Kroniiki takayaɣ naalɛ ñɩŋga 33:1-25
33 Manaasee+ kaawɛnɩ pɩnzɩ 12 alɩwaatʋ ndʋ ɛpɩsɩ wiyaʋ yɔ, nɛ ɛtɔɔ kewiyitu pɩnzɩ 55 Yeruzalɛm.+
2 Ɛlabɩ mbʋ pɩfɛyɩ ɖeu Yehowa ɛsɩndaa yɔ, ɛtɩŋaɣ lakasɩ kɩdɛkɛdɩsɩ nzɩ ajɛɛ wena Yehowa kaaɖɔɔnɩ-yɛ Izrayɛɛlɩ mba ɛsɩndaa yɔ alakaɣ yɔ.+
3 Ɛɖaɣnɩ maʋ lona kʋkʋya wena ɛ-caa Ezekiyaasɩ kaayɔkaa yɔ,+ esiɣ Baalɩ altaarunaa nɛ ɛla sizikasɩ kiɖeɖesi,* nɛ eluŋ ɛsɔdaa wondu* kpeekpe tɛɛ nɛ ɛsɛɛ-tʋ.+
4 Ɛma ɖɔɖɔ altaarunaa Yehowa ɖɩɣa taa;+ ɖɩɣa ŋga, kɔ-tɔm Yehowa kaayɔɔdaa se: «Yeruzalɛm taa ma-hɩɖɛ kaɣ wɛʋ tam.»+
5 Nɛ ɛma Yehowa ɖɩɣa kadasɩ 2 taa ɛsɔdaa wondu* kpeekpe altaarunaa.+
6 Nɛ ɛñaɣzɩ ɛ-maɣmaɣ ɛ-pɩyalaa miŋ*+ Hinɔɔm Pɩyalʋ Fɛɛʋ taa;+ ɛla maajiki,+ ɛla tɩyɩtʋ lakasɩ, ɛla efeletu lakasɩ, nɛ ɛlɩzɩ nabɛyɛ se pasʋzʋʋ nɛ pɔyɔɔdʋʋnɩ sɩɖaa, nɛ ɛlɩzɩ ɖɔɖɔ tɩyaa mba pɔyɔɔdʋʋ cee wayɩ tɔm yɔ.+ Ɛlabɩ mbʋ pɩfɛyɩ ɖeu Yehowa ɛsɩndaa yɔ pɩdɩɩfɛyɩ, se ɛɖʋnɩ-ɩ ɖɩwɩzɩyɛ.
7 Ɛkpaɣ sɩʋ kpeliɣa ŋga ɛsaɣaa yɔ nɛ ɛsɩɩ Ɛsɔ toovenim tʋ ɖɩɣa+ ŋga Ɛsɔ kaaheyi Daviid nɛ ɛlɛ pɩyalʋ Salomɔɔ kɔ-tɔm yɔ ka-taa. Eeheyi-wɛ se: «Ðɩɣa kanɛ nɛ Yeruzalɛm, ŋgʋ malɩzɩ Izrayɛɛlɩ cejewiye kpeekpe taa yɔ, pa-taa mankaɣ yebu nɛ ma-hɩɖɛ wɛɛ tam.+
8 Nɛ maakaɣ tasʋʋ kʋsʋʋ Izrayɛɛlɩ nɩŋgbanzɩ tɛtʋ ndʋ maacɛlɩ pɔ-cɔzɔnaa yɔ tɩ-yɔɔ, pañɩtɩ nɛ pɔɖɔŋ mbʋ payɩ mɔnpɔzɩ-wɛ se pala yɔ pɩ-yɔɔ yɔ, Paɣtʋ kpeekpe, kpalɩtʋ nɛ tɔm hʋʋ paɣtʋ ndʋ mantɩŋnɩ Moyizi yɔɔ nɛ mɛncɛlɩ-wɛ yɔ.»
9 Manaasee kaawɛɛ nɛ epeɣziɣ Yuuda nɛ Yeruzalɛm taa mba, nɛ eyeki nɛ palakɩ kɩdɛkɛdɩm mbʋ pɩkpaɖɩ mbʋ ajɛɛ wena Yehowa ɖɩzɩ Izrayɛɛlɩ mba ɛsɩndaa yɔ alakaɣ yɔ.+
10 Yehowa wɛɛ nɛ ɛyɔɔdʋʋnɩ Manaasee nɛ ɛ-samaɣ, ɛlɛ patikemni-i.+
11 Pʋyɔɔ Yehowa yeba nɛ Asiirii wiyaʋ sɔɔjanaa ñʋndɩnaa wolo pa-wayɩ, nɛ pakpa Manaasee nɛ ñɩma wena a-nɔsɩ kotaa yɔ* nɛ pɔhɔkɩ-ɩ nɛ ñɩɣyʋʋ kɩsɛɛmʋʋ kpasɩ 2 nɛ pakpaɣ-ɩ nɛ pɛɖɛnɩ Babilɔɔnɩ.
12 Ɛɛwɛ kʋñɔŋ taa lɛ, etendi ɛ-Ɛsɔ Yehowa* se ɛna ɛ-pʋtɔdɩyɛ nɛ ɛwɛɛ ɛ-tɩ luzuu yɔɔ siŋŋ ɛ-cɔzɔnaa tɛ Ɛsɔ ɛsɩndaa.
13 Ɛwɛɛ nɛ ɛtɩmɩɣnɩ Ɛsɔ, nɛ e-tenduu mbʋ pɩla Ɛsɔ pʋtɔdɩyɛ nɛ ɛlɛ nɩɩ tenduu mbʋ etendiɣ se pana ɛ-pʋtɔdɩyɛ yɔ, nɛ ɛpɩsɩnɩ-ɩ Yeruzalɛm nɛ ɛɖaɣnɩ-ɩ cɛlʋʋ e-kewiyitu.+ Peeɖe Manaasee kɔm nɛ ɛna se Yehowa kɛnɩ Ɛsɔ toovenim tʋ.+
14 Pʋwayɩ lɛ, ɛma Daviid Tɛtʋ+ awayɩ koloŋa Gihɔɔnɩ+ wɩsɩ ɖɩɖʋyɛ taa fɛɛʋ* taa nɛ piwolo pɩtalɩ Kpakpasɩ Nɔnɔɔ,+ nɛ ɛma-kɛ nɛ kɔcɔɔ nɛ katalɩ Ofɛɛlɩ,+ nɛ ɛma-kɛ nɛ kakʋyɩ pɩdɩɩfɛyɩ. Pɩtasɩ lɛ, ɛsɩ sɔɔjanaa ñʋndɩnaa Yuuda tɛtʋ ɖoŋ ñɩndʋ kpeekpe taa.
15 Nɛ ɛlɩzɩ agbaaɣdaa ɛsɔnaa nɛ sɩʋ kpeliɣa Yehowa ɖɩɣa taa,+ pɩkpɛndɩnɩ altaarunaa kpeekpe mba ɛɛma Yehowa ɖɩɣa pʋʋ taa+ nɛ Yeruzalɛm yɔ, nɛ eyele nɛ pɔlɔ-wɛ tɛtʋ nɛ wayɩ.
16 Ɛñɔɔzɩ ɖɔɖɔ Yehowa altaaru+ nɛ ɛpaɣzɩ laʋ laŋhɛzɩyɛ kɩlaŋ+ nɛ ɛsɩmɩyɛ kɩlaŋ+ kɩ-yɔɔ, nɛ eheyi Yuuda se kɩsɛɛ Izrayɛɛlɩ tɛ Ɛsɔ Yehowa.
17 Paa mbʋ yɔ, samaɣ kaawɛɛ nɛ kalaɣ kɩlaŋ lona kʋkʋya yɔɔ mbʋ, ɛlɛ kɛ-Ɛsɔ Yehowa ɖeke kalaɣaɣ kɩlaŋ ɛnɩ.
18 Piyele nɛ Manaasee yɔɔ tɔm ndʋ pɩkazaa yɔ, adɩma wena ɛtɩmnɩ ɛ-Ɛsɔ yɔ, nɛ tɔm ndʋ mba panaɣ natʋ yɔ pɔyɔɔdaa yɔ, mba pɔyɔɔdɩnɩ-ɩ Izrayɛɛlɩ tɛ Ɛsɔ Yehowa hɩɖɛ taa yɔ, pama-tʋ Izrayɛɛlɩ awiya yɔɔ tɔm takayaɣ taa.
19 Pɩtasɩ lɛ, ɛ-adɩma+ nɛ ɛzɩma pocosi tenduu mbʋ etendaa yɔ pɩ-yɔɔ yɔ, ɛ-kɩwɛɛkɩm kpeekpe nɛ mbʋ ɛɛlaba nɛ pɩfɛyɩ siɣsiɣ yɔ,+ lona wena a-taa ɛma lona kʋkʋya nɛ esiɣ sizikasɩ kiɖeɖesi*+ nɛ sɩʋ kpelisi pʋcɔ nɛ eluzuu ɛ-tɩ yɔ, pama-tʋ tɔm ndʋ ɛ-ɛyaa mba panaɣ natʋ yɔ pamawa yɔ tɩ-taa.
20 Pʋwayɩ lɛ, Manaasee sɩ,* nɛ pepimi-i ɛ-ɖɩɣa taa; nɛ ɛ-pɩyalʋ Amɔɔnɩ pɩsɩ wiyaʋ e-lone taa.+
21 Amɔɔnɩ+ kaawɛnɩ pɩnzɩ 22 alɩwaatʋ ndʋ ɛpɩsɩ wiyaʋ yɔ, nɛ ɛtɔɔ kewiyitu pɩnzɩ 2 Yeruzalɛm.+
22 Nɛ ewolo pɩ-yɔɔ nɛ ɛlakɩ mbʋ pɩfɛyɩ ɖeu Yehowa ɛsɩndaa yɔ, ɛzɩ ɛ-caa Manaasee kaalabʋ yɔ;+ nɛ Amɔɔnɩ laa kɩlaŋ sɩʋ kpelisi nzɩ payɩ ɛ-caa Manaasee kaalaba yɔ,+ nɛ ɛwɛɛ nɛ ɛsɛɣ-sɩ.
23 Ɛlɛ etiluzi ɛ-tɩ Yehowa ɛsɩndaa+ ɛzɩ ɛ-caa Manaasee kaaluzuu ɛ-tɩ yɔ;+ ɛlɛ Amɔɔnɩ yele nɛ ɛtɛzɩ wɛɛ ɖɔʋ pɩdɩɩfɛyɩ.
24 Kɩyakʋ nakʋyʋ lɛ, ɛ-lɩmɖʋyaa kpɛyɩ ɛ-tɔm+ nɛ pakʋ-ɩ ɛ-maɣmaɣ ɛ-ɖɩɣa taa.
25 Ɛlɛ ɛjaɖɛ taa ñɩma kʋ mba payɩ pɛkpɛyɩ Wiyaʋ Amɔɔnɩ+ tɔm yɔ, nɛ pasɩɩ ɛ-pɩyalʋ Yoziyaasɩ+ wiyaʋ e-lone taa.
Pɩ-tɛɛ tɔm
^ Cɔnɩ Tɔm pee sɔsɔna tɔbʋʋ lɩzʋʋ.
^ Piye piye, «yoyaa.»
^ Piye piye, «yoyaa.»
^ Piye piye, «Nɛ ɛtɩŋnɩ ɛ-maɣmaɣ ɛ-pɩyalaa miŋ taa.»
^ Pɩpɩzɩɣ pɩkɛ, «pakpa Manaasee pɔŋ taa.»
^ Yaa «ɛhɛzɩ ɛ-Ɛsɔ Yehowa laŋɩyɛ.»
^ Yaa «lemeɣa.»
^ Cɔnɩ Tɔm pee sɔsɔna tɔbʋʋ lɩzʋʋ.
^ Piye piye, «pahɩzɩ Manaasee ɛ-cɔzɔnaa cɔlɔ.»
