Kɔrɛntɩ mba takayaɣ naalɛ ñɩŋga 5:1-21
5 Mbʋ pʋyɔɔ yɔ ɖɩsɩm mbʋ se ye ɖa-ɖɩɣa ŋga kɛwɛ tɛtʋ yɔɔ yɔ, kizinziku kʋnɛ, pɔyɔkɩ-kʋ yɔ,*+ ɖɩwɛɣnɩ kuduyuu nakʋyʋ ŋgʋ kɩlɩnɩ Ɛsɔ cɔlɔ yɔ, ɖɩɣa ŋga patɩma-kɛ nɛ nesi yɔ,+ ŋga kɛwɛɣ ɛsɔdaa tam yɔ.
2 Mbʋ pʋyɔɔ yɔ toovenim taa lɛ, ɖɩwɛɛ nɛ ɖimuzuu ɖɩɣa* kanɛ ka-taa, nɛ ɖe-liu wɛɛ pɩŋŋ se ɖɩkpaɣ ŋga pɔñɔɔzaa nɛ pasɩɩ-ɖʋ yɔ nɛ ɖisuu, ŋga kalɩnɩ ɛsɔdaa yɔ,+
3 se pɩsa nɛ alɩwaatʋ ndʋ ɖisuu-kɛ yɔ, pataana-ɖʋ ndaakpeɖe.
4 Toovenim taa lɛ, ɖa mba ɖɩwɛ kizinziku kʋnɛ kɩ-tɛɛ yɔ, ɖimuzuu nɛ pɩnɩɣ-ɖʋ; mbʋ pʋyɔɔ yɔ ɖɩtɩsɔɔlɩ se ɖɩhɔzɩ kʋnɛ yɔ, ɛlɛ ɖɩsɔɔlaa se ɖɩtɩnɩ lɛɛkʋ kɩ-yɔɔ,+ se pɩsa nɛ wezuu li mbʋ pɩsɩkɩ yɔ.+
5 Nɛ weyi ɛñɔɔzɩ-ɖʋ wezuu ŋgʋ yɔ, ɛnʋ lɛ Ɛsɔ;+ ɛnʋ hanɩ-ɖʋ fezuu se pɩkɛ mbʋ pɩkɔŋnɩ ɛsɩndaa yɔ pɩ-yʋsaɣ.+
6 Pʋyɔɔ paa ɛzɩmtaa lɛ, ɖɩwɛ abalɩtʋ siŋŋ nɛ ɖɩnawa se alɩwaatʋ ndʋ ɖɩkpɛndɩ ɖɩwɛnɩ ɖo-tomnaɣ yɔ,* ɖiposini Kɩbaɣlʋ;+
7 mbʋ pʋyɔɔ yɔ ɖɩɖɔŋnɩ tisuu, ɖɩɩɖɔŋnɩ mbʋ pɩnaɣ yɔ.
8 Ɛlɛ ɖɩwɛ abalɩtʋ siŋŋ, nɛ pɩkɩlɩ-ɖʋ ɖeu se ɖiposini tomnaɣ nɛ ɖɩwɛɛ Kɩbaɣlʋ cɔlɔ.+
9 Mbʋ yebina nɛ paa ɖɩwɛ ɛ-cɔlɔ yaa ɖiposini-i yɔ, ɖa-kaɖʋwa lɛ se ɖɔ-tɔm ɛkɛdɩnɩ-ɩ.
10 Mbʋ pʋyɔɔ yɔ pɩwɛɛ se ɖa-tɩŋa ɖɩsɩŋ Krɩstʋ tɔm ɖɩhʋyɛ ɛsɩndaa, nɛ pɩsa nɛ pɛhɛyɩ paa weyi lakasɩ nzɩ ɛlaba alɩwaatʋ ndʋ ɛɛwɛ tomnaɣ taa yɔ sɩ-yɔɔ, paa sɩkɛ kɩbanzɩ yaa kɩdɛkɛdɩsɩ yɔ.+
11 Ðɩtɩlɩ Kɩbaɣlʋ sɔɔndʋ seu, pʋyɔɔ lɛ ɖɩwɛɛ nɛ ɖiseɣtiɣ ɛyaa; ɛlɛ Ɛsɔ sɩm-ɖʋ camɩyɛ. Paa mbʋ yɔ, mantaɣ liu se mɩ-ɛhʋyɛ sɩnɩ-mɩ nɛ ɩtɩlɩ-ɖʋ camɩyɛ ɖɔɖɔ.
12 Ðɩɩɖaɣnɩɣ ɖa-tɩ sam mɩ-cɔlɔ, ɛlɛ ɖiseɣtiɣ-mɩ se ɩkʋndɩ ɖɔ-yɔɔ nɛ ɩpɩzɩ nɛ icosi mba pakʋndʋʋ mbʋ pɩnaɣ ɛsa yɔɔ yem yɔ pɩ-yɔɔ,+ ɛlɛ paakʋndʋʋ mbʋ pɩwɛ laŋɩyɛ taa yɔ pɩ-yɔɔ yɔ.
13 Mbʋ pʋyɔɔ yɔ ye ɖa-ñʋŋ taa ɩcɔwa yɔ,+ Ɛsɔ yɔɔ pɩwɛ mbʋ; ye ɖa-maɣzɩm ɛwɛ ɖeyi ɖeyi yɔ, mɩ-yɔɔ yɔɔ pɩwɛ mbʋ.
14 Mbʋ pʋyɔɔ yɔ sɔɔlɩm mbʋ Krɩstʋ wɛna yɔ piseɣtiɣ-ɖʋ, mbʋ pʋyɔɔ yɔ tɔm tʋnɛ tɩ-yɔɔ ɖitisiɣ: ɛyʋ kʋɖʋm sɩbɩ ɛyaa tɩŋa yɔɔ;+ mbʋ pʋyɔɔ yɔ, ɛyaa tɩŋa kaasɩba.
15 Nɛ ɛsɩbɩ ɛyaa tɩŋa yɔɔ se pɩsa nɛ mba pɛwɛ wezuu yɔ, pataatasɩ caɣʋ wezuu pa-tɩ yɔɔ;+ ɛlɛ pacaɣ-kʋ weyi ɛsɩbɩ pɔ-yɔɔ nɛ pefezi-i yɔ ɛ-yɔɔ.
16 Pʋyɔɔ lɛ, kpaɣnɩ lɛɛlɛɛyɔ lɛ, ɖɩɩsɩŋ nɔɔyʋ tomnaɣ yɔɔ.+ Paa ɖɩɩsɩm Krɩstʋ tomnaɣ yɔɔ nɛ pɩɖɛɛ yɔ, toovenim taa lɛ, ɖɩɩtasɩɣ-ɩ sɩm mbʋ.+
17 Pʋyɔɔ lɛ, ye nɔɔyʋ nɛ Krɩstʋ pɛwɛ nɔɔ kʋɖʋmaɣ yɔ, ɛkɛ wonuu kɩlɩzʋʋ kɩfalʋʋ;+ wondu kɩbɩndʋ ɖɛwa; ɩna, wondu kɩfatʋ lɩwa.
18 Ɛlɛ pɩtɩŋa payɩ pɩlɩnɩ Ɛsɔ cɔlɔ, ɛnʋ weyi ɛtɩŋnɩ Krɩstʋ yɔɔ nɛ eyele se ɖa nɛ ɩ ɖiceɣ,+ nɛ ɛcɛlɩ-ɖʋ ceɣu tʋmɩyɛ yɔ,+
19 pʋ-tɔbʋʋ se Ɛsɔ tɩŋaɣnɩ Krɩstʋ yɔɔ nɛ ɛ nɛ ɛjaɖɛ peceɣu;+ nɛ ɛtaatasɩɣ kpaɣʋ pa-kɩwɛɛkɩm nɛ ɛlakɩnɩ tʋmɩyɛ,+ nɛ ɛɖʋzɩ ɖe-nesi tɛɛ ceɣu tɔm.+
20 Pʋyɔɔ lɛ, ɖɩkɛ Ɛsɔ lone taa caɣyaa+ mba palakɩ Krɩstʋ+ tʋmɩyɛ yɔ,* nɛ pɩwɛ ɛzɩ Ɛsɔ wɛɛ nɛ ɛtɩŋɩɣnɩ ɖɔ-yɔɔ nɛ etendiɣ ɛyaa yɔ. Krɩstʋ lone taa lɛ, ɖitendiɣ ɛyaa se: «Iyele nɛ mɩ nɛ Ɛsɔ iceɣ.»
21 Weyi ɛtɩtɩlɩ kɩwɛɛkɩm yɔ,+ ɛpɩsɩ-ɩ kɩwɛɛkɩm* ɖɔ-yɔɔ, se pɩsa nɛ pɩtɩŋnɩ ɛ-yɔɔ lɛ, ɖɩpɩsɩ siɣsiɣ tɩnaa Ɛsɔ ɛsɩndaa.+
Pɩ-tɛɛ tɔm
^ Yaa «kɩyɔlaa yɔ.»
^ Yaa «ɖɩjaɣyɛ.»
^ Piye piye, «ɖɩwɛnɩ ɖa-ɖɩɣa tomnaɣ taa yɔ.»
^ Piye piye, «ɖɩkɛ lone taa caɣyaa Krɩstʋ lone taa.»
^ Yaa «kɩwɛɛkɩm kɩlaʋ.»
