Samɩyɛɛlɩ takayaɣ naalɛ ñɩŋga 11:1-27
11 Pɩnaɣ ɖɩbazɩyɛ,* alɩwaatʋ ndʋ tɩ-taa awiya woki yoŋ yɔ tɩ-taa lɛ, Daviid tiyi Yowaabʋ nɛ ɛ-lɩmɖʋyaa nɛ Izrayɛɛlɩ sɔɔjanaa kpeekpe se powolo nɛ paɖɩzɩ Amooni mba; nɛ powolo nɛ pɛñɛyɩ Raba.+ Alɩwaatʋ ndʋ lɛ, Daviid caɣ Yeruzalɛm.+
2 Ðanaɣ nakɛyɛ* lɛ, Daviid kʋyɩnɩ ɛ-kaɖʋ yɔɔ nɛ ɛɖɔŋ e-kewiyaɣ ɖɩɣa ñʋʋ taa. Ɛwɛ ɖɩɣa ñʋʋ taa peeɖe lɛ, ɛna halʋ nɔɔyʋ sɔwaɣ lɩm, nɛ halʋ ɛnʋ eeɖe pɩdɩɩfɛyɩ.
3 Daviid tiyi nɔɔyʋ se ɛpɔzɩ nɛ ɛna se anɩ halʋ ɛnʋ ɛkɛnaa, nɛ ɛlɛ kɔɔ nɛ eheyi-i se: «Payaɣ-ɩ se Bat-Seeba,+ ɛkɛ Eliyam pɛlɛ,+ nɛ Hɛɛtɩ tʋ+ Uriya+ halʋ lɛ.»
4 Nɛ Daviid tiyi ɛyaa se powolo nɛ pɔkɔnɩ-ɩ.+ Nɛ ɛlɛ kɔɔ ɛ-cɔlɔ, nɛ Daviid sʋʋnɩ-ɩ.+ (Pɩlabɩ mbʋ alɩwaatʋ ndʋ Bat-Seeba kaawɛɛ nɛ ɛñalɩɣ ɛ-tɩ se ɛwɛɛ kele kele ɛ-azuluma yɔɔ yɔ.*)+ Pʋwayɩ lɛ, Bat-Seeba pɩsɩ ɛ-ɖɩɣa taa.
5 Bat-Seeba haɣ hoɣa, nɛ etiyi se peheyi Daviid se: «Ma nɛ hoɣa.»
6 Ðɩnɛ ɛlɛ, Daviid tiyi se peheyi Yowaabʋ se: «Tiyini-m Hɛɛtɩ tʋ Uriya.» Peeɖe Yowaabʋ tiyini Uriya Daviid.
7 Uriya kɔm Daviid cɔlɔ lɛ, Daviid pɔzɩ-ɩ Yowaabʋ nɛ sɔɔjanaa pɔ-yɔɔ, nɛ ɛzɩma piɖiɣni ɖɔm you taa yɔ.
8 Nɛ Daviid heyi Uriya se: «Tii ña-ɖɩɣa taa nɛ ŋhɛzɩ.»* Uriya lɩ wiyaʋ ɖɩɣa taa lɛ, wiyaʋ tiyini-i camɩyɛ lakasɩ kʋjɔʋ.*
9 Ɛlɛ Uriya hɩnɩ wiyaʋ ɖɩɣa nɔnɔɔ taa, ɛ nɛ ɛ-kɩbaɣlʋ lɩmɖʋyaa lalaa tɩŋa, nɛ etitii ɛ-maɣmaɣ ɛ-ɖɩɣa taa.
10 Nɛ powolo peheyi Daviid se: «Uriya titii ɛ-ɖɩɣa taa.» Peeɖe Daviid pɔzɩ Uriya se: «Pɩtɩkɛ nʋmɔʋ ŋtɩɩlɩnaa nɛ ŋtalɩ yaa we? Ɛbɛ yɔɔ ŋtitii ña-ɖɩɣa taa?»
11 Uriya cosi Daviid se: «Aɖakaɣ+ nɛ Izrayɛɛlɩ nɛ Yuuda ɛyaa pɛwɛ kizinzikiŋ tɛɛ, nɛ man-kɩbaɣlʋ Yowaabʋ nɛ man-kɩbaɣlʋ lɩmɖʋyaa ñekpeɣli awayɩ ñɩtʋ taa. Nɛ ma mowokini man-ɖɩɣa taa se mɔntɔɔ nɛ mɔñɔɔ nɛ ma nɛ ma-halʋ ɖɩhɩnɩ yaa we?+ Ŋñɩtʋʋ nɛ ŋwɛɛ wezuu nɛ ŋfeziɣ yɔ,* maakaɣ labʋ mbʋ kpa!»
12 Peeɖe Daviid heyi Uriya se: «Caɣ cɩnɛ sɔnɔ ɖɔɖɔ, nɛ cee lɛ, mankaɣ-ŋ yebu nɛ ŋɖɛɛ.» Nɛ Uriya caɣ Yeruzalɛm kɩyakʋ ŋgʋ ki-wiye nɛ tɛʋ kifemuu.
13 Nɛ Daviid tiyi se payaa-ɩ nɛ ɛkɔɔ nɛ ɛ nɛ ɩ pɔtɔɔ nɛ pɔñɔɔ; nɛ Daviid yele nɛ sʋlʋm kʋ-ɩ. Ɛlɛ pɩkɔm ɖanaɣ yɔɔ lɛ, Uriya lɩɩ nɛ ɛhɩnɩ ɛ-kaɖʋ yɔɔ, ɛ nɛ ɛ-kɩbaɣlʋ lɩmɖʋyaa, nɛ etitii ɛ-ɖɩɣa taa.
14 Kifem tanaŋ tɛɛ lɛ, Daviid ma takayaɣ nɛ ɛcɛlɩ-kɛ Uriya se ɛlɛ ewoni-kɛ nɛ ɛcɛlɩ Yowaabʋ.
15 Ɛma takayaɣ ŋga ka-taa se: «Sɩɩ Uriya sɔɔjanaa mba pɛwɛ you ɛsɩndaa yɔ pa-taa, ɖenɖe you kpaɖɩ ɖoŋ yɔ. Nɛ ŋposi ña-tɩ nɛ ɩ, se pɩsa nɛ pakʋ-ɩ.»+
16 Yowaabʋ kaacɔnɩ camɩyɛ tɛtʋ ndʋ ɛwɛɛ nɛ eyouna yɔ, nɛ ɛsɩɩ Uriya ɖenɖe ɛnawa se sɔdɩŋ ɖoŋ tɩnaa kaawɛɛ yɔ.
17 Alɩwaatʋ ndʋ tɛtʋ ndʋ tɩ-taa ñɩma lɩwa nɛ poyooni Yowaabʋ lɛ, Daviid lɩmɖʋyaa nabɛyɛ sɩ, nɛ Hɛɛtɩ tʋ Uriya kaawɛ mba pasɩba yɔ, pa-taa.+
18 Nɛ Yowaabʋ tiyi nɛ pɛkɛdɩ Daviid mbʋ payɩ pɩlabɩ you ŋgʋ kɩ-taa yɔ.
19 Eheyi weyi etiyaa yɔ se: «Ŋtɛŋ heyuu wiyaʋ mbʋ payɩ pɩlabɩ you taa yɔ lɛ,
20 wiyaʋ pɩzɩɣ nɛ ɛkɔ pana nɛ ɛpɔzɩ-ŋ se: “Ɛbɛ yɔɔ pɩɩwɛɛ se ɩñɔtɩnɩ tɛtʋ kpam mbʋ se iyooni-tʋ? Ɩtaatɩlɩ se pakaɣ wɛʋ koloŋa yɔɔ nɛ pɔtɔ-mɩ ñɩma yaa we?
21 Akʋ Yerubesɛɛtɩ+ pɩyalʋ Abimelɛɛkɩ?+ Pɩtɩkɛ halʋ nɔɔyʋ kaawɛnɩ koloŋa yɔɔ nɛ ɛlɔ ɛ-yɔɔ pɩyɛ sɔsɔyɛ* nɛ piyele nɛ ɛlɛ sɩ Tebɛɛzɩ taa yaa we? Ɛbɛ yɔɔ pɩɩwɛɛ se ɩñɔtɩnɩ koloŋa kpam mbʋ?” Ðɩnɛ ɛlɛ ŋheyi-i se: “Ña-lɩmɖʋyʋ Hɛɛtɩ tʋ Uriya ɖɔɖɔ sɩba.”»
22 Peeɖe weyi petiyaa yɔ ewoba nɛ eheyi Daviid tɔm ndʋ payɩ Yowaabʋ tiyi-i se ewolo nɛ eheyi-i yɔ.
23 Nɛ weyi petiyaa yɔ eheyi Daviid se: «Pɛ-ɛyaa kɩlɩ-ɖʋ ɖoŋ, nɛ palɩɩ nɛ poyooni-ɖʋ lakʋ taa; ɛlɛ ɖɩpɩzaa nɛ ɖɩɖɔɔnɩ-wɛ nɛ ɖɩkɔɔ ɖɩtalɩ tɛtʋ nɔnɔɔ taa.
24 Nɛ tɔŋ tɔyaa kaawɛ koloŋa yɔɔ nɛ pɔtɔʋ ñɩma ña-lɩmɖʋyaa, nɛ wiyaʋ lɩmɖʋyaa taa nabɛyɛ sɩ; ña-lɩmɖʋyʋ Hɛɛtɩ tʋ Uriya ɖɔɖɔ sɩba.»+
25 Peeɖe Daviid heyi weyi petiyaa yɔ se: «Heyi Yowaabʋ tɔm tʋnɛ: “Tɔm ndʋ tɩtaacɛyɩ-ŋ, mbʋ pʋyɔɔ yɔ laɣɖɛ kʋʋ paa anɩ nɛ ɖɩɩsɔŋ nɔɔyʋ. Yooni tɛtʋ ndʋ siŋŋ nɛ ŋwabɩ-tʋ.”+ Ña yɔ, kpazɩ-ɩ ɖoŋ.»
26 Uriya halʋ nɩwa se ɛ-walʋ Uriya sɩba lɛ, ɛpaɣzɩ caɣʋ kʋñɔwiye ɛ-walʋ yɔɔ.
27 Kʋñɔwiye caɣʋ alɩwaatʋ tɩɩtɛma lɛ, Daviid tiyi nɛ pɔkɔnɩ-ɩ ɛ-ɖɩɣa taa, nɛ ɛpɩsɩ ɛ-halʋ+ nɛ ɛlʋlɩ-ɩ abalɩbɩɣa. Ɛlɛ mbʋ Daviid kaalaba yɔ pɩtɩkɛdɩnɩ Yehowa paa ññɩɩ.*+
Pɩ-tɛɛ tɔm
^ Pʋ-tɔbʋʋ se kpiziɣɖe alɩwaatʋ taa.
^ Yaa «Evemiye naɖɩyɛ, ɖanaɣ yɔɔ kpaagbaa.»
^ Pɩkɛɣnɩ e-fenaɣ naʋ tɛ azuluma.
^ Yaa «tiyini-i wiyaʋ ɖeɖe,» pʋ-tɔbʋʋ se tɔɔnaɣ ŋga ɖɩɣdʋ tiyaɣni ɛ-ɛgɔm weyi ɛcaɣ se ɛɖʋ-ɩ hɩɖɛ yɔ.
^ Piye piye, «nɛ ŋkɔ ña-nɩŋgbanzɩ lɩm.»
^ Yaa «nɛ ña-kalɩzaɣ wɛɛ wezuu yɔ.»
^ Yaa «nem sɔsɔ.» Cɔnɩ Tɔm pee sɔsɔna tɔbʋʋ lɩzʋʋ.
^ Piye piye, «pɩɩkɛ kɩdɛkɛdɩm Yehowa ɛsɩndaa.»
