yɔ.*+
53 Mbʋ pʋyɔɔ yɔ ŋlɩzɩ-wɛ nɛ hɔɔlʋʋ nɛ pɛkɛ ña-ñɩm tɛtʋ yɔɔ ɛyaa kpeekpe taa,+ ɛzɩ ŋŋtɩŋnʋʋ ña-lɩmɖʋyʋ Moyizi yɔɔ nɛ ŋyɔɔdɩ, alɩwaatʋ ndʋ ŋlɩzaɣ ɖɔ-cɔzɔnaa Ejipiti taa yɔ, hayɩ Kɩbaɣlʋ Kɩlɩm Yehowa.»
54 Nɛ Salomɔɔ tɩɩtɛm labʋ adɩma ana a-tɩŋa nɛ etendi Yehowa nɛ ɛpɔzɩ ɛ-pʋtɔdɩyɛ naʋ lɛ, ɛkʋyɩnɩ Yehowa altaaru ɛsɩndaa, ɖenɖe eeluŋaa nɛ ɛkpazɩ e-nesi nɛ ɛsɔdaa yɔ.+
55 Nɛ ɛsɩŋ nɛ ɛwazɩ Izrayɛɛlɩ samaɣ kpeekpe yɔɔ nɛ nɔɔ kɩkʋyaɣ, nɛ ɛyɔɔdɩ se:
56 «Pasa Yehowa, weyi ɛha ɖɩhɛzɩyɛ lone ɛ-samaɣ Izrayɛɛlɩ, ɛzɩ ɛɛyɔɔdʋʋ yɔ.+ Lidaʋ tɔm kɩbandʋ ndʋ payɩ ɛɛtɩŋnɩ ɛ-lɩmɖʋyʋ Moyizi yɔɔ nɛ ɛyɔɔdɩ yɔ, tɩ-taa paa kʋɖʋmtʋ tɩkazɩ se tɩtɩla.+
57 Ðɛ-Ɛsɔ Yehowa ɛwɛɛ ɖɔ-cɔlɔ ɛzɩ ɛɛwɛʋ ɖɔ-cɔzɔnaa cɔlɔ yɔ.+ Etaayele-ɖʋ nɛ ɛtaalɔ-ɖʋ.+
58 Ɛkɛzɩ ɖa-laŋɩyɛ nɛ ɛ-yɔɔ,+ nɛ ɖɩɖɔ ɛ-nʋmɔŋ kpeekpe taa nɛ ɖɩɖɔkɩ ɛ-paɣtʋ, ɛ-kpalɩtʋ, nɛ ɛ-tɔm hʋʋ, ɛzɩ ɛɛɖʋʋ ɖɔ-cɔzɔnaa se pɔɖɔ pɩ-yɔɔ yɔ.
59 Nɛ mɔn-tɔm tʋnɛ, ndʋ mentendini Yehowa nɛ mɔnpɔzɩ ɛ-pʋtɔdɩyɛ naʋ yɔ, ɖɛ-Ɛsɔ Yehowa ɛtɔzʋʋ tɩ-yɔɔ wɩsɩ nɛ ɖoo, nɛ ɛhʋʋ ɛ-lɩmɖʋyʋ tɔm nɛ ɛ-samaɣ tɔm ɛzɩ pɩpɔzʋʋ paa kɩyakʋ ŋgʋ yɔ,
60 nɛ pɩsa nɛ tɛtʋ yɔɔ ɛyaa samasɩ kpeekpe tɩlɩ se Yehowa kɛnɩ Ɛsɔ toovenim tʋ.+ Nɔɔyʋ fɛyɩ nɛ pɩtasɩnɩ-ɩ!+
61 Pʋyɔɔ lɛ, iyele nɛ mɩ-laŋɩyɛ ñɔɔnɩ+ ɖɛ-Ɛsɔ Yehowa kpam nɛ ɩɖɔŋ ɛ-kpalɩtʋ yɔɔ nɛ ɩɖɔkʋʋ ɛ-paɣtʋ ɛzɩ sɔnɔ yɔ.»
62 Nɛ wiyaʋ nɛ Izrayɛɛlɩ samaɣ kpeekpe, ŋga kaawɛ ɛ-cɔlɔ yɔ palaa kɩlaŋ sakɩyɛ Yehowa ɛsɩndaa.+
63 Salomɔɔ la Yehowa laŋhɛzɩyɛ kɩlaŋ:+ Ɛla naŋ 22 000 nɛ heŋ 120 000. Mbʋ wiyaʋ nɛ Izrayɛɛlɩ mba kpeekpe patʋlɩ Yehowa ɖɩɣa nɔnɔsɩ.+
64 Kɩyakʋ ŋgʋ ki-wiye, pɩɩpɔzaa se wiyaʋ ɛla nɛ kadaɣ ŋga kɛwɛ Yehowa ɖɩɣa ɛsɩndaa yɔ kɛ-hɛkʋ taa pɩsɩ lone kiɖeɖeye, mbʋ pʋyɔɔ yɔ, pɩɩpɔzaa se ɛlaa peeɖe kɩlaŋ kɩñaɣzɩŋ, tɔɔnaɣ pee kɩlaŋ, nɛ laŋhɛzɩyɛ kɩlaŋ num, mbʋ pʋyɔɔ yɔ ñɩɣyʋʋ kɩsɛɛmʋʋ altaaru+ ŋgʋ kɩwɛ Yehowa ɛsɩndaa yɔ, kɩɩkɩlɩ ññɩɩ nɛ kɩlaŋ kɩñaɣzɩŋ, tɔɔnaɣ pee kɩlaŋ, nɛ laŋhɛzɩyɛ kɩlaŋ num+ pataapɩzɩɣ se pamaɣ kɩ-yɔɔ.
65 Alɩwaatʋ ndʋ, Salomɔɔ nɛ Izrayɛɛlɩ kpeekpe palabɩ kazandʋ;+ pɩɩkɛ ɛyaa samaɣ sɔsɔɔ,* kalɩnɩ ɖooo Lebo-Hamatɩ* nɛ pitii Ejipiti Lemeɣa.*+ Palabɩ kazandʋ ndʋ ɖɛ-Ɛsɔ Yehowa ɛsɩndaa kɩyakɩŋ 7 nɛ pʋwayɩ lɛ, kɩyakɩŋ 7 lɛɛŋ, nɛ pɩtɩŋa pɩkpɛndɩ kɩyakɩŋ 14.
66 Kɩyakʋ ŋgʋ kɩtɩŋ pʋwayɩ yɔ* ki-wiye lɛ, eyele ɛyaa se pɛɖɛɛ, nɛ paba wazɩ wiyaʋ yɔɔ nɛ pɛɖɛɛ pekpe pɛ-tɛ nɛ amɛya nɛ laŋhʋlʋmɩyɛ, kɩbandʋ ndʋ payɩ+ Yehowa labɩ ɛ-lɩmɖʋyʋ Daviid nɛ ɛ-samaɣ Izrayɛɛlɩ yɔ tɩ-yɔɔ.
Pɩ-tɛɛ tɔm
^ Pʋ-tɔbʋʋ se Coka Kazandʋ.
^ Cɔnɩ Tɔm kɩsɔzɩtʋ B15.
^ Yaa «kigbeɣluu.»
^ Yaa «ɛgbɛyɛ.»
^ Piye piye, «ɛma Izrayɛɛlɩ tɛ Ɛsɔ Yehowa hɩɖɛ ɖɩɣa.»
^ Piye piye, «se ŋma ma-hɩɖɛ ɖɩɣa.»
^ Piye piye, «ña-pɩyalʋ, weyi ɛlɩɣnɩ ña-tɩnaɣ taa yɔ.»
^ Piye piye, «ɛnʋ kaɣnɩ maʋ ma-hɩɖɛ ɖɩɣa.»
^ Piye piye, «Mama ɖɔɖɔ Izrayɛɛlɩ tɛ Ɛsɔ Yehowa hɩɖɛ ɖɩɣa.»
^ Yaa «ŋga ka-taa paɖʋ pɩtaahalanzɩ nzɩ sɩ-yɔɔ pama ɛgbɛyɛ nɖɩ Yehowa ɖʋnɩ ɖɔ-cɔzɔnaa.»
^ Yaa «ɛgbɛyɛ.»
^ Yaa «nɛ weyi payʋsɩnɩ-ɩ yɔ, eyele nɛ weyi ɛyʋsɩnɩ-ɩ yɔ eɖuuni ɛ-maɣmaɣ.» Pʋ-tɔbʋʋ se ɖuutu ndʋ tɩ-taa posuyi nɔɔ kɩdɛkɛdaɣ lɔʋ se nɔɔ lɔʋ mbʋ pɩla ye weyi eɖuwaa yɔ ɛtɩɖɔ ɖuutu ndʋ eɖuwaa nɛ ɛyɔɔdɩ yɔ tɩ-yɔɔ yɔ.
^ Piye piye, «nɔɔ kɩdɛkɛdaɣ lɔʋ.»
^ Piye piye, «nɔɔ kɩdɛkɛdaɣ lɔʋ.»
^ Piye piye, «se ɛkɛ kɩdɛkɛdʋ.»
^ Piye piye, «se ɛwɛ siɣsiɣ.»
^ Yaa «ŋwɩlɩ-wɛ ñaŋ.»
^ Yaa «yaa nakaŋ.»
^ Piye piye, «pɛñɛyɩ-wɛ ɛ-nɔnɔsɩ ɛjaɖɛ taa.»
^ Yaa «ña-hɩɖɛ sɛʋ.»
^ Piye piye, «ɖɩɣa ŋga mama ña-hɩɖɛ yɔ.»
^ Cɔnɩ Tɔm pee sɔsɔna tɔbʋʋ lɩzʋʋ.
^ Piye piye, «ɖɩɣa ŋga mama ña-hɩɖɛ yɔ.»
^ Yaa «nɛ ŋwelisiɣni-wɛ paa ɛbɛ pɔpɔzɩ-ŋ yɔ.»
^ Piye piye, «pɩɩkɛ ɛgbɛyɛ sɔsɔɖɛ.»
^ Yaa «Hamatɩ nɔnɔɔ taa.»
^ Cɔnɩ Tɔm pee sɔsɔna tɔbʋʋ lɩzʋʋ.
^ Piye piye, «Kɩyakʋ 8 ñɩŋgʋ,» pʋ-tɔbʋʋ se kɩyakʋ ŋgʋ kɩtɩŋ kɩyakɩŋ 7 kɛdɛzaɣ ñɩŋ yɔ.
