Samɩyɛɛlɩ takayaɣ naalɛ ñɩŋga 19:1-43
19 Powolo nɛ peheyi Yowaabʋ se: «Wiyaʋ wɛɛ nɛ ewiɣ nɛ ɛwɛɛ kʋñɔwiye taa Absalɔm yɔɔ.»+
2 Nɛ kɩyakʋ ŋgʋ ki-wiye, wabɩtʋ* pɩsɩ kʋñɔwiye samaɣ kpeekpe, mbʋ pʋyɔɔ yɔ kanɩwa se wiyaʋ kaawɛ ɛsɩñɩŋɩyɛ taa ɛ-pɩyalʋ yɔɔ.
3 Nɛ samaɣ pɩsɩ tɛtʋ taa+ tamɩyɛ evemiye nɖɩ ɛzɩ ɛyaa mba fɛyɛ kpa-wɛ mbʋ pʋyɔɔ yɔ pese you taa nɛ papɩsɩ yɔ.
4 Wiyaʋ huuzi ɛ-ɛsɩndaa nɛ ɛwɛɛ wiu yɔɔ nɛ nɔɔ kɩkʋyaɣ nɛ ɛyɔɔdʋʋ se: «Man-pɩyalʋ Absalɔm! Absalɔm man-pɩyalʋ, man-pɩyalʋ!»+
5 Ðɩnɛ ɛlɛ, Yowaabʋ sʋʋ wiyaʋ cɔlɔ ɖɩɣa taa nɛ eheyi-i se: «Sɔnɔ ŋɖʋ fɛyɛ ña-lɩmɖʋyaa kpeekpe mba payabɩ ñe-wezuu* nɛ ña-pɩyalaa,+ ñɛ-pɛlaa,+ ña-halaa, nɛ ña-ɖaŋnaa+ weziŋ* yɔ.
6 Ŋsɔɔlɩ mba papaɖɩɣ-ŋ yɔ nɛ ŋpaɖɩɣ mba pɔsɔɔlɩ-ŋ yɔ, mbʋ pʋyɔɔ yɔ sɔnɔ ŋwɩlɩ kpayɩ kpayɩ se ñɛ-ɛyaa ñʋndɩnaa nɛ ña-lɩmɖʋyaa tɩlɩɩ pʋyʋ ñɛ-ɛsɩndaa, mbʋ pʋyɔɔ yɔ maapɩtɩɣ se ye pɩɩlaba se Absalɔm wɛ wezuu sɔnɔ nɛ ɖa mba pɩkazaa yɔ ɖɩsɩ yɔ, pɩɩwɛ-ŋ ɖeu nɛ pɩkɩlɩ.
7 Lɛɛlɛɛyɔ lɛ kʋyɩ, lɩɩ nɛ ŋhɛzɩ ña-lɩmɖʋyaa laŋɩyɛ,* mbʋ pʋyɔɔ yɔ monɖukini-ŋ Yehowa hɩɖɛ taa se ye ŋtɩlɩɩ yɔ, pɩɩkaɣ kazʋʋ paa ɛyʋ kʋɖʋm ñɔ-cɔlɔ ɖoo anɛ. Pɩkaɣ-ŋ kɔnʋʋ kaɖɛ nɖɩ yɔ, ɖɩkɩlɩɣ kala wena payɩ atalɩ-ŋ, kpaɣnɩ ɖooo ñe-evebitu taa nɛ pɩkɔɔ pɩtalɩ lɛɛlɛɛyɔ yɔ.»
8 Peeɖe wiyaʋ kʋyaa nɛ ɛcaɣ tɛtʋ nɔnɔɔ taa, nɛ peheyi samaɣ tɩŋa se: «Wiyaʋ caɣ nɔnɔɔ taa.» Nɛ samaɣ tɩŋa kɔɔ wiyaʋ ɛsɩndaa.
Ɛlɛ Izrayɛɛlɩ kaasewa, nɛ paa weyi lɛ eewobi ɛ-ɖɩɣa taa.+
9 Izrayɛɛlɩ cejewe kpeekpe taa ɛyaa tɩŋa kaawɛɛ nɛ pɔhɔŋ ɖama nɛ tɔm nɛ pɔtɔŋ se: «Wiyaʋ kaayabɩ ɖa-ñʋʋ ɖo-koyindinaa nesi tɛɛ,+ nɛ eholi-ɖʋ Filistii mba nesi tɛɛ; ɛlɛ lɛɛlɛɛyɔ ese tɛtʋ taa Absalɔm yɔɔ.+
10 Nɛ Absalɔm weyi ɖɩta-ɩ num se ɛtɔɔ kewiyitu ɖɔ-yɔɔ yɔ,+ ɛsɩbɩ you taa.+ Nɛ lɛɛlɛɛyɔ, ɛbɛ yɔɔ ɩɩlakɩ nabʋyʋ se ɩpɩsɩnɩ wiyaʋ?»
11 Wiyaʋ Daviid tiyini tɔm tʋnɛ cɔjɔnaa Sadɔɔkɩ+ nɛ Abiyaataarɩ+ se: «Ɩyɔɔdɩnɩ Yuuda ɛzʋtʋyaa+ nɛ ɩpɔzɩ-wɛ se: “Ɛbɛ yɔɔ pɩpɔzʋʋ se ɩkɛ kɛdɛzaɣ ñɩma mba papɩsɩɣnɩ wiyaʋ ɛ-ɖɩɣa taa yɔ, alɩwaatʋ ndʋ Izrayɛɛlɩ kpeekpe tɔm tɛm talʋʋ wiyaʋ ɛ-ɖɩɣa taa yɔ?
12 Ɩkɛ mon-koobiya; ɩkɛ ma-maɣmaɣ mɔ-mɔɔyɛ nɛ mon-tomnaɣ.* Ɛbɛ yɔɔ pɩpɔzʋʋ se ɩkɛ kɛdɛzaɣ ñɩma mba papɩsɩɣnɩ wiyaʋ yɔ?”
13 Nɛ pɩwɛɛ se iheyi Amazaa+ se: “Ŋtɩkɛ ma-maɣmaɣ mɔ-mɔɔyɛ nɛ mon-tomnaɣ na? Ɛsɔ ɛhɔ ma-nɩŋgbaŋʋʋ siŋŋ* ye ŋtɩpɩsɩ mɔn-sɔɔjanaa ñʋʋdʋ Yowaabʋ lone taa, kpaɣnɩ lɛɛlɛɛyɔ nɛ pɩɖɛɛ yɔ.”»+
14 Nɛ ɛpɩsɩnɩ* Yuuda ɛyaa tɩŋa laŋa nɛ ɛ-yɔɔ ɛzɩ ɛyʋ kʋɖʋm yɔ, nɛ petiyi nɛ peheyi wiyaʋ se: «Pɩsɩ nɛ ŋkɔɔ, ña nɛ ña-lɩmɖʋyaa tɩŋa.»
15 Wiyaʋ paɣzɩ pɩsʋʋ nɛ ɛtalɩ Yɔɔrdaŋ, nɛ Yuuda samaɣ lɩɩnɩ Gilgaalɩ+ nɛ kɔkɔɔ se kakatɩ wiyaʋ nɛ kasɩɩ-ɩ nɛ ɛtɛzɩ Yɔɔrdaŋ.
16 Nɛ Geera pɩyalʋ Simeyii,+ Bɛnjamɛɛ tʋ weyi ɛlɩnɩ Bahurim yɔ, etii lɛɛ lɛɛ, ɛ nɛ Yuuda ɛyaa, se ɛkatɩ Wiyaʋ Daviid.
17 Nɛ ɛyaa 1 000 mba palɩnɩ Bɛnjamɛɛ taa yɔ paawɛ ɛ-cɔlɔ. Pɩtasɩ lɛ, Sɔɔlɩ ɖɩɣa yɔɔ cɔnɩyʋ Ziba+ nɛ ɛ-pɩyalaa 15 nɛ ɛ-lɩmɖʋyaa 20 pɛɖɛɛ lɛɛ lɛɛ wiyaʋ nɔɔ nɛ petii Yɔɔrdaŋ.
18 Ɛtɛzɩ* pɔɔ ka-ɖɩdɛzɩyɛ taa se ɛtɛzɩnɩ wiyaʋ ɖɩɣa taa mba nɛ ɛla mbʋ payɩ wiyaʋ liu wɛɛ yɔ. Ɛlɛ Geera pɩyalʋ Simeyii luŋ wiyaʋ ɛsɩndaa alɩwaatʋ ndʋ ɛlɛ caɣaɣ tɛzʋʋ Yɔɔrdaŋ yɔ.
19 Eheyi wiyaʋ se: «Man-kɩbaɣlʋ ɛtaakpaɣ mbʋ maalaba yɔ nɛ ɛlabɩnɩ tʋmɩyɛ;+ nɛ taatɔzɩ kɩwɛɛkɩm mbʋ ña-lɩmɖʋyʋ labɩ kɩyakʋ ŋgʋ man-kɩbaɣlʋ wiyaʋ lɩ Yeruzalɛm yɔ pɩ-yɔɔ. Wiyaʋ ɛtaasɩɩ-pʋ ɛ-laŋɩyɛ taa,
20 mbʋ pʋyɔɔ yɔ ma ña-lɩmɖʋyʋ mansɩm camɩyɛ se malabɩ kɩwɛɛkɩm; mbʋ yebina nɛ sɔnɔ, mɛnkɛ Yosɛɛfʋ ɖɩɣa kpeekpe taa kajalaɣ tʋ weyi etiba se ɛkatɩ man-kɩbaɣlʋ wiyaʋ yɔ.»
21 Kpaagbaa mbʋ lɛ, Zeruyaa+ pɩyalʋ Abisayii+ yɔɔdɩ se: «Pɩtɩmʋna se pakʋ Simeyii yaa we? Mbʋ pʋyɔɔ yɔ ɛɛlɔ nɔɔ kɩdɛkɛdaɣ Yehowa tɛ patam num yɔɔ.»+
22 Ɛlɛ Daviid pɔzɩ se: «Zeruyaa pɩyalaa,+ ma nɛ mɩ suwe, nɛ pɩwɛɛ se ɩla mbʋ pɩkaɖɩɣnɩ-m yɔ? Pɩpɔzʋʋ se pakʋ nɔɔyʋ sɔnɔ Izrayɛɛlɩ taa? Yaa mantɩtɩlɩ se sɔnɔ mɛnkɛ wiyaʋ Izrayɛɛlɩ yɔɔ?»
23 Nɛ wiyaʋ heyi Simeyii se: «Ŋŋkaɣ sɩbʋ.» Nɛ wiyaʋ ɖuuni-i.+
24 Sɔɔlɩ sayɩ Mefiibosɛɛtɩ+ ɖɔɖɔ tii se ɛkatɩ wiyaʋ. Ɛtaacɔnɩ ɛ-nɩŋgbanzɩ yɔɔ se sɩwɛɛ ɖeu nɛ ɛtaañɔɔzɩ ɛ-nɔɔ yɔɔ hʋndʋ nɛ ɛtaacɔtɩ e-wondu kpaɣnɩ kɩyakʋ ŋgʋ wiyaʋ ɖɛwa yɔ nɛ pɩkɔɔ pɩtalɩ kɩyakʋ ŋgʋ ɛpɩsaa nɛ ɛkɔmnɩ laŋhɛzɩyɛ yɔ.
25 Alɩwaatʋ ndʋ ɛkɔm* Yeruzalɛm se ɛkatɩ wiyaʋ lɛ, wiyaʋ pɔzɩ-ɩ se: «Ɛbɛ yɔɔ ŋtaatɩŋɩ-m, Mefiibosɛɛtɩ?»
26 Peeɖe ecosaa se: «Man-kɩbaɣlʋ wiyaʋ, ma-lɩmɖʋyʋ+ cɛtɩnɩ-m. Mbʋ pʋyɔɔ yɔ ña-lɩmɖʋyʋ kaayɔɔdaa se: “Yele nɛ pɔñɔɔzɩ-m man-kpaŋaɣ nɛ pɩsa nɛ mancaɣ kɔ-yɔɔ nɛ ma nɛ wiyaʋ ɖɩɖɛɛ,” mbʋ pʋyɔɔ yɔ ña-lɩmɖʋyʋ kɛ ɛjam.+
27 Ɛlɛ ɛcɛtɩnɩ ña-lɩmɖʋyʋ taa man-kɩbaɣlʋ wiyaʋ cɔlɔ.+ Paa mbʋ yɔ, man-kɩbaɣlʋ wiyaʋ wɛ ɛzɩ Ɛsɔ toovenim tʋ tiyiyu yɔ, pʋyɔɔ lɛ, la mbʋ payɩ pɩwɛ ɖeu ñɛ-ɛsɩndaa yɔ.
28 Man-kɩbaɣlʋ wiyaʋ pɩzaɣ se ɛkʋ man-caa ɖɩɣa taa mba tɩŋa, paa mbʋ yɔ ŋsɩ ña-lɩmɖʋyʋ mba pɔtɔkɩ ña-taabɩlɩ yɔɔ yɔ pɛ-hɛkʋ taa.+ Ye mbʋ, nɔɔ ŋga mantasɩ wɛnʋʋ se mama kubusi nɛ wiyaʋ cɔlɔ kiŋ?»
29 Ɛlɛ wiyaʋ heyi-i se: «Ɛbɛ yɔɔ ŋwɛɛ nɛ ŋtasɩɣ yɔɔdʋʋ sakɩyɛ? Manɖʋwa se pɩwɛɛ se ña nɛ Ziba ɩtayɩ hayɩm.»+
30 Peeɖe Mefiibosɛɛtɩ heyi wiyaʋ se: «Ɛkpaɣ pɩtɩŋa, man-kɩbaɣlʋ wiyaʋ ñɩtʋʋ nɛ ɛpɩsɩ nɛ ɛkɔɔ ɛ-ɖɩɣa nɛ laŋhɛzɩyɛ yɔ, pɩmaɣ-m.»
31 Pʋwayɩ lɛ, Galaadɩ tʋ Barizilayii+ lɩɩnɩ Rogelim nɛ etii Yɔɔrdaŋ egeetiye taa se ɛsɩɩ wiyaʋ nɛ ɛtanɩ-ɩ Yɔɔrdaŋ pɔɔ cɔlɔ.
32 Barizilayii kaakpadɩyɩ siŋŋ, ɛɛwɛnɩ pɩnzɩ 80, nɛ ɛɛha wiyaʋ tɔɔnaɣ alɩwaatʋ ndʋ ɛlɛ kaacaɣ Mahanayim yɔ,+ mbʋ pʋyɔɔ yɔ Barizilayii kaakɛ ñɩm tʋ sɔsɔ nɔɔyʋ.
33 Nɛ wiyaʋ heyi Barizilayii se: «Ma nɛ ŋ ɖɩtɛzɩ, nɛ mankaɣ-ŋ haʋ tɔɔnaɣ Yeruzalɛm.»+
34 Ɛlɛ Barizilayii cosi wiyaʋ se: «Kɩyakɩŋ* ɛzɩma pɩkazɩ-m se mancaɣ wezuu nɛ pɩwɛɛ se ma nɛ wiyaʋ ɖɩkpa Yeruzalɛm?
35 Sɔnɔ mɛwɛnɩ pɩnzɩ 80.+ Ɛzɩ manpɩzɩɣ nɛ manɖʋ tʋkaɣ kɩbam nɛ kɩdɛkɛdɩm pɛ-hɛkʋ taa? Ɛzɩ ma ña-lɩmɖʋyʋ manpɩzɩɣ nɛ manɖɩŋ mbʋ mɔntɔkɩ yaa mbʋ mɔñɔʋ yɔ se manɩɩ pi-leleŋ na? Manpɩzɩɣ nɛ mantasɩ welisuu hendu teyaa abalɩñɩma nɛ halɩñɩma nɔsɩ na?+ Ye mbʋ, ɛbɛ yɔɔ pɩwɛɛ se ña-lɩmɖʋyʋ ɛsɔzɩ sʋʋtʋ man-kɩbaɣlʋ wiyaʋ?
36 Waɖɛ nɖɩ ña-lɩmɖʋyʋ wɛna se ɛpɩzɩ nɛ ɛtanɩ wiyaʋ Yɔɔrdaŋ pɔɔ cɔlɔ yɔ, ɖɩmaɣaa. Ɛbɛ yɔɔ pɩpɔzʋʋ se wiyaʋ ɛhɛyɩ-m kɩhɛyʋʋ kʋnɛ?
37 Mentendi-ŋ, yele nɛ ma ña-lɩmɖʋyʋ manpɩsɩ, nɛ mansɩ mɛn-tɛtʋ taa man-caa nɛ mon-ɖoo pa-pɩlaʋ cɔlɔ.+ Ɛlɛ na, ña-lɩmɖʋyʋ Kimaamɩ+ yɔ. Ɛ nɛ man-kɩbaɣlʋ wiyaʋ pɛtɛzɩ, nɛ ŋpɩzɩɣ nɛ ŋlabɩ-ɩ mbʋ pɩwɛ ɖeu ñɛ-ɛsɩndaa yɔ.»
38 Peeɖe wiyaʋ yɔɔdaa se: «Ma nɛ Kimaamɩ ɖɩkaɣ tɛzʋʋ, nɛ mankaɣ-ɩ labʋ mbʋ pɩwɛ ɖeu ñɛ-ɛsɩndaa yɔ; mbʋ payɩ ŋpɔzʋʋ-m yɔ, mankaɣ-ŋ pʋ labʋ.»
39 Nɛ samaɣ tɩŋa paɣzɩ tɛzʋʋ Yɔɔrdaŋ, nɛ wiyaʋ caɣaɣ tɛzʋʋ lɛ, wiyaʋ kpi Barizilayii nɛ ekpiikini-i+ nɛ ɛwazɩ ɛ-yɔɔ; nɛ Barizilayii pɩsɩ ɛ-tɛ.
40 Wiyaʋ tɛzaɣ Gilgaalɩ lɛ,+ ɛ nɛ Kimaamɩ pɛtɛzɩ. Yuuda samaɣ kpeekpe nɛ Izrayɛɛlɩ samaɣ hɔɔlʋʋ patɩŋ wiyaʋ nɛ pɛtɛzɩ.+
41 Pʋwayɩ lɛ, Izrayɛɛlɩ ɛyaa kpeekpe ñɔtɩnɩ wiyaʋ nɛ pɔpɔzɩ-ɩ se: «Ɛbɛ yɔɔ ɖo-koobiya Yuuda mba mɩlɩ-ŋ nɛ pakpaɣ ña wiyaʋ nɛ ña-ɖɩɣa taa mba tɩŋa nɛ pɛtɛzɩnɩ-mɩ Yɔɔrdaŋ, pɩkpɛndɩnɩ ñɛ-ɛyaa tɩŋa?»+
42 Yuuda ɛyaa tɩŋa cosi Izrayɛɛlɩ ɛyaa se: «Mbʋ pʋyɔɔ yɔ wiyaʋ kɛ ɖɔ-hɔʋ taa tʋ.+ Ɛbɛ yɔɔ mɩ-taa wɩɣ? Ðɩtɔɔ wiyaʋ nabʋyʋ yaa we? Yaa ɛlabɩ-ɖʋ kʋjɔʋ nakʋyʋ?»
43 Ɛlɛ Izrayɛɛlɩ ɛyaa cosi Yuuda ɛyaa se: «Ðɩwɛnɩ hɔɔlɩŋ 10 wiyaʋ cɔlɔ, pʋyɔɔ lɛ, mbʋ ɖɩwɛnɩ Daviid cɔlɔ yɔ, pɩɖɔwa nɛ pɩkɩlɩ mbʋ ɩwɛnɩ ɛ-cɔlɔ yɔ. Ye mbʋ, ɛbɛ yɔɔ inim-ɖʋ? Pɩtaamʋna se ɖɛkɛnɩ kajalaɣ ñɩma mba papɩsɩnɩ wiyaʋ yɔ?» Ɛlɛ Yuuda ɛyaa tɔm wa* Izrayɛɛlɩ ɛyaa ñɩndʋ.
Pɩ-tɛɛ tɔm
^ Yaa «ñʋʋ yabʋ.»
^ Yaa «ña-kalɩzaɣ.»
^ Yaa «kalɩzasɩ.»
^ Piye piye, «nɛ ŋyɔɔdɩnɩ ña-lɩmɖʋyaa laŋɩyɛ.»
^ Yaa «ɩkɛ mɔ-hɔʋ taa ñɩma.»
^ Piye piye, «Ɛsɔ ɛlabɩ-m mbʋ nɛ ɛsɔzɩ pɩ-yɔɔ.»
^ Piye piye, «eluzi.»
^ Pɩpɩzɩɣ pɩkɛ, «Pɛtɛzɩ.»
^ Pɩpɩzɩɣ pɩkɛ, «ɛlɩnɩ.»
^ Piye piye, «Pɩnzɩ kɩyakɩŋ.»
^ Yaa «tɔm kaakpaɖɩ ɖoŋ.»
