Samɩyɛɛlɩ takayaɣ naalɛ ñɩŋga 1:1-27
1 Sɔɔlɩ sɩm wayɩ, Daviid wabɩ* Amalɛɛkɩ mba nɛ ɛpɩsɩ lɛ, ɛcaɣ kɩyakɩŋ 2 Zikɩlaagɩ.+
2 Kɩyakʋ 3 ñɩŋgʋ wiye lɛ, abalʋ nɔɔyʋ lɩɩnɩ Sɔɔlɩ sɔɔjanaa ɖigbeɣliye* taa nɛ ɛkɔɔ. E-tokonaa cɩyaa nɛ tɛtʋ wɛ ɛ-ñʋʋ taa. Ɛñɔtɩnɩ Daviid lɛ, eluŋ tataa nɛ ɛpa ɛ-ɛsa nɛ tɛtʋ.
3 Daviid pɔzɩ-ɩ se: «Le ŋlɩnaa?» Ɛlɛ cosi se: «Malɩnɩ Izrayɛɛlɩ ɖigbeɣliye* taa nɛ mense.»
4 Daviid pɔzɩ-ɩ se: «Ɛzɩma pɩɖɔma? Mentendi-ŋ heyi-m.» Peeɖe ɛlɛ yɔɔdaa se: «Ɛyaa lɩ you taa nɛ pese, nɛ sakɩyɛ sɩba. Halɩ Sɔɔlɩ nɛ ɛ-pɩyalʋ Yonataanɩ pasɩba.»+
5 Nɛ Daviid pɔzɩ evebu weyi ɛkɔm nɛ eheyiɣ-i tɔm yɔ se: «Ɛzɩma ŋlaba nɛ ŋna se Sɔɔlɩ nɛ ɛ-pɩyalʋ Yonataanɩ pasɩba?»
6 Evebu ɛnʋ ecosi-i se: «Pɩtʋʋzɩnɩ kɩtʋʋzɩnʋʋ se maawɛ Gilibowa+ Pʋʋ yɔɔ, nɛ Sɔɔlɩ kaawɛ peeɖe nɛ ɛñɩɣ ɛ-kɩgbɛzɛŋ yɔɔ, nɛ kɛɛkɛɛnaa nɛ kpaŋnaŋ yɔɔ caɣyaa pɔñɔtɩnɩ-ɩ kpam.+
7 Ɛkɛzɩ ɛ-tɩ nɛ ɛna-m lɛ, ɛya-m, nɛ moncosi se: “Ma yɔ!”
8 Ɛpɔzɩ-m se: “Ña yɔ anɩ?” Moncosi se: “Mɛnkɛ Amalɛɛkɩ tʋ.”+
9 Peeɖe eheyi-m se: “Mentendi-ŋ, ñɔtɩnɩ-m nɛ ŋkʋ-m, mbʋ pʋyɔɔ yɔ mɛwɛɛ nɛ manɩɣ siziŋ siŋŋ, ɛlɛ mɛnkpɛndɩ mɛwɛnɩ mɛ-ɛsa.”*
10 Ðɩnɛ ɛlɛ mɔñɔtɩnɩ-ɩ nɛ mankʋ-ɩ,+ mbʋ pʋyɔɔ yɔ manawa se ɛzɩma paaɖʋ-ɩ heŋ siŋŋ nɛ ɛtɔlɩ yɔ, ɛtaapɩzɩɣ se ɛwɛɛ wezuu. Nɛ mankpaɣ awiya hulaɣ* ŋga kaawɛ ɛ-ñʋʋ taa yɔ nɛ kpayaɣ ŋga kaawɛ e-nesi yɔɔ yɔ, nɛ mɔnkɔnɩ-wɛ cɩnɛ man-kɩbaɣlʋ.»
11 Peeɖe Daviid ɖɔkɩ e-tokonaa nɛ ɛcɩyɩ-wɛ, nɛ ɛyaa mba paawɛ ɛ-cɔlɔ yɔ, pa-tɩŋa pala ɖɔɖɔ mbʋ.
12 Nɛ pacaɣ kʋñɔwiye nɛ pewii nɛ pɔhɔkɩ nɔɔ+ nɛ ɖanaɣ kɔɔ nɛ kaɖanɩ, Sɔɔlɩ yɔɔ, ɛ-pɩyalʋ Yonataanɩ yɔɔ, Yehowa samaɣ yɔɔ, nɛ Izrayɛɛlɩ ɖɩɣa yɔɔ,+ mbʋ pʋyɔɔ yɔ pakʋ-wɛ nɛ laɣɖɛ.
13 Daviid pɔzɩ evebu weyi ɛkɔm nɛ eheyi-i tɔm ndʋ yɔ se: «Le ŋlɩnaa?» Ɛlɛ cosi se: «Mɛnkɛ Amalɛɛkɩ tʋ, ɛgɔm nɔɔyʋ pɩyalʋ.»
14 Nɛ Daviid pɔzɩ-ɩ se: «Ɛbɛ yɔɔ sɔɔndʋ tɩkpa-ŋ se ŋkpazɩ ñe-nesi nɛ ŋkʋ Yehowa tɛ patam num?»+
15 Peeɖe Daviid ya e-evebiya taa evebu nɔɔyʋ nɛ eheyi-i se: «Ñɔtɩnɩ-ɩ nɛ ŋkʋ-ɩ.» Nɛ ɛlɛ kʋ-ɩ.+
16 Daviid heyi-i se: «Ña-calɩm wɛ ña-maɣmaɣ ña-ñʋʋ taa, mbʋ pʋyɔɔ yɔ ña-maɣmaɣ ñɔ-nɔɔ lɩnɩ ña-wayɩ nɛ kɔyɔɔdɩ se: “Ma-maɣmaɣ mankʋnɩ Yehowa tɛ patam num.”»+
17 Nɛ Daviid tee kʋñɔwiye hendu tʋnɛ Sɔɔlɩ nɛ ɛ-pɩyalʋ Yonataanɩ pɔ-yɔɔ+
18 nɛ ɛyɔɔdɩ se pɩwɛɛ se pawɩlɩ Yuuda samaɣ kʋñɔwiye hendu ndʋ. Paya-tʋ se «Tɔʋ» nɛ pama-tʋ Yasaarɩ takayaɣ taa:+
19 «Hayɩ Izrayɛɛlɩ, mba pa-hɩla sɛwa yɔ, pakʋ-wɛ ño-lona kʋkʋya yɔɔ.+
Na ɛzɩma ɖoŋ tɩnaa tɔlaa yɔ!
20 Ɩtaayɔɔdɩ-tʋ Gaatɩ taa;+Itaasusi-tʋ Askelɔɔnɩ habɛɛ yɔɔ,Pɩtɩkɛ mbʋ yɔ, Filistii mba pɛlaa taa kaɣ labʋ leleŋ,Pɩtɩkɛ mbʋ yɔ, kɩdɩbɛlɩŋ pɛlaa kaɣ mɛyʋʋ amɛya.
21 Gilibowa pʋŋ mɩ,+Ðoluu yaa tɛʋ ɛtaanɩɩ mɩ-yɔɔ,Nɛ hayɩm mbʋ pɩwɛ mɩ-yɔɔ yɔ pɩtaalʋlɩ haɖɛ kiɖeɖeye,+Mbʋ pʋyɔɔ yɔ peeɖe pepisi ɖoŋ tɩnaa kpayʋʋ,Paatasɩɣ Sɔɔlɩ kpayʋʋ num taʋ.
22 Yonataanɩ tɔʋ taayeki pɩyʋʋ+Mba pakʋ-wɛ yɔ pa-calɩm nɛ ɖoŋ tɩnaa num,Nɛ Sɔɔlɩ laɣɖɛ taapɩsɩɣ nɛ ɖɩtɩwa.+
23 Sɔɔlɩ nɛ Yonataanɩ,+ pɛkɛ ɛyaa kʋsɔɔlaa nɛ pɔ-tɔm kɛdɩnɩ lalaa pe-wezuu caɣʋ taa,Nɛ sɩm tɩtayɩ pɛ-hɛkʋ taa.+
Paawɛ lɛɛ lɛɛ nɛ pɩkpaɖɩ kpeliŋ,*+Nɛ pɛwɛɛ ɖoŋ nɛ pɩkpaɖɩ mʋʋzɩŋ.+
24 Hayɩ Izrayɛɛlɩ pɛlaa, iwii Sɔɔlɩ yɔɔ,Ɛnʋ weyi esuwaɣ-mɩ wondu kɩsɛɛmtʋ cɩɩɩ nɛ wondu kɩbandʋ yɔ,Ɛnʋ weyi ɛɖʋwaɣ sika ajana wondu mi-wondu kususutu yɔɔ yɔ.
25 Ɩna ɛzɩma ɖoŋ tɩnaa tɔlɩ you taa yɔ!
Yonataanɩ sɩbɩ mi-lona kʋkʋya yɔɔ!+
26 Manɩɣ siziŋ siŋŋ ñɔ-yɔɔ, mon-koobu Yonataanɩ;Ŋŋkɛ-m ɛyʋ kʋsɔɔlʋ.+
Sɔɔlɩm mbʋ ŋŋwɛnɩ mɔ-yɔɔ yɔ pɩwɛ ɖeu siŋŋ nɛ pɩkpaɖɩ halaa sɔɔlɩm.+
27 Ɩna ɛzɩma ɖoŋ tɩnaa tɔlaaNɛ you wondu mʋʋ yɔ!»
Pɩ-tɛɛ tɔm
^ Yaa «kʋ.»
^ Yaa «maalika.»
^ Yaa «maalika.»
^ Yaa «mbʋ pʋyɔɔ yɔ man-kalɩzaɣ tɩŋa kpɛndɩ kɛwɛ man-taa.»
^ Yaa «awiya hulaɣ ŋga kɔ-yɔɔ wɛ ñɩɣlɩm pɛɛ yɔ.»
^ Yaa «keziyewaa.»