Kroniiki takayaɣ naalɛ ñɩŋga 25:1-28
25 Amaziya kaawɛnɩ pɩnzɩ 25 alɩwaatʋ ndʋ ɛpɩsɩ wiyaʋ yɔ, nɛ ɛtɔɔ kewiyitu pɩnzɩ 29 Yeruzalɛm. Payaɣaɣ e-ɖoo se Yehowadaanɩ, ɛɛkɛ Yeruzalɛm tʋ.+
2 Ewobi pɩ-yɔɔ nɛ ɛla mbʋ pɩtʋʋzɩ Yehowa ɛsɩndaa yɔ, ɛlɛ ɛtɩla mbʋ nɛ laŋɩyɛ pilim.
3 Kewiyaɣ tɩɩkɔm nɛ kɛcɛyɩsɩ camɩyɛ e-nesi tɛɛ lɛ, ɛkʋ ɛ-lɩmɖʋyaa mba paakʋ ɛ-caa weyi ɛɛkɛ wiyaʋ yɔ.+
4 Ɛlɛ ɛtɩkʋ pa-pɩyalaa, mbʋ pʋyɔɔ yɔ ɛlabɩ mbʋ pɩlabɩ nɔɔ kʋɖʋmaɣ nɛ tɔm ndʋ pama Paɣtʋ taa, Moyizi takayaɣ taa yɔ. Yehowa yɔɔdɩ peeɖe se: «Pɩtɩpɔzɩ se caanaa ɩsɩ pa-pɩyalaa kɩwɛɛkɩm yɔɔ, nɛ pɩtɩpɔzɩ se pɩyalaa ɩsɩ pa-caanaa kɩwɛɛkɩm yɔɔ; ɛlɛ pɩwɛɛ se paa weyi lɛ ɛsɩ ɛ-maɣmaɣ ɛ-kɩwɛɛkɩm yɔɔ.»+
5 Nɛ Amaziya kpeɣli Yuuda mba nɛ eyele nɛ pasɩŋ ɛzɩ pɛwɛʋ pa-caanaa ɖɩsɩ taa yɔ, ɛzɩ pɛwɛʋ kudokiŋ ñʋndɩnaa nɛ mɩnɩŋ ñʋndɩnaa tindima taa Yuuda nɛ Bɛnjamɛɛ kpeekpe taa yɔ.+ Ɛkalɩ-wɛ, mba paawɛnɩ kpaɣnɩ pɩnzɩ 20 nɛ pɩkpa yɔ,+ nɛ ɛna se you laɖaa mba pafalɩsɩ-wɛ* se pɛwɛɛ sɔɔjanaa taa, mba pasɩm labɩnʋʋ tʋmɩyɛ kɩgbɛzɛŋ nɛ kpayʋʋ sɔsɔʋ yɔ pɛkpɛndɩ 300 000.
6 Pɩtasɩ lɛ, ɛkpaɣ liidiye talaŋwaa* 100 nɛ ɛtɛɣ Izrayɛɛlɩ sɔdɩŋ ɖoŋ tɩnaa 100 000.
7 Ɛlɛ Ɛsɔ toovenim tʋ tɛ ɛyʋ nɔɔyʋ kɔɔ ɛ-cɔlɔ nɛ ɛtɔ se: «Oo wiyaʋ, taayele nɛ Izrayɛɛlɩ sɔɔjanaa tɩŋɩ-ŋ, mbʋ pʋyɔɔ yɔ Yehowa fɛyɩ Izrayɛɛlɩ cɔlɔ,+ ɛfɛyɩ Efrayim mba taa nɔɔyʋ cɔlɔ.
8 Ɛlɛ wolo ñe-ɖeke, la mbʋ pɩpɔzʋʋ yɔ, nɛ ŋwɛɛ abalɩtʋ you taa. Pɩtɩkɛ mbʋ yɔ, Ɛsɔ toovenim tʋ pɩzɩɣ eyele nɛ pituuli-ŋ koyindu nɔɔyʋ ɛsɩndaa, mbʋ pʋyɔɔ yɔ Ɛsɔ wɛnɩ ɖoŋ se ɛsɩna+ yaa se eyele nɛ pituuli.»
9 Peeɖe Amaziya pɔzɩ Ɛsɔ toovenim tʋ tɛ ɛyʋ se: «Nɛ talaŋwaa 100 mba mɛncɛlɩ Izrayɛɛlɩ sɔɔjanaa yɔ?» Ɛsɔ toovenim tʋ tɛ ɛyʋ cosi se: «Yehowa wɛnɩ ɖoŋ se ɛha-ŋ nɛ pɩkpaɖɩ mbʋ.»+
10 Nɛ Amaziya yele sɔɔjanaa mba paalɩnɩ Efrayim nɛ pɔkɔɔ ɛ-cɔlɔ yɔ nɛ papɩsɩ pɛ-tɛ. Ɛlɛ pa-taa wɩɩnɩ Yuuda siŋŋ, nɛ papɩsɩ pɛ-tɛ nɛ pana pɩdɩɩfɛyɩ.
11 Nɛ pɩha Amaziya abalɩtʋ nɛ eɖiyi ɛ-maɣmaɣ ɛ-sɔɔjanaa nɛ powolo Ðɔm Fɛɛʋ taa,+ nɛ ɛkʋ Seyiri mba 10 000.+
12 Nɛ Yuuda mba kpa ɛyaa 10 000 nɛ pɛ-ɛsa. Nɛ powoni-wɛ kaaʋ sɔsɔʋ ñʋʋ taa nɛ potuzi-wɛ nɛ kaaʋ sɔsɔʋ ñʋʋ taa nɛ pɛpɛɖɩ, nɛ pa-tɩŋa papʋʋtɩ.
13 Ɛlɛ sɔɔjanaa mba Amaziya pɩsɩnaa se pataasɩɩ-ɩ you taa yɔ,+ pɛwɛɛ nɛ poyouni Yuuda tɛtʋ ndɩ ndɩ, kpaɣnɩ Samaarii+ nɛ pɩtalɩ Bɛtɩ-Horonɩ;+ pakʋ peeɖe ɛyaa 3 000 nɛ palazɩ ñɩm sakɩyɛ.
14 Ɛlɛ Amaziya tɛm Edom mba kʋʋ nɛ ɛpɩsɩ lɛ, ɛkɔnɩ Seyiri mba ɛsɔnaa nɛ ɛpɩsɩ-wɛ ɛ-ɛsɔnaa,+ nɛ ɛpaɣzɩ pɛ-tɛɛ luŋuu nɛ ɛlakɩ nɛ kɩlaŋ ñɔsɩ kpaɣ pɔ-yɔɔ.
15 Nɛ Yehowa taa wɩɩnɩ Amaziya siŋŋ, nɛ etiyi nayʋ nɔɔyʋ nɛ ɛlɛ heyi-i se: «Ɛbɛ yɔɔ ŋwɛɛ nɛ ŋtɩŋɩɣ samaɣ ŋga kɛ-ɛsɔnaa wayɩ? Ɛsɔnaa mba, patɩpɩzɩ nɛ poholi pa-maɣmaɣ pa-samaɣ ñe-nesi tɛɛ.»+
16 Ɛwɛɛ nɛ ɛyɔɔdʋʋnɩ wiyaʋ lɛ, ɛlɛ yɔɔdɩ se: «Ðɩlɩzɩ-ŋ se ŋkɛ wiyaʋ lɔŋ tasɩyʋ na?+ Suli ñɔ-nɔɔ!+ Ɛbɛ yɔɔ pɩwɛɛ se pakʋ-ŋ?» Peeɖe nayʋ suma, ɛlɛ pʋcɔ nɛ esu lɛ, ɛsɔzaa se: «Manawa se Ɛsɔ ɖʋwa se ɛɖɩzɩɣ-ŋ, mbʋ pʋyɔɔ yɔ ŋlabɩ lakasɩ sɩnɛ nɛ ŋtiwelisi mɔ-lɔŋ tasʋʋ.»+
17 Yuuda wiyaʋ Amaziya nɛ ɛ-lɔŋ tasɩyaa pacaɣaa nɛ pala lɩmaɣza nɛ pɩtɛ lɛ, etiyi se peheyi Izrayɛɛlɩ wiyaʋ Yehu pɩyalʋ Yehowahazɩ pɩyalʋ Yehowaasɩ se: «Kɔɔ nɛ ɖɩkatɩ ɖama nɛ ɖɩla you.»*+
18 Izrayɛɛlɩ wiyaʋ Yehowaasɩ tiyi se peheyi Yuuda wiyaʋ Amaziya se: «Libaŋ sɔɔ ñɩyʋʋ tiyaa se peheyi Libaŋ sɛɛdrɩ se: “Cɛlɩ ñɛ-pɛlɛ man-pɩyalʋ nɛ ɛpɩsɩ-ɩ ɛ-halʋ.” Ɛlɛ Libaŋ tɛtɛgbɩnɛ naɖɩyɛ tɩŋnɩ peeɖe nɛ ɖɩfɛyɩ sɔɔ ñɩyʋʋ ŋgʋ.
19 Ŋyɔɔdaa se: “Na! Mawabɩ* Edom.”+ Pʋyɔɔ ña-laŋɩyɛ kpazɩ ɖɩ-tɩ nɛ ɖɩñɩnɩɣ se pasam-ɖɩ. Ɛlɛ lɛɛlɛɛyɔ lɛ, caɣ ña-ɖɩɣa.* Ɛbɛ yɔɔ ŋñɩnɩɣ se ŋkɔnɩ ña-tɩ asɛyʋʋ nɛ ŋtɔlɩ, nɛ ŋkpɛndɩɣnɩ Yuuda?»
20 Ɛlɛ Amaziya tiwelisi,+ mbʋ pʋyɔɔ yɔ Ɛsɔ toovenim tʋ yebina se pɩla mbʋ nɛ ɛɖʋzɩ-wɛ koyindu nesi tɛɛ,+ mbʋ pʋyɔɔ yɔ paatɩŋ Edom ɛsɔnaa wayɩ.+
21 Peeɖe Izrayɛɛlɩ wiyaʋ Yehowaasɩ kpawa, nɛ ɛ nɛ Yuuda wiyaʋ Amaziya pakatɩ ɖama nɛ pala you Bɛtɩ-Semɛɛsɩ+ ŋgʋ kɩwɛ Yuuda yɔ kɩ-taa.
22 Izrayɛɛlɩ wa Yuuda, nɛ paa weyi lɛ ese nɛ ekpe ɛ-tɛ.*
23 Izrayɛɛlɩ wiyaʋ Yehowaasɩ kpa Yuuda wiyaʋ Amaziya, weyi ɛɛkɛ Yehowaasɩ pɩyalʋ Yehowahazɩ* pɩyalʋ yɔ, Bɛtɩ-Semɛɛsɩ taa. Pʋwayɩ lɛ, ɛkɔnɩ-ɩ Yeruzalɛm nɛ ɛtʋlɩ Yeruzalɛm koloŋa pɔʋ, kpaɣnɩ Efrayim Nɔnɔɔ+ nɛ piwolo Kɔna taa Nɔnɔɔ,+ nuŋgolonzi 400.*
24 Ɛkpaɣ sika nɛ liidiye ñɩɣtʋ kpeekpe nɛ wondu ndʋ payɩ tɩɩwɛ Ɛsɔ toovenim tʋ ɖɩɣa taa, Obɛɛdɩ-Edom cɔlɔ* yɔ, nɛ wiyaʋ ɖɩɣa ñɩm ɖɩzɩyɛ taa yɔ;+ nɛ ɛkpaɣ ɖɔɖɔ ɛyaa se ɛɖɛnɩ yomiye taa. Pʋwayɩ lɛ, ɛpɩsɩ Samaarii.
25 Yuuda wiyaʋ Yehowaasɩ pɩyalʋ Amaziya+ caɣ wezuu pɩnzɩ 15 Izrayɛɛlɩ wiyaʋ Yehowahazɩ+ pɩyalʋ Yehowaasɩ sɩm wayɩ.+
26 Piyele nɛ Amaziya yɔɔ tɔm ndʋ pɩkazaa yɔ, kpaɣnɩ kiɖe tɛɛ nɛ piwolo tɩnaɣ yɔɔ lɛ, ɛzɩ patɩma pɩ-tɔm Yuuda nɛ Izrayɛɛlɩ Awiya Takayaɣ taa yaa we?
27 Kpaɣnɩ alɩwaatʋ ndʋ Amaziya yebi Yehowa wayɩ tɩŋʋʋ yɔ, pɛkpɛyɩ ɛ-tɔm+ Yeruzalɛm, nɛ ese nɛ ewolo Lakisi, ɛlɛ petiyi ɛyaa ɛ-wayɩ Lakisi nɛ pakʋ-ɩ peeɖe.
28 Nɛ pakpaɣ-ɩ kɛɛkɛɛ ŋgʋ kpaŋnaŋ hɔŋaɣ yɔ kɩ-taa nɛ papɩsɩna, nɛ pepimi-i ɛ-cɔzɔnaa cɔlɔ Yuuda tɛtʋ taa.
Pɩ-tɛɛ tɔm
^ Piye piye, «mba pɔtɔzɩ-wɛ.»
^ Talaŋ kʋɖʋmʋʋ maɣnɩ ɛzɩ kilonaa 34 mbʋ yɔ (kilonaa 34,2). Cɔnɩ Tɔm kɩsɔzɩtʋ B14.
^ Yaa «ɖɩkatɩ nɛ ɖɩpa ɖama nɛ ɛsa.»
^ Piye piye, «Ŋwabɩ.»
^ Yaa «ña-awiya ɖɩɣa taa.»
^ Piye piye, «ese nɛ ɛsʋʋ e-kizinzikiŋ tɛɛ.»
^ Ɛnʋ payaɣ ɖɔɖɔ se Okoziyaasɩ.
^ Ɛzɩ mɛtanaa 178 mbʋ yɔ. Cɔnɩ Tɔm kɩsɔzɩtʋ B14.
^ Yaa «Obɛɛdɩ-Edom nesi tɛɛ.»
