Samɩyɛɛlɩ takayaɣ naalɛ ñɩŋga 3:1-39
3 You kaawɛ Sɔɔlɩ ɖɩɣa nɛ Daviid ɖɩɣa pɛ-hɛkʋ taa nɛ pileɖiɣ; nɛ Daviid kaawɛɛ nɛ ɛkpaɣ ɖoŋ,+ nɛ Sɔɔlɩ ɖɩɣa ñɛwɛɛ nɛ kɛtɛzɩɣ camʋʋ.+
2 Alɩwaatʋ ndʋ Daviid kaawɛ Ebrɔŋ yɔ, palʋlɩ-ɩ abalɩbiya.+ Ɛ-pɩyalʋ kajalaɣ ñɩnʋ lɛ Amnɔɔnɩ;+ Yizreyɛɛlɩ tʋ Ahiinowam+ lʋlɩnɩ-ɩ.
3 Ɛ-pɩyalʋ 2 ñɩnʋ lɛ Kileyaabɩ; Karmɛɛlɩ tʋ Naabaalɩ lelu Abigayɛɛlɩ+ lʋlɩnɩ-ɩ. Nɛ 3 ñɩnʋ lɛ Absalɔm;+ Gesuur wiyaʋ Talɩmaayɩ+ pɛlɛ Maaka lʋlɩnɩ-ɩ.
4 Ɛ-pɩyalʋ 4 ñɩnʋ lɛ Hagiit pɩyalʋ Adoniya,+ nɛ 5 ñɩnʋ lɛ Abitaalɩ pɩyalʋ Sefatiya.
5 Ɛ-pɩyalʋ 6 ñɩnʋ lɛ Itreyam; Daviid halʋ Egɩla lʋlɩnɩ-ɩ. Abalɩbiya nzɩ palʋlɩ Daviid Ebrɔŋ yɔ, nzɩ lɛ.
6 Alɩwaatʋ ndʋ you kaawɛɛ nɛ kiwoki pɩ-yɔɔ Sɔɔlɩ ɖɩɣa nɛ Daviid ɖɩɣa pɛ-hɛkʋ taa yɔ, Abnɛɛrɩ+ kaawɛɛ nɛ ɛkpazɩɣ ɖoŋ lone nɖɩ ɛɛwɛnɩ Sɔɔlɩ ɖɩɣa taa yɔ tam.
7 Sɔɔlɩ kaawɛnɩ ɖaŋ nɔɔyʋ, payaɣ-ɩ se Rizɩpa,+ Aya pɛlɛ. Isibosɛɛtɩ+ pɔzɩ Abnɛɛrɩ pʋwayɩ se: «Ɛbɛ yɔɔ ŋsʋnɩ man-caa ɖaŋ?»+
8 Abnɛɛrɩ mʋ pana siŋŋ nɛ Isibosɛɛtɩ tɔm ndʋ nɛ ɛyɔɔdɩ se: «Mɛnkɛ haɣ ñʋʋ Yuuda taa yaa we? Pɩtalʋʋnɩ sɔnɔ kɩyakʋ kʋnɛ kɩ-maɣmaɣ yɔ, mawɩlɩ sɔɔlɩm siɣsiɣ ñɩmbʋ ña-caa Sɔɔlɩ ɖɩɣa nɛ e-koobiya nɛ ɛ-taabalaa, nɛ mantɩɖʋzɩ-ŋ Daviid nesi tɛɛ; nɛ sɔnɔ ŋpɔzʋʋ-m akɔnta se mansʋnɩ halʋ na?
9 Ɛsɔ ɛhɔ ma-nɩŋgbaŋʋʋ siŋŋ* ye mantɩla Daviid ɛzɩ Yehowa ɖuunuu-i yɔ.+
10 Eɖuuni-i se ɛmʋʋ kewiyaɣ Sɔɔlɩ ɖɩɣa nesi tɛɛ nɛ ɛcɛyɩsɩ Daviid kewiyaɣ kpelaɣ Izrayɛɛlɩ yɔɔ nɛ Yuuda yɔɔ, kpaɣnɩ Daanɩ nɛ piwolo Beyɛɛrɩ-Seeba.»+
11 Isibosɛɛtɩ tɩpɩzɩ nɛ ɛtasɩ natʋyʋ yɔɔdʋʋ se ecosi Abnɛɛrɩ, mbʋ pʋyɔɔ yɔ eseɣaɣ-ɩ sɔɔndʋ.+
12 Kpaagbaa mbʋ lɛ, Abnɛɛrɩ tiyi ɛyaa Daviid cɔlɔ se peheyi-i se: «Atɩnɩ ɛjaɖɛ?» Ɛsɔzɩ se: «Yele nɛ ma nɛ ŋ ɖɩɖʋ ɛgbɛyɛ, nɛ mankaɣ labʋ mbʋ payɩ manpɩzɩɣ yɔ* nɛ manpɩsɩnɩ Izrayɛɛlɩ kpeekpe ñɔ-hɔɔlʋʋ yɔɔ.»+
13 Peeɖe ɛlɛ cosi-i se: «Pɩwɛ ɖeu! Ma nɛ ŋ ɖɩkaɣ ɖʋʋ ɛgbɛyɛ. Pʋyʋ kʋɖʋm weyi mɔnpɔzʋʋ-ŋ yɔ ɛnʋ yɔ: ye ŋtɩcalɩnɩ kɔnʋʋ Miikaalɩ,+ Sɔɔlɩ pɛlɛ alɩwaatʋ ndʋ ŋkɔŋ se ŋna-m yɔ, taañɩnɩ se ŋna mɛ-ɛsɩndaa.»
14 Nɛ Daviid tiyi ɛyaa Sɔɔlɩ pɩyalʋ Isibosɛɛtɩ+ cɔlɔ nɛ ɛtɔ se: «Cɛlɩ-m ma-halʋ Miikaalɩ, weyi ɛ-yɔɔ mowoni Filistii mba hɩna nɔsɩ taa hutu 100 yɔ.»+
15 Peeɖe Isibosɛɛtɩ tiyaa se powolo nɛ pakpaɣ-ɩ ɛ-walʋ Palɩtɩyɛɛlɩ+ cɔlɔ, ɛlɛ kaakɛ Layiisi pɩyalʋ.
16 Ɛlɛ ɛ-walʋ wɛɛ nɛ ɛtɩŋɩɣ-ɩ, ewilaɣ nɛ ɛtɩŋɩɣ-ɩ nɛ ɛkɔɔ ɛtalɩ ɖooo Bahurim.+ Ðɩnɛ ɛlɛ Abnɛɛrɩ heyi-i se: «Ðɛɛ ŋpɩsɩ!» Peeɖe ɛpɩsaa.
17 Alɩwaatʋ natʋyʋ, Abnɛɛrɩ tiyaa se peheyi Izrayɛɛlɩ ɛzʋtʋyaa se: «Pɩlakɩ alɩwaatʋ natʋyʋ yɔ, ɩɩsɔɔlaa se Daviid ɛkɛ mi-wiyaʋ.
18 Lɛɛlɛɛyɔ lɛ, ɩla mbʋ, mbʋ pʋyɔɔ yɔ Yehowa heyi Daviid se: “Ma-lɩmɖʋyʋ Daviid+ nesi yɔɔ mankaɣ tɩŋnʋʋ nɛ maya man-samaɣ Izrayɛɛlɩ ñʋʋ Filistii mba nesi tɛɛ nɛ ko-koyindinaa tɩŋa nesi tɛɛ.”»
19 Nɛ Abnɛɛrɩ yɔɔdɩnɩ Bɛnjamɛɛ ɛyaa samaɣ.+ Abnɛɛrɩ wolo ɖɔɖɔ se ɛ nɛ Daviid pɔyɔɔdɩnɩ ɖama pa-taa pe-ɖeke Ebrɔŋ nɛ eheyi-i tɔm ndʋ tɩ-yɔɔ Izrayɛɛlɩ nɛ Bɛnjamɛɛ ɖɩɣa kpeekpe petisaa yɔ.
20 Alɩwaatʋ ndʋ Abnɛɛrɩ nɛ ɛyaa 20 pɔkɔm Daviid cɔlɔ Ebrɔŋ yɔ, Daviid labɩ-wɛ kazandʋ.
21 Pʋwayɩ lɛ, Abnɛɛrɩ heyi Daviid se: «Yebi-m nɛ mowolo nɛ menkpeɣli Izrayɛɛlɩ kpeekpe man-kɩbaɣlʋ wiyaʋ, nɛ pɩsa nɛ ña nɛ wɛ ɩɖʋ ɛgbɛyɛ, nɛ ŋkaɣ tɔɔʋ kewiyitu mbʋ payɩ ñe-liu wɛɛ* yɔ pɩ-yɔɔ.» Peeɖe Daviid yebi Abnɛɛrɩ se ɛɖɛɛ, nɛ ɛlɛ kpaɣ ɛ-nʋmɔʋ nɛ ɛɖɛɛnɩ laŋhɛzɩyɛ.
22 Alɩwaatʋ ndʋ tɩ-taa ɖeyi ɖeyi lɛ, Daviid lɩmɖʋyaa nɛ Yowaabʋ palɩnɩ you nɛ pɔkɔɔ, pɛkpɛndɩnɩ wondu ndʋ pamʋwa yɔ, tɩɖɔ sakɩyɛ. Abnɛɛrɩ taatasɩ wɛʋ Daviid cɔlɔ Ebrɔŋ, mbʋ pʋyɔɔ yɔ Daviid kaayebi-i nɛ ɛlɛ kpaɣ ɛ-nʋmɔʋ nɛ ɛɖɛɛnɩ laŋhɛzɩyɛ.
23 Yowaabʋ+ nɛ sɔɔjanaa kpeekpe mba paawɛ ɛ-cɔlɔ yɔ patalaa lɛ, peheyi Yowaabʋ se: «Nɛɛrɩ+ pɩyalʋ Abnɛɛrɩ+ kɔm wiyaʋ cɔlɔ, nɛ wiyaʋ yebi-i se ɛɖɛɛ, nɛ ɛlɛ kpaɣ ɛ-nʋmɔʋ nɛ ɛɖɛɛnɩ laŋhɛzɩyɛ.»
24 Peeɖe Yowaabʋ sʋ wiyaʋ cɔlɔ nɛ ɛyɔɔdɩ se: «Ɛbɛ ŋlabɩ mbʋ yɔ? Abnɛɛrɩ kɔm ñɔ-cɔlɔ cɩnɛ. Ɛbɛ yɔɔ ŋyebi-i nɛ ɛɖɛɛ? Lɛɛlɛɛyɔ ɛɖɛwa lɛ!
25 Ŋsɩm Nɛɛrɩ pɩyalʋ Abnɛɛrɩ! Ɛkɔm cɩnɛ se epeɣzi-ŋ nɛ ɛtɩlɩ ña-sʋʋ nɛ ña-lɩʋ nɛ eɖiɣzini mbʋ payɩ ŋɖiɣni labʋ yɔ.»
26 Nɛ Yowaabʋ lɩɩ Daviid cɔlɔ nɛ etiyi ɛyaa Abnɛɛrɩ wayɩ, nɛ pehiɣ-i Sira lɔkɔ* cɔlɔ nɛ papɩsɩnɩ-ɩ; ɛlɛ Daviid taatɩlɩ natʋyʋ pɩ-yɔɔ.
27 Abnɛɛrɩ pɩsɩ Ebrɔŋ lɛ,+ Yowaabʋ kpaɣ-ɩ nɛ ɛkɛzɩ-ɩ hɔɔlʋʋ, nɔnɔɔ taa, se ɛ nɛ ɩ pɔyɔɔdɩnɩ ɖama pa-taa pe-ɖeke. Ɛlɛ pɛwɛ peeɖe lɛ, ɛsɔ Abnɛɛrɩ lotu taa sɩɣa nɛ ɛlɛ sɩ;+ ɛlabɩ mbʋ, mbʋ pʋyɔɔ yɔ Abnɛɛrɩ kaakʋ e-neu* Asayɛlɩ.*+
28 Daviid nɩ tɔm ndʋ pʋwayɩ lɛ, ɛyɔɔdɩ se: «Ma nɛ men-kewiyaɣ ɖɩlɩ cɩŋgɩlɩm Yehowa ɛsɩndaa tam Nɛɛrɩ pɩyalʋ Abnɛɛrɩ calɩm kpɛdʋʋ kɩmɩyɛ taa.+
29 Calɩm kpɛdʋʋ mbʋ, pɩpɩsɩ Yowaabʋ nɛ ɛ-caa ɖɩɣa kpeekpe ñʋʋ taa.+ Paa ɛzɩmtaa lɛ, pɩwɛɛ se abalʋ nɔɔyʋ ɛwɛɛ Yowaabʋ ɖɩɣa taa nɛ nabʋyʋ kpeŋni-i+ yaa ɛkɛ canaɣ+ yaa ɛtɔʋ pɩsatʋ kpeɖe yɔɔ* yaa pakʋ-ɩ nɛ laɣɖɛ yaa ɛwɛɛ tɔɔnaɣ kɛdɛɖaɣ taa!»+
30 Mbʋ Yowaabʋ nɛ ɛ-ɖalʋ* Abisayii+ pakʋ Abnɛɛrɩ,+ mbʋ pʋyɔɔ yɔ ɛlɛ kaakʋ pe-neu* Asayɛlɩ Gabawɔɔ you taa.+
31 Pʋwayɩ lɛ, Daviid heyi Yowaabʋ nɛ samaɣ ŋga kaawɛ ɛ-cɔlɔ yɔ ke-kpeekpe se: «Ɩcɩyɩ mi-tokonaa nɛ isuu fɔlɔtɔnaa nɛ ɩcaɣ kʋñɔwiye Abnɛɛrɩ sɩm yɔɔ.» Wiyaʋ Daviid maɣmaɣ kaawɛɛ nɛ ɛɖɔŋ sɩɖʋ tɛya wayɩ.
32 Pepi Abnɛɛrɩ Ebrɔŋ; nɛ wiyaʋ wiini nɔɔ kɩkʋyaɣ Abnɛɛrɩ pɩlaʋ cɔlɔ, nɛ samaɣ kpeekpe paɣzɩ wiu.
33 Wiyaʋ tee kʋñɔwiye hendu Abnɛɛrɩ yɔɔ nɛ ɛtɔ se:
«Ɛzɩ pɩɩwɛɛ se Abnɛɛrɩ ɛsɩ ɛyʋ kɩmɛlɛŋ sɩm na?
34 Patɩhɔkɩ ñe-nesi,Nɛ ña-nɩŋgbanzɩ taawɛɛ kpasɩ* taa.
Ŋtɔlɩ ɛzɩ ɛyʋ tɔlʋʋ ɛyaa kʋyaa* nesi tɛɛ yɔ.»+
Peeɖe samaɣ kpeekpe tasɩ wiu ɛ-yɔɔ.
35 Pʋwayɩ lɛ, samaɣ kpeekpe kɔɔ se kaha Daviid kpɔnɔ nɛ kɛhɛzɩ ɛ-laŋɩyɛ,* alɩwaatʋ ndʋ wɩsɩ tɩɖʋta yɔ. Ɛlɛ Daviid ɖuu nɛ ɛyɔɔdɩ se: «Ɛsɔ ɛhɔ ma-nɩŋgbaŋʋʋ siŋŋ* ye manɖɩkɩ kpɔnɔ yaa nabʋyʋ pʋcɔ nɛ wɩsɩ ɖʋ yɔ!»+
36 Samaɣ kpeekpe na mbʋ pɩlaba yɔ, nɛ pɩkɛdɩnɩ-kɛ. Mbʋ payɩ wiyaʋ lakaɣ yɔ pɩkɛdaɣnɩ ɖɔɖɔ samaɣ kpeekpe.
37 Nɛ samaɣ kpeekpe nɛ Izrayɛɛlɩ kpeekpe patɩlɩ kɩyakʋ ŋgʋ ki-wiye se pɩtɩkɛ wiyaʋ cɔlɔ pɩlɩnaa nɛ pakʋ Nɛɛrɩ pɩyalʋ Abnɛɛrɩ.+
38 Pʋwayɩ lɛ, wiyaʋ heyi ɛ-lɩmɖʋyaa se: «Ɩtɩtɩlɩ se awumbu nɛ ɛyʋ sɔsɔ nɔɔyʋ sɩbɩnɩ sɔnɔ kɩyakʋ kʋnɛ Izrayɛɛlɩ taa yaa we?+
39 Sɔnɔ mɛnkɛ ɛjam, paa pata-m num nɛ manpɩsɩ wiyaʋ yɔ,+ nɛ abalaa panɛ, Zeruyaa+ pɩyalaa panɛ, pakɩlɩ wɛʋ puuyaɣ mɛ-ɛsɩndaa.+ Yehowa ɛhɛyɩ kɩdɛkɛdɩm laɖʋ ɛ-maɣmaɣ ɛ-kɩdɛkɛdɩm lakasɩ nɔɔ taa.»+
Pɩ-tɛɛ tɔm
^ Piye piye, «Ɛsɔ ɛla Abnɛɛrɩ mbʋ nɛ ɛsɔzɩ pɩ-yɔɔ.»
^ Piye piye, «nɛ na, me-nesi wɛ ñɔ-cɔlɔ.»
^ Yaa «ña-kalɩzaɣ liu wɛɛ.»
^ Pʋ-tɔbʋʋ se pɔʋ ŋgʋ pohuyaa nɛ paɖʋʋ lɩm kɩ-taa yɔ.
^ Ebree taa lɛ, patɩyɔɔdɩ kpayɩ kpayɩ se ɛnʋ kɛnɩ ɖalʋ yaa neu.
^ Yaa «ɛlabɩ mbʋ, e-neu Asayɛlɩ calɩm yɔɔ.»
^ Pʋtɔma yɔ abalʋ weyi pɩcamɩ-ɩ nɛ pɩpɔzʋʋ se ɛla halaa tʋma yɔ, ɛ-tɔm pɔyɔɔdʋʋ.
^ Ebree taa lɛ, patɩyɔɔdɩ kpayɩ kpayɩ se ɛnʋ kɛnɩ ɖalʋ yaa neu.
^ Ebree taa lɛ, patɩyɔɔdɩ kpayɩ kpayɩ se ɛnʋ kɛnɩ ɖalʋ yaa neu.
^ Piye piye, «ñɩɣyʋʋ kɩsɛɛmʋʋ.»
^ Piye piye, «mbʋ pɩfɛyɩ siɣsiɣ yɔ pɩ-pɩyalaa.»
^ Yaa «kaha Daviid kʋñɔwiye kpɔnɔ.»
^ Piye piye, «Ɛsɔ ɛlabɩ-m mbʋ nɛ ɛsɔzɩ pɩ-yɔɔ.»