Kroniiki takayaɣ naalɛ ñɩŋga 31:1-21
31 Patɩɩtɛm pɩtɩŋa payɩ mbʋ lɛ, Izrayɛɛlɩ ñɩma kpeekpe mba paawɛ peeɖe yɔ, palɩɩ nɛ powolo Yuuda tɛtʋ ndɩ ndɩ taa, nɛ pɔyɔkɩ tilima kiɖeɖena,+ pɛsɛtɩ sizikasɩ kiɖeɖesi,*+ nɛ pɔyɔkɩ lona kʋkʋya+ nɛ altaarunaa+ Yuuda nɛ Bɛnjamɛɛ taa, pɩkpɛndɩnɩ Efrayim nɛ Manaasee taa,+ pɩkɔɔ nɛ pɩsɩɩnɩ alɩwaatʋ ndʋ paɖɩzɩ pɩtɩŋa caɣ caɣ yɔ, pʋwayɩ lɛ, Izrayɛɛlɩ mba kpeekpe pɩsɩ pɛ-tɛtʋ ndɩ ndɩ taa, paa weyi lɛ ɛpɩsɩ mbʋ ɛwɛna yɔ pɩ-cɔlɔ.
2 Nɛ Ezekiyaasɩ sɩɩ cɔjɔnaa pe-tindima taa+ nɛ Leevi mba pe-tindima taa,+ cɔjɔnaa taa paa weyi nɛ Leevi mba taa paa weyi ɛ-tʋmɩyɛ taa,+ se palaa kɩlaŋ kɩñaɣzɩŋ nɛ laŋhɛzɩyɛ kɩlaŋ, se paɖʋ lɩm nɛ paha sɛtʋ nɛ samtʋ Yehowa kadasɩ nɔnɔsɩ taa.+
3 Paakpaɣ wiyaʋ maɣmaɣ ñɩm hɔɔlʋʋ nakʋyʋ nɛ pɛcɛlɩ se palabɩnɩ kɩlaŋ kɩñaɣzɩŋ,+ pɩkpɛndɩnɩ tanaŋ nɛ ɖanaɣ kɩlaŋ,+ nɛ Sabaatɩwaa,+ fenasɩ kɩfasɩ,+ nɛ kazandʋ ndɩ ndɩ+ kɩlaŋ kɩñaɣzɩŋ, ɛzɩ pamaʋ Yehowa Paɣtʋ taa yɔ.
4 Pɩtasɩ lɛ, ɛɖʋ paɣtʋ mba pɛwɛ Yeruzalɛm yɔ se pɛcɛlɩ cɔjɔnaa nɛ Leevi mba mbʋ pɩpɔzʋʋ se pɛcɛlɩ-wɛ yɔ,+ nɛ pɩsa nɛ pɔñɔɔnɩ* Yehowa paɣtʋ ɖeyi ɖeyi.
5 Patiisusi paɣtʋ ndʋ lɛ, Izrayɛɛlɩ mba ha kajalaɣ tɔɔnaɣ pee, vɛɛ kɩfalʋʋ, num,+ nɛ tʋŋ num, nɛ hayɩm taa tɔɔnasɩ tɩŋa+ nɛ pɩɖɔɔ siŋŋ; paa mbʋ lɛ, pɔkɔnɩ pɩ-hɔɔlʋʋ 10 ñɩŋgʋ nɛ pɩɖɔɔ siŋŋ.+
6 Nɛ Izrayɛɛlɩ mba nɛ Yuuda ñɩma mba pɛwɛ Yuuda tɛtʋ ndɩ ndɩ taa yɔ, pɔkɔnɩ ɖɔɖɔ naŋ nɛ heŋ hɔɔlʋʋ 10 ñɩŋgʋ nɛ wondu kiɖeɖetu ndʋ paha-tʋ* pɛ-Ɛsɔ Yehowa yɔ tɩ-hɔɔlʋʋ 10 ñɩŋgʋ.+ Pɔkɔnɩ-tʋ nɛ pekpeɣli-tʋ huwa sakɩyɛ.
7 Fenaɣ 3 ñɩŋga taa+ papaɣzɩ kpeɣluu pa-haɖɛ huwa huwa; nɛ pɛtɛ fenaɣ 7 ñɩŋga taa.+
8 Ezekiyaasɩ nɛ awumbiya pɔkɔm nɛ pana huwa ana lɛ, pasa Yehowa nɛ pawazɩ ɛ-samaɣ Izrayɛɛlɩ yɔɔ.
9 Ezekiyaasɩ pɔzɩ cɔjɔnaa nɛ Leevi mba tɔm pɩlɩɩnɩ huwa ana a-yɔɔ,
10 nɛ Sadɔɔkɩ ɖɩɣa taa cɔjɔ sɔsɔ Azariya heyi-i se: «Kpaɣnɩ alɩwaatʋ ndʋ papaɣzɩ kɔnʋʋ haɖɛ Yehowa ɖɩɣa taa yɔ,+ samaɣ wɛɛ kɔtɔkɩ nɛ kahakɩ nɛ halɩ pɩɖaɣnɩ kazʋʋ sakɩyɛ, mbʋ pʋyɔɔ yɔ Yehowa wazɩ ɛ-samaɣ. Na pɩkazʋʋ sakɩyɛ.»+
11 Peeɖe Ezekiyaasɩ heyi-wɛ se pɔñɔɔzɩ Yehowa ɖɩɣa taa kuduyuŋ weyi ɩ-tɛɛ pasɩɣ wondu yɔ,*+ nɛ pɔñɔɔzɩ-ɩ.
12 Pɛwɛɛ nɛ pɔkɔŋnɩ haɖɛ, hɔɔlɩŋ 10 ñɩŋ,+ nɛ wondu kiɖeɖetu ɛzɩ pɩpɔzʋʋ yɔ; Leevi tʋ Konaniya palɩzaa se ɛcɔŋnɩ pɩtɩŋa payɩ mbʋ yɔ pɩ-yɔɔ, nɛ e-neu* Simeyii kaakɛnɩ ɛ-tɛɛ tʋ.
13 Yehiyɛɛlɩ, Azaziya, Nahaatɩ, Asayɛlɩ, Yerimɔɔtɩ, Yozabaadɩ, Eliyɛɛlɩ, Isimakiya, Mahaatɩ nɛ Benayaa paakɛ kaɖɩsɩ nzɩ sɩsɩɣaɣnɩ Konaniya nɛ e-neu Simeyii, ɛzɩ Wiyaʋ Ezekiyaasɩ kaaɖʋʋ paɣtʋ yɔ, nɛ Azariya kaakɛnɩ Ɛsɔ toovenim tʋ ɖɩɣa yɔɔ cɔnɩyʋ.
14 Nɛ Iminaa pɩyalʋ Koree, Leevi tʋ weyi ɛkɛ nɔnɔɔ yɔɔ ɖaŋɩyʋ wɩsɩ ɖɩlɩyɛ hɔɔlʋʋ taa yɔ,+ ɛnʋ cɔŋnaɣnɩ Ɛsɔ toovenim tʋ sɔɔlɩm haɖɛ yɔɔ,+ nɛ ɛtayaɣ haɖɛ nɖɩ palabɩ Yehowa yɔ+ nɛ wondu kiɖeɖetu ndʋ tɩkpaɖaa yɔ.+
15 Nɛ ɛnʋ ɖiyaɣni Edɛɛnɩ, Miniyamini, Yesuwa, Semayaa, Amariya nɛ Sekaniya, cɔjɔnaa tɛtʋ ndɩ ndɩ taa,+ tʋma wena pata-wɛ liu nɛ paɖʋ-wɛ yɔ a-taa, se patayɩɣ po-koobiya mbʋ pɩwɛɛ se pɛcɛlɩ-wɛ yɔ kɩmaŋ tindima taa,+ sɔsaa nɛ cikpema kɩmaŋ.
16 Pɩtasɩnɩ mbʋ lɛ, abalaa mba pama pa-hɩla pɔ-hɔŋ liɖe takayɩsɩ taa yɔ, mba pɔkɔŋaɣ paa evemiye nɖɩ se pala tʋmɩyɛ Yehowa ɖɩɣa taa nɛ pala tʋma wena paɖʋ pe-tindima yɔ, pɛcɛlaɣ-wɛ mbʋ pɩwɛɛ se pɛcɛlɩ-wɛ yɔ, kpaɣnɩ mba pɛwɛnɩ pɩnzɩ 3 nɛ pɩkpa yɔ.
17 Pama cɔjɔnaa hɩla pɔ-hɔŋ liɖe takayɩsɩ taa ɛzɩ pɛwɛʋ pa-caanaa ɖɩsɩ taa yɔ,+ ɛzɩ paalabʋ Leevi ñɩma mba pɛwɛnɩ kpaɣnɩ pɩnzɩ 20 nɛ pɩkpa yɔ;+ palabɩ mbʋ tʋma wena paaɖʋ pe-tindima yɔ a-nɔɔ taa.+
18 Pama ɖɔɖɔ pe-piya, pa-halaa, pa-pɩyalaa nɛ pɛ-pɛlaa kpeekpe, pa-samaɣ kpeekpe hɩla pɔ-hɔŋ liɖe takayɩsɩ taa—pɔcɔŋnaɣ pɛ-wɛtʋ kiɖeɖetu yɔɔ paa ɛzɩmtaa mbʋ pʋyɔɔ yɔ paaɖʋ-wɛ se pala tʋma kiɖeɖena—
19 pɩkpɛndɩnɩ Aarɔɔnɩ lʋlʋʋ taa mba, cɔjɔnaa mba paawɛ lona wena a-taa kpɩna tɔkɩ ñɩtʋ yɔ a-hayɩm mbʋ pɩcɔ pɛ-tɛtʋ ndɩ ndɩ nɛ pɩta yɔ pɩ-taa yɔ.+ Tɛtʋ ndɩ ndɩ ndʋ tɩ-tɩŋa tɩ-taa lɛ, paaya nabɛyɛ nɛ pa-hɩla nɛ palɩzɩ-wɛ se paha cɔjɔnaa taa paa abalʋ weyi lɛ e-ɖeɖe, nɛ paha ɖɔɖɔ mba payɩ pama pa-hɩla Leevi mba hɔŋ liɖe takayɩsɩ taa yɔ, pa-taa paa weyi lɛ e-ɖeɖe.
20 Ezekiyaasɩ la mbʋ Yuuda kpeekpe taa, nɛ ewolo pɩ-yɔɔ nɛ ɛla mbʋ pɩwɛ ɖeu nɛ pɩtʋʋzɩ nɛ pɩwɛɛ siɣsiɣ ɛ-Ɛsɔ Yehowa ɛsɩndaa yɔ.
21 Nɛ tʋma wena payɩ ɛlaba se ɛñɩnɩ ɛ-Ɛsɔ yɔ, paa pɩtɩɩkɛ wena atukuuni Ɛsɔ toovenim tʋ ɖɩɣa tʋmɩyɛ+ yaa wena atukuuni Paɣtʋ nɛ mbʋ payɩ tɩpɔzʋʋ yɔ, ɛlabɩ-yɛ nɛ ɛ-laŋɩyɛ pilim, nɛ piiɖeni-i.
Pɩ-tɛɛ tɔm
^ Cɔnɩ Tɔm pee sɔsɔna tɔbʋʋ lɩzʋʋ.
^ Yaa «nɛ pɩsa nɛ pɛcɛlɩ pa-tɩ pilim.»
^ Piye piye, «papɩsɩ-tʋ kiɖeɖetu.»
^ Yaa «ɖamɩŋ weyi ɩ-tɛɛ pɔtɔkɩ tɔɔnaɣ yɔ.»
^ Ebree taa lɛ, patɩyɔɔdɩ kpayɩ kpayɩ se ɛnʋ kɛnɩ ɖalʋ yaa neu.
