Kroniiki takayaɣ kajalaɣ ñɩŋga 28:1-21
28 Nɛ Daviid kpeɣli Izrayɛɛlɩ awumbiya kpeekpe Yeruzalɛm: cejewe awumbiya, ɛyaa tindima wena alakɩ wiyaʋ tʋma yɔ a-ñʋndɩnaa,+ kudokiŋ ñʋndɩnaa nɛ mɩnɩŋ ñʋndɩnaa,+ ñʋndɩnaa mba pɔcɔŋnɩ wiyaʋ nɛ ɛ-pɩyalaa+ pa-ñɩm nɛ pa-kpɩna kpeekpe yɔɔ yɔ,+ pɩkpɛndɩnɩ wiyaʋ ɖɩɣa taa kaɖɩsɩ nɛ abalaa ɖoŋ tɩnaa mba pataɣ-wɛ liu yɔ pa-tɩŋa.+
2 Nɛ Wiyaʋ Daviid kʋyɩ nɛ ɛsɩŋ nɛ ɛyɔɔdɩ se:
«Mon-koobiya nɛ man-samaɣ, iwelisini-m. Maasɔɔlɩnɩ ma-laŋɩyɛ pilim se mama ɖɩɣa nɛ kɛkɛ ɖɩhɛzɩyɛ lone Yehowa ɛgbɛyɛ ɖʋʋ aɖakaɣ nɛ kɛkɛ ɖɔɖɔ ɖɛ-Ɛsɔ nɩŋgbanzɩ ɖɩzɩyɛ,+ nɛ mɔñɔɔzɩ mbʋ mbʋ pamaɣnɩ-kɛ yɔ.+
3 Ɛlɛ Ɛsɔ toovenim tʋ heyi-m se: “Ŋŋkaɣ maʋ ɖɩɣa ŋga keyeki nɛ ma-hɩɖɛ sɛɛ yɔ,*+ mbʋ pʋyɔɔ yɔ ŋkɛ you laɖʋ, nɛ ŋkpɛdɩ calɩm.”+
4 Ɛlɛ Izrayɛɛlɩ tɛ Ɛsɔ Yehowa lɩzɩ-m man-caa ɖɩɣa kpeekpe taa se manpɩsɩ wiyaʋ Izrayɛɛlɩ yɔɔ tam,+ mbʋ pʋyɔɔ yɔ ɛlɩzɩ Yuuda se ɛkɛ ɖiyiyu+ nɛ Yuuda ɖɩɣa taa lɛ, man-caa ɖɩɣa ɛlɩzaa,+ nɛ man-caa pɩyalaa taa lɛ, ma mɛkɛnɩ weyi ɛ-tɔm kɛdɩnɩ-ɩ se ɛsɩ-m wiyaʋ Izrayɛɛlɩ kpeekpe yɔɔ yɔ.+
5 Nɛ man-pɩyalaa kpeekpe taa lɛ (mbʋ pʋyɔɔ yɔ Yehowa ha-m pɩyalaa sakɩyɛ+) ɛlɩzɩ man-pɩyalʋ Salomɔɔ+ se ɛcaɣ Yehowa kewiyitu kpelaɣ yɔɔ nɛ ɛtɔɔ kewiyitu Izrayɛɛlɩ yɔɔ.+
6 «Eheyi-m se: “Ña-pɩyalʋ Salomɔɔ kaɣnɩ maʋ man-ɖɩɣa nɛ man-kadasɩ, mbʋ pʋyɔɔ yɔ malɩzɩ-ɩ se ɛkɛ man-pɩyalʋ nɛ mankaɣ pɩsʋʋ ɛ-caa.+
7 Ye ɛtɛm ɛ-taa nɛ ɛɖɔŋ man-paɣtʋ nɛ mɔn-tɔm hʋʋ paɣtʋ yɔɔ,+ ɛzɩ ɛwɛʋ nɛ ɛlakɩ lɛɛlɛɛyɔ yɔ, mankaɣ kam e-kewiyitu camɩyɛ tam.”+
8 Pʋyɔɔ lɛ, mɔyɔɔdʋʋ Izrayɛɛlɩ kpeekpe, Yehowa ɛgbɛyɛ ɛsɩndaa, nɛ ɖɛ-Ɛsɔ nɩŋgbaaŋ taa se: Ɩɖɔ camɩyɛ mɩ-Ɛsɔ Yehowa paɣtʋ kpeekpe yɔɔ nɛ ɩñɩnɩ-tʋ, se pɩsa nɛ ɛjaɖɛ kɩbanɖɛ ɖɩnɛ+ ɖɩpɩsɩ mɩ-pʋyʋ nɛ ɩcɛlɩ-ɖɩ mɩ-pɩyalaa mba pakaɣ kɔm mɩ-wayɩ yɔ nɛ pɩkɛ pa-ñɩm tam.
9 «Piyele nɛ ña man-pɩyalʋ Salomɔɔ, tɩlɩ ña-caa tɛ Ɛsɔ, nɛ ŋsɛɛ-ɩ nɛ ña-laŋɩyɛ pilim*+ nɛ ña-kalɩzaɣ* faaa,* mbʋ pʋyɔɔ yɔ Yehowa wiliɣ laŋa kpeekpe taa,+ nɛ ɛtɩlɩɣ ɖenɖe ɛyʋ lɩmaɣza tɩŋa kpiliɣna yɔ.+ Ye ŋñɩnɩɣ-ɩ yɔ ɛkaɣ yebu nɛ ŋna-ɩ;+ ɛlɛ ye ŋyebi-i yɔ, ɛkaɣ-ŋ lɔʋ tam.+
10 Lɛɛlɛɛyɔ lɛ, na, Yehowa lɩzɩ-ŋ se ŋma ɖɩɣa nɛ kɛkɛ kooka kiɖeɖeɣa. Wɛɛ abalɩtʋ nɛ ŋla tʋmɩyɛ.»
11 Nɛ Daviid cɛlɩ ɛ-pɩyalʋ Salomɔɔ anjaʋ+ ŋgʋ pɩwɛɛ se ɛtɩŋnɩ kɩ-yɔɔ nɛ ɛma kʋjɔŋ+ nɛ kɩ-ɖɩsɩ, ki-wondu ɖɩzɩyɛ kuduyuŋ, kɩ-ɛsɔdaa kuduyuŋ, kɩ-tɛ pɩ-taa kuduyuŋ, nɛ ceɣu ɖɩɣa* yɔ.+
12 Ɛcɛlɩ-ɩ anjaʋ ŋgʋ kɩwɩlɩɣ mbʋ mbʋ fezuu wɩlɩ-ɩ pɩlɩɩnɩ ɛzɩma pɩwɛɛ se pama Yehowa ɖɩɣa kadasɩ,+ tɔɔnaɣ ɖɩdɔɔyɛ ɖamɩŋ weyi ɩcɔ-kɛ nɛ ɩta yɔ ɩ-tɩŋa, Ɛsɔ toovenim tʋ ɖɩɣa ñɩm ɖɩzɩyɛ nɛ wondu ndʋ papɩsɩ-tʋ kiɖeɖetu yɔ* tɩ-ɖɩzɩyɛ yɔ;+
13 pɩlɩɩnɩ ɖɔɖɔ cɔjɔnaa nɛ Leevi mba tindima yɔɔ,+ Yehowa ɖɩɣa taa tʋma tɩŋa yɔɔ, nɛ Yehowa ɖɩɣa taa tʋmɩyɛ wondu tɩŋa yɔɔ;
14 pɩlɩɩnɩ ɖɔɖɔ sika yuŋ yɔɔ, sika ŋga pɩwɛɛ se palabɩnɩ tʋma ndɩ ndɩ wondu yɔ, nɛ liidiye wondu tɩŋa ndʋ pɩwɛɛ se palabɩnɩ tʋma ndɩ ndɩ yɔ, ti-yuŋ yɔɔ;
15 pɩlɩɩnɩ ɖɔɖɔ sika kanɖʋnaa ɖɩzɩyɛ+ nɛ pe-sika kanɖʋnaa yuŋ yɔɔ, kanɖʋnaa ɖɩzɩyɛ ndɩ ndɩ nɛ pa-kanɖʋnaa yuŋ yɔɔ, nɛ liidiye kanɖʋnaa ɖɩzɩyɛ yuŋ yɔɔ; pɩlɩɣnɩ tʋmɩyɛ nɖɩ palakɩnɩ paa kanɖʋnaa ɖɩzɩyɛ nɖɩ nɛ ɖɩ-kanɖʋnaa yɔ ɖɩ-cɔlɔ;
16 pɩlɩɩnɩ ɖɔɖɔ sika ŋga palakɩnɩ taabɩlɩnaa mba pɔ-yɔɔ pasɩɣ kpɔnɔnaa mba patɩnɩɣ-wɛ ɖama yɔɔ yɔ*+ ko-yuŋ yɔɔ, paa taabɩlɩ ŋgʋ lɛ, ki-sika yuŋ yɔɔ, pɩkpɛndɩnɩ liidiye nɖɩ pɩwɛɛ se palabɩnɩ liidiye taabɩlɩnaa yɔ ɖi-yuŋ yɔɔ,
17 kela lɔɔyɩsɩ, ñanzɩ kulam ñɩnzɩ, sika kele kele ñɩŋga peeɣsi po-yuŋ yɔɔ, nɛ sika ñanzɩ cikpesi kulam ñɩnzɩ+ yuŋ yɔɔ, paa ñanaɣ cikpelaɣ kulam ñɩŋga ŋga lɛ ko-yuŋ yɔɔ, nɛ liidiye ñanzɩ cikpesi kulam ñɩnzɩ yuŋ yɔɔ, paa ñanaɣ cikpelaɣ kulam ñɩŋga ŋga lɛ ko-yuŋ yɔɔ.
18 Ɛcɛlɩ ɖɔɖɔ sika kele kele ñɩŋga* yuŋ, ŋga pɩwɛɛ se pakpaɣ nɛ palabɩnɩ ŋgee tɩlaaɖɩ altaaru+ nɛ mbʋ pɩsɩŋnɩ kɛɛkɛɛ yɔ,+ pʋ-tɔbʋʋ se sika kerebimwaa+ mba poposi pe-keŋ nɛ pihuuzi Yehowa ɛgbɛyɛ ɖʋʋ aɖakaɣ yɔɔ yɔ.
19 Daviid yɔɔdɩ se: «Yehowa nesi kaawɛ mɔ-yɔɔ, nɛ ɛha-m lɛɣtʋ se mama ɛzɩma pɩwɛɛ se ɖɩɣa ŋga kɛwɛɛ yɔ pɩ-tɛ anjaʋ+ wɛtʋ tete.»+
20 Nɛ Daviid heyi ɛ-pɩyalʋ Salomɔɔ se: «Wɛɛ abalɩtʋ nɛ ŋwɛɛ ɖoŋ nɛ ŋla tʋmɩyɛ. Sɔɔndʋ ɛtaakpa-ŋ nɛ taaseli, mbʋ pʋyɔɔ yɔ Yehowa Ɛsɔ, mɛ-Ɛsɔ, wɛ ñɔ-cɔlɔ.+ Ɛɛkaɣ-ŋ yebu nɛ ɛɛkaɣ-ŋ lɔʋ,+ ɛlɛ ɛkaɣ wɛʋ ñɔ-cɔlɔ nɛ pɩkɔɔ pɩtalɩ alɩwaatʋ ndʋ Yehowa ɖɩɣa tʋma kpeekpe tɛma yɔ.
21 Nɛ cɔjɔnaa+ nɛ Leevi mba+ tindima wena akaɣ labʋ Ɛsɔ toovenim tʋ ɖɩɣa tʋma kpeekpe yɔ ana yɔ. Ŋwɛnɩ tʋmlaɖaa mba petisiɣ faaa nɛ pɛwɛ niye yɔ se pala paa tʋmɩyɛ nɖɩ,+ pɩkpɛndɩnɩ awumbiya+ nɛ samaɣ kpeekpe, mba pakaɣ ɖɔm ñɔ-tɔm kpeekpe yɔɔ yɔ.»
Pɩ-tɛɛ tɔm
^ Piye piye, «Ŋŋkaɣ maʋ ma-hɩɖɛ ɖɩɣa.»
^ Yaa «nɛ laŋɩyɛ nɖɩ ɖɩñɔnɩ-ɩ kiya.»
^ Yaa «nɛ kalɩzaɣ ŋga ka-taa wɛ leleŋ yɔ.»
^ Cɔnɩ Tɔm pee sɔsɔna tɔbʋʋ lɩzʋʋ.
^ Yaa «ceɣu sulaɣ ɖɩɣa; kɩwɛɛkɩm yɔɔ huuzuu sulaɣ ɖɩɣa.»
^ Yaa «wondu ndʋ paha Ɛsɔ yɔ.»
^ Pʋ-tɔbʋʋ se Ɛsɔ ɛsɩndaa kpɔnɔnaa.
^ Ebree tɔm piye nɖɩ palabɩnɩ tʋmɩyɛ yɔ, ye pɛɖɛzɩ-ɖɩ piye piye yɔ, ɖɩwɩlɩɣ ɛzɩma paɖʋʋ ñɩɣyʋʋ miŋ taa se kiyoli nɛ palɩzɩ kɩ-azuluma nɛ kɩwɛɛ cɩɖɩ cɩɖɩ yɔ.
