Samɩyɛɛlɩ takayaɣ naalɛ ñɩŋga 9:1-13
-
Daviid wɩlɩ Mefiibosɛɛtɩ sɔɔlɩmsiɣsiɣ ñɩmbʋ (1-13)
9 Nɛ Daviid pɔzɩ se: «Pɩtasɩ kazʋʋ nɔɔyʋ Sɔɔlɩ ɖɩɣa taa nɛ mawɩlɩ-ɩ sɔɔlɩm siɣsiɣ ñɩmbʋ ɛzɩ maalabʋ tamaɣ Yonataanɩ yɔ?»+
2 Payaɣaɣ Sɔɔlɩ ɖɩɣa taa lɩmɖʋyʋ nɔɔyʋ se Ziba.+ Nɛ powoni-i Daviid cɔlɔ, nɛ wiyaʋ pɔzɩ-ɩ se: «Ña payaɣ se Ziba?» Ɛlɛ cosi se: «Ɛɛɛ, man-kɩbaɣlʋ.»
3 Wiyaʋ tasɩ pɔzʋʋ se: «Pɩkazɩ nɔɔyʋ Sɔɔlɩ ɖɩɣa taa nɛ mawɩlɩ-ɩ Ɛsɔ sɔɔlɩm siɣsiɣ ñɩmbʋ yaa we?» Ziba cosi wiyaʋ se: «Pɩkazɩ Yonataanɩ pɩyalʋ nɔɔyʋ; pɩcamɩ ɛ-nɩŋgbanzɩ nzɩ sɩ-naalɛ.»*+
4 Wiyaʋ pɔzɩ-ɩ se: «Le ɛwɛɛ?» Ziba cosi wiyaʋ se: «Ɛwɛ Amiyɛɛlɩ pɩyalʋ Makiir+ ɖɩɣa taa Lo-Debar.»
5 Wiyaʋ Daviid tiyi kpaagbaa nɛ powolo pakpaɣ-ɩ Amiyɛɛlɩ pɩyalʋ Makiir ɖɩɣa taa Lo-Debar nɛ pɔkɔnɩ-ɩ.
6 Sɔɔlɩ sayɩ Mefiibosɛɛtɩ, Yonataanɩ pɩyalʋ talɩ Daviid cɔlɔ lɛ, ɛcaŋ eluŋ nɛ ɛpa ɛ-ɛsa nɛ tɛtʋ Daviid ɛsɩndaa. Nɛ Daviid yɔɔdɩ se: «Mefiibosɛɛtɩ!» Nɛ ɛlɛ cosi se: «Ña-lɩmɖʋyʋ yɔ.»
7 Daviid heyi-i se: «Sɔɔndʋ ɛtaakpa-ŋ, mbʋ pʋyɔɔ yɔ pɩtʋʋ fɛyɩ se mankaɣ-ŋ wɩlʋʋ sɔɔlɩm siɣsiɣ ñɩmbʋ+ ɛzɩ maalabʋ tamaɣ ña-caa Yonataanɩ yɔ, nɛ mankaɣ-ŋ pɩsɩnʋʋ ñɔ-cɔzɔ Sɔɔlɩ tɛtʋ kpeekpe, nɛ ŋkaɣ tɔɔʋ tɔɔnaɣ* man-taabɩlɩ yɔɔ paa ɛzɩmtaa.»+
8 Peeɖe eluŋaa nɛ ɛpa ɛ-ɛsa nɛ tɛtʋ nɛ ɛyɔɔdɩ se: «Anɩ ña-lɩmɖʋyʋ kɛnaa, nɛ ŋmaɣzɩ* ma weyi mɛnkɛ haɣ kɩsɩbaɣ+ yɔ mɔ-yɔɔ?»
9 Nɛ wiyaʋ tiyi nɛ payaa Sɔɔlɩ lɩmɖʋyʋ Ziba, nɛ eheyi-i se: «Mbʋ payɩ pɩɩkɛ Sɔɔlɩ ñɩm nɛ ɛ-ɖɩɣa kpeekpe ñɩm yɔ, mɛncɛlɩɣ-pʋ ña-ñʋʋdʋ sayɩ.+
10 Ña nɛ ña-pɩyalaa nɛ ña-lɩmɖʋyaa ɩkaɣ-ɩ hayʋʋ tɛtʋ ndʋ nɛ ɩkaɣ kpeɣluu mbʋ tɩlʋlʋʋ yɔ nɛ pɩkɛ ña-ñʋʋdʋ sayɩ ñɩma tɔɔnaɣ. Ɛlɛ ña-ñʋʋdʋ sayɩ Mefiibosɛɛtɩ kaɣ tɔɔʋ tɔɔnaɣ man-taabɩlɩ yɔɔ paa ɛzɩmtaa.»+
Ziba kaawɛnɩ abalɩbiya 15 nɛ lɩmɖʋyaa 20.+
11 Peeɖe Ziba cosi wiyaʋ se: «Ña-lɩmɖʋyʋ kaɣ labʋ mbʋ payɩ man-kɩbaɣlʋ wiyaʋ pɔzʋʋ ɛ-lɩmɖʋyʋ se ɛla yɔ.» Nɛ Mefiibosɛɛtɩ tɔɔ tɔɔnaɣ Daviid taabɩlɩ* yɔɔ ɛzɩ wiyaʋ pɩyalaa taa nɔɔyʋ yɔ.
12 Nɛ Mefiibosɛɛtɩ kaawɛnɩ evebu nɔɔyʋ nɛ payaɣ-ɩ se Mika;+ nɛ mba payɩ paawɛ Ziba ɖɩɣa taa yɔ, papɩsɩ Mefiibosɛɛtɩ lɩmɖʋyaa.
13 Nɛ Mefiibosɛɛtɩ wɛɛ Yeruzalɛm, mbʋ pʋyɔɔ yɔ ɛtɔkaɣ tɔɔnaɣ paa ɛzɩmtaa wiyaʋ taabɩlɩ yɔɔ.+ Nɛ pɩɩcamɩ ɛ-nɩŋgbanzɩ nzɩ sɩ-naalɛ.+
Pɩ-tɛɛ tɔm
^ Yaa «ɛkɛ kaakalaɣ.»
^ Piye piye, «ŋkaɣ tɔɔʋ kpɔnɔ.»
^ Piye piye, «nɛ ŋha ɛsa nɛ.»
^ Pɩpɩzɩɣ pɩkɛ, «man-taabɩlɩ.»