Kroniiki takayaɣ naalɛ ñɩŋga 29:1-36
29 Ezekiyaasɩ+ pɩsɩ wiyaʋ alɩwaatʋ ndʋ ɛwɛnɩ pɩnzɩ 25 yɔ, nɛ ɛtɔɔ kewiyitu pɩnzɩ 29 Yeruzalɛm. Payaɣaɣ e-ɖoo se Abiya, Zakarii pɛlɛ.+
2 Ewobi pɩ-yɔɔ nɛ ɛlakɩ mbʋ pɩtʋʋzɩ Yehowa ɛsɩndaa yɔ,+ ɛzɩ ɛ-cɔzɔ Daviid kaalabʋ yɔ.+
3 E-kewiyitu tɔɔʋ pɩnaɣ kajalaɣ ñɩŋga taa, fenaɣ kajalaɣ ñɩŋga taa, ɛtʋlɩ Yehowa ɖɩɣa nɔnɔsɩ nɛ ɛñɔɔzɩ-sɩ.+
4 Nɛ ɛkɔnɩ cɔjɔnaa nɛ Leevi mba nɛ ekpeɣli-wɛ kadaɣ taa wɩsɩ ɖɩlɩyɛ taa.
5 Eheyi-wɛ se: «Iwelisini-m, mɩ Leevi mba. Lɛɛlɛɛyɔ lɛ, ɩpɩsɩ mɩ-tɩ kiɖeɖema+ nɛ ɩpɩsɩ mɩ-cɔzɔnaa tɛ Ɛsɔ Yehowa ɖɩɣa kiɖeɖeɣa, nɛ ɩlɩzɩ mbʋ pɩfɛyɩ kele kele yɔ lone kiɖeɖeye taa.+
6 Mbʋ pʋyɔɔ yɔ ɖa-caanaa taawɛɛ siɣsiɣ nɛ palabɩ mbʋ pɩfɛyɩ ɖeu ɖɛ-Ɛsɔ Yehowa ɛsɩndaa yɔ.+ Peyebi-i nɛ pɛkɛzɩ pɛ-ɛsa se pataana Yehowa tɛ Ɛsɔ sɛtʋ kɩɖanɖʋʋ nɛ paha-ɩ siɣye.+
7 Paɖɩɣ ɖɔɖɔ kʋjɔŋ nɔnɔsɩ+ nɛ paɖɩzɩ kanɖʋnaa.+ Peyebi Izrayɛɛlɩ tɛ Ɛsɔ sɔbʋ ŋgee tɩlaaɖɩ+ nɛ peyebi-i laʋ kɩlaŋ kɩñaɣzɩŋ+ lone kiɖeɖeye taa.
8 Pʋyɔɔ Yehowa pana tibi Yuuda nɛ Yeruzalɛm pɔ-yɔɔ,+ nɛ eyele nɛ papɩsɩ sɔɔndʋ pʋyʋ nɛ mbʋ pɩɖɩɣzɩɣ ɛyaa yɔ nɛ mbʋ piyeki nɛ pahʋlʋʋ kancʋʋlaɣ yɔ,* ɛzɩ ɩnaɣʋnɩ mɩ-maɣmaɣ mɩ-ɛsa yɔ.+
9 Ɩna, pʋyɔɔ lɛ, pakʋ ɖɔ-cɔzɔnaa nɛ laɣɖɛ,+ nɛ powoni ɖa-pɩyalaa, ɖɛ-pɛlaa, nɛ ɖa-halaa yomiye taa.+
10 Lɛɛlɛɛyɔ lɛ, mɔnsɔɔlɩnɩ ma-laŋɩyɛ pilim se manɖʋ ɛgbɛyɛ nɛ Izrayɛɛlɩ tɛ Ɛsɔ Yehowa,+ nɛ ɛ-pana sɔsɔna ɖɛɛ ɖɔ-yɔɔ.
11 Man-pɩyalaa, pɩtɩkɛ lɛɛlɛɛyɔ pɩwɛɛ se ɩla kaakendu,* mbʋ pʋyɔɔ yɔ Yehowa lɩzɩ-mɩ se ɩsɩŋ ɛ-ɛsɩndaa, nɛ ɩkɛ ɛ-lɩmɖʋyaa,+ nɛ ɩkpazɩ ɛ-kɩlaŋ ñɔsɩ.»+
12 Peeɖe Leevi mba kʋyaa: Kehaatɩ mba+ taa lɛ, Amasayi pɩyalʋ Mahaatɩ nɛ Azariya pɩyalʋ Yowɛɛlɩ; Merarii mba+ taa lɛ, Abɩdii pɩyalʋ Kiisi nɛ Yehalelɛɛlɩ pɩyalʋ Azariya; Gɛrɩsɔɔnɩ mba taa lɛ,+ Zima pɩyalʋ Yoowaa nɛ Yoowaa pɩyalʋ Edɛɛnɩ;
13 Elizafaanɩ pɩyalaa taa lɛ, Simirii nɛ Yewuwɛɛlɩ; Azaafʋ+ pɩyalaa taa lɛ, Zakarii nɛ Mataaniya;
14 Hemaanɩ pɩyalaa+ taa lɛ, Yehiyɛɛlɩ nɛ Simeyii; Yedutuunɩ+ pɩyalaa taa lɛ, Semayaa nɛ Uziyɛɛlɩ.
15 Nɛ pekpeɣli po-koobiya nɛ papɩsɩ pa-tɩ kiɖeɖema nɛ pɔkɔɔ se pala nɛ Yehowa ɖɩɣa pɩsɩ kele kele,+ ɛzɩ Yehowa kaayɔɔdʋʋ nɛ wiyaʋ ɖʋ paɣtʋ yɔ.
16 Nɛ cɔjɔnaa sʋʋ Yehowa ɖɩɣa taa se pala nɛ kɛwɛɛ kele kele nɛ palɩzɩ azuluma wondu ndʋ payɩ pana Yehowa templo taa yɔ nɛ powoni-tʋ Yehowa ɖɩɣa kadaɣ taa.+ Nɛ Leevi mba ñakpaɣ-tʋ nɛ palɩnɩ-tʋ awayɩ nɛ powoni-tʋ Kidrɔɔnɩ Fɛɛʋ taa.+
17 Mbʋ papaɣzɩ templo pɩsʋʋ kiɖeɖeu kajalaɣ fenaɣ tɛ kajalaɣ kɩyakʋ ñɩŋgʋ wiye; nɛ fenaɣ ŋga ka-kɩyakʋ 8 ñɩŋgʋ wiye lɛ, patalɩ Yehowa kʋjɔŋ+ cɔlɔ. Pakpaɣ kɩyakɩŋ 8 nɛ papɩsɩnɩ Yehowa ɖɩɣa kiɖeɖeɣa, nɛ pɛtɛ tʋmɩyɛ kajalaɣ fenaɣ ŋga ka-kɩyakʋ 16 ñɩŋgʋ wiye.
18 Pʋwayɩ lɛ, powolo Wiyaʋ Ezekiyaasɩ cɔlɔ nɛ peheyi-i se: «Ðɩlaba nɛ Yehowa ɖɩɣa kpeekpe, kɩlaʋ kɩñaɣzʋʋ altaaru+ nɛ ki-wondu tɩŋa,+ nɛ taabɩlɩ ŋgʋ kɩ-yɔɔ pasɩɣ kpɔnɔnaa mba patɩnɩɣ-wɛ ɖama yɔɔ yɔ*+ nɛ ki-wondu tɩŋa papɩsɩ kele kele.
19 Nɛ wondu ndʋ payɩ Wiyaʋ Ahaazɩ kaakɛzɩnɩ hɔɔlʋʋ e-kewiyitu tɔɔʋ alɩwaatʋ taa, alɩwaatʋ ndʋ ɛlakaɣ mbʋ pɩfɛyɩ siɣsiɣ yɔ,+ ɖɩñɔɔzɩ-tʋ nɛ ɖɩpɩsɩ-tʋ kiɖeɖetu,+ nɛ tɩwɛ Yehowa altaaru ɛsɩndaa.»
20 Nɛ Wiyaʋ Ezekiyaasɩ kʋyɩ tanaŋ tɛɛ cu nɛ ekpeɣli tɛtʋ taa awumbiya, nɛ pakpa Yehowa ɖɩɣa taa.
21 Powoni naŋ abalɩñɩŋ 7, ɛyaŋ 7, heɣsi abalɩñɩnzɩ 7 nɛ tuliŋ 7 se pɩkɛ kewiyaɣ yɔɔ, kooka kiɖeɖeɣa yɔɔ, nɛ Yuuda yɔɔ kɩwɛɛkɩm kɩlaʋ.+ Nɛ eheyi cɔjɔnaa, Aarɔɔnɩ lʋlʋʋ taa mba, se palaa kpɩna ana Yehowa altaaru yɔɔ.
22 Nɛ pakʋ naŋ,+ nɛ cɔjɔnaa kpaɣ calɩm nɛ pamɩzɩ-pʋ altaaru yɔɔ;+ pʋwayɩ lɛ, pakʋ ɛyaŋ nɛ pamɩzɩ calɩm altaaru yɔɔ, nɛ pakʋ heɣsi abalɩñɩnzɩ nɛ pamɩzɩ calɩm altaaru yɔɔ.
23 Nɛ powoni kɩwɛɛkɩm yɔɔ kɩlaʋ tuliŋ wiyaʋ nɛ samaɣ pɛ-ɛsɩndaa nɛ patɩnɩ pe-nesi ɩ-yɔɔ.
24 Cɔjɔnaa kʋ tuliŋ ɛnɩ nɛ pakpaɣ ɩ-calɩm nɛ palaa kɩwɛɛkɩm yɔɔ kɩlaʋ altaaru yɔɔ se pihuuzi Izrayɛɛlɩ kpeekpe kɩwɛɛkɩm yɔɔ, mbʋ pʋyɔɔ yɔ wiyaʋ yɔɔdaa se pɩwɛɛ se palaa kɩlaʋ kɩñaɣzʋʋ nɛ kɩwɛɛkɩm yɔɔ kɩlaʋ Izrayɛɛlɩ kpeekpe yɔɔ.
25 Alɩwaatʋ ndʋ lɛ, eeyeba nɛ Leevi mba sɩŋ Yehowa ɖɩɣa taa nɛ pɔɖɔkɩ ŋgbamɛɛ, cɩmʋʋ wondu ndʋ tɩ-yɔɔ wɛ nimasɩ yɔ nɛ cɩmɩŋ,+ ɛzɩ Daviid+ nɛ Gaadɩ,+ wiyaʋ tɛ ɛyʋ weyi ɛnaɣ natʋ yɔ nɛ nayʋ Naataanɩ+ paɖʋʋ paɣtʋ yɔ, mbʋ pʋyɔɔ yɔ Yehowa kaatɩŋnɩ ɛ-nayaa yɔɔ nɛ ɛɖʋ paɣtʋ ndʋ.
26 Nɛ Leevi mba kaasɩŋaa, pɔɖɔkɩ Daviid minziiki wondu, nɛ cɔjɔnaa ñɔɖɔkɩ aganda.+
27 Nɛ Ezekiyaasɩ ha nɔɔ se palaa kɩlaʋ kɩñaɣzʋʋ altaaru yɔɔ.+ Kɩlaʋ kɩñaɣzʋʋ paɣzaa lɛ, Yehowa hendu paɣzɩ; nɛ papaɣzɩ mabʋ Izrayɛɛlɩ wiyaʋ Daviid minziiki wondu nɛ pahʋlʋʋ aganda ɖɔɖɔ.
28 Nɛ samaɣ kpeekpe luŋ alɩwaatʋ ndʋ peteɣaɣ hendu nɛ aganda tiliɣ yɔ. Pɛwɛɛ pɩ-yɔɔ mbʋ nɛ pɩkɔɔ pɩtalɩ alɩwaatʋ ndʋ kɩlaʋ kɩñaɣzʋʋ tɛma yɔ.
29 Nɛ patɩɩtɛm laʋ kɩlaʋ lɛ, wiyaʋ nɛ mba payɩ paawɛ ɛ-cɔlɔ yɔ poluŋ nɛ papa pɛ-ɛsa nɛ tɛtʋ.
30 Nɛ Wiyaʋ Ezekiyaasɩ nɛ awumbiya peheyi Leevi mba se patɩŋnɩ Daviid+ nɛ Azaafʋ+ weyi ɛnaɣ natʋ yɔ pe-keɣsi yɔɔ nɛ pasa Yehowa. Nɛ petee samtʋ hendu nɛ amɛya siŋŋ, nɛ poluŋ nɛ papa pɛ-ɛsa nɛ tɛtʋ.
31 Nɛ Ezekiyaasɩ yɔɔdɩ se: «Lɛɛlɛɛyɔ palɩzʋʋ-mɩ nɛ hɔɔlʋʋ* se ɩkɛ Yehowa pʋyʋ yɔ, ɩkɔɔ nɛ iwoni kɩlaŋ nɛ ɛsɩmɩyɛ kɩlaŋ Yehowa ɖɩɣa taa.» Nɛ samaɣ paɣzɩ wonuu kɩlaŋ nɛ ɛsɩmɩyɛ kɩlaŋ, nɛ mba payɩ paasɔɔlɩnɩ pa-laŋɩyɛ faaa yɔ powoni kɩlaŋ kɩñaɣzɩŋ.+
32 Kɩlaŋ kɩñaɣzɩŋ kpɩna wena samaɣ wonaa yɔ akpɛndɩ naŋ 70, ɛyaŋ 100, heɣsi abalɩñɩnzɩ 200 (pɩtɩŋa mbʋ yɔ se pɩkɛ kɩlaʋ kɩñaɣzʋʋ Yehowa+)
33 nɛ kɩlaŋ kiɖeɖeŋ kpɩna kaakpɛndɩ naŋ 600 nɛ heŋ 3 000.
34 Ɛlɛ cɔjɔnaa taaɖɔɔ se papɩzɩ nɛ peliti kɩlaŋ kɩñaɣzɩŋ kpɩna tɩŋa tɔna, pʋyɔɔ po-koobiya Leevi mba sɩnɩ-wɛ+ nɛ pɩkɔɔ pɩtalɩ alɩwaatʋ ndʋ tʋmɩyɛ tɛma yɔ nɛ pɩkɔɔ pɩtalɩ alɩwaatʋ ndʋ cɔjɔnaa pɩzaa nɛ papɩsɩ pa-tɩ kiɖeɖema yɔ,+ mbʋ pʋyɔɔ yɔ Leevi mba maɣzaɣ* pa-tɩ pɩsʋʋ kiɖeɖema yɔɔ nɛ pɩkpaɖɩ cɔjɔnaa.
35 Pɩtasɩ lɛ, kɩlaŋ kɩñaɣzɩŋ kaaɖɔ sakɩyɛ,+ ɖɔɖɔ ɛzɩ laŋhɛzɩyɛ kɩlaŋ num+ nɛ kilizasɩ nzɩ palakɩnɩ kɩlaŋ kɩñaɣzɩŋ yɔ+ ɩɖɔʋ yɔ. Mbʋ paɖaɣnɩ paɣzʋʋ labʋ* Yehowa ɖɩɣa taa tʋmɩyɛ.
36 Piyeba nɛ Ezekiyaasɩ nɛ samaɣ kpeekpe pɛmɛyɩ amɛya mbʋ Ɛsɔ toovenim tʋ labɩ samaɣ yɔ pʋyɔɔ,+ mbʋ pʋyɔɔ yɔ pɩtɩŋa pɩɩlabɩ tuda yem.
Pɩ-tɛɛ tɔm
^ Yaa «nɛ woŋa pʋyʋ.»
^ Yaa «se ɩhɛzɩ.»
^ Pʋ-tɔbʋʋ se Ɛsɔ ɛsɩndaa kpɔnɔnaa.
^ Piye piye, «Lɛɛlɛɛyɔ iyebu nɛ mi-nesi taa su.»
^ Piye piye, «laŋa kaatʋʋzɩ.»
^ Yaa «Mbʋ pɔñɔɔzɩ.»
