Kroniiki takayaɣ naalɛ ñɩŋga 15:1-19
-
Lɛɣzɩtʋ ndʋ Aazaa laba yɔ (1-19)
15 Nɛ Ɛsɔ fezuu tii Odɛɛdɩ pɩyalʋ Azariya yɔɔ.
2 Nɛ ɛlɩɩ ɛkatɩ Aazaa nɛ eheyi-i se: «Iwelisini-m, Oo Aazaa nɛ Yuuda kpeekpe nɛ Bɛnjamɛɛ kpeekpe! Yehowa wɛ mɩ-cɔlɔ alɩwaatʋ ndʋ payɩ ɩwɛɣ ɛ-cɔlɔ yɔ;+ nɛ ye ɩñɩnɩɣ-ɩ yɔ ɛkaɣ yebu nɛ ɩna-ɩ,+ ɛlɛ ye ɩlɔ-ɩ yɔ, ɛkaɣ-mɩ lɔʋ.+
3 Pɩlabɩ alɩwaatʋ sakɩyɛ,* Ɛsɔ toovenim tʋ taawɛɛ Izrayɛɛlɩ taa, cɔjɔ taawɛɛ se ɛwɩlɩ tɔm, nɛ paɣtʋ taawɛɛ.+
4 Ɛlɛ alɩwaatʋ ndʋ paawɛ kʋñɔŋ taa nɛ papɩsɩnɩ Izrayɛɛlɩ tɛ Ɛsɔ Yehowa yɔɔ nɛ pañɩnɩ-ɩ lɛ, eyebi ɛ-tɩ nɛ pana-ɩ.+
5 Alɩwaatʋ ndʋ tɩ-taa lɛ, nɔɔyʋ taapɩzɩɣ se ewolo nʋmɔʋ nɛ ɛtɩkatɩ kaɖɛ naɖɩyɛ,* mbʋ pʋyɔɔ yɔ ñam ñam lakasɩ kaawɛ ajɛɛ taa mba tɩŋa hɛkʋ taa.
6 Ɛjaɖɛ naɖɩyɛ naŋaɣ ɛjaɖɛ lɛɛɖɛ, nɛ tɛtʋ natʋyʋ naŋaɣ tɛtʋ lɛɛtʋ, mbʋ pʋyɔɔ yɔ Ɛsɔ tɩŋnɩ kʋñɔmɩŋ ndɩ ndɩ yɔɔ nɛ eyele nɛ pisidiɣ pɛ-hɛkʋ taa yem yem.+
7 Ɛlɛ mɩ lɛ, ɩwɛɛ ɖoŋ nɛ pitaatibi-mɩ yɔɔɔ,*+ mbʋ pʋyɔɔ yɔ pakaɣ-mɩ hɛyʋʋ mɩ-tʋmɩyɛ yɔɔ.»
8 Aazaa tɩɩnɩ tɔm ndʋ nɛ nayʋ Odɛɛdɩ natʋ tɔm lɛ, pɩha-ɩ abalɩtʋ nɛ ɛɖɩzɩ sɩʋ kpelisi nzɩ sɩwɛ kiniŋ yɔ Yuuda ɛjaɖɛ kpeekpe taa+ nɛ Bɛnjamɛɛ taa nɛ tɛtʋ ndɩ ndɩ ndʋ ɛmʋ Efrayim pʋŋ egeetiye taa yɔ tɩ-taa, nɛ ɛñɔɔzɩ Yehowa altaaru ŋgʋ kɩɩwɛ Yehowa kʋjɔŋ ɛsɩndaa yɔ.+
9 Nɛ ekpeɣli Yuuda kpeekpe nɛ Bɛnjamɛɛ kpeekpe nɛ agɔma mba palɩnɩ Efrayim nɛ Manaasee nɛ Siimeyɔɔ nɛ pɛwɛɛ pɔ-cɔlɔ yɔ,+ mbʋ pʋyɔɔ yɔ ɛyaa sakɩyɛ kaase Izrayɛɛlɩ nɛ powolo ɛ-cɔlɔ alɩwaatʋ ndʋ panawa se ɛ-Ɛsɔ Yehowa wɛ ɛ-cɔlɔ yɔ.
10 Nɛ pekpeɣli Yeruzalɛm, Aazaa kewiyitu tɔɔʋ pɩnaɣ 15 ñɩŋga tɛ fenaɣ 3 ñɩŋga taa.
11 Kɩyakʋ ŋgʋ ki-wiye, pakpaɣ wondu ndʋ palazaa nɛ pɔkɔna yɔ tɩ-taa natʋyʋ nɛ palaa Yehowa kɩlaʋ, naŋ 700 nɛ heŋ 7 000.
12 Pɩtasɩ lɛ, paɖʋ ɖama nɛ ɛgbɛyɛ se pañɩnɩɣ pɔ-cɔzɔnaa tɛ Ɛsɔ Yehowa nɛ pa-laŋɩyɛ pilim nɛ pa-kalɩzaɣ* pilim.+
13 Weyi ɛɛñɩnɩɣ Izrayɛɛlɩ tɛ Ɛsɔ Yehowa yɔ, pɩwɛɛ se pakʋ-ɩ, paa ɛkɛ cikpelu yaa sɔsɔ, abalʋ yaa halʋ yɔ.+
14 Peeɖe poɖuuni Yehowa nɛ nɔɔ kɩkʋyaɣ nɛ taa leleŋ kubusi, nɛ aganda nɛ nɔndɔŋ.
15 Nɛ Yuuda kpeekpe taa la leleŋ nɛ ɖuutu ndʋ, mbʋ pʋyɔɔ yɔ poɖuu ɖuutu ndʋ nɛ pa-laŋɩyɛ pilim nɛ pañɩnɩ-ɩ nɛ kpekpeka nɛ eyele ɛ-tɩ nɛ pana-ɩ,+ nɛ Yehowa wolo pɩ-yɔɔ nɛ ɛhaɣ-wɛ hɛzɩyɛ hɔɔlɩŋ kpeekpe taa.+
16 Halɩ wiyaʋ Aazaa mʋ wiyaʋ ɖoo waɖɛ nɖɩ e-neze Maaka+ kaawɛna yɔ, mbʋ pʋyɔɔ yɔ ɛlɛ labɩ sɩʋ kpeliɣa ŋga kɛwɛ kʋzɔɔtʋ pɩdɩɩfɛyɩ yɔ se palabɩnɩ tʋmɩyɛ sizika kiɖeɖeɣa* sɛtʋ taa.+ Aazaa yɔkɩ ɛ-sɩʋ kpeliɣa kʋzɔɔtʋ ñɩŋga ŋga nɛ ɛnaŋ-kɛ nɛ ɛñaɣzɩ-kɛ miŋ Kidrɔɔnɩ Fɛɛʋ taa.+
17 Ɛlɛ patɩyɔkɩ lona kʋkʋya+ Izrayɛɛlɩ taa.+ Paa mbʋ yɔ, Aazaa laŋɩyɛ kaawɛ pilim e-wezuu* kpeekpe taa.+
18 Nɛ ɛkɔnɩ wondu ndʋ ɛ nɛ ɛ-caa paapɩsɩ-tʋ kiɖeɖetu yɔ Ɛsɔ toovenim tʋ ɖɩɣa taa: liidiye, sika nɛ wondu ndɩ ndɩ.+
19 You taawɛɛ nɛ pɩkɔɔ pɩtalɩ Aazaa kewiyitu tɔɔʋ pɩnaɣ 35 ñɩŋga taa.+
Pɩ-tɛɛ tɔm
^ Piye piye, «Nɛ kɩyakɩŋ sakɩyɛ.»
^ Piye piye, «weyi ɛlɩɣ yɔ yaa weyi ɛsʋʋ yɔ, ɛtaawɛɛnɩ laŋhɛzɩyɛ.»
^ Piye piye, «nɛ itaayele nɛ mi-nesi tii yɔɔɔ.»
^ Cɔnɩ Tɔm pee sɔsɔna tɔbʋʋ lɩzʋʋ.
^ Cɔnɩ Tɔm pee sɔsɔna tɔbʋʋ lɩzʋʋ.
^ Piye piye, «ɛ-kɩyakɩŋ.»
