Samɩyɛɛlɩ takayaɣ naalɛ ñɩŋga 16:1-23
16 Alɩwaatʋ ndʋ Daviid tɛzɩ pʋʋ ñʋʋ taa pazɩ lɛ,+ Mefiibosɛɛtɩ+ lɩmɖʋyʋ Ziba+ kaawɛ peeɖe nɛ ɛɖaŋɩ-ɩ, ɛkpɛndɩnɩ kpaŋasɩ 2, pasʋʋ-sɩ kpɔnɔnaa 200, viiñi pee kɩwɩlɛɛ kakayɩsɩ 100, soŋaɣ alɩwaatʋ taa tɩŋ pee* kakayɩsɩ 100, nɛ peeɣa sɔsɔɔ ŋga ka-taa nɛ vɛɛ yɔ.+
2 Nɛ wiyaʋ pɔzɩ Ziba se: «Ɛbɛ yɔɔ ŋkɔnɩ wondu ndʋ?» Ziba cosi se: «Wiyaʋ ɖɩɣa taa mba mɔnkɔnɩ kpaŋasɩ se pacaɣ sɩ-yɔɔ, mɔnkɔnɩ kpɔnɔnaa nɛ soŋaɣ alɩwaatʋ taa tɩŋ pee se pɛcɛlɩ evebiya nɛ pɔtɔɔ, nɛ mɔnkɔnɩ vɛɛ se mba pɩnɩɣ-wɛ kañɩmbusuu taa yɔ paañɔɔ.»+
3 Nɛ wiyaʋ pɔzɩ-ɩ se: «Nɛ ña-tʋ pɩyalʋ* Mefiibosɛɛtɩ ñɛwɛ le yɔ?»+ Peeɖe Ziba cosi wiyaʋ se: «Ɛcaɣ Yeruzalɛm, mbʋ pʋyɔɔ yɔ ɛyɔɔdaa se: “Sɔnɔ Izrayɛɛlɩ ɖɩɣa kaɣ-m pɩsɩnʋʋ man-caa kewiyitu.”»+
4 Nɛ wiyaʋ heyi Ziba se: «Na! Mbʋ payɩ Mefiibosɛɛtɩ tɩna yɔ, pɩpɩsɩ ña-pʋyʋ.»+ Ziba cosi se: «Moluŋuu ñɛ-ɛsɩndaa. Tɛtɛ nɛ mɔn-tɔm kɛdɩnɩ-ŋ, man-kɩbaɣlʋ wiyaʋ.»+
5 Wiyaʋ Daviid talɩ Bahurim lɛ, Sɔɔlɩ ɖɩɣa hɔʋ taa abalʋ nɔɔyʋ, Geera pɩyalʋ weyi payaɣ se Simeyii+ yɔ, ɛlɩɩ nɛ ɛlɔʋ nɔɔ kɩdɛkɛdaɣ nɛ ɛñɔtʋʋnɩ-ɩ.+
6 Ɛɛwɛɛ nɛ ɛtɔʋ pɛɛ Daviid nɛ Wiyaʋ Daviid lɩmɖʋyaa kpeekpe, pɩkpɛndɩnɩ samaɣ kpeekpe nɛ Daviid ɛyaa ɖoŋ tɩnaa mba paawɛ ɛ-nɩwaŋ yɔɔ nɛ ɛ-nɩmɩyɛ yɔɔ yɔ.
7 Simeyii lɔwaɣ nɔɔ kɩdɛkɛdaɣ nɛ ɛyɔɔdʋʋ se: «Lɩɩ, lɩɩ, calɩm kpɛdɩyʋ ña!* Kaawazaɣ ña!
8 Yehowa kpa-ŋ kɩmɩyɛ, mbʋ pʋyɔɔ yɔ ŋkpɛdɩ Sɔɔlɩ ɖɩɣa taa mba calɩm nɛ ŋmʋ e-kewiyaɣ. Ɛlɛ Yehowa ɖʋzʋʋ kewiyitu ña-pɩyalʋ Absalɔm nesi tɛɛ. Lɛɛlɛɛyɔ lɛ, asɛyʋʋ talɩ-ŋ mbʋ pʋyɔɔ yɔ ŋkɛ calɩm kpɛdɩyʋ!»*+
9 Peeɖe Zeruyaa+ pɩyalʋ Abisayii heyi wiyaʋ se: «Ɛbɛ yɔɔ haɣ kɩsɩbaɣ+ ŋga yɔ kɔlɔʋ nɔɔ kɩdɛkɛdaɣ man-kɩbaɣlʋ wiyaʋ yɔɔ?+ Mentendi-ŋ, ha-m nʋmɔʋ nɛ mowolo mɛnsɛtɩ ɛ-ñʋʋ.»+
10 Ɛlɛ wiyaʋ yɔɔdɩ se: «Ma nɛ mɩ suwe, Zeruyaa pɩyalaa?+ Iyebi-i nɛ ɛlɔ nɔɔ kɩdɛkɛdaɣ mɔ-yɔɔ,+ mbʋ pʋyɔɔ yɔ Yehowa heyini-i se:+ “Lɔ nɔɔ kɩdɛkɛdaɣ Daviid yɔɔ!” Pʋyɔɔ lɛ, apɩzɩɣ nɛ ɛyɔɔdɩ se: “Ɛbɛ yɔɔ ŋlakɩ mbʋ?”»
11 Nɛ Daviid heyi Abisayii nɛ ɛ-lɩmɖʋyaa tɩŋa se: «Ɩna, ma-maɣmaɣ man-pɩyalʋ, weyi ɛlɩnɩ ma-maɣmaɣ man-taa yɔ, ɛwɛɛ nɛ ɛñɩnɩɣ se ɛlɩzɩ me-wezuu,*+ nɛ pɩcandɩnɩ Bɛnjamɛɛ tʋ na!+ Iyebi-i nɛ ɛlɔ mɔ-yɔɔ nɔɔ kɩdɛkɛdaɣ, mbʋ pʋyɔɔ yɔ Yehowa heyini-i se ɛla mbʋ!
12 Pʋtɔma yɔ Yehowa kaɣ naʋ man-kʋñɔŋ,+ nɛ Yehowa kaɣ-m pɩsɩnʋʋ kɩbandʋ, nɔɔ kɩdɛkɛdaɣ ŋga pɔlɔ mɔ-yɔɔ sɔnɔ yɔ ko-lone taa.»+
13 Nɛ Daviid nɛ ɛ-ɛyaa powolo pa-nʋmɔʋ ɖɔm yɔɔ nɛ petiki, alɩwaatʋ ndʋ lɛ, Simeyii kaawɛɛ nɛ ɛɖɔŋ pʋʋ kpɛŋa yɔɔ, ɛlɔʋ nɔɔ kɩdɛkɛdaɣ+ nɛ ɛtɔʋ pɛɛ nɛ ɛmɩzɩɣ mʋzʋʋ sakɩyɛ.
14 Nɛ wiyaʋ nɛ ɛyaa samaɣ ŋga kaawɛ ɛ-cɔlɔ yɔ, pɔkɔɔ nɛ patalɩ ɖenɖe powokaɣ yɔ, pɩɩnɩ-wɛ siŋŋ, nɛ pɛhɛzɩ.
15 Alɩwaatʋ ndʋ lɛ, Absalɔm nɛ Izrayɛɛlɩ ɛyaa kpeekpe patalɩ Yeruzalɛm; nɛ Ahitofɛɛlɩ+ kaawɛ ɛ-cɔlɔ.
16 Alɩwaatʋ ndʋ Arki tʋ+ Usaayii,+ Daviid taabalʋ* kɔm nɛ ɛsʋʋ Absalɔm cɔlɔ lɛ, Usaayii heyi Absalɔm se: «Wiyaʋ wezuu ɛɖaɣlɩ!+ Wiyaʋ wezuu ɛɖaɣlɩ!»
17 Peeɖe Absalɔm pɔzɩ Usaayii se: «Sɔɔlɩm siɣsiɣ ñɩmbʋ mbʋ ŋwɛnɩ ña-taabalʋ yɔɔ yɔ, mbʋ lɛ? Pɩlabɩ ɛzɩma nɛ ŋtɩtɩŋ ña-taabalʋ?»
18 Nɛ Usaayii cosi Absalɔm se: «Aayɩ, mɛwɛ weyi Yehowa nɛ samaɣ kanɛ, nɛ Izrayɛɛlɩ ɛyaa kpeekpe lɩzaa yɔ ɛ-hɔɔlʋʋ yɔɔ. Mankaɣ caɣʋ ɛ-cɔlɔ.
19 Nɛ mantasɩɣ yɔɔdʋʋ nɛ mɛlɛlɩ se: Anɩ pɩpɔzʋʋ se manɖʋ lɩm? Pɩtɩkɛ ɛ-pɩyalʋ? Ɛzɩ manɖʋʋ lɩm ña-caa yɔ, mbʋ ɖɔɖɔ mankaɣ-ŋ ɖʋʋ lɩm.»+
20 Pʋwayɩ lɛ, Absalɔm heyi Ahitofɛɛlɩ se: «Tasɩ-m lɔŋ.+ Ɛbɛ pɩwɛɛ se ɖɩla?»
21 Peeɖe Ahitofɛɛlɩ heyi Absalɔm se: «Sʋʋnɩ ña-caa ɖaŋnaa,+ mba eyebini wayɩ se pɔcɔnɩ ɖɩɣa* yɔɔ yɔ.+ Ðɩnɛ ɛlɛ Izrayɛɛlɩ kpeekpe kaɣ nɩʋ se ŋpɩsɩ ña-tɩ mbʋ pɩlɩɣ sɔŋ siŋŋ yɔ ña-caa mɔɔŋ tɛɛ, nɛ mba patɩnɩɣ ñɔ-yɔɔ yɔ pɩkaɣ-wɛ kpazʋʋ ɖoŋ.»
22 Peeɖe pesiɣ Absalɔm kizinziku, kuduyuu ñʋʋ taa,+ nɛ Absalɔm sʋʋnɩ ɛ-caa ɖaŋnaa+ Izrayɛɛlɩ kpeekpe ɛsɩndaa.+
23 Alɩwaatʋ ndʋ tɩ-taa, pakpakaɣ Ahitofɛɛlɩ+ lɔŋ tasʋʋ ɛzɩ tɔm ndʋ tɩlɩnɩ Ɛsɔ toovenim tʋ cɔlɔ yɔ.* Mbʋ Daviid nɛ Absalɔm pakpakaɣ lɔŋ weyi payɩ Ahitofɛɛlɩ tasaɣ yɔ.
Pɩ-tɛɛ tɔm
^ Kɔzɩ kɔzɩ fiigi pee nɛ pʋtɔma ɖɔɖɔ yɔ daatɩ pee.
^ Yaa «sayɩ.»
^ Yaa «ña weyi ŋɖɔ calɩm kpɛdʋʋ wɛɛ yɔ.»
^ Yaa «ŋkɛ weyi ɛɖɔ calɩm kpɛdʋʋ wɛɛ yɔ.»
^ Yaa «man-kalɩzaɣ.»
^ Yaa «weyi Daviid taɣ liu yɔ.»
^ Yaa «awiya ɖɩɣa.»
^ Yaa «ɛzɩ ɛyʋ pɔzʋʋ tɔm Ɛsɔ toovenim tʋ yɔ.»
