Samɩyɛɛlɩ takayaɣ naalɛ ñɩŋga 24:1-25
24 Yehowa pana ɖaɣnɩ miŋ mʋʋ nɛ Izrayɛɛlɩ+ alɩwaatʋ ndʋ nɔɔyʋ seɣti Daviid* se ɛla mbʋ pɩkɔŋnɩ Izrayɛɛlɩ kaɖɛ yɔ. Ɛyʋ ɛnʋ eheyi-i se: «Wolo nɛ ŋkalɩ+ Izrayɛɛlɩ nɛ Yuuda ɛyaa ñʋʋ.»+
2 Peeɖe wiyaʋ heyi sɔɔjanaa ñʋʋdʋ Yowaabʋ,+ weyi ɛɛwɛ ɛ-cɔlɔ yɔ se: «Mentendi-ŋ, wolo nɛ ŋcɔɔ Izrayɛɛlɩ cejewe kpeekpe taa, kpaɣnɩ Daanɩ nɛ piwolo Beyɛɛrɩ-Seeba,+ nɛ ŋma takayaɣ taa samaɣ taa ɛyaa hɩla se pɩsa nɛ mantɩlɩ samaɣ ñʋʋ.»
3 Ɛlɛ Yowaabʋ heyi wiyaʋ se: «Ñɛ-Ɛsɔ Yehowa eyele nɛ samaɣ huu tam 100, nɛ man-kɩbaɣlʋ wiyaʋ nanɩ ɛ-ɛsa, ɛlɛ ɛbɛ yɔɔ man-kɩbaɣlʋ wiyaʋ ñɩnɩɣ se ɛla mbʋ?»
4 Ɛlɛ wiyaʋ tɔm wa Yowaabʋ nɛ sɔɔjanaa ñʋndɩnaa tɔm. Peeɖe Yowaabʋ nɛ sɔɔjanaa ñʋndɩnaa pakʋyɩ wiyaʋ ɛsɩndaa nɛ pɛɖɛɛ palɩɩ se pama Izrayɛɛlɩ mba hɩla takayaɣ taa nɛ patɩlɩ samaɣ ñʋʋ.+
5 Pɛtɛzɩ Yɔɔrdaŋ nɛ powolo pekpeɣli Arowɛɛrɩ,+ tɛtʋ nɩwaŋ yɔɔ,* fɛɛʋ* hɛkʋ taa, nɛ pɛɖɛɛnɩ Gaadɩ hɔɔlʋʋ taa kiŋ, nɛ pʋwayɩ lɛ pɛɖɛɛ Yazɛɛrɩ.+
6 Pʋwayɩ lɛ, pɛɖɛɛ powolo Galaadɩ+ nɛ Taatim-Hodisii ɛjaɖɛ taa nɛ pakpaɣ nʋmɔʋ nɛ powolo Daanɩ-Yaanɩ nɛ papɩsɩ pɛɖɛɛnɩ Siidɔɔ yɔɔ kiŋ.+
7 Pʋwayɩ lɛ, pɛɖɛɛ nɛ powolo Tiirɩ lone ɖoŋ ñɩnɖɛ taa+ nɛ Hivi mba+ nɛ Kanaŋ mba tɛtʋ kpeekpe taa nɛ pɔkɔɔ pɛtɛzɩnɩ Beyɛɛrɩ-Seeba,+ Yuuda tɛ Negɛɛbʋ+ taa.
8 Mbʋ pɔcɔ ɛjaɖɛ kpeekpe taa nɛ papɩsɩ pɔkɔɔ Yeruzalɛm fenasɩ 9 nɛ kɩyakɩŋ 20 wayɩ.
9 Nɛ Yowaabʋ cɛlɩ wiyaʋ ɛyaa mba pakalɩ-wɛ nɛ pama takayaɣ taa yɔ pa-ñʋʋ. Izrayɛɛlɩ taa sɔɔjanaa mba pɔɖɔkʋʋ laɣla yɔ pɛkpɛndɩ 800 000, nɛ Yuuda abalaa ñaakɛ 500 000.+
10 Ɛlɛ Daviid kalɩ samaɣ ñʋʋ nɛ pɩtɛ lɛ, ɛ-laŋɩyɛ paɣzɩ maʋ.*+ Pʋyɔɔ Daviid heyi Yehowa se: «Pɩkɛnɩ-m kɩwɛɛkɩm+ sɔsɔm se malabɩ lakasɩ nzɩ. Nɛ lɛɛlɛɛyɔ lɛ, Yehowa, mentendi-ŋ, kpaɣ ña-lɩmɖʋyʋ kɩwɛɛkɩm nɛ ŋkpeɣ-i,+ mbʋ pʋyɔɔ yɔ malabɩ kɩmɛlɛndʋ siŋŋ.»+
11 Tanaŋ tɛɛ, alɩwaatʋ ndʋ Daviid kʋyaa lɛ, Yehowa tɔm talɩ nayʋ Gaadɩ,+ Daviid tɛ ɛyʋ weyi ɛnaɣ natʋ yɔ se:
12 «Wolo nɛ ŋheyi Daviid se: “Tɔm tʋnɛ Yehowa yɔɔdʋʋ: ‘Manɖʋʋ pʋnɛ pɩ-naadozo ñɛ-ɛsɩndaa. Lɩzɩ pɩ-taa kʋɖʋm nɛ mɔnkɔnɩ-pʋ ñɔ-yɔɔ.’”»+
13 Nɛ Gaadɩ sʋʋ Daviid cɔlɔ nɛ eheyi-i se: «Ŋsɔɔlaa se ñɔɔsɩ ɛkɔɔ ñɛ-ɛjaɖɛ taa pɩnzɩ 7?+ Yaa ŋsɔɔlaa se mba pakaɖɩɣnɩ-ŋ yɔ pɛwɛɛ nɛ pɔɖɔɔnʋʋ-ŋ nɛ ŋseɣ pɛ-ɛsɩndaa fenasɩ 3?+ Yaa ŋsɔɔlaa se ɛyaa kɩzɩkʋ ɛkɔɔ ñɛ-ɛjaɖɛ taa kɩyakɩŋ 3?+ Lɛɛlɛɛyɔ lɛ, maɣzɩ camɩyɛ nɛ ŋheyi-m tɔm ndʋ pɩwɛɛ se mowolo nɛ meheyi Weyi etiyi-m yɔ.»
14 Peeɖe Daviid cosi Gaadɩ se: «Mɛwɛ laŋwɛɛkɩyɛ taa siŋŋ. Mentendi-ŋ, yele nɛ ɖɩtɔlɩ Yehowa nesi tɛɛ,+ mbʋ pʋyɔɔ yɔ ɛ-pʋtɔdɩyɛ naʋ paɣlaa;+ ɛlɛ taayele nɛ mɔntɔlɩ ɛyʋ nesi tɛɛ.»+
15 Nɛ Yehowa tiyini ɛyaa kɩzɩkʋ+ Izrayɛɛlɩ yɔɔ kpaɣnɩ tanaŋ tɛɛ nɛ pɩkɔɔ pɩtalɩ alɩwaatʋ ndʋ paɖʋwa yɔ, nɛ ɛyaa 70 000 sɩ+ kpaɣnɩ Daanɩ nɛ piwolo pɩtalɩ Beyɛɛrɩ-Seeba.+
16 Ɛsɔ tiyiyu posi e-nesi Yeruzalɛm yɔɔ kiŋ se ɛɖɩzɩ-kʋ lɛ, Yehowa kpiɖi* asɛyʋʋ ŋgʋ kɩ-yɔɔ,+ nɛ eheyi tiyiyu weyi ɛwɛɛ nɛ ɛkɔŋnɩ ɖɩzʋʋ samaɣ taa yɔ se: «Pɩmaɣ mbʋ! Lɛɛlɛɛyɔ lɛ, tisi ñe-nesi.» Yehowa tiyiyu kaañɔtɩnɩ Yebuusi tʋ+ Arona+ tɔɔnaɣ ɖɩmaɖɛ kadaɣ.
17 Daviid na Ɛsɔ tiyiyu weyi ɛwɛɛ nɛ ɛkʋʋ samaɣ yɔ lɛ, eheyi Yehowa se: «Malabɩnɩ kɩwɛɛkɩm, nɛ malabɩnɩ mbʋ pɩfɛyɩ ɖeu yɔ; ɛlɛ heŋ+ ɛnɛ yɔ, ɛbɛ ɩlaba? Mentendi-ŋ, yele nɛ ñe-nesi kɔɔ mɔ-yɔɔ nɛ man-caa ɖɩɣa yɔɔ.»+
18 Mbʋ Gaadɩ sʋ Daviid cɔlɔ kɩyakʋ ŋgʋ nɛ eheyi-i se: «Kʋyɩ nɛ ŋkpa; ma Yehowa altaaru Yebuusi tʋ Arona tɔɔnaɣ ɖɩmaɖɛ kadaɣ taa.»+
19 Nɛ Daviid kʋyɩ nɛ ɛkpa ɛzɩ Gaadɩ yɔɔdʋʋ yɔ, ɛzɩ Yehowa ɖʋʋ paɣtʋ yɔ.
20 Arona losaa nɛ ɛna wiyaʋ nɛ ɛ-lɩmɖʋyaa pɔkɔŋnɩ ɛ-cɔlɔ kiŋ lɛ, ɛcaŋ ɛlɩɩ nɛ eluŋ wiyaʋ tɛɛ nɛ ɛpa ɛ-ɛsa nɛ tɛtʋ.
21 Arona pɔzɩ se: «Ɛbɛ yɔɔ man-kɩbaɣlʋ wiyaʋ kɔm ɛ-lɩmɖʋyʋ cɔlɔ?» Daviid cosi se: «Mɔnkɔma se maya ñɔ-cɔlɔ tɔɔnaɣ ɖɩmaɖɛ kadaɣ nɛ mama Yehowa altaaru, nɛ pɩsa nɛ asɛyʋʋ ŋgʋ kɩkɔm samaɣ yɔɔ yɔ kɩsɩŋ.»+
22 Ɛlɛ Arona kitini Daviid se: «Man-kɩbaɣlʋ wiyaʋ ɛkpaɣ-kɛ nɛ ɛlaa peeɖe mbʋ ɛsɔɔlaa yɔ.* Naŋ kɔyɔ, kpaɣ-ɩ nɛ ŋlaanɩ kɩlaŋ kɩñaɣzɩŋ; nɛ ɖasɩ lɛ, ŋpɩzɩɣ ŋkpaɣ kɛɛkɛɛ ŋgʋ pamakɩnɩ tɔɔnaɣ yɔ kɩ-ɖaŋ nɛ ɖaŋ weyi pɔhɔkʋʋnɩ naŋ yɔ.
23 Oo wiyaʋ, Arona cɛlɩɣ pɩtɩŋa payɩ mbʋ yɔ wiyaʋ.» Nɛ Arona heyi wiyaʋ se: «Tɛtɛ nɛ ñɛ-Ɛsɔ Yehowa wazɩ-ŋ.»
24 Ɛlɛ wiyaʋ heyi Arona se: «Aayɩ, pɩwɛɛ se mayabɩ-kɛ ñɔ-cɔlɔ kɩyabʋ. Maakaɣ laʋ mɛ-Ɛsɔ Yehowa kɩlaŋ kɩñaɣzɩŋ weyi mantɩhɛyɩ nabʋyʋ ɩ-yɔɔ yɔ.» Nɛ Daviid kpaɣ liidiye pɔɔyɩsɩ siklinaa* 50+ nɛ ɛyabɩnɩ tɔɔnaɣ ɖɩmaɖɛ kadaɣ nɛ naŋ.
25 Nɛ Daviid ma Yehowa altaaru+ nakʋyʋ peeɖe nɛ ɛlaa kɩlaŋ kɩñaɣzɩŋ nɛ laŋhɛzɩyɛ kɩlaŋ. Nɛ Yehowa nɩɩ tenduu mbʋ Daviid tendaɣ ɛjaɖɛ yɔɔ yɔ,+ nɛ asɛyʋʋ ŋgʋ kɩkɔm Izrayɛɛlɩ yɔɔ yɔ kɩsɩŋ.
Pɩ-tɛɛ tɔm
^ Yaa «alɩwaatʋ ndʋ peseɣti Daviid.»
^ Yaa «tɛtʋ hadɛ kiŋ.»
^ Yaa «lemeɣa.»
^ Yaa «ɛ-ɛhʋyɛ paɣzɩ-ɩ cɛyʋʋ.»
^ Yaa «caɣ kʋñɔwiye.»
^ Piye piye, «mbʋ pɩwɛ ɖeu ɛ-ɛsɩndaa yɔ.»
^ Sikli kʋɖʋmʋʋ maɣnɩ ɛzɩ kɩɖamnaa 11 nɛ hɔɔlʋʋ mbʋ yɔ (kɩɖamnaa 11,4). Cɔnɩ Tɔm kɩsɔzɩtʋ B14.
