Samɩyɛɛlɩ takayaɣ naalɛ ñɩŋga 4:1-12
4 Sɔɔlɩ pɩyalʋ Isibosɛɛtɩ+ nɩwa se Abnɛɛrɩ sɩbɩ Ebrɔŋ lɛ,+ pitibi-i yɔɔɔ* nɛ pisidi Izrayɛɛlɩ mba kpeekpe lɩmaɣza taa.
2 Abalaa nabɛyɛ 2 kaakɛ Sɔɔlɩ pɩyalʋ ɛtɛlɛmwaa ñʋndɩnaa: payaɣ kʋɖʋm se Baanaa nɛ payaa lɛlʋ se Rekaab. Paakɛ Beerɔɔtɩ tʋ Rimɔɔnɩ weyi ɛ-tɛ wɛ Bɛnjamɛɛ cejewiye taa yɔ, ɛ-pɩyalaa. (Mbʋ pʋyɔɔ yɔ ɖooo lɛ pakalaɣ Beerɔɔtɩ+ se kɩwɛ Bɛnjamɛɛ taa.
3 Beerɔɔtɩ mba sewa nɛ powolo Gitayim,+ nɛ pɛkɛ agɔma peeɖe halɩ nɛ sɔnɔ.)
4 Sɔɔlɩ pɩyalʋ Yonataanɩ+ kaawɛnɩ pɩyalʋ nɔɔyʋ, pɩcamɩ ɛ-nɩŋgbanzɩ.*+ Alɩwaatʋ ndʋ tɔm lɩnɩ Yizreyɛɛlɩ+ nɛ tɩtalɩ se Sɔɔlɩ nɛ Yonataanɩ pasɩba yɔ, ɛɛwɛnɩ pɩnzɩ 5. Nɛ ɛ-pʋnʋʋyʋ kpaɣ-ɩ nɛ ese; ɛlɛ ɛɛwɛɛ nɛ eseɣni sɔɔndʋ lɛ, pɩɣa tɔlɩ nɛ pɩcamɩ-kɛ. Payaɣ-kɛ se Mefiibosɛɛtɩ.+
5 Beerɔɔtɩ tʋ Rimɔɔnɩ pɩyalaa, Rekaab nɛ Baanaa powolo Isibosɛɛtɩ tɛ wɩsɩ kaalaŋa taa, nɛ ɛlɛ ñaawɛɛ nɛ eɖou wɩsɩ taa ɖom.
6 Pɛɖɛɛ pasʋʋ ɖɩɣa taa nɛ pɛwɛɛ palakɩ ɛzɩ blee pañɩnɩɣ yɔ, nɛ pɔsɔ e-lotu taa sɩɣa; nɛ Rekaab nɛ e-koobu Baanaa+ palɩɩ nɛ pese.
7 Paasʋ ɖɩɣa taa lɛ, ɛlɛ ñaahɩnɩ ɛ-kaɖʋ yɔɔ, kuduyuu ŋgʋ kɩ-tɛɛ ɛsʋʋ yɔ, nɛ pɔsɔbɩ-ɩ sɩɣa nɛ pakʋ-ɩ; pʋwayɩ lɛ, pɛsɛtɩ ɛ-ñʋʋ. Nɛ pakpaɣ ɛ-ñʋʋ nɛ patɩŋ Araabaa habɩyɛ nɛ pɔɖɔ ɖoo pilim.
8 Nɛ powoni Isibosɛɛtɩ+ ñʋʋ Daviid cɔlɔ Ebrɔŋ nɛ peheyi wiyaʋ se: «Ño-koyindu Sɔɔlɩ+ weyi ɛñɩnaɣ se ɛlɩzɩ ñe-wezuu* yɔ,+ ɛ-pɩyalʋ Isibosɛɛtɩ ñʋʋ yɔ. Sɔnɔ Yehowa kpa kɩmɩyɛ Sɔɔlɩ nɛ ɛ-lʋlʋʋ taa mba, man-kɩbaɣlʋ wiyaʋ yɔɔ.»
9 Ɛlɛ Daviid cosi Rekaab nɛ e-koobu Baanaa, Beerɔɔtɩ tʋ Rimɔɔnɩ pɩyalaa se: «Yehowa weyi ɛlɩzɩ-m* kʋñɔmɩŋ kpeekpe taa yɔ, ɛñɩtʋʋ nɛ ɛwɛɛ wezuu yɔ,+
10 alɩwaatʋ ndʋ nɔɔyʋ kɔma nɛ eheyi-m se: “Sɔɔlɩ sɩba,”+ nɛ ɛmaɣzɩ se tɔm kɩbandʋ eheyaɣ-m lɛ, mankpa-ɩ nɛ mankʋ-ɩ+ Zikɩlaagɩ. Kɩhɛyʋʋ ŋgʋ ɛmʋ mɔn-cɔlɔ yɔ, ŋgʋ lɛ!
11 Nɛ pɩcandɩnɩ se kañatʋ tɩnaa kʋ ɛyʋ siɣsiɣ tʋ ɛ-maɣmaɣ ɛ-ɖɩɣa taa ɛ-kaɖʋ yɔɔ! Pɩfɛyɩ se mɔnpɔzɩ ɛ-calɩm mi-nesi tɛɛ+ nɛ mamʋʋzɩ-mɩ tɛtʋ yɔɔ?»
12 Peeɖe Daviid heyi evebiya se pakʋ-wɛ.+ Pɛsɛtɩ pe-nesi nɛ pa-nɩŋgbanzɩ nɛ popuzi-wɛ+ Ebrɔŋ lɩŋgamʋʋ cɔlɔ. Ɛlɛ pakpaɣ Isibosɛɛtɩ ñʋʋ nɛ pepim-kʋ Abnɛɛrɩ pɩlaʋ taa Ebrɔŋ.
Pɩ-tɛɛ tɔm
^ Piye piye, «e-nesi tii yɔbɩ.»
^ Yaa «ɛkɛ kaakalaɣ.»
^ Yaa «ña-kalɩzaɣ.»
^ Yaa «ɛyabɩ man-kalɩzaɣ ñʋʋ.»
