Samɩyɛɛlɩ takayaɣ naalɛ ñɩŋga 2:1-32
2 Pʋwayɩ lɛ, Daviid pɔzɩ Yehowa+ se: «Pɩwɛɛ se mankpa Yuuda tɛtʋ natʋyʋ taa?» Yehowa cosi-i se: «Kpa.» Daviid tasɩ pɔzʋʋ se: «Le pɩwɛɛ se mowolo?» Ecosi-i se: «Ebrɔŋ.»+
2 Nɛ Daviid kpa peeɖe, ɛ nɛ ɛ-halaa mba pa-naalɛ, Yizreyɛɛlɩ tʋ Ahiinowam+ nɛ Karmɛɛlɩ tʋ Naabaalɩ lelu Abigayɛɛlɩ.+
3 Daviid kpɛndɩnɩ ɖɔɖɔ ɛyaa mba paawɛ ɛ-cɔlɔ yɔ,+ paa weyi lɛ nɛ ɛ-ɖɩɣa taa mba, nɛ pacaɣ tɛtʋ ndʋ tɩɩcɔ Ebrɔŋ kpɛɛɛ yɔ tɩ-taa.
4 Pʋwayɩ lɛ, Yuuda abalaa wolo nɛ pataa Daviid num peeɖe nɛ ɛpɩsɩ wiyaʋ Yuuda ɖɩɣa yɔɔ.+
Peheyi Daviid se: «Yabɛɛsɩ-Galaadɩ mba pimni Sɔɔlɩ.»
5 Nɛ Daviid tiyi ɛyaa Yabɛɛsɩ-Galaadɩ ɛyaa cɔlɔ nɛ peheyi-wɛ se: «Yehowa ɛwazɩ-mɩ, mbʋ pʋyɔɔ yɔ ɩwɩlɩ sɔɔlɩm siɣsiɣ ñɩmbʋ mɩ-kɩbaɣlʋ Sɔɔlɩ nɛ ipimi-i.+
6 Yehowa ɛwɩlɩ-mɩ sɔɔlɩm siɣsiɣ ñɩmbʋ nɛ siɣsiɣ wɛtʋ. Mankaɣ-mɩ labʋ ɖɔɖɔ camɩyɛ lakasɩ, mbʋ pʋyɔɔ yɔ ɩlabɩ mbʋ.+
7 Lɛɛlɛɛyɔ lɛ, iyele nɛ mi-nesi kpa ɖoŋ nɛ ɩkɛ abalaa mba pɛwɛ abalɩtʋ yɔ, mbʋ pʋyɔɔ yɔ mɩ-kɩbaɣlʋ Sɔɔlɩ sɩba, nɛ Yuuda ɖɩɣa ta-m num se mɛnkɛ wiyaʋ pɔ-yɔɔ.»
8 Ɛlɛ Nɛɛrɩ pɩyalʋ Abnɛɛrɩ,+ Sɔɔlɩ sɔɔjanaa ñʋʋdʋ, kaakpaɣ Sɔɔlɩ pɩyalʋ Isibosɛɛtɩ+ nɛ ɛ nɛ ɩ pɛtɛzɩ nɛ powolo Mahanayim+
9 nɛ ɛsɩɩ-ɩ wiyaʋ Galaadɩ+ yɔɔ, Asur mba yɔɔ, Yizreyɛɛlɩ+ yɔɔ, Efrayim+ yɔɔ, Bɛnjamɛɛ yɔɔ, nɛ Izrayɛɛlɩ kpeekpe yɔɔ.
10 Sɔɔlɩ pɩyalʋ Isibosɛɛtɩ kaawɛnɩ pɩnzɩ 40 alɩwaatʋ ndʋ ɛpɩsɩ wiyaʋ Izrayɛɛlɩ yɔɔ yɔ, nɛ ɛtɔɔ kewiyitu pɩnzɩ 2. Ɛlɛ Yuuda ɖɩɣa ñaawɛ Daviid hɔɔlʋʋ yɔɔ.+
11 Alɩwaatʋ ndʋ* Daviid tɔɔ kewiyitu Ebrɔŋ, Yuuda ɖɩɣa yɔɔ yɔ tɩkpɛndɩ pɩnzɩ 7 nɛ fenasɩ 6.+
12 Pʋwayɩ lɛ, Nɛɛrɩ pɩyalʋ Abnɛɛrɩ nɛ Sɔɔlɩ pɩyalʋ Isibosɛɛtɩ lɩmɖʋyaa, pakʋyɩnɩ Mahanayim+ nɛ powolo Gabawɔɔ.+
13 Zeruyaa+ pɩyalʋ Yowaabʋ+ nɛ Daviid lɩmɖʋyaa palɩɩ ɖɔɖɔ nɛ pakatɩ-wɛ Gabawɔɔ lɩŋgamʋʋ cɔlɔ; nɛ tindimiye kʋɖʋmɖɩyɛ caɣ lɩŋgamʋʋ hɔɔlʋʋ kʋnɛ kɩ-yɔɔ, nɛ tindimiye lɛɛɖɛ ñacaɣ lɩŋgamʋʋ hɔɔlʋʋ lɛɛkʋ yɔɔ.
14 Ðɩnɛ ɛlɛ Abnɛɛrɩ heyi Yowaabʋ se: «Evebiya ɩkʋyɩ nɛ poyooni ɖama* ɖɛ-ɛsɩndaa.» Peeɖe Yowaabʋ yɔɔdaa se: «Pakʋyɩ.»
15 Peeɖe pakʋyaa nɛ palɩɩ ɛsɩndaa, nɛ pakalɩ pa-ñʋʋ: Bɛnjamɛɛ nɛ Sɔɔlɩ pɩyalʋ Isibosɛɛtɩ ɛyaa 12, nɛ Daviid lɩmɖʋyaa taa ɛyaa 12.
16 Pakpa ɖama ñʋŋ, nɛ paa weyi lɛ ɛsɔ ɛ-laɣɖɛ e-koyindu hʋyʋʋ tɛɛ, nɛ pa-tɩŋa pɛkpɛndɩ pɔtɔlɩ. Nɛ payaa lone nɖɩ se Hɛlkaatɩ-Hazurim; ɖɩɩwɛ Gabawɔɔ taa.
17 You ŋgʋ kɩlɩ puwiye yɔ kɩɩwɛ kaɖɛ pɩdɩɩfɛyɩ; nɛ Daviid lɩmɖʋyaa kɔɔ nɛ pawa Abnɛɛrɩ nɛ Izrayɛɛlɩ abalaa.
18 Nɛ Zeruyaa pɩyalaa 3+ kaawɛ peeɖe: Yowaabʋ,+ Abisayii,+ nɛ Asayɛlɩ;+ Asayɛlɩ seɣaɣ lɛɛ lɛɛ ɛzɩ nɛnzɛm lakʋ taa yɔ.
19 Asayɛlɩ ɖʋ Abnɛɛrɩ wayɩ, nɛ ɛtaakɛɣ nɩwaŋ yɔɔ yaa nɩmɩyɛ yɔɔ alɩwaatʋ ndʋ ɛtaŋaɣ Abnɛɛrɩ yɔ.
20 Abnɛɛrɩ kisaa lɛ, ɛpɔzɩ se: «Ña Asayɛlɩ yaa we?» Nɛ ɛlɛ cosi se: «Ɛɛɛ, ma.»
21 Nɛ Abnɛɛrɩ heyi-i se: «Kɛɛnɩ ña-nɩwaŋ yɔɔ yaa ña-nɩmɩyɛ yɔɔ nɛ ŋkpa evebiya taa nɔɔyʋ, nɛ ŋkpaɣ mbʋ payɩ ŋmʋʋ ɛ-cɔlɔ yɔ nɛ pɩpɩsɩ ña-pʋyʋ.» Ɛlɛ Asayɛlɩ taasɔɔlɩ se eyele ɛ-wayɩ ɖʋʋ.
22 Nɛ Abnɛɛrɩ tasɩ heyuu Asayɛlɩ se: «Yebi-m ɖɔɔnʋʋ. Ɛbɛ yɔɔ pɩwɛɛ se mankʋ-ŋ? Ɛzɩma manpɩzɩɣ nɛ mɔncɔnɩ ña-ɖalʋ* Yowaabʋ ɛsɩndaa?»
23 Ɛlɛ Asayɛlɩ kizi kpem se ɛɛsɩŋɩɣ, nɛ Abnɛɛrɩ kɛzɩ kɩgbɛzɛŋ kiɖe nɛ ɛsɔ e-lotu taa,+ nɛ kɩgbɛzɛŋ lɩɩnɩ e-siɣye wayɩ; nɛ ɛtɔlɩ peeɖe nɛ ɛsɩ kpaagbaa. Paa weyi ɛtalɩɣ lone nɖɩ ɖɩ-taa Asayɛlɩ tɔlaa nɛ ɛsɩ yɔ lɛ, ɛsɩŋɩɣ pazɩ.
24 Nɛ Yowaabʋ nɛ Abisayii pɛɖɛɛ nɛ paɖʋ Abnɛɛrɩ wayɩ. Wɩsɩ ɖʋwaɣ lɛ patalɩ Amaa piyaɣ yɔɔ; piyaɣ ŋga kaha ɛsa nɛ Giya, Gabawɔɔ kañɩmbusuu nʋmɔʋ taa.
25 Nɛ Bɛnjamɛɛ mba kpeɣli Abnɛɛrɩ wayɩ, nɛ papɩsɩ tindimiye kʋɖʋmɖɩyɛ, nɛ pasɩŋ piyaɣ nakɛyɛ ñʋʋ taa.
26 Nɛ Abnɛɛrɩ koo nɛ ɛyaa Yowaabʋ nɛ ɛtɔ se: «Laɣɖɛ wɛɣ pʋʋtʋʋ yɔɔ nɛ pɩfɛyɩ tɛm yaa we? Ŋtɩtɩlɩ se ɛsɩñɩŋɩyɛ ɖeke kaɣnɩ lɩʋ pɩ-taa? Alɩwaatʋ ɛzɩma pɩwɛɛ se pɩla pʋcɔ nɛ ŋheyi ñɛ-ɛyaa se peyele po-koobiya wayɩ ɖʋʋ nɛ papɩsɩ?»
27 Peeɖe Yowaabʋ yɔɔdaa se: «Ɛsɔ toovenim tʋ ñɩtʋʋ nɛ ɛwɛɛ wezuu yɔ, ye ŋtaayɔɔdɩ tɔm tʋnɛ yɔ, samaɣ taayele ko-koobiya wayɩ ɖʋʋ pʋcɔ nɛ tɛʋ fe.»
28 Ðɩnɛ ɛlɛ Yowaabʋ hʋlɩ nɔndɔʋ, nɛ ɛ-ɛyaa yele Izrayɛɛlɩ ɖɔɔnʋʋ, nɛ you ŋgʋ kɩsɩɩ tɩnaɣ.
29 Nɛ Abnɛɛrɩ nɛ ɛ-ɛyaa pɔɖɔ Araabaa taa+ ɖoo tɩŋa nɛ pɛtɛzɩ Yɔɔrdaŋ nɛ patɩŋ fɛɛʋ* taa nɛ pakpa nɛ pɔkɔɔ patalɩ Mahanayim.+
30 Yowaabʋ yebi Abnɛɛrɩ wayɩ ɖʋʋ nɛ ɛpɩsɩ lɛ, ekpeɣli samaɣ tɩŋa. Daviid lɩmɖʋyaa taa, pɩtasɩnɩ Asayɛlɩ lɛ, ɛyaa 19 fɛyɩ.
31 Ɛlɛ Daviid lɩmɖʋyaa kaawabɩ Bɛnjamɛɛ mba nɛ Abnɛɛrɩ ɛyaa, nɛ pɛ-ɛyaa 360 kaasɩba.
32 Pakpaɣ Asayɛlɩ+ nɛ pepimi-i ɛ-caa pɩlaʋ ŋgʋ kɩwɛ Bɛtɩlɛhɛm+ yɔ kɩ-taa. Pʋwayɩ lɛ, Yowaabʋ nɛ ɛ-ɛyaa pɔɖɔ ɖoo tɩŋa, nɛ pɔkɔɔ patalɩ Ebrɔŋ+ tanaŋ tɛɛ.
Pɩ-tɛɛ tɔm
^ Piye piye, «Kɩyakɩŋ ñʋŋ weyi.»
^ Yaa «nɛ pamaɣzɩ nɛ pana se awakɩ.»
^ Ebree taa lɛ, patɩyɔɔdɩ kpayɩ kpayɩ se ɛnʋ kɛnɩ ɖalʋ yaa neu.
^ Pɩpɩzɩɣ pɩkɛ, «Bitrooni.»
