Kroniiki takayaɣ naalɛ ñɩŋga 30:1-27
-
Ezekiyaasɩ tɔɔ Paska kazandʋ (1-27)
30 Ezekiyaasɩ tiyi ɛyaa Izrayɛɛlɩ+ nɛ Yuuda kpeekpe taa, nɛ halɩ ɛma takayɩsɩ Efrayim nɛ Manaasee,+ se pɔkɔɔ Yehowa ɖɩɣa taa Yeruzalɛm nɛ pɔtɔɔ Paska Izrayɛɛlɩ tɛ Ɛsɔ Yehowa.+
2 Ɛlɛ wiyaʋ, ɛ-awumbiya, nɛ samaɣ ŋga kɛwɛ Yeruzalɛm yɔ ke-kpeekpe pakpaɣ lɩmaɣzɩyɛ se pɔtɔkɩ Paska fenaɣ 2 ñɩŋga taa,+
3 mbʋ pʋyɔɔ yɔ pataapɩzɩ nɛ pɔtɔɔ-kʋ alɩwaatʋ ndʋ tɩ-yɔɔ pɩwɛɛ se pɔtɔɔ-kʋ yɔ,+ mbʋ pʋyɔɔ yɔ cɔjɔnaa sakɩyɛ taapɩsɩ pa-tɩ kiɖeɖema+ nɛ samaɣ taakpeɣli ɖɔɖɔ Yeruzalɛm.
4 Ðʋtʋ ndʋ tɩkɛdɩnɩ wiyaʋ nɛ samaɣ kpeekpe.
5 Nɛ pakpaɣ lɩmaɣzɩyɛ se posusuu Izrayɛɛlɩ kpeekpe taa, kpaɣnɩ Beyɛɛrɩ-Seeba nɛ piwolo Daanɩ,+ se pɩwɛɛ se samaɣ ɛkɔɔ Yeruzalɛm nɛ kɔtɔɔ Paska Izrayɛɛlɩ tɛ Ɛsɔ Yehowa, mbʋ pʋyɔɔ yɔ samaɣ taakpɛndɩ nɛ kɔtɔɔ-kʋ ɛzɩ pamaʋ yɔ.+
6 Ðɩnɛ ɛlɛ mba patɩŋɩɣnɩ pɔ-yɔɔ nɛ petiyiɣni takayɩsɩ yɔ,* powoni takayɩsɩ nzɩ wiyaʋ nɛ ɛ-awumbiya pɛcɛlɩ-wɛ yɔ Izrayɛɛlɩ nɛ Yuuda kpeekpe taa, ɛzɩ wiyaʋ kaaɖʋʋ paɣtʋ yɔ; ɛyɔɔdaa se: «Izrayɛɛlɩ samaɣ, ɩpɩsɩ Abraham, Izaakɩ, nɛ Izrayɛɛlɩ tɛ Ɛsɔ Yehowa cɔlɔ, se pɩsa nɛ ɛpɩsɩ mba pɩkazaa yɔ pɔ-cɔlɔ, mba palɩ Asiirii awiya nesi tɛɛ yɔ.+
7 Ɩtaawɛɛ ɛzɩ mɩ-cɔzɔnaa nɛ mi-koobiya mba palabɩ mbʋ pɩfɛyɩ siɣsiɣ pɔ-cɔzɔnaa tɛ Ɛsɔ Yehowa ɛsɩndaa yɔ, nɛ ɛlɛ yele nɛ papɩsɩ sɔɔndʋ pʋyʋ, ɛzɩ ɩwɛʋ nɛ ɩnaɣ yɔ.+
8 Lɛɛlɛɛyɔ lɛ, ɩtaawɛɛ ñʋʋ taa ɖoŋ ɛzɩ mɩ-cɔzɔnaa yɔ.+ Iluzi mɩ-tɩ Yehowa tɛɛ nɛ ɩkɔɔ e-kooka+ kiɖeɖeɣa ŋga ɛpɩsɩ-kɛ kiɖeɖeɣa tam tam yɔ ka-taa nɛ ɩsɛɛ mɩ-Ɛsɔ Yehowa, se pɩsa nɛ ɛ-pana sɔsɔna ɖɛɛ mɩ-yɔɔ.+
9 Mbʋ pʋyɔɔ yɔ alɩwaatʋ ndʋ ɩpɩsɩɣ Yehowa cɔlɔ yɔ, mba pakpa mi-koobiya nɛ mɩ-pɩyalaa yɔ pakaɣ naʋ pa-pʋtɔdɩyɛ+ nɛ paha-wɛ nʋmɔʋ se papɩsɩ ɛjaɖɛ ɖɩnɛ ɖɩ-taa,+ mbʋ pʋyɔɔ yɔ mɩ-Ɛsɔ Yehowa nɩɣ ɛyaa wɩzasɩ* nɛ ɛnaɣ pʋtɔdɩyɛ,+ nɛ ɛɛkaɣ-mɩ haʋ siɣye* ye ɩpɩsɩ ɛ-cɔlɔ yɔ.»+
10 Nɛ mba patɩŋɩɣnɩ pɔ-yɔɔ nɛ petiyiɣni takayɩsɩ yɔ,* powolo kpaɣ tɛtʋ nɛ ŋwolo tɛtʋ Efrayim nɛ Manaasee ɛjaɖɛ taa,+ halɩ piwolo nɛ pɩtalɩ Zebulɔɔnɩ, ɛlɛ ɛyaa wɛɛ nɛ patadɩɣ-wɛ nɛ powoŋuu-wɛ.+
11 Paa mbʋ yɔ, Asɛɛrɩ, Manaasee nɛ Zebulɔɔnɩ taa mba nabɛyɛ luzi pa-tɩ nɛ pɔkɔɔ Yeruzalɛm.+
12 Ɛsɔ toovenim tʋ nesi kaawɛ ɖɔɖɔ Yuuda taa se eyele nɛ nɔɔ kʋɖʋmaɣ wɛɛ pɛ-hɛkʋ taa* nɛ pɔɖɔ paɣtʋ ndʋ wiyaʋ nɛ awumbiya paaɖʋwa yɔ tɩ-yɔɔ ɛzɩ Yehowa yɔɔdʋʋ yɔ.
13 Samaɣ sɔsɔɔ nakɛyɛ kpeɣli Yeruzalɛm se kɔtɔɔ Kpɔnɔ ŋgʋ kɩ-taa patɩɖʋ lɔlɔm yɔ kɩ-kazandʋ+ fenaɣ 2 ñɩŋga taa;+ pɩɩkɛ samaɣ sɔsɔɔ kpem.
14 Pakʋyɩ nɛ pakʋsɩ altaarunaa mba paawɛ Yeruzalɛm yɔ,+ nɛ pakʋsɩ ŋgee tɩlaaɖɩ altaarunaa tɩŋa+ nɛ pɔlɔ-wɛ Kidrɔɔnɩ Fɛɛʋ taa.
15 Nɛ pakʋ Paska kɩlaʋ kpɩna fenaɣ 2 ñɩŋga tɛ kɩyakʋ 14 ñɩŋgʋ wiye. Fɛyɛ kpa cɔjɔnaa nɛ Leevi mba, nɛ papɩsɩ pa-tɩ kiɖeɖema nɛ powoni kɩlaŋ kɩñaɣzɩŋ Yehowa ɖɩɣa taa.
16 Pasɩŋ lona wena a-taa patɩɩsɩŋɩɣ yɔ, ɛzɩ Ɛsɔ toovenim tʋ tɛ ɛyʋ Moyizi Paɣtʋ pɔzʋʋ yɔ; pʋwayɩ lɛ cɔjɔnaa mɩzɩ calɩm+ mbʋ pamʋ Leevi mba nesi tɛɛ yɔ.
17 Ɛyaa sakɩyɛ kaawɛ samaɣ taa nɛ pataapɩsɩ pa-tɩ kiɖeɖema, nɛ paɖʋ Leevi mba tʋmɩyɛ se mba pɛfɛyɩ cɩɖɩ cɩɖɩ yɔ+ pakʋ-wɛ Paska kɩlaʋ kpɩna nɛ papɩsɩ-wɛ kiɖeɖema Yehowa ɛsɩndaa.
18 Mbʋ pʋyɔɔ yɔ samaɣ taa ɛyaa sakɩyɛ, kɔzɩ kɔzɩ mba palɩnɩ Efrayim, Manaasee,+ Isakaarɩ, nɛ Zebulɔɔnɩ yɔ, pataapɩsɩ pa-tɩ kele kele, ɛlɛ pɔtɔɔ Paska mbʋ, nɛ pɩtɩla nɔɔ kʋɖʋmaɣ nɛ tɔm ndʋ pamawa yɔ. Ɛlɛ Ezekiyaasɩ tɩmɩ pɔ-yɔɔ nɛ ɛyɔɔdɩ se: «Yehowa, weyi ɛkɛ kɩbanʋ yɔ,+ tɛtɛ nɛ ekpeɣ
19 mba payɩ pɔñɔɔzɩ pa-laŋa se pañɩnɩɣ Ɛsɔ toovenim tʋ+ Yehowa, pɔ-cɔzɔnaa tɛ Ɛsɔ yɔ, paa patɩpɩsɩ pa-tɩ kele kele ɛzɩ kele kele wɛtʋ paɣtʋ pɔzʋʋ yɔ.»+
20 Nɛ Yehowa welisini Ezekiyaasɩ nɛ ekpeɣ* samaɣ.
21 Nɛ Izrayɛɛlɩ ñɩma mba paawɛ Yeruzalɛm yɔ pɔtɔɔ Kpɔnɔ ŋgʋ kɩ-taa patɩɖʋ lɔlɔm yɔ kɩ-kazandʋ+ kɩyakɩŋ 7 nɛ amɛya siŋŋ,+ nɛ Leevi mba nɛ cɔjɔnaa paawɛɛ nɛ pasaŋ Yehowa paa evemiye nɖɩ, pamakɩ pe-minziiki wondu ɖoŋ nɛ pasaŋ Yehowa.+
22 Pɩtasɩ lɛ, Ezekiyaasɩ yɔɔdɩnɩ Leevi ñɩma mba payɩ pɛsɛɣaɣ Yehowa nɛ lɔŋsɩnɖɛ yɔ nɛ ɛkpazɩ-wɛ ɖoŋ.* Nɛ pɛwɛɛ tɔɔʋ yɔɔ kɩyakɩŋ 7 kazandʋ ndʋ tɩ-taa,+ palakɩ laŋhɛzɩyɛ kɩlaŋ+ nɛ pɛsɛɣ pɔ-cɔzɔnaa tɛ Ɛsɔ Yehowa se ɛlabaɣ lɛ.
23 Nɛ samaɣ kpeekpe kpaɣ lɩmaɣzɩyɛ se katasɩɣ kazandʋ ndʋ tɔɔʋ kɩyakɩŋ 7; peeɖe katasɩ kazandʋ ndʋ tɔɔʋ kɩyakɩŋ 7 nɛ amɛya.+
24 Nɛ Yuuda wiyaʋ Ezekiyaasɩ ha samaɣ naŋ abalɩñɩŋ 1 000 nɛ heŋ 7 000, nɛ awumbiya ñaha samaɣ naŋ abalɩñɩŋ 1 000 nɛ heŋ 10 000;+ nɛ cɔjɔnaa sakɩyɛ wɛɛ nɛ papɩsɩɣ pa-tɩ kiɖeɖema.+
25 Nɛ Yuuda samaɣ kpeekpe, cɔjɔnaa, Leevi mba, samaɣ ŋga kalɩnɩ Izrayɛɛlɩ nɛ kɔkɔɔ yɔ ke-kpeekpe,+ nɛ agɔma+ mba palɩnɩ Izrayɛɛlɩ ɛjaɖɛ taa nɛ pɔkɔɔ yɔ, nɛ mba pɛwɛ Yuuda yɔ pɛwɛɛ amɛya yɔɔ.
26 Nɛ amɛya sɔsɔna kaawɛ Yeruzalɛm taa, mbʋ pʋyɔɔ yɔ pɩkpaɣʋnɩ Izrayɛɛlɩ wiyaʋ Daviid pɩyalʋ Salomɔɔ alɩwaatʋ taa yɔ, nabʋyʋ taalabɩtɩ mbʋ Yeruzalɛm.+
27 Kɛdɛzaɣ ɖeɖe lɛ, cɔjɔnaa mba pɛkɛ Leevi ñɩma yɔ, pakʋyɩ pasɩŋ nɛ pawazɩ samaɣ yɔɔ;+ nɛ Ɛsɔ nɩɩ pɔ-nɔɔ, nɛ pa-adɩma talɩ ɛ-ɖɩjaɣyɛ kiɖeɖeye taa, ɛsɔdaa.
Pɩ-tɛɛ tɔm
^ Piye piye, «Ðɩnɛ ɛlɛ seyaa.»
^ Yaa «kɛ camɩyɛ lakasɩ tʋ.»
^ Piye piye, «ɛɛkaɣ kɛzʋʋ ɛsa se ɛtaana-mɩ.»
^ Piye piye, «Nɛ seyaa.»
^ Piye piye, «se ɛha-wɛ laŋɩyɛ kʋɖʋmɖɩyɛ.»
^ Piye piye, «ɛwaa.»
^ Piye piye, «Ezekiyaasɩ yɔɔdɩnɩ Leevi ñɩma mba payɩ pɛsɛɣaɣ Yehowa nɛ lɔŋsɩnɖɛ yɔ pa-laŋɩyɛ.»
