Samɩyɛɛlɩ takayaɣ naalɛ ñɩŋga 7:1-29
7 Alɩwaatʋ ndʋ wiyaʋ kɔm nɛ ɛwɛɛ ɛ-maɣmaɣ ɛ-ɖɩɣa* taa+ nɛ Yehowa ya ɛ-ñʋʋ e-koyindinaa kpeekpe mba pɔcɔ-ɩ nɛ pata yɔ pe-nesi tɛɛ nɛ ɛha-ɩ hɛzɩyɛ lɛ,
2 eheyi nayʋ Naataanɩ+ se: «Na, mɛwɛ sɛɛdrɩ tɩŋ ɖɩɣa taa,+ ɛlɛ Ɛsɔ toovenim tʋ Aɖakaɣ ñɛwɛ kizinziku pɩsaŋ tɛɛ.»+
3 Naataanɩ cosi wiyaʋ se: «Wolo nɛ ŋla mbʋ payɩ pɩwɛ ña-laŋɩyɛ taa yɔ, mbʋ pʋyɔɔ yɔ Yehowa wɛ ñɔ-cɔlɔ.»+
4 Ðoo ana maɣmaɣ, Yehowa tɔm talɩ Naataanɩ se:
5 «Wolo nɛ ŋheyi ma-lɩmɖʋyʋ Daviid se: “Tɔm tʋnɛ Yehowa yɔɔdʋʋ: ‘Pɩwɛɛ se ŋma-m ɖɩɣa nɛ mancaɣ ka-taa yaa we?+
6 Mbʋ pʋyɔɔ yɔ mantɩcaɣ ɖɩɣa nakɛyɛ taa kpaɣnɩ kɩyakʋ ŋgʋ malɩzɩ Izrayɛɛlɩ samaɣ Ejipiti nɛ pɩkɔɔ pɩtalɩnɩ kɩyakʋ kʋnɛ yɔ,+ ɛlɛ mancakaɣ kizinziku tɛɛ nɛ Ɛsɔ sɛtʋ kɩɖanɖʋʋ tɛɛ+ nɛ mɔncɔʋ* kpaɣ lone nɛ ŋwolo lone lɛɛɖɛ taa.
7 Alɩwaatʋ ndʋ payɩ ma nɛ Izrayɛɛlɩ mba* kpeekpe ɖɩɖɔŋaɣ yɔ, wiɖiyi mɛntɛm pɔzʋʋ Izrayɛɛlɩ cejewe ñʋndɩnaa mba malɩzaa se peɖiyi man-samaɣ Izrayɛɛlɩ yɔ pa-taa nɔɔyʋ se: “Ɛbɛ yɔɔ ɩtɩma-m sɛɛdrɩ tɩŋ ɖɩɣa?”’”
8 Lɛɛlɛɛyɔ lɛ, heyi tɔm tʋnɛ ma-lɩmɖʋyʋ Daviid: “Tɔm tʋnɛ yoyaa tɛ Yehowa yɔɔdʋʋ: ‘Mankpaɣ-ŋ nɛ lona wena a-taa kpɩna tɔkɩ ñɩtʋ yɔ, ŋtɩŋaɣ kpɩna lɛ,+ se ŋpɩsɩ man-samaɣ Izrayɛɛlɩ ɖiyiyu.+
9 Nɛ mankaɣ wɛʋ ñɔ-cɔlɔ paa le ŋwoki yɔ,+ nɛ mankaɣ ɖɩzʋʋ ño-koyindinaa tɩŋa ñɛ-ɛsɩndaa;+ nɛ mankaɣ yebu nɛ ña-hɩɖɛ sɛɛ siŋŋ+ ɛzɩ ɛyaa sɔsaa mba pa-hɩla sɛ tɛtʋ yɔɔ yɔ.
10 Mankaɣ lɩzʋʋ man-samaɣ Izrayɛɛlɩ lone naɖɩyɛ nɛ mansɩɩ-kɛ peeɖe, nɛ kakaɣ wɛʋ peeɖe nɛ nɔɔyʋ ɛɛkaɣ-kɛ tasʋʋ cɛyʋʋ; nɛ ɛyaa kɩdɛkɛdaa ɩɩkaɣ-kɛ tasʋʋ nazʋʋ ɛzɩ paalabʋ-kɛ nɛ pɩɖɛɛ yɔ,+
11 kpaɣnɩ kɩyakʋ ŋgʋ malɩzɩ tɔm hʋyaa+ se peɖiyi man-samaɣ Izrayɛɛlɩ yɔ. Nɛ mankaɣ yabʋ ña-ñʋʋ ño-koyindinaa kpeekpe nesi tɛɛ nɛ maha-ŋ hɛzɩyɛ.+
«“‘Pɩtasɩ lɛ, Yehowa kaaheyi-ŋ se Yehowa kaɣ-ŋ maʋ ɖɩɣa.*+
12 Ña-kɩyakɩŋ kɔŋ nɛ ɩtɛ+ nɛ pahɩzɩ-ŋ ñɔ-cɔzɔnaa cɔlɔ lɛ, mankaɣ lɩzʋʋ ña-lʋlʋʋ taa tʋ* nɔɔyʋ ña-wayɩ, ña-maɣmaɣ ña-pɩyalʋ,* nɛ mankaɣ kam e-kewiyaɣ camɩyɛ.+
13 Ɛnʋ kaɣnɩ maʋ ɖɩɣa ŋga keyeki nɛ ma-hɩɖɛ sɛɛ yɔ,*+ nɛ mankaɣ kam e-kewiyaɣ kpelaɣ camɩyɛ tam.+
14 Mankaɣ pɩsʋʋ ɛ-caa, nɛ ɛkaɣ pɩsʋʋ man-pɩyalʋ.+ Ye ɛlabɩ mbʋ pɩfɛyɩ ɖeu yɔ, mankaɣ-ɩ tɔm kizinuu nɛ ɛyaa ɖaʋ, nɛ mankaɣ-ɩ luu ɛzɩ poluu ɛyaa* pɩyalaa yɔ.+
15 Maakaɣ lɛɣʋ mɔn-sɔɔlɩm siɣsiɣ ñɩmbʋ ɛ-cɔlɔ ɛzɩ maalɛɣʋ-pʋ Sɔɔlɩ+ weyi mankʋsɩ-ɩ ñɛ-ɛsɩndaa yɔ ɛ-cɔlɔ yɔ.
16 Ña-ɖɩɣa nɛ ñe-kewiyaɣ pakaɣ cɛyɩsʋʋ camɩyɛ tam ñɛ-ɛsɩndaa; ñe-kewiyaɣ kpelaɣ kaɣ kam camɩyɛ tam.’”»+
17 Naataanɩ heyi Daviid tɔm ndʋ tɩ-tɩŋa nɛ natʋ ndʋ tɩ-tɩŋa.+
18 Peeɖe Wiyaʋ Daviid sʋwa nɛ ɛcaɣ Yehowa ɛsɩndaa nɛ ɛyɔɔdɩ se: «Hayɩ Kɩbaɣlʋ Kɩlɩm Yehowa, ma lɛ anɩ? Nɛ ɛbɛ man-ɖɩɣa kɛnaa nɛ ŋlabɩ-m pɩtɩŋa payɩ mbʋ yɔ?+
19 Hayɩ Kɩbaɣlʋ Kɩlɩm Yehowa, ñɛ-ɛsɩndaa lɛ pɩtɩmaɣta, nɛ ŋyɔɔdɩ ɖɔɖɔ mbʋ pɩkaɣ labʋ ña-lɩmɖʋyʋ ɖɩɣa yɔ pɩ-tɔm, nɛ pɩkɔɔ nɛ pɩtalɩ ɖooo cee wayɩ alɩwaatʋ taa; nɛ pɩkɛnɩ paɣtʋ ɛyaa kpeekpe, hayɩ Kɩbaɣlʋ Kɩlɩm Yehowa.
20 Suwe ma ña-lɩmɖʋyʋ Daviid manpɩzɩɣ nɛ mantasɩ-ŋ heyuu mbʋ pʋyɔɔ yɔ ŋsɩmɩ-m camɩyɛ,+ hayɩ Kɩbaɣlʋ Kɩlɩm Yehowa?
21 Tɔm ndʋ ŋyɔɔdaa yɔ nɛ mbʋ ŋɖʋ ña-laŋɩyɛ taa yɔ* pʋyɔɔ lɛ, ŋlabɩ lakasɩ sɔsɔsɩ nzɩ sɩ-tɩŋa nɛ ŋlɩzɩ-sɩ nɛ ŋwɩlɩ ña-lɩmɖʋyʋ.+
22 Pʋyɔɔ ŋkɛ sɔsɔ toovenim taa,+ hayɩ Kɩbaɣlʋ Kɩlɩm Yehowa. Nɔɔyʋ fɛyɩ ɛzɩ ña yɔ,+ nɛ Ɛsɔ nɔɔyʋ fɛyɩ nɛ pɩtasɩnɩ-ŋ;+ tɔm ndʋ payɩ ɖɩnɩnɩ ɖa-nɩŋgbaaŋ yɔ tɩwɩlɩɣ se pɩkɛ toovenim.
23 Nɛ ɛjaɖɛ lɛɛɖɛ nɖɩ wɛ tɛtʋ yɔɔ ɛzɩ ña-samaɣ Izrayɛɛlɩ yɔ?+ Ña Ɛsɔ, ŋwoba nɛ ŋyabɩ-kɛ nɛ kɛkɛ ña-samaɣ,+ nɛ ŋtɩŋnɩ lakasɩ sɔsɔsɩ nɛ maamaaci lakasɩ nzɩ ŋlabɩ-kɛ yɔ sɩ-yɔɔ+ nɛ ŋla nɛ ña-hɩɖɛ sɛɛ.*+ Ŋɖɔɔnɩ ajɛɛ nɛ a-ɛsɔnaa ña-samaɣ yɔɔ, ña-samaɣ ŋga ŋyabɩ Ejipiti taa yɔ.
24 Ŋsɩ ña-samaɣ Izrayɛɛlɩ se kɛkɛ ña-maɣmaɣ ña-samaɣ tam;+ nɛ ña lɛ, hayɩ Yehowa, ŋpɩsɩ kɛ-Ɛsɔ.+
25 «Lɛɛlɛɛyɔ, hayɩ Yehowa Ɛsɔ, la lidaʋ tɔm ndʋ ŋyɔɔdɩ ña-lɩmɖʋyʋ nɛ ɛ-ɖɩɣa pɔ-yɔɔ yɔ tɩ-yɔɔ tam, nɛ ŋla ɖeyi ɖeyi ɛzɩ ŋyɔɔdʋʋ yɔ.+
26 Pasa ña-hɩɖɛ tam,+ se pɩsa nɛ ɛyaa yɔɔdɩ se: “Yoyaa tɛ Yehowa kɛ Ɛsɔ Izrayɛɛlɩ yɔɔ,” nɛ ña-lɩmɖʋyʋ Daviid ɖɩɣa ɛka camɩyɛ ñɛ-ɛsɩndaa.+
27 Mbʋ pʋyɔɔ yɔ ña Yoyaa tɛ Yehowa, Izrayɛɛlɩ tɛ Ɛsɔ lɛ, ŋkuli tɔm natʋyʋ yɔɔ nɛ ŋwɩlɩ ña-lɩmɖʋyʋ nɛ ŋyɔɔdɩ se: “Mankaɣ-ŋ maʋ ɖɩɣa.”*+ Pʋyɔɔ ña-lɩmɖʋyʋ wɛnɩ abalɩtʋ* se ɛtɩmnɩ-ŋ adɩma anɛ.
28 Nɛ lɛɛlɛɛyɔ lɛ, hayɩ Kɩbaɣlʋ Kɩlɩm Yehowa, ŋkɛ Ɛsɔ toovenim tʋ, nɛ ñɔ-tɔm kɛ toovenim,+ nɛ ŋheyi ña-lɩmɖʋyʋ se ŋkaɣ-ɩ labʋ lakasɩ kɩbanzɩ nzɩ.
29 Ye mbʋ, tɛtɛ nɛ pɩkɛdɩnɩ-ŋ nɛ ŋwazɩ ña-lɩmɖʋyʋ ɖɩɣa yɔɔ, nɛ ŋyele nɛ kɛwɛɛ tam ñɛ-ɛsɩndaa;+ mbʋ pʋyɔɔ yɔ ña, hayɩ Kɩbaɣlʋ Kɩlɩm Yehowa, ñɔyɔɔdɩnɩ lidaʋ tɔm ndʋ. Nɛ tɛtɛ nɛ ña-wazaɣ wɛɛ ña-lɩmɖʋyʋ ɖɩɣa yɔɔ tam.»+
Pɩ-tɛɛ tɔm
^ Yaa «ɛ-awiya ɖɩɣa.»
^ Piye piye, «mɔnɖɔŋ.»
^ Piye piye, «Izrayɛɛlɩ pɩyalaa.»
^ Yaa «awiya hɔʋ.»
^ Piye piye, «ño-ɖomaɣ.»
^ Piye piye, «weyi ɛkaɣ lɩnʋʋ ña-taa yɔ.»
^ Piye piye, «kaɣnɩ maʋ ma-hɩɖɛ ɖɩɣa.»
^ Pɩpɩzɩɣ pɩkɛ, «Aɖam.»
^ Yaa «nɛ mbʋ pɩlabɩ nɔɔ kʋɖʋmaɣ nɛ ñɔ-sɔɔlɩm yɔ.»
^ Piye piye, «nɛ ŋla ña-tɩ hɩɖɛ.»
^ Yaa «awiya hɔʋ.»
^ Piye piye, «ña-lɩmɖʋyʋ hiɣ ɛ-laŋɩyɛ.»