Awiya takayaɣ kajalaɣ ñɩŋga 9:1-28
9 Salomɔɔ tɩɩtɛm maʋ Yehowa ɖɩɣa, wiyaʋ ɖɩɣa+ nɛ mbʋ payɩ Salomɔɔ liu kaawɛɛ se ɛla yɔ lɛ,+
2 Yehowa lɩɩ Salomɔɔ yɔɔ nabʋlɛ ɖeɖe, ɛzɩ ɛɛlɩʋ ɛ-yɔɔ Gabawɔɔ yɔ.+
3 Yehowa heyi-i se: «Manɩ ña-adɩma nɛ tenduu mbʋ ŋtendi mɛ-ɛsɩndaa se mana mɩ-pʋtɔdɩyɛ yɔ. Ðɩɣa kanɛ, ŋga ŋmawa yɔ, manpɩsɩ-kɛ kiɖeɖeɣa mbʋ pʋyɔɔ yɔ mansɩ ma-hɩɖɛ peeɖe tam,+ nɛ mɛ-ɛsa nɛ ma-laŋɩyɛ pakaɣ wɛʋ peeɖe paa ɛzɩmtaa.+
4 Nɛ ña yɔ, ye ŋɖɔŋ mɛ-ɛsɩndaa ɛzɩ ña-caa Daviid kaaɖɔm yɔ,+ nɛ laŋɩyɛ nɖɩ ɖɩwɛ cɩŋgɩlɩm yɔ+ nɛ siɣsiɣ wɛtʋ yɔ,+ nɛ ŋlakɩ mbʋ payɩ mɔnpɔzɩ-ŋ yɔ,+ nɛ ŋñaŋ man-paɣtʋ nɛ mɔn-tɔm hʋʋ yɔ,+
5 pʋbʋ lɛ, mankaɣ kam ñe-kewiyaɣ kpelaɣ camɩyɛ Izrayɛɛlɩ yɔɔ tam, ɛzɩ maaheyuu ña-caa Daviid yɔ se: “Paa pɩɩla ɛzɩma yɔ, ña-lʋlʋʋ taa tʋ nɔɔyʋ kaɣ wɛʋ se ɛcaɣ Izrayɛɛlɩ kewiyaɣ kpelaɣ yɔɔ.”+
6 Ɛlɛ ye ña nɛ ña-pɩyalaa iyebi ma-wayɩ tɩŋʋʋ nɛ ɩɩɖɔŋ man-paɣtʋ nɛ man-kpalɩtʋ ndʋ mansɩ mɩ-ɛsɩndaa yɔ tɩ-yɔɔ, nɛ iwolo nɛ ɩsɛɣ ɛsɔnaa lalaa nɛ iluŋuu pɛ-tɛɛ yɔ,+
7 mankaɣ Izrayɛɛlɩ ɖɩzʋʋ ɛjaɖɛ nɖɩ maha-wɛ yɔ ɖɩ-taa;+ nɛ ɖɩɣa ŋga manpɩsɩ-kɛ kiɖeɖeɣa ma-hɩɖɛ yɔɔ yɔ, mankaɣ-kɛ kʋsʋʋ mɛ-ɛsɩndaa,+ nɛ Izrayɛɛlɩ kaɣ pɩsʋʋ mbʋ peniŋ yɔ* nɛ woŋa pʋyʋ samasɩ kpeekpe hɛkʋ taa.+
8 Nɛ ɖɩɣa kanɛ kakaɣ pɩsʋʋ njɛyɛ tambaɣ huuye.+ Paa weyi ɛtɩŋnɩ kɔ-cɔlɔ yɔ, ɛkaɣ cɔnʋʋ nɛ pɩɖɩɣzɩ-ɩ nɛ ɛkaɣ hʋlʋʋ kancʋʋlaɣ nɛ ɛyɔɔdɩ se: “Ɛbɛ yɔɔ Yehowa labɩ ɛjaɖɛ ɖɩnɛ nɛ ɖɩɣa kanɛ mbʋ?”+
9 Nɛ pakaɣ yɔɔdʋʋ se: “Mbʋ pʋyɔɔ yɔ, peyebi pɛ-Ɛsɔ Yehowa weyi ɛlɩzɩ pɔ-cɔzɔnaa Ejipiti ɛjaɖɛ taa yɔ, nɛ pɔñɔɔnɩ ɛsɔnaa lalaa nɛ poluŋ pɛ-tɛɛ nɛ pɛsɛɛ-wɛ. Pʋyɔɔ Yehowa kɔnɩ asɛyʋʋ kʋnɛ kɩ-tɩŋa pɔ-yɔɔ.”»+
10 Salomɔɔ ma ɖɩsɩ nzɩ sɩ-naalɛ, Yehowa ɖɩɣa nɛ wiyaʋ ɖɩɣa, pɩnzɩ 20 taa.+
11 Tiirɩ wiyaʋ Hiram+ kaatiyini Salomɔɔ sɛɛdrɩ nɛ jenevriyee kpoŋgbolonaa nɛ sika sakɩyɛ ɛzɩ ɛlɛ kaasɔɔlʋʋ yɔ,+ nɛ pʋwayɩ lɛ, Wiyaʋ Salomɔɔ ha Hiram tɛtʋ 20 Galilee ɛjaɖɛ taa.
12 Nɛ Hiram lɩɩnɩ Tiirɩ se ewolo nɛ ɛna tɛtʋ ndʋ Salomɔɔ kaaha-ɩ yɔ, ɛlɛ ɛna-tʋ lɛ tɩtɩkɛdɩnɩ-ɩ.*
13 Ɛyɔɔdɩ se: «Tɛtʋ ndʋ ŋha-m mbʋ yɔ, mon-koobu?» Nɛ pɔkɔɔ payaa tɛtʋ ndʋ se Kabuulɩ Tɛtʋ* halɩ nɛ sɔnɔ.
14 Hiram tiyini wiyaʋ sika+ talaŋwaa* 120.
15 Mba Wiyaʋ Salomɔɔ kaaɖʋ kɩjɛyʋʋ tʋma+ se pama Yehowa ɖɩɣa,+ ɛ-maɣmaɣ ɛ-ɖɩɣa,* Suyuu,*+ Yeruzalɛm koloŋa, Hazɔɔrɩ,+ Megido,+ nɛ Gezɛɛrɩ+ yɔ, pɔ-yɔɔ tɔm yɔ.
16 (Ejipiti wiyaʋ Farawɔɔ kaalɩwa nɛ ɛkpa nɛ ɛmʋ Gezɛɛrɩ nɛ ɛñaɣzɩ-kʋ miŋ, nɛ ɛɛkʋ ɖɔɖɔ Kanaŋ ñɩma+ mba paawɛ tɛtʋ ndʋ tɩ-taa yɔ. Nɛ ɛcɛlɩ-tʋ ɛ-pɛlɛ,+ Salomɔɔ halʋ, se pɩkɛnɩ kʋjɔʋ ŋgʋ ɛlakɩnɩ-ɩ wele wele yɔ.*)
17 Salomɔɔ ma* Gezɛɛrɩ, Bɛtɩ-Horonɩ Pɩ-tɛɛ Ñɩŋgʋ,+
18 Baalatɩ,+ nɛ Tamaarɩ ŋgʋ kɩwɛ kañɩmbusuu taa, ɛjaɖɛ taa yɔ,
19 pɩkpɛndɩnɩ Salomɔɔ tɛtʋ ndɩ ndɩ ndʋ tɩ-taa pasɩɣ wondu yɔ ti-kpeekpe, kɛɛkɛɛnaa tɛtʋ ndɩ ndɩ,+ kpaŋnaŋ yɔɔ caɣyaa tɛtʋ ndɩ ndɩ, nɛ mbʋ payɩ Salomɔɔ kaasɔɔlaa se ɛma Yeruzalɛm taa, Libaŋ taa, nɛ ɛjaɖɛ nɖɩ ɖɩ-taa payɩ ɛtɔkɩ kewiyitu yɔ ɖɩ-taa yɔ.
20 Piyele nɛ ɛyaa mba payɩ pɩɩkazɩ Amoori mba taa, Hɛɛtɩ mba taa, Perizi mba taa, Hivi mba taa, nɛ Yebuusi mba+ taa, mba pataakɛ Izrayɛɛlɩ samaɣ taa mba yɔ,+
21 pa-lʋlʋʋ taa ñɩma mba pɩɩkazɩ ɛjaɖɛ taa yɔ—mba Izrayɛɛlɩ ñɩma taapɩzɩ nɛ paɖɩzɩ-wɛ yɔ—Salomɔɔ ɖʋ-wɛ kɩjɛyʋʋ tʋma nɛ papɩsɩ yomaa halɩ nɛ sɔnɔ.+
22 Ɛlɛ Izrayɛɛlɩ mba lɛ, Salomɔɔ tɩpɩsɩ pa-taa nɔɔyʋ e-yom,+ mbʋ pʋyɔɔ yɔ paakɛ e-you laɖaa, ɛ-lɩmɖʋyaa, ɛ-awumbiya, ɛ-sɔɔjanaa sɔsaa, nɛ ɛ-kɛɛkɛɛnaa sayaa ñʋndɩnaa nɛ ɛ-kpaŋnaŋ yɔɔ caɣyaa ñʋndɩnaa.
23 Salomɔɔ tʋma yɔɔ cɔnɩyaa ñʋndɩnaa kaakpɛndɩ 550, mba cɔŋnaɣnɩ ɛyaa mba palakaɣ tʋmɩyɛ yɔ pɔ-yɔɔ.+
24 Ɛlɛ Farawɔɔ pɛlɛ+ lɩɩ Daviid Tɛtʋ+ taa nɛ ɛkpa ɛ-maɣmaɣ ɛ-ɖɩɣa ŋga Salomɔɔ kaama-ɩ yɔ ka-taa; pʋwayɩ lɛ Salomɔɔ ma Suyuu.*+
25 Tam nabudozo pɩnaɣ taa lɛ,+ Salomɔɔ laɣaɣ kɩlaŋ kɩñaɣzɩŋ nɛ laŋhɛzɩyɛ kɩlaŋ altaaru ŋgʋ ɛɛma Yehowa yɔ kɩ-yɔɔ,+ eyekaɣ ɖɔɖɔ nɛ kɩlaŋ ɛnɩ ɩ-ñɔsɩ kʋyʋʋnɩ altaaru ŋgʋ kɩɩwɛ Yehowa ɛsɩndaa yɔ kɩ-yɔɔ; nɛ ɛtɛzɩ ɖɩɣa ŋga.+
26 Wiyaʋ Salomɔɔ labɩ ɖɔɖɔ mɛlɛnaa Eziyɔnɩ-Gebɛɛrɩ,+ ŋgʋ kɩwɛ Elɔɔtɩ cɔlɔ, Teŋgu Kɩsɛɛmʋʋ kidiiliŋ yɔɔ Edom ɛjaɖɛ taa yɔ.+
27 Hiram tiyi ɛ-maɣmaɣ ɛ-lɩmɖʋyaa, teŋgu yɔɔ tʋmlaɖaa mba paawɛ niye yɔ, se pa nɛ Salomɔɔ lɩmɖʋyaa pala tʋmɩyɛ mɛlɛnaa taa.+
28 Powolo Ofiiri+ nɛ pakpaɣ sika talaŋwaa 420 peeɖe nɛ pɔkɔnɩ-kɛ Wiyaʋ Salomɔɔ.
Pɩ-tɛɛ tɔm
^ Piye piye, «kaɣ pɩsʋʋ eduuye.»
^ Piye piye, «tɩtɩtʋʋzɩ ɛ-ɛsɩndaa.»
^ Pɩpɩzɩɣ pɩkɛ, «Tɛtʋ ndʋ tɩfɛyɩ wazaɣ yɔ.»
^ Talaŋ kʋɖʋmʋʋ maɣnɩ ɛzɩ kilonaa 34 mbʋ yɔ (kilonaa 34,2). Cɔnɩ Tɔm kɩsɔzɩtʋ B14.
^ Yaa «Milo.» Ebree tɔm piye nɖɩ ɖɩ-tɔbʋʋ lɛ se «suyi.»
^ Yaa «ɛ-awiya ɖɩɣa.»
^ Yaa «se pɩkɛnɩ nesi ɖɔkʋʋ kʋjɔʋ.»
^ Yaa «kpazɩ ɖoŋ.»
^ Yaa «Milo.» Ebree tɔm piye nɖɩ ɖɩ-tɔbʋʋ lɛ se «suyi.»
