Kroniiki takayaɣ naalɛ ñɩŋga 8:1-18
8 Salomɔɔ ma Yehowa ɖɩɣa nɛ ɛ-maɣmaɣ ɛ-ɖɩɣa,* pɩnzɩ 20 taa.+
2 Pʋwayɩ lɛ, Salomɔɔ ɖaɣnɩ maʋ tɛtʋ ndɩ ndɩ ndʋ Hiram+ kaaha-ɩ yɔ nɛ ɛsɩɩ Izrayɛɛlɩ mba* peeɖe.
3 Pɩtasɩ lɛ, Salomɔɔ wobi Hamatɩ-Zobaa nɛ ɛmʋ-kʋ.
4 Pʋwayɩ lɛ, ɛma* Tadɩmɔɔrɩ kañɩmbusuu taa nɛ tɛtʋ ndɩ ndɩ ndʋ tɩ-taa pasɩɣ wondu yɔ ti-kpeekpe,+ ndʋ ɛɛma Hamatɩ+ taa yɔ.
5 Ɛma ɖɔɖɔ Bɛtɩ-Horonɩ Hayo Ñɩŋgʋ+ nɛ Bɛtɩ-Horonɩ Pɩ-tɛɛ Ñɩŋgʋ,+ tɛtʋ ɖoŋ ñɩndʋ ndɩ ndɩ ndʋ tɩwɛnɩ kolonzi, nɔnɔsɩ, nɛ ñɩɣtʋ ndʋ paɖɩkɩnɩ-sɩ yɔ,
6 nɛ Baalatɩ,+ pɩkpɛndɩnɩ Salomɔɔ tɛtʋ ndɩ ndɩ ndʋ tɩ-taa pasɩɣ wondu yɔ ti-kpeekpe, kɛɛkɛɛnaa tɛtʋ ndɩ ndɩ kpeekpe,+ kpaŋnaŋ yɔɔ caɣyaa tɛtʋ ndɩ ndɩ, nɛ mbʋ payɩ Salomɔɔ kaasɔɔlaa se ɛma Yeruzalɛm taa, Libaŋ taa, nɛ ɛjaɖɛ nɖɩ ɖɩ-taa payɩ ɛtɔkɩ kewiyitu yɔ ɖɩ-taa yɔ.
7 Piyele nɛ ɛyaa mba payɩ pɩɩkazɩ Hɛɛtɩ mba taa, Amoori mba taa, Perizi mba taa, Hivi mba taa, nɛ Yebuusi mba+ taa, mba pataakɛ Izrayɛɛlɩ mba yɔ,+
8 pa-lʋlʋʋ taa ñɩma mba pɩɩkazɩ ɛjaɖɛ taa yɔ—mba Izrayɛɛlɩ ñɩma taaɖɩzɩ-wɛ yɔ+—Salomɔɔ ɖʋ-wɛ kɩjɛyʋʋ tʋma halɩ nɛ sɔnɔ.+
9 Ɛlɛ Izrayɛɛlɩ mba lɛ, Salomɔɔ tɩpɩsɩ pa-taa nɔɔyʋ e-yom se ɛla ɛ-tʋmɩyɛ,+ mbʋ pʋyɔɔ yɔ paakɛ e-you laɖaa, ɛ-sɔɔjanaa sɔsaa ñʋndɩnaa, nɛ ɛ-kɛɛkɛɛnaa sayaa ñʋndɩnaa nɛ ɛ-kpaŋnaŋ yɔɔ caɣyaa ñʋndɩnaa.+
10 Wiyaʋ Salomɔɔ tʋma yɔɔ cɔnɩyaa ñʋndɩnaa kaakpɛndɩ 250, mba cɔŋnaɣnɩ ɛyaa yɔɔ.+
11 Salomɔɔ kpaɣ ɖɔɖɔ Farawɔɔ pɛlɛ+ Daviid Tɛtʋ taa nɛ ɛkpanɩ-ɩ ɖɩɣa ŋga ɛɛma-ɩ yɔ ka-taa,+ mbʋ pʋyɔɔ yɔ ɛyɔɔdaa se: «Paa ɛkɛ ma-halʋ yɔ, pɩtɩpɔzɩ se ɛcaɣ Izrayɛɛlɩ wiyaʋ Daviid ɖɩɣa taa, mbʋ pʋyɔɔ yɔ lona wena a-taa pɔkɔnɩ Yehowa Aɖakaɣ yɔ akɛ kiɖeɖena.»+
12 Nɛ Salomɔɔ laa Yehowa kɩlaŋ kɩñaɣzɩŋ+ Yehowa altaaru+ ŋgʋ ɛɛma kʋjɔŋ+ ɛsɩndaa yɔ kɩ-yɔɔ.
13 Ɛlakaɣ ɛzɩ pɩpɔzʋʋ se palakɩ paa evemiye nɖɩ yɔ nɛ ɛlaa kɩlaŋ ɛzɩ Moyizi paɣtʋ pɔzʋʋ se palakɩ Sabaatɩwaa yɔɔ,+ fenasɩ kɩfasɩ yɔɔ,+ nɛ kazandʋ 3 ndʋ pɔtɔkɩ pɩnaɣ taa yɔ tɩ-yɔɔ yɔ:+ Kpɔnɔ ŋgʋ kɩ-taa patɩɖʋ lɔlɔm yɔ kɩ-kazandʋ,+ Kpɩtaŋ Kazandʋ+ nɛ Coka* Kazandʋ.+
14 Pɩtasɩ lɛ, ɛsɩ cɔjɔnaa tindima+ se ala a-tʋma ɛzɩ ɛ-caa Daviid ɖʋʋ yɔ, nɛ ɛsɩɩ Leevi mba pa-tʋma taa, se pasa+ Ɛsɔ nɛ paɖʋ lɩm cɔjɔnaa ɛsɩndaa ɛzɩ pɩpɔzʋʋ se palakɩ paa evemiye nɖɩ yɔ, nɛ ɛsɩɩ nɔnɔsɩ yɔɔ ɖaŋɩyaa pe-tindima taa se pala pa-tʋma nɔnɔsɩ ndɩ ndɩ taa,+ mbʋ pʋyɔɔ yɔ paɣtʋ ndʋ Ɛsɔ toovenim tʋ ɛyʋ Daviid kaaɖʋwa.
15 Nɛ paɣtʋ ndʋ wiyaʋ ɖʋ cɔjɔnaa nɛ Leevi mba pɩlɩɩnɩ paa tɔm ndʋ tɩ-yɔɔ yaa pɩlɩɩnɩ wondu ɖɩzɩyɛ kuduyuŋ yɔɔ yɔ, patiyele-tʋ nɛ pɛkɛɛnɩ hɔɔlʋʋ.
16 Mbʋ pɔñɔɔzɩ* Salomɔɔ tʋma tɩŋa camɩyɛ, kpaɣnɩ kɩyakʋ ŋgʋ pasɩ Yehowa ɖɩɣa tigiɖe+ nɛ pɩkɔɔ pɩtalɩ alɩwaatʋ ndʋ pɛtɛm-kɛ yɔ. Mbʋ pɛtɛm Yehowa ɖɩɣa.+
17 Alɩwaatʋ ndʋ tɩ-taa Salomɔɔ wobi Eziyɔnɩ-Gebɛɛrɩ+ nɛ Elɔɔtɩ,+ teŋgu nɔɔ, Edom ɛjaɖɛ taa.+
18 Hiram+ tɩŋnɩ ɛ-maɣmaɣ ɛ-lɩmɖʋyaa yɔɔ nɛ etiyini-i mɛlɛnaa nɛ teŋgu yɔɔ tʋmlaɖaa mba paawɛ niye yɔ. Pa nɛ Salomɔɔ lɩmɖʋyaa powolo Ofiiri+ nɛ pakpaɣ sika+ talaŋwaa* 450 peeɖe nɛ pɔkɔnɩ-kɛ Wiyaʋ Salomɔɔ.+
Pɩ-tɛɛ tɔm
^ Yaa «ɛ-awiya ɖɩɣa.»
^ Piye piye, «Izrayɛɛlɩ pɩyalaa.»
^ Yaa «ɛɖaɣnɩ maʋ.»
^ Yaa «Ðɩjɔzɩyɛ lona wena pesiki nɛ pʋwayɩ lɛ pɛkpɛzɩ-yɛ yɔ.»
^ Yaa «pɛtɛm.»
^ Talaŋ kʋɖʋmʋʋ maɣnɩ ɛzɩ kilonaa 34 mbʋ yɔ (kilonaa 34,2). Cɔnɩ Tɔm kɩsɔzɩtʋ B14.