Samɩyɛɛlɩ takayaɣ naalɛ ñɩŋga 5:1-25
5 Pʋwayɩ lɛ, Izrayɛɛlɩ cejewe tɩŋa wolo Daviid cɔlɔ Ebrɔŋ+ nɛ peheyi-i se: «Na! Ðɩkɛ ña-maɣmaɣ ñɔ-mɔɔyɛ nɛ ño-tomnaɣ.*+
2 Sɔɔlɩ kaakɛ ɖe-wiyaʋ alɩwaatʋ ndʋ tɩɖɛwa yɔ tɩ-taa lɛ, ñaakɛnɩ weyi eɖiyaɣ Izrayɛɛlɩ yoŋ yɔ.*+ Nɛ Yehowa heyi-ŋ se: “Ŋkaɣ ɖiyuu man-samaɣ Izrayɛɛlɩ, nɛ ŋkaɣ pɩsʋʋ Izrayɛɛlɩ ñʋʋdʋ.”»+
3 Nɛ Izrayɛɛlɩ ɛzʋtʋyaa kpeekpe wolo wiyaʋ cɔlɔ Ebrɔŋ, nɛ pa nɛ Wiyaʋ Daviid paɖʋ ɛgbɛyɛ+ Ebrɔŋ, Yehowa ɛsɩndaa. Pʋwayɩ lɛ, pataa Daviid num nɛ ɛpɩsɩ wiyaʋ Izrayɛɛlɩ yɔɔ.+
4 Daviid kaawɛnɩ pɩnzɩ 30 alɩwaatʋ ndʋ ɛpɩsɩ wiyaʋ yɔ, nɛ ɛtɔɔ kewiyitu pɩnzɩ 40.+
5 Ebrɔŋ taa lɛ, ɛtɔɔ kewiyitu pɩnzɩ 7 nɛ fenasɩ 6 Yuuda yɔɔ, nɛ Yeruzalɛm+ taa lɛ, ɛtɔɔ kewiyitu pɩnzɩ 33 Izrayɛɛlɩ kpeekpe yɔɔ nɛ Yuuda yɔɔ.
6 Nɛ wiyaʋ nɛ ɛ-ɛyaa palɩɩ se pɛɖɛɛ Yeruzalɛm nɛ poyooni Yebuusi ñɩma+ mba paawɛ egeetiye nɖɩ ɖɩ-taa yɔ. Paahoŋ Daviid nɛ peheyi-i se: «Ŋŋkaɣ sʋʋ cɩnɛ kpa! Halɩ yʋlʋmaa nɛ kaakalasɩ pakaɣnɩ-ŋ ɖɔɔnʋʋ.» Pamaɣzaɣ se: «Daviid ɛɛkaɣ sʋʋ cɩnɛ kpa.»+
7 Ɛlɛ Daviid mʋ Siyɔŋ tɛtʋ ɖoŋ ñɩndʋ; nɛ ndʋ payaɣ lɛɛlɛɛyɔ se Daviid Tɛtʋ.+
8 Nɛ Daviid yɔɔdɩ puwiye se: «Mba palakɩ you nɛ Yebuusi mba yɔ, pɩwɛɛ se patɩŋnɩ tɛtɛɛ pɔʋ ŋgʋ kɩ-taa nɛ lɩm yɔ kɩ-taa nɛ powolo pakʋ “kaakalasɩ nɛ yʋlʋmaa,” mba Daviid* paɖɩɣ yɔ!» Pʋyɔɔ pɔyɔɔdʋʋ se: «Yʋlʋmaa nɛ kaakalasɩ ɩɩkaɣ sʋʋ ɖɩɣa taa kaaʋ.»
9 Nɛ Daviid caɣ tɛtʋ ɖoŋ ñɩndʋ taa, nɛ payaa-tʋ* se Daviid Tɛtʋ; nɛ Daviid paɣzɩ maʋ pɩ-cɔlɔ kpɛɛɛ, kpaɣnɩ Suyuu*+ nɛ pɩsʋʋ tɛtʋ taa.+
10 Nɛ Daviid wɛɛ nɛ ɛkpaɣ ɖoŋ pɩdɩɩfɛyɩ,+ nɛ yoyaa tɛ Ɛsɔ Yehowa kaawɛ ɛ-cɔlɔ.+
11 Tiirɩ wiyaʋ Hiram+ tiyi ɛyaa Daviid cɔlɔ, etiyini ɖɔɖɔ sɛɛdrɩ tɩʋ kpoŋgbolonaa,+ nɛ kafɩndanaa, nɛ pɛɛ kuduyuŋ mayaa se pama kolonzi, nɛ papaɣzɩ maʋ Daviid ɖɩɣa.*+
12 Nɛ Daviid tɩlɩ se Yehowa pɩsɩ-ɩ wiyaʋ Izrayɛɛlɩ taa nɛ ɛka camɩyɛ,+ nɛ Ɛsɔ samaɣ Izrayɛɛlɩ yɔɔ lɛ,+ Ɛsɔ kpazɩ e-kewiyaɣ ɖoŋ.+
13 Daviid lɩnɩ Ebrɔŋ nɛ ewolo Yeruzalɛm lɛ, ɛtasɩ wɛnʋʋ ɖaŋnaa+ nɛ ɛtasɩ kpaɣʋ ɖɔɖɔ halaa, nɛ patasɩ-ɩ lʋlʋʋ abalɩbiya nɛ halɩbiya.+
14 Piya nzɩ palʋlɩ-ɩ Yeruzalɛm yɔ sɩ-hɩla yɔ: Samuwaa, Sobaabɩ, Naataanɩ,+ Salomɔɔ,+
15 Ibaarɩ, Eliisuwa, Nefɛɛgɩ, Yafiya,
16 Eliisama, Eliyada nɛ Elifelɛɛtɩ.
17 Filistii mba nɩwa se pata Daviid num nɛ ɛpɩsɩ wiyaʋ Izrayɛɛlɩ yɔɔ lɛ,+ Filistii mba kpeekpe kpa se pañɩnɩ Daviid.+ Daviid nɩ mbʋ lɛ, etii ɖɩjɔzɩyɛ taa.+
18 Nɛ Filistii mba kɔɔ nɛ pamɩzɩ ɖama Refayim Fɛɛʋ* tɩŋa taa.+
19 Daviid pɔzɩ Yehowa+ se: «Pɩwɛɛ se mankpa Filistii mba wayɩ? Ŋkaɣ-wɛ ɖʋzʋʋ me-nesi tɛɛ?» Peeɖe Yehowa heyi Daviid se: «Kpa, mbʋ pʋyɔɔ yɔ pɩtʋʋ fɛyɩ se mankaɣ ɖʋzʋʋ Filistii mba ñe-nesi tɛɛ.»+
20 Nɛ Daviid wolo Baalɩ-Perazim, nɛ ɛwabɩ-wɛ peeɖe. Ðɩnɛ ɛlɛ ɛyɔɔdɩ se: «Yehowa yɔkaa nɛ ɛsʋʋ mon-koyindinaa taa+ mɛ-ɛsɩndaa, ɛzɩ lɩm yɔkʋʋ koloŋa yɔ.» Pʋyɔɔ ɛya lone nɖɩ se Baalɩ-Perazim.*+
21 Filistii mba yele pa-sɩʋ kpelisi peeɖe, nɛ Daviid nɛ ɛ-ɛyaa pakpaɣ-sɩ nɛ pɛɖɛna.
22 Pʋwayɩ lɛ, Filistii mba ɖaɣnɩ kpaʋ nɛ pamɩzɩ ɖama Refayim Fɛɛʋ*+ tɩŋa taa.
23 Daviid pɔzɩ Yehowa lɛ, ɛlɛ cosi se: «Taakpa nɛ ŋkatɩ-wɛ nɛ pɛ-ɛsɩndaa. Ɛlɛ cɔɔnɩ pa-wayɩ kiŋ, nɛ ŋwolo ŋyooni-wɛ cɔka wena payaɣ se baka yɔ a-ɛsɩndaa.
24 Nɛ alɩwaatʋ ndʋ ŋnɩɣ ɖɔnɛ taŋ cɔka wena payaɣ se baka yɔ a-ñʋŋ yɔɔ lɛ, la kpɛdɛyɛ; mbʋ pʋyɔɔ yɔ Yehowa tɛm ɖɛʋ ñɔ-nɔɔ se ɛkʋ Filistii mba sɔɔjanaa.»
25 Nɛ Daviid la ɖeyi ɖeyi ɛzɩ Yehowa ɖʋʋ-ɩ paɣtʋ yɔ, nɛ ɛkʋ Filistii mba+ kpaɣnɩ Geba+ nɛ piwolo pɩtalɩ ɖooo Gezɛɛrɩ.+
Pɩ-tɛɛ tɔm
^ Yaa «Ðɩkɛ ñɔ-hɔʋ taa ñɩma.»
^ Piye piye, «weyi ɛlɩɣaɣnɩ Izrayɛɛlɩ nɛ weyi ɛsʋwaɣnɩ-kʋ yɔ.»
^ Yaa «Daviid kalɩzaɣ.»
^ Pɩpɩzɩɣ pɩkɛ, «nɛ ɛyaa-tʋ.»
^ Yaa «Milo.» Ebree tɔm piye nɖɩ ɖɩ-tɔbʋʋ lɛ se «suyi.»
^ Yaa «awiya ɖɩɣa.»
^ Yaa «Kɛdɛɛŋa.»
^ Pʋ-tɔbʋʋ se «Yɔkʋʋ ñʋʋdʋ.»
^ Yaa «Kɛdɛɛŋa.»