Kroniiki takayaɣ naalɛ ñɩŋga 13:1-22
13 Wiyaʋ Yerobowam kewiyitu tɔɔʋ pɩnaɣ 18 ñɩŋga taa lɛ, Abiya pɩsɩ Yuuda wiyaʋ.+
2 Ɛtɔɔ kewiyitu Yeruzalɛm pɩnzɩ 3. Payaɣaɣ e-ɖoo se Mikayiya,+ Gibeyaa+ tʋ Uriyɛɛlɩ pɛlɛ. Nɛ you kaawɛ Abiya nɛ Yerobowam pɛ-hɛkʋ taa.+
3 Nɛ Abiya ɖɛɛ you, ɛ nɛ sɔɔjanaa sɔdɩŋ ɖoŋ tɩnaa 400 000, mba pafalɩsɩ-wɛ yɔ.*+ Nɛ Yerobowam ñɔɔzɩ ɛ-ɛyaa 800 000 mba pafalɩsɩ-wɛ yɔ* se poyooni-i, paakɛ sɔdɩŋ ɖoŋ tɩnaa.
4 Nɛ Abiya sɩŋ Zemarayim Pʋʋ ŋgʋ kɩwɛ Efrayim pʋŋ egeetiye taa yɔ kɩ-yɔɔ, nɛ ɛyɔɔdɩ se: «Iwelisini-m, Oo Yerobowam nɛ Izrayɛɛlɩ kpeekpe.
5 Ɩɩsɩŋ se Izrayɛɛlɩ tɛ Ɛsɔ Yehowa tɩŋnɩ ɖɔm ɛgbɛyɛ*+ naɖɩyɛ yɔɔ nɛ ɛcɛlɩ kewiyaɣ Daviid nɛ ɛ-pɩyalaa+ se pɔtɔɔ kewiyitu Izrayɛɛlɩ yɔɔ tam+ yaa we?
6 Ɛlɛ Nebatɩ pɩyalʋ Yerobowam,+ weyi ɛkɛ Daviid pɩyalʋ Salomɔɔ lɩmɖʋyʋ yɔ, ɛkʋyɩ nɛ ɛkaɖɩnɩ ɛ-kɩbaɣlʋ.+
7 Nɛ ɛyaa feendu tɩnaa, mba pɛfɛyɩ wazaɣ nakɛyɛ yɔ pɛwɛɛ nɛ pekpeɣliɣ ɛ-cɔlɔ. Nɛ pakɩlɩ ɖoŋ Salomɔɔ pɩyalʋ Robowam; alɩwaatʋ ndʋ lɛ Robowam kaakɛ evebu yem nɛ ɛɛwɛ sɔɔndʋ, nɛ ɛtaapɩzɩɣ se ɛkaɖɩnɩ-wɛ.
8 «Nɛ lɛɛlɛɛyɔ ɩmaɣzɩɣ se ɩpɩzɩɣ nɛ ɩkaɖɩnɩ Yehowa kewiyaɣ ŋga kɛwɛ Daviid pɩyalaa nesi tɛɛ yɔ, mbʋ pʋyɔɔ yɔ ɩkɛ samaɣ sɔsɔɔ nɛ ɩwɛnɩ sika newee wena Yerobowam laba nɛ akɛ mɩ-ɛsɔnaa yɔ.+
9 Ɛzɩ ɩtɩɖɔɔnɩ Yehowa cɔjɔnaa,+ Aarɔɔnɩ lʋlʋʋ taa mba, nɛ Leevi mba, nɛ ɩlɩzɩ mɩ-maɣmaɣ mɩ-cɔjɔnaa ɛzɩ ajɛɛ lɛɛna taa samasɩ lakʋʋ yɔ?+ Weyi ɛkpɛndɩɣnɩ nɔ* abalɩñɩnʋ nɛ ɛyaŋ 7 nɛ ɛkɔɔ yɔ, ɛpɩzɩɣ nɛ ɛpɩsɩ mba patɩkɛ ɛsɔnaa yɔ pɔ-cɔjɔ.
10 Piyele nɛ ɖa yɔ, Yehowa kɛnɩ ɖɛ-Ɛsɔ,+ nɛ ɖɩtɩlɔ-ɩ; ɖɔ-cɔjɔnaa, Aarɔɔnɩ lʋlʋʋ taa mba, wɛɛ paɖʋʋ Yehowa lɩm, nɛ Leevi mba sɩɣnɩ-wɛ pa-tʋmɩyɛ taa.
11 Pɛwɛɛ palakɩ nɛ kɩlaŋ kɩñaɣzɩŋ ñɔsɩ kpaɣ Yehowa cɔlɔ paa tanaŋ ŋgʋ nɛ paa ɖanaɣ ŋga,+ pɩkpɛndɩnɩ ŋgee tɩlaaɖɩ sɔzɩŋ ñɩŋgʋ,+ nɛ kpɔnɔnaa mba patɩnɩɣ-wɛ ɖama yɔɔ yɔ*+ pɛwɛ sika kele kele ñɩŋga taabɩlɩ yɔɔ, nɛ pɔsɔkɩ kanɖʋnaa mba pɛwɛ sika kanɖʋnaa ɖɩzɩyɛ+ yɔɔ yɔ miŋ paa ɖanaɣ ŋga,+ mbʋ pʋyɔɔ yɔ ɖɩwɛɛ nɛ ɖɩlakɩ tʋmɩyɛ nɖɩ ɖɛ-Ɛsɔ Yehowa ɖʋ-ɖʋ yɔ; ɛlɛ mɩ lɛ ɩlɔ-ɩ.
12 Lɛɛlɛɛyɔ ɩna! Ɛsɔ toovenim tʋ wɛ ɖɔ-cɔlɔ nɛ eɖiyiɣ-ɖʋ. Nɛ ɛ-cɔjɔnaa wɛ ɖɔ-cɔlɔ nɛ aganda se pahʋlɩ nɛ pɩwɩlɩ se ɖiyouni-mɩ. Oo Izrayɛɛlɩ ɛyaa, itaayooni mɩ-cɔzɔnaa tɛ Ɛsɔ Yehowa, mbʋ pʋyɔɔ yɔ ɩɩkaɣ wabʋ.»+
13 Ɛlɛ Yerobowam tiyi sɔɔjanaa nabɛyɛ se powolo nɛ papabɩ Yuuda mba nɛ palɩɩnɩ pa-wayɩ nɛ poyooni-wɛ. Piyeba nɛ ɛ-sɔɔjanaa mba pakazaa yɔ pɛwɛɛ Yuuda ɛsɩndaa nɛ mba papabaa yɔ paba wɛɛnɩ pa-wayɩ.
14 Yuuda sɔɔjanaa kisaa lɛ, pana se pɩwɛɛ se poyooni pɛ-ɛsɩndaa mba nɛ pa-wayɩ mba ɖɔɖɔ. Nɛ papaɣzɩ kubusi mabʋ nɛ payaɣ Yehowa;+ alɩwaatʋ ndʋ lɛ, cɔjɔnaa ñaawɛɛ nɛ pahʋlʋʋ aganda ɖoŋ.
15 Yuuda sɔɔjanaa ma you kubuka, nɛ alɩwaatʋ ndʋ Yuuda sɔɔjanaa mabɩ you kubuka yɔ, Ɛsɔ toovenim tʋ wa Yerobowam nɛ Izrayɛɛlɩ kpeekpe, Abiya nɛ Yuuda pɛ-ɛsɩndaa.
16 Izrayɛɛlɩ mba se Yuuda ɛsɩndaa, nɛ Ɛsɔ ɖʋzɩ-wɛ pe-nesi tɛɛ.
17 Abiya nɛ ɛ-ɛyaa pakʋ-wɛ siŋŋ, nɛ Izrayɛɛlɩ ñɩma mba pakʋwa yɔ, pɛkpɛndɩ ɛyaa 500 000 mba pafalɩsɩ-wɛ yɔ.*
18 Mbʋ poluzi Izrayɛɛlɩ mba alɩwaatʋ ndʋ tɩ-taa. Ɛlɛ Yuuda ɛyaa waba mbʋ pʋyɔɔ yɔ pata pɔ-cɔzɔnaa tɛ Ɛsɔ Yehowa liu.+
19 Abiya ɖʋ Yerobowam wayɩ nɛ ɛmʋ ɛ-cɔlɔ tɛtʋ ndɩ ndɩ, Betɛɛlɩ+ nɛ kɩ-tɛtʋ cikpetu ndɩ ndɩ,* Yesana nɛ kɩ-tɛtʋ cikpetu ndɩ ndɩ, nɛ Efrayin+ nɛ kɩ-tɛtʋ cikpetu ndɩ ndɩ.
20 Nɛ Yerobowam tɩtasɩ hiɣu e-ɖoŋ wiɖiyi Abiya alɩwaatʋ taa; nɛ Yehowa hɔ ɛ-nɩŋgbaŋʋʋ nɛ ɛsɩ.+
21 Ɛlɛ Abiya kpa ɖoŋ. Ɛkɔm nɛ ɛwɛɛnɩ halaa 14+ nɛ palʋlɩ-ɩ abalɩbiya 22 nɛ halɩbiya 16.
22 Nɛ Abiya yɔɔ tɔm ndʋ pɩkazaa yɔ, ɛ-tʋma nɛ ɛ-tɔm lɛ, pama-tʋ nayʋ Ido+ takayɩsɩ* taa.
Pɩ-tɛɛ tɔm
^ Piye piye, «mba pɔtɔzɩ-wɛ yɔ.»
^ Piye piye, «mba pɔtɔzɩ-wɛ yɔ.»
^ Pʋ-tɔbʋʋ se ɛgbɛyɛ nɖɩ ɖɩwɛɣ tam nɛ ɖɩɩlɛɣzɩɣ yɔ.
^ Nɔ weyi ɛ nɛ e-ɖoŋ nɛ ɛtɩkpadɩyɩ yɔ ɛ-tɔm pɔyɔɔdʋʋ.
^ Pʋ-tɔbʋʋ se Ɛsɔ ɛsɩndaa kpɔnɔnaa.
^ Piye piye, «mba pɔtɔzɩ-wɛ yɔ.»
^ Yaa «nɛ tɛtʋ cikpetu ndɩ ndɩ ndʋ tɩcɔ-kʋ nɛ tɩta yɔ.»
^ Yaa «tɔm taa lɩzʋʋ.»
