Kroniiki takayaɣ naalɛ ñɩŋga 28:1-27
28 Ahaazɩ+ kaawɛnɩ pɩnzɩ 20 alɩwaatʋ ndʋ ɛpɩsɩ wiyaʋ yɔ, nɛ ɛtɔɔ kewiyitu pɩnzɩ 16 Yeruzalɛm. Ɛtɩla mbʋ pɩtʋʋzɩ Yehowa ɛsɩndaa yɔ, ɛzɩ ɛ-cɔzɔ Daviid kaalabʋ yɔ.+
2 Ɛlɛ, ɛɖɔm Izrayɛɛlɩ awiya nʋmɔŋ taa,+ nɛ halɩ ɛla Baalɩwaa ñɩɣtʋ sɩʋ kpelisi.*+
3 Pɩtasɩ lɛ, ɛlakaɣ nɛ kɩlaŋ ñɔsɩ kpaɣ Hinɔɔm Pɩyalʋ Fɛɛʋ* taa nɛ ɛñaɣzɩ ɛ-pɩyalaa miŋ,+ nɛ ɛlakɩ lakasɩ kɩdɛkɛdɩsɩ nzɩ ajɛɛ wena Yehowa kaaɖɔɔnɩ-yɛ Izrayɛɛlɩ mba ɛsɩndaa yɔ, alakaɣ yɔ.+
4 Ewobi pɩ-yɔɔ ɖɔɖɔ nɛ ɛlaɣ kɩlaŋ nɛ ɛlakɩ nɛ kɩlaŋ ñɔsɩ kpaɣ lona kʋkʋya taa,+ piyisi yɔɔ, nɛ tɩŋ weyi payɩ ɩwɛ hatʋ camɩyɛ yɔ ɩ-tɛɛ.+
5 Pʋyɔɔ ɛ-Ɛsɔ Yehowa ɖʋzɩ-ɩ Siirii wiyaʋ nesi tɛɛ,+ nɛ pawabɩ-ɩ nɛ pakpa ɛyaa sakɩyɛ nɛ papɩsɩ-wɛ yomaa nɛ powoni-wɛ Damaasɩ.+ Ɛɖʋzɩ-ɩ ɖɔɖɔ Izrayɛɛlɩ wiyaʋ nesi tɛɛ, nɛ ɛlɛ wabɩ-ɩ nɛ ɛkʋ ɛ-ɛyaa sakɩyɛ.
6 Mbʋ pʋyɔɔ yɔ Remaliya pɩyalʋ Peeka+ kʋ ɛyaa 120 000 Yuuda taa kɩyakʋ kʋɖʋmʋʋ, pa-tɩŋa paawɛ abalɩtʋ. Ɛkʋ-wɛ mbʋ pʋyɔɔ yɔ peyebi pɔ-cɔzɔnaa tɛ Ɛsɔ Yehowa.+
7 Nɛ Efrayim tʋ sɔdʋʋ Zikiri kʋ wiyaʋ pɩyalʋ Maaseyiya, nɛ Azɩrikam weyi ɛcɔŋnaɣ awiya ɖɩɣa yɔɔ yɔ,* nɛ Ɛlɩkaana, weyi ɛɛkɛ wiyaʋ tɛɛ tʋ yɔ.
8 Pɩtasɩ lɛ, Izrayɛɛlɩ mba kpa po-koobiya taa ɛyaa 200 000 nɛ papɩsɩ-wɛ yomaa—halaa, pɩyalaa, nɛ pɛlaa; poku ɖɔɖɔ wondu sakɩyɛ, nɛ powoni-tʋ Samaarii.+
9 Ɛlɛ Yehowa tɛ nayʋ weyi payaɣ se Odɛɛdɩ yɔ ɛɛwɛ peeɖe. Ɛlɩɩ sɔɔjanaa mba pɔkɔŋaɣ Samaarii yɔ pɛ-ɛsɩndaa nɛ eheyi-wɛ se: «Ɩna! Mɩ-cɔzɔnaa tɛ Ɛsɔ Yehowa kaakɔ pana nɛ Yuuda, pʋyɔɔ ɛɖʋzɩ-wɛ mi-nesi tɛɛ,+ nɛ ɩkʋ-wɛ nɛ pana sɔsɔna wena atalɩ ɖooo ɛsɔdaa yɔ.
10 Nɛ lɛɛlɛɛyɔ lɛ, ɩɖʋ mɩ-taa se ɩpɩsɩɣ Yuuda nɛ Yeruzalɛm mba mɩ-lɩmɖʋyaa abalɩñɩma nɛ halɩñɩma.+ Paa mbʋ yɔ, ɩfɛyɩnɩ ɖɔɖɔ kɩwɛɛkɩm mɩ-Ɛsɔ Yehowa ɛsɩndaa yaa we?
11 Lɛɛlɛɛyɔ, iwelisini-m nɛ ɩpɩsɩnɩ mba ɩkpa mi-koobiya cɔlɔ nɛ ɩpɩsɩ-wɛ yomaa yɔ, mbʋ pʋyɔɔ yɔ Yehowa kɔ-mɩ nɛ pana siŋŋ.»
12 Peeɖe Efrayim mba ñʋndɩnaa taa nabɛyɛ, Yehohanaanɩ pɩyalʋ Azariya, Mesilemɔɔtɩ pɩyalʋ Berekiya, Saalum pɩyalʋ Yehizikiya, nɛ Hadɩlaayɩ pɩyalʋ Amazaa, pakaɖɩnɩ mba palɩnɩ you nɛ pɔkɔŋ yɔ,
13 nɛ peheyi-wɛ se: «Ɩtaasʋnɩ yomaa cɩnɛ, mbʋ pʋyɔɔ yɔ pɩkaɣ yebu nɛ ɖɩɖɔɔ wɛɛ Yehowa ɛsɩndaa. Mbʋ ɩɖʋ mɩ-taa se ɩlakɩ yɔ pɩkaɣ sɔzʋʋ ɖa-kɩwɛɛkɩm yɔɔ nɛ wɛɛ wena ɖɩɖɔwa yɔ a-yɔɔ, mbʋ pʋyɔɔ yɔ wɛɛ wena ɖɩɖɔwa yɔ atɛm paɣlʋʋ nɛ pana sɔsɔna wɛ Izrayɛɛlɩ yɔɔ.»
14 Peeɖe sɔɔjanaa kɛzɩ yomaa nɛ wondu ndʋ palazaa yɔ+ nɛ pɛcɛlɩ awumbiya nɛ samaɣ kpeekpe.
15 Nɛ abalaa mba paaya-wɛ nɛ pa-hɩla nɛ palɩzɩ-wɛ yɔ pakʋyɩ nɛ pamʋ yomaa, nɛ palɩzɩ wondu kususutu wondu ndʋ paalazaa yɔ tɩ-taa nɛ pɛcɛlɩ pa-taa mba payɩ paawɛ ndaakpeɖe yɔ. Nɛ posuu-wɛ wondu nɛ paha-wɛ naataŋgbala, tɔɔnaɣ nɛ mbʋ pɔñɔɔ yɔ, nɛ num mbʋ pataa po-tomnaɣ yɔ. Pɩtasɩ lɛ, mba pɛkɛ ajamaa yɔ pakpaɣ-wɛ kpaŋasɩ yɔɔ nɛ powoni-wɛ po-koobiya cɔlɔ Yeriikoo, paŋ tɛtʋ taa. Pʋwayɩ lɛ, papɩsɩ Samaarii.
16 Alɩwaatʋ ndʋ, Wiyaʋ Ahaazɩ pɔzɩ Asiirii awiya se pasɩnɩ-ɩ.+
17 Nɛ Edom mba tasɩ wobu Yuuda wayɩ nɛ poyooni-kʋ nɛ pakpa ɛyaa nɛ papɩsɩ-wɛ yomaa nɛ pɛɖɛna.
18 Filistii mba+ wolo nɛ poyooni ɖɔɖɔ Seefela+ tɛtʋ ndɩ ndɩ nɛ Negɛɛbʋ tɛtʋ ndɩ ndɩ Yuuda taa nɛ pamʋ Bɛtɩ-Semɛɛsɩ,+ Ayalɔɔnɩ,+ Gederɔtɩ, Soko nɛ kɩ-tɛtʋ cikpetu ndɩ ndɩ,* Timina+ nɛ kɩ-tɛtʋ cikpetu ndɩ ndɩ, nɛ Gimzo nɛ kɩ-tɛtʋ cikpetu ndɩ ndɩ; nɛ pacaɣ peeɖe.
19 Izrayɛɛlɩ wiyaʋ Ahaazɩ yɔɔ lɛ, Yehowa luzi Yuuda, mbʋ pʋyɔɔ yɔ eeyeba nɛ Yuuda ɖɛlɛsɩ niye kɩ-lakasɩ taa, piyele nɛ pala mbʋ pɩfɛyɩ siɣsiɣ kpem yɔ Yehowa ɛsɩndaa.
20 Pɩtalɩ alɩwaatʋ natʋyʋ lɛ, Asiirii wiyaʋ Tilɩgaatɩ-Pilinezɛɛrɩ+ kɔɔ ɛ-wayɩ, nɛ ɖenɖe ɛzɩ ɛɛkpazɩ-ɩ ɖoŋ lɛ, eyele nɛ ɛɖʋ-ɩ kʋñɔŋ kɩɖʋʋ.+
21 Mbʋ pʋyɔɔ yɔ Ahaazɩ lazɩ mbʋ pɩwɛ Yehowa ɖɩɣa taa nɛ wiyaʋ ɖɩɣa taa+ nɛ awumbiya ɖɩsɩ taa yɔ nɛ ɛlabɩnɩ Asiirii wiyaʋ kʋjɔʋ; ɛlɛ pɩtɩsɩnɩ-ɩ paa ññɩɩ.
22 Nɛ alɩwaatʋ ndʋ Wiyaʋ Ahaazɩ kaawɛ kʋñɔŋ taa yɔ, ɛtasɩ labʋ mbʋ pɩfɛyɩ siɣsiɣ Yehowa ɛsɩndaa yɔ nɛ pɩkpaɖɩ.
23 Ɛpaɣzɩ laʋ kɩlaŋ Damaasɩ ɛsɔnaa+ mba paawabɩ-ɩ yɔ,+ nɛ ɛwɛɛ ɛyɔɔdʋʋ se: «Siirii awiya ɛsɔnaa wɛɛ nɛ pasɩɣnɩ-wɛ; pʋyɔɔ lɛ, malaɣ-wɛ kɩlaŋ nɛ ma ɖɔɖɔ pasɩnɩ-m.»+ Ɛlɛ pala nɛ pituuli ɛ nɛ Izrayɛɛlɩ kpeekpe.
24 Pɩtasɩ lɛ, Ahaazɩ kpeɣli Ɛsɔ toovenim tʋ ɖɩɣa taa wondu; nɛ pʋwayɩ lɛ ɛpʋʋtɩ Ɛsɔ toovenim tʋ ɖɩɣa taa wondu,+ ɛɖɩɣ Yehowa ɖɩɣa nɔnɔsɩ,+ nɛ ɛla ɛ-tɩ altaarunaa paa Yeruzalɛm kɔna ŋgʋ lɛ kɩ-taa.
25 Nɛ ɛla lona kʋkʋya Yuuda tɛtʋ ndɩ ndɩ kpeekpe taa se ɛkpazɩ kɩlaŋ ñɔsɩ ɛsɔnaa lalaa,+ nɛ ɛɖʋ ɛ-cɔzɔnaa tɛ Ɛsɔ Yehowa ɖɩwɩzɩyɛ.
26 Piyele nɛ ɛ-yɔɔ tɔm ndʋ pɩkazaa yɔ, mbʋ payɩ ɛlabɩ kpaɣnɩ kiɖe tɛɛ nɛ piwolo tɩnaɣ yɔɔ yɔ, pama-tʋ Yuuda nɛ Izrayɛɛlɩ Awiya Takayaɣ taa.+
27 Pʋwayɩ lɛ, Ahaazɩ sɩ* nɛ pepimi-i tɛtʋ taa, Yeruzalɛm; mbʋ pʋyɔɔ yɔ patiwoni-i Izrayɛɛlɩ awiya pɩlaŋ yɔɔ.+ Nɛ ɛ-pɩyalʋ Ezekiyaasɩ pɩsɩ wiyaʋ e-lone taa.
Pɩ-tɛɛ tɔm
^ Yaa «sɩʋ kpelisi nzɩ poyolisi ñɩɣtʋ nɛ polubina yɔ.»
^ Cɔnɩ Tɔm pee sɔsɔna tɔbʋʋ lɩzʋʋ «Gehena.»
^ Piye piye, «weyi ɛcɔŋnaɣ ɖɩɣa yɔɔ yɔ.»
^ Yaa «nɛ tɛtʋ cikpetu ndɩ ndɩ ndʋ tɩcɔ-kʋ nɛ tɩta yɔ.»
^ Piye piye, «pahɩzɩ Ahaazɩ ɛ-cɔzɔnaa cɔlɔ.»
