Kroniiki takayaɣ naalɛ ñɩŋga 26:1-23
26 Peeɖe Yuuda samaɣ kpeekpe kpaɣ Uziya+ weyi ɛɛwɛnɩ pɩnzɩ 16 yɔ, nɛ pasɩɩ-ɩ wiyaʋ ɛ-caa Amaziya lone taa.+
2 Ɛɖaɣnɩ maʋ Elɔɔtɩ+ tɛtʋ nɛ eyele nɛ tɩɖaɣnɩ pɩsʋʋ Yuuda tɛtʋ, wiyaʋ* sɩm wayɩ.*+
3 Uziya+ kaawɛnɩ pɩnzɩ 16 alɩwaatʋ ndʋ ɛpɩsɩ wiyaʋ yɔ, nɛ ɛtɔɔ kewiyitu pɩnzɩ 52 Yeruzalɛm. Payaɣaɣ e-ɖoo se Yekoliya, ɛɛkɛ Yeruzalɛm tʋ.+
4 Ewobi pɩ-yɔɔ nɛ ɛla mbʋ pɩtʋʋzɩ Yehowa ɛsɩndaa yɔ, ɛzɩ ɛ-caa Amaziya kaalabʋ yɔ.+
5 Nɛ ewolo pɩ-yɔɔ nɛ ɛñɩnɩɣ Ɛsɔ, Zakarii alɩwaatʋ taa; ɛlɛ kaawɩlɩnɩ-ɩ se ese Ɛsɔ toovenim tʋ sɔɔndʋ. Alɩwaatʋ ndʋ tɩ-taa ɛɛwɛɛ nɛ ɛñɩnɩɣ Yehowa yɔ, Ɛsɔ toovenim tʋ yeba nɛ piɖeni-i.+
6 Ɛlɩɩ nɛ ewolo eyooni Filistii mba+ nɛ ɛtʋlɩ pɔʋ Gaatɩ+ koloŋa, Yabnee+ koloŋa, nɛ Asɩdoodi+ koloŋa. Nɛ ɛma tɛtʋ ndɩ ndɩ Asɩdoodi egeetiye taa nɛ Filistii mba hɛkʋ taa.
7 Ɛsɔ toovenim tʋ wolo pɩ-yɔɔ nɛ ɛsɩɣnɩ-ɩ nɛ eyouni Filistii mba, Arabii ñɩma+ mba paacaɣ Gurbaalɩ yɔ, nɛ Mewunim mba.
8 Amooni mba+ paɣzɩ Uziya hɛyʋʋ lambuu. Ɛ-hɩɖɛ sɛɛ nɛ pɩyɛlɩ nɛ pɩtalɩ ɖooo Ejipiti, mbʋ pʋyɔɔ yɔ ɛkɔma nɛ ɛwɛɛ ɖoŋ pɩdɩɩfɛyɩ.
9 Pɩtasɩ lɛ, Uziya ma tilima+ Yeruzalɛm taa, Kɔna taa Nɔnɔɔ+ cɔlɔ, Fɛɛʋ Nɔnɔɔ+ cɔlɔ, nɛ Tilimiye Kɩtɩlɩyɛ cɔlɔ nɛ ɛcɛyɩsɩ-yɛ.
10 Pɩtasɩ lɛ, ɛma tilima+ kañɩmbusuu taa nɛ ehuyi* lɔkɔnaa* sakɩyɛ (mbʋ pʋyɔɔ yɔ ɛɛwɛnɩ kpɩna sakɩyɛ); ɛlabɩ mbʋ ɖɔɖɔ Seefela taa nɛ kɛdɛɛŋa taa.* Ɛɛwɛnɩ haɖaa nɛ viiñi hayɩyaa pʋŋ taa nɛ Karmɛɛlɩ taa, mbʋ pʋyɔɔ yɔ ɛɛsɔɔlɩ haɖaʋ.
11 Pɩtasɩ lɛ, Uziya kɔma nɛ ɛwɛɛnɩ sɔɔjanaa mba pɔñɔɔzɩ pa-tɩ se pala you yɔ. Palɩɣaɣ nɛ palakɩ you, paatayɩ-wɛ tindima ndɩ ndɩ. Takayaɣ taa mayʋ Yeyiyɛɛlɩ+ nɛ kaɖɩka Maaseyiya paakalɩnɩ-wɛ nɛ pama pa-hɩla,+ nɛ wiyaʋ awumbiya taa weyi payaɣ se Anaanɩya yɔ ɛnʋ ɖiyaɣni-wɛ.
12 Caanaa ɖɩsɩ ñʋndɩnaa tɩŋa mba paakɛ sɔdɩŋ ɖoŋ tɩnaa mba pa-ñʋndɩnaa yɔ, paakpɛndɩ 2 600.
13 Sɔɔjanaa mba peɖiyaɣ yɔ paakpɛndɩ abalaa 307 500 mba pɔñɔɔzɩ pa-tɩ se pala you yɔ, paakɛ sɔɔjanaa ɖoŋ tɩnaa mba paɖʋwaɣ wiyaʋ nesi se eyooni koyindinaa yɔ.+
14 Uziya kaayeba nɛ sɔɔjanaa tɩŋa wɛɛnɩ kpayɩŋ, kɩgbɛzɛmɩŋ,+ ñɩɣyʋʋ hulasɩ, ñɩɣyʋʋ tokonaa,+ tɔŋ, nɛ pɛɛ wena pɔtɔʋnɩ pʋtɔla yɔ.+
15 Pɩtasɩ lɛ, ɛtɩŋnɩ mba pɛwɛ lɛɣtʋ yɔ pɔ-yɔɔ nɛ ɛla you menziiniwaa Yeruzalɛm taa; paasɩ-wɛ tilima yɔɔ+ nɛ kolonzi kɔnanaa yɔɔ nɛ papɩzaɣ se pɔtɔ tɔʋ ñɩma nɛ pɛɛ sɔsɔna. Piyeba nɛ ɛ-hɩɖɛ sɛɛ nɛ pɩyɛlɩ pɩtalɩ paa le, mbʋ pʋyɔɔ yɔ paasɩnɩ-ɩ pɩdɩɩfɛyɩ nɛ ɛkɔɔ ɛkpa ɖoŋ.
16 Ɛlɛ, ɛtɩɩkpa ɖoŋ lɛ, ɛ-laŋɩyɛ kpazɩ ɖɩ-tɩ nɛ pɩkɔnɩ-ɩ asɛyʋʋ, nɛ ɛla mbʋ pɩfɛyɩ siɣsiɣ ɛ-Ɛsɔ Yehowa ɛsɩndaa yɔ nɛ ɛsʋʋ Yehowa templo taa se ɛsɔ ŋgee tɩlaaɖɩ miŋ, ŋgee tɩlaaɖɩ altaaru yɔɔ.+
17 Kpaagbaa mbʋ lɛ, cɔjɔ Azariya nɛ Yehowa cɔjɔnaa 80 lalaa mba pɛwɛ abalɩtʋ yɔ pasʋʋ ɛ-wayɩ.
18 Pakaɖɩnɩ Wiyaʋ Uziya nɛ peheyi-i se: «Uziya, pɩtɩkɛ ña pɩmʋnaa se ŋsɔ ŋgee tɩlaaɖɩ miŋ Yehowa!+ Cɔjɔnaa ɖeke pɩwɛɛ se pɔsɔ ŋgee tɩlaaɖɩ miŋ, mbʋ pʋyɔɔ yɔ pɛkɛ Aarɔɔnɩ lʋlʋʋ taa mba,+ mba papɩsɩ-wɛ kiɖeɖema yɔ. Lɩɩ kooka kiɖeɖeɣa taa, mbʋ pʋyɔɔ yɔ ŋlabɩ mbʋ pɩfɛyɩ siɣsiɣ yɔ nɛ ŋŋkaɣ mʋʋ samtʋ natʋyʋ Ɛsɔ Yehowa cɔlɔ lakasɩ sɩnɛ sɩ-yɔɔ.»
19 Ɛlɛ Uziya, weyi ɛɛɖɔkɩ e-nesi tɛɛ wonuu ŋgʋ kɩ-taa pañaɣzɩɣ ŋgee tɩlaaɖɩ se ɛñaɣzɩ ŋgee tɩlaaɖɩ yɔ, ɛkɔ pana siŋŋ;+ nɛ ɛkɔ pana nɛ cɔjɔnaa mbʋ lɛ, canatʋ+ lɩɩ e-kiɖe taa cɔjɔnaa ɛsɩndaa, Yehowa ɖɩɣa taa, ŋgee tɩlaaɖɩ altaaru cɔlɔ.
20 Cɔjɔ sɔsɔ Azariya nɛ cɔjɔnaa tɩŋa kɛzɩ pa-tɩ nɛ ɛ-yɔɔ lɛ, pana se canatʋ lɩ e-kiɖe taa! Nɛ palɩzɩ-ɩ peeɖe lɛɛ lɛɛ, nɛ ɛ-maɣmaɣ ɛlɩɩ lɛɛ lɛɛ, mbʋ pʋyɔɔ yɔ Yehowa kaahɔm ɛ-nɩŋgbaŋʋʋ.
21 Wiyaʋ Uziya kaakɛ canaɣ mbʋ nɛ pɩkɔɔ pɩtalɩ ɛ-sɩm wiye, nɛ ɛwɛɛ ɖɩɣa ŋga kaawɛ kɩjaʋ yɔ ka-taa, ɛ-canatʋ ndʋ tɩ-yɔɔ,+ mbʋ pʋyɔɔ yɔ paalɩzɩ-ɩ Yehowa ɖɩɣa taa. Ɛ-pɩyalʋ Yotam kaawɛɛ nɛ ɛcɔŋnɩ wiyaʋ ɖɩɣa yɔɔ, nɛ ɛhʋʋ ɛjaɖɛ taa ɛyaa tɔm.+
22 Nɛ Uziya yɔɔ tɔm ndʋ pɩkazaa yɔ, kpaɣnɩ kiɖe tɛɛ nɛ piwolo tɩnaɣ yɔɔ, Amoozɩ pɩyalʋ nayʋ Izaayii+ ma-tʋ.
23 Pʋwayɩ lɛ, Uziya sɩ,* nɛ pepimi-i ɛ-cɔzɔnaa cɔlɔ, ɛlɛ awiya hayɩm mbʋ pɩ-taa pepiŋ sɩɖaa yɔ* pɩ-taa pepimi-i, mbʋ pʋyɔɔ yɔ pɔyɔɔdaa se: «Ɛkɛ canaɣ.» Nɛ ɛ-pɩyalʋ Yotam+ pɩsɩ wiyaʋ e-lone taa.
Pɩ-tɛɛ tɔm
^ Pʋ-tɔbʋʋ se ɛ-caa Amaziya.
^ Piye piye, «alɩwaatʋ ndʋ pɛtɛm hɩzʋʋ wiyaʋ ɛ-cɔzɔnaa cɔlɔ yɔ.»
^ Yaa «piyaɣ ŋga ka-ñʋʋ taa wɛ landamm yɔ kɔ-yɔɔ.»
^ Pɩkɛɣnɩ kaaʋ sɔsɔʋ taa.
^ Pʋ-tɔbʋʋ se pɔŋ weyi pohuyaa nɛ paɖʋʋ lɩm ɩ-taa yɔ.
^ Piye piye, «pahɩzɩ Uziya ɛ-cɔzɔnaa cɔlɔ.»
^ Pɩpɩzɩɣ nɛ pɩla se hayɩm mbʋ, pɩɩwɛ ɖenɖe pepiŋ awiya yɔ pɩ-cɔlɔ.
