Kroniiki takayaɣ naalɛ ñɩŋga 12:1-16
12 Robowam kewiyitu kam camɩyɛ nɛ ɛpɩsɩ ɖoŋ tʋ nɛ pɩla alɩwaatʋ pazɩ lɛ,+ ɛlɔ Yehowa Paɣtʋ,+ nɛ Izrayɛɛlɩ kpeekpe la ɖɔɖɔ ɛzɩ ɛnʋ yɔ.
2 Wiyaʋ Robowam pɩnaɣ 5 ñɩŋga taa, Ejipiti wiyaʋ Sisaakɩ+ kpawa nɛ eyooni Yeruzalɛm, mbʋ pʋyɔɔ yɔ pataala mbʋ pɩwɛ siɣsiɣ yɔ Yehowa ɛsɩndaa.
3 Ɛɛwɛnɩ kɛɛkɛɛnaa 1 200, kpaŋnaŋ yɔɔ caɣyaa 60 000, nɛ sɔɔjanaa mba pɛfɛyɩ kalʋʋ yɔ, mba ɛ nɛ wɛ palɩnɩ Ejipiti nɛ pɔkɔɔ yɔ—Liibii mba, Suki mba nɛ Etiyoopii mba.+
4 Ɛmʋ Yuuda tɛtʋ ɖoŋ ñɩndʋ ndɩ ndɩ nɛ ɛkɔɔ ɛtalɩ Yeruzalɛm.
5 Nayʋ Semayaa+ kɔɔ Robowam cɔlɔ nɛ Yuuda awumbiya mba peseɣaɣ Sisaakɩ sɔɔndʋ nɛ pekpeɣli Yeruzalɛm yɔ pɔ-cɔlɔ, nɛ eheyi-wɛ se: «Tɔm tʋnɛ Yehowa yɔɔdʋʋ: “Ɩlɔ-m, pʋyɔɔ lɛ ma ɖɔɖɔ manɖʋzɩ-mɩ Sisaakɩ nesi tɛɛ.”»+
6 Peeɖe Izrayɛɛlɩ awumbiya nɛ wiyaʋ poluzi pa-tɩ+ nɛ pɔyɔɔdɩ se: «Yehowa wɛ siɣsiɣ.»
7 Yehowa nawa se poluzi pa-tɩ lɛ, Yehowa tɔm talɩ Semayaa se: «Poluzi pa-tɩ. Maakaɣ-wɛ ɖɩzʋʋ;+ nɛ pɩkazɩ pazɩ lɛ, mankaɣ pa-ñʋʋ yabʋ. Maakaɣ tɩŋnʋʋ Sisaakɩ yɔɔ nɛ manpɩyɩ man-pana Yeruzalɛm yɔɔ.
8 Ɛlɛ pakaɣ pɩsʋʋ ɛ-lɩmɖʋyaa, se pɩsa nɛ patɩlɩ tʋkaɣ ŋga kɛwɛ ma-lɩm ɖʋʋ nɛ ajɛɛ lɛɛna awiya* lɩm ɖʋʋ pɛ-hɛkʋ taa yɔ.»
9 Nɛ Ejipiti wiyaʋ Sisaakɩ kpa nɛ eyooni Yeruzalɛm. Ɛkpaɣ Yehowa ɖɩɣa taa ñɩm+ nɛ wiyaʋ ɖɩɣa taa ñɩm. Ɛkpaɣ pɩtɩŋa, pɩkpɛndɩnɩ sika kpayɩŋ weyi Salomɔɔ kaalaba yɔ.+
10 Peeɖe Wiyaʋ Robowam labɩ ñɩɣyʋʋ kɩsɛɛmʋʋ kpayɩŋ se ɛlɛɣzɩ i-lone taa, nɛ ɛɖʋzɩ-ɩ kandɩyaa* ñʋndɩnaa mba paɖaŋaɣ wiyaʋ ɖɩɣa nɔnɔɔ yɔɔ yɔ pe-nesi tɛɛ.
11 Alɩwaatʋ ndʋ payɩ wiyaʋ kɔŋaɣ Yehowa ɖɩɣa taa yɔ, kandɩyaa sʋwaɣ nɛ pakpakɩɣ kpayɩŋ ɛnɩ, nɛ pʋwayɩ lɛ papɩsaɣnɩ-ɩ kuduyuu ŋgʋ kɩ-tɛɛ paasɩ-ɩ nɛ paɖaŋ ɩ-yɔɔ yɔ.
12 Wiyaʋ luzi ɛ-tɩ; pʋyɔɔ lɛ, Yehowa yebi-i nɛ pana kɔʋ,+ nɛ ɛtɩɖɩzɩ-wɛ caɣ caɣ.+ Pɩtasɩ lɛ, pana lakasɩ kɩbanzɩ nasɩyɩ* Yuuda taa.+
13 Wiyaʋ Robowam kpazɩ e-kewiyitu ɖoŋ Yeruzalɛm taa nɛ ewolo pɩ-yɔɔ nɛ ɛtɔkɩ kewiyitu; Robowam kaawɛnɩ pɩnzɩ 41 alɩwaatʋ ndʋ ɛpɩsɩ wiyaʋ yɔ, nɛ ɛtɔɔ kewiyitu pɩnzɩ 17 Yeruzalɛm, tɛtʋ ndʋ Yehowa kaalɩzɩ Izrayɛɛlɩ cejewe kpeekpe taa se ɛ-hɩɖɛ ɛwɛɛ peeɖe yɔ. Payaɣaɣ wiyaʋ ɖoo se Amooni tʋ Naama.+
14 Ɛlɛ Robowam labɩ mbʋ pɩfɛyɩ ɖeu yɔ, mbʋ pʋyɔɔ yɔ ɛtaatɛ ɛ-taa* se ɛñɩnɩɣ Yehowa.+
15 Piyele nɛ Robowam yɔɔ tɔm lɛ, kpaɣnɩ kiɖe tɛɛ nɛ piwolo tɩnaɣ yɔɔ, ɛzɩ patɩma-tʋ tɔm ndʋ nayʋ Semayaa+ nɛ Ido+ weyi ɛnaɣ natʋ yɔ pamawa nɛ tɩwɛɛ liɖe takayɩsɩ taa yɔ tɩ-taa yaa we? Nɛ you kaawɛ Robowam nɛ Yerobowam pɛ-hɛkʋ taa paa ɛzɩmtaa.+
16 Pʋwayɩ lɛ, Robowam sɩ* nɛ pepimi-i Daviid Tɛtʋ taa;+ nɛ ɛ-pɩyalʋ Abiya+ pɩsɩ wiyaʋ e-lone taa.
Pɩ-tɛɛ tɔm
^ Piye piye, «kewiyisi.»
^ Piye piye, «seyaa.»
^ Yaa «tʋma kɩbana naayɛ.»
^ Piye piye, «ɛtaaɖʋ ɛ-laŋɩyɛ taa.»
^ Piye piye, «pahɩzɩ Robowam ɛ-cɔzɔnaa cɔlɔ.»