Kroniiki takayaɣ naalɛ ñɩŋga 22:1-12
22 Nɛ Yeruzalɛm mba sɩɩ ɛ-pɩyalaa taa cikpelu Okoziyaasɩ wiyaʋ e-lone taa, mbʋ pʋyɔɔ yɔ ɛtɛlɛmwaa mba pa nɛ Arabii ñɩma paawobi ɖigbeɣliye* taa yɔ, paakʋ ɛ-pɩyalaa sɔsaa tɩŋa.+ Nɛ Yehoram pɩyalʋ Okoziyaasɩ pɩsɩ Yuuda wiyaʋ nɛ ɛpaɣzɩ kewiyitu tɔɔʋ.+
2 Okoziyaasɩ kaawɛnɩ pɩnzɩ 22 alɩwaatʋ ndʋ ɛpɩsɩ wiyaʋ yɔ, nɛ ɛtɔɔ kewiyitu pɩnaɣ kʋɖʋmaɣ Yeruzalɛm. Payaɣaɣ e-ɖoo se Ataali,+ Omirii+ sayɩ.*
3 Ɛnʋ ɖɔɖɔ ɛɖɔm Ahaabɩ ɖɩɣa nʋmɔŋ taa,+ mbʋ pʋyɔɔ yɔ e-ɖoo tasaɣnɩ-ɩ lɔŋ nɛ ɛlakɩ lakasɩ kɩdɛkɛdɩsɩ.
4 Nɛ ewolo pɩ-yɔɔ nɛ ɛlakɩ mbʋ pɩfɛyɩ ɖeu Yehowa ɛsɩndaa yɔ, ɛzɩ Ahaabɩ ɖɩɣa yɔ, mbʋ pʋyɔɔ yɔ paapɩsɩ ɛ-lɔŋ tasɩyaa ɛ-caa sɩm wayɩ, se pɩkɔnɩ-ɩ ɖɩzʋʋ.
5 Ɛɖɔm pɔ-lɔŋ tasʋʋ yɔɔ nɛ ɛ nɛ Izrayɛɛlɩ wiyaʋ Ahaabɩ pɩyalʋ Yehoram powolo se poyooni Siirii wiyaʋ Azayɛɛlɩ+ Ramɔɔtɩ-Galaadɩ taa,+ peeɖe tɔŋ tɔyaa ɖʋ Yehoram heŋ.
6 Ɛpɩsɩ Yizreyɛɛlɩ+ se ɛwaa heŋ weyi paaɖʋ-ɩ Raamaa alɩwaatʋ ndʋ eyowaɣni Siirii+ wiyaʋ Azayɛɛlɩ yɔ.
Okoziyaasɩ,* Yehoram+ pɩyalʋ, Yuuda wiyaʋ tii Yizreyɛɛlɩ se ɛna Ahaabɩ pɩyalʋ Yehoram,+ mbʋ pʋyɔɔ yɔ paaɖʋ-ɩ heŋ.*+
7 Ɛlɛ Ɛsɔ yele nɛ Okoziyaasɩ sɩ alɩwaatʋ ndʋ ewoba se ɛna Yehoram yɔ; ɛtalaa lɛ, ɛ nɛ Yehoram palɩɩ se pakatɩ Nimisii sayɩ* Yehu,+ weyi Yehowa kaata num se ɛɖɩzɩ Ahaabɩ ɖɩɣa yɔ.+
8 Yehu paɣzɩ Ahaabɩ ɖɩɣa tɔm hʋnʋʋ lɛ, ɛkatɩ Yuuda awumbiya nɛ Okoziyaasɩ koobiya pɩyalaa, Okoziyaasɩ lɩmɖʋyaa, nɛ ɛkʋ-wɛ.+
9 Pʋwayɩ lɛ, ɛñɩnɩ Okoziyaasɩ; pakpa-ɩ ɖenɖe ɛɛmɛlɩ Samaarii taa yɔ, nɛ pɔkɔnɩ-ɩ Yehu cɔlɔ. Nɛ pakʋ-ɩ nɛ pepimi-i,+ mbʋ pʋyɔɔ yɔ pɔyɔɔdaa se: «Ɛkɛ Yozafaatɩ weyi ɛñɩnɩ Yehowa nɛ ɛ-laŋɩyɛ pilim yɔ ɛ-sayɩ.»+ Nɔɔyʋ taawɛɛ Okoziyaasɩ ɖɩɣa taa nɛ ɛwɛɛnɩ ɖoŋ se ɛtɔɔ kewiyitu.
10 Okoziyaasɩ ɖoo Ataali+ nawa se ɛ-pɩyalʋ sɩba lɛ, ɛkʋyɩ nɛ ɛɖɩzɩ Yuuda ɖɩɣa taa ñɩma mba papɩzaɣ se pɔtɔɔ kewiyitu yɔ pe-kpeekpe.*+
11 Ɛlɛ, wiyaʋ pɛlɛ Yehosabaatɩ kpaɣ Okoziyaasɩ pɩyalʋ Yehowaasɩ+ mɛsaɣ tɛɛ,* wiyaʋ pɩyalaa mba pɩɩwɛɛ se pakʋ-wɛ yɔ pɛ-hɛkʋ taa, nɛ ɛsɩɩ ɛ nɛ ɛ-pʋnʋʋyʋ ɖooo pɩ-taa kuduyuu nakʋyʋ taa. Wiyaʋ Yehoram+ pɛlɛ Yehosabaatɩ (ɛɛkɛ cɔjɔ Yehoyiyada+ halʋ nɛ Okoziyaasɩ kɔɔ) pɩzaa nɛ ɛmɛsɩ-ɩ nɛ Ataali tɩna-ɩ. Piyeba nɛ Ataali tɩkʋ-ɩ.+
12 Ɛwɛɛ pɔ-cɔlɔ pɩnzɩ 6, Ɛsɔ toovenim tʋ ɖɩɣa taa mɛsaɣ tɛɛ; nɛ alɩwaatʋ ndʋ lɛ, Ataali ñaawɛɛ nɛ ɛtɔkɩ kewiyitu ɛjaɖɛ taa.
Pɩ-tɛɛ tɔm
^ Yaa «maalika.»
^ Piye piye, «pɛlɛ.»
^ Ebree caanaʋ taa takayɩsɩ nasɩyɩ taa, paya-ɩ se Azariya.
^ Yaa «mbʋ pʋyɔɔ yɔ pɩwɩɣaɣ-ɩ.»
^ Piye piye, «pɩyalʋ.»
^ Piye piye, «ɛɖɩzɩ Yuuda ɖɩɣa taa kewiyaɣ ɖomaɣ kpeekpe.»
^ Piye piye, «Yehosabaatɩ mɩlɩ Okoziyaasɩ pɩyalʋ Yehowaasɩ.»
