Kroniiki takayaɣ naalɛ ñɩŋga 21:1-20
21 Pʋwayɩ lɛ, Yozafaatɩ sɩ* nɛ pepimi-i ɛ-cɔzɔnaa cɔlɔ, Daviid Tɛtʋ taa; nɛ ɛ-pɩyalʋ Yehoram pɩsɩ wiyaʋ e-lone taa.+
2 Yehoram newaa, Yozafaatɩ pɩyalaa yɔ: Azariya, Yehiyɛɛlɩ, Zakarii, Azariya, Mikayɛɛlɩ, nɛ Sefatiya. Pa-tɩŋa pɛkɛ Izrayɛɛlɩ wiyaʋ Yozafaatɩ pɩyalaa.
3 Nɛ pa-caa kaalabɩ-wɛ kʋjɔŋ sakɩyɛ: Liidiye nɛ sika, nɛ wondu ndʋ tɩmʋ ñɩm yɔ, pɩ nɛ tɛtʋ ɖoŋ ñɩndʋ ndɩ ndɩ Yuuda taa.+ Ɛlɛ ɛcɛlɩ kewiyaɣ Yehoram,+ mbʋ pʋyɔɔ yɔ ɛnʋ kaakɛnɩ kajalaɣ pɩɣa.
4 Yehoram kɔm nɛ ɛpaɣzɩ ɖiyuu ɛ-caa kewiyaɣ lɛ, ɛkʋ e-newaa tɩŋa+ nɛ laɣɖɛ, pɩkpɛndɩnɩ Izrayɛɛlɩ awumbiya taa nabɛyɛ nɛ ɛkpazɩnɩ e-kewiyitu ɖoŋ.
5 Yehoram kaawɛnɩ pɩnzɩ 32 alɩwaatʋ ndʋ ɛpɩsɩ wiyaʋ yɔ, nɛ ɛtɔɔ kewiyitu pɩnzɩ 8 Yeruzalɛm.+
6 Ɛɖɔm Izrayɛɛlɩ awiya nʋmɔʋ taa+ ɛzɩ Ahaabɩ ɖɩɣa taa ñɩma kaalabʋ yɔ, mbʋ pʋyɔɔ yɔ ɛɛkpaɣ Ahaabɩ pɛlɛ nɛ ɛpɩsɩ-ɩ ɛ-halʋ;+ nɛ ewolo pɩ-yɔɔ nɛ ɛlakɩ mbʋ pɩfɛyɩ ɖeu Yehowa ɛsɩndaa yɔ.
7 Ɛlɛ Yehowa taasɔɔlɩ se ɛɖɩzɩ Daviid ɖɩɣa, ɛgbɛyɛ nɖɩ ɛɛɖʋnɩ Daviid yɔ ɖɩ-yɔɔ,+ mbʋ pʋyɔɔ yɔ ɛyɔɔdɩ lidaʋ tɔm se ɛkaɣ haʋ kanɖʋ ɛ nɛ ɛ-pɩyalaa tam.+
8 Yehoram alɩwaatʋ taa, Edom kʋyaa nɛ kɩkaɖɩnɩ Yuuda+ nɛ kɩsɩɩ kɩ-maɣmaɣ ki-wiyaʋ.+
9 Peeɖe Yehoram nɛ ɛ-sɔɔjanaa ñʋndɩnaa pɛtɛzaa, pa nɛ ɛ-kɛɛkɛɛnaa tɩŋa, nɛ ɛkʋyɩnɩ ɖoo nɛ eyooni Edom ñɩma mba paacɔ ɛ nɛ kɛɛkɛɛnaa ñʋndɩnaa nɛ pata yɔ nɛ ɛwabɩ-wɛ.
10 Ɛlɛ Edom wɛɛ nɛ kɩkaɖɩɣnɩ Yuuda halɩ nɛ sɔnɔ. Libna+ ɖɔɖɔ kʋyaa nɛ kɩkaɖɩnɩ-ɩ alɩwaatʋ ndʋ tɩ-taa, mbʋ pʋyɔɔ yɔ ɛɛlɔ ɛ-cɔzɔnaa tɛ Ɛsɔ Yehowa.+
11 Ɛɛlabɩ ɖɔɖɔ lona kʋkʋya+ Yuuda pʋŋ yɔɔ se eyele nɛ Yeruzalɛm taa mba la fezuu taa hayitu, nɛ elesi Yuuda.
12 Pɩkɔm nɛ pɩtalɩ alɩwaatʋ natʋyʋ lɛ, takayaɣ nakɛyɛ lɩɩnɩ nayʋ Eliya+ cɔlɔ nɛ katalɩ-ɩ. Kɔyɔɔdʋʋ se: «Tɔm tʋnɛ ñɔ-cɔzɔ Daviid tɛ Ɛsɔ Yehowa yɔɔdʋʋ: “Ŋtɩɖɔ ña-caa Yozafaatɩ nʋmɔŋ taa+ yaa Yuuda wiyaʋ Aazaa+ nʋmɔŋ taa.
13 Ɛlɛ ŋɖɔŋ Izrayɛɛlɩ awiya nʋmɔʋ taa+ nɛ ŋyeki se Yuuda nɛ Yeruzalɛm taa mba pala fezuu taa hayitu+ ɛzɩ Ahaabɩ ɖɩɣa hayitu yɔ,+ nɛ halɩ ŋkʋ ña-maɣmaɣ ñe-newaa,+ ña-caa ɖɩɣa taa mba, mba pakpaɖɩ-ŋ ɖeu yɔ.
14 Pʋyɔɔ lɛ, Yehowa kɔŋnɩ asɛyʋʋ sɔsɔʋ ña-samaɣ, ña-pɩyalaa, ña-halaa, nɛ ña-ñɩm kpeekpe yɔɔ.
15 Nɛ ŋkaɣ hɩnʋʋ kʋdɔmɩŋ sakɩyɛ, pɩkpɛndɩnɩ kʋdɔŋ ŋgʋ kɩkaɣ kpaʋ ña-taa lotu yɔ; nɛ kʋdɔŋ yɔɔ lɛ, ña-taa lotu kaɣ lɩʋ, kpaɣ evemiye nɛ ŋwolo evemiye.”»
16 Nɛ Yehowa seɣti+ Filistii mba*+ nɛ Arabii ñɩma+ mba paañɔtɩnɩ Etiyoopii mba yɔ, nɛ pakʋyɩ Yehoram yɔɔ.
17 Nɛ pakʋyɩ powolo Yuuda wayɩ, nɛ pasʋʋ kɩ-taa nɛ ɖoŋ, nɛ pakpaɣ ñɩm mbʋ pana wiyaʋ ɖɩɣa taa yɔ pi-kpeekpe,+ pɩkpɛndɩnɩ ɛ-pɩyalaa nɛ ɛ-halaa; nɛ ɛ-pɩyalaa taa cikpelu Yehowahazɩ*+ ɖeke pɩkazɩ-ɩ.
18 Nɛ pɩtɩŋa mbʋ yɔ pʋwayɩ lɛ, Yehowa yele nɛ kʋdɔŋ ŋgʋ kɩfɛyɩnɩ kɔyɛ yɔ kɩkpa ɛ-taa lotu.+
19 Alɩwaatʋ natʋyʋ wayɩ, pɩnzɩ 2 pilim ɖɛwa lɛ, ɛ-kʋdɔŋ ŋgʋ kɩ-yɔɔ lɛ, ɛ-taa lotu lɩɩ, nɛ ɛsɩ alɩwaatʋ ndʋ ɛɛwɛɛ nɛ ɛnɩɣ siziŋ siŋŋ ɛ-kʋdɔŋ ŋgʋ kɩ-taa yɔ; nɛ ɛ-samaɣ tɩsɔ miŋ se paɖʋnɩ-ɩ hɩɖɛ, ɛzɩ paasɔbʋ miŋ nɛ paɖʋnɩ hɩɖɛ ɛ-cɔzɔnaa yɔ.+
20 Ɛɛwɛnɩ pɩnzɩ 32 alɩwaatʋ ndʋ ɛpɩsɩ wiyaʋ yɔ, nɛ ɛtɔɔ kewiyitu pɩnzɩ 8 Yeruzalɛm. Pɩtɩcɛyɩ nɔɔyʋ alɩwaatʋ ndʋ ɛsɩba yɔ. Nɛ pepimi-i Daviid Tɛtʋ taa,+ ɛlɛ pɩtɩkɛ awiya pɩlaŋ yɔɔ.+
Pɩ-tɛɛ tɔm
^ Piye piye, «pahɩzɩ Yozafaatɩ ɛ-cɔzɔnaa cɔlɔ.»
^ Piye piye, «Filistii mba fezuu.»
^ Ɛnʋ payaɣ ɖɔɖɔ se Okoziyaasɩ.
