Kroniiki takayaɣ naalɛ ñɩŋga 9:1-31
9 Nɛ Seeba abiɖe+ nɩɩ Salomɔɔ yɔɔ tɔm, nɛ ɛkɔɔ Yeruzalɛm se ɛpɔzɩ-ɩ tɔm kaɖɛ ñɩndʋ* nɛ ɛtakɩ-ɩ. Ɛ nɛ ɛ-lɩmɖʋyaa* sakɩyɛ paakɔmna, pɛkpɛndɩnɩ aɖaaɖaanaa mba pasɩɣlɩ balɩsam num nɛ sika+ nɛ ñɩɣlɩm pɛɛ sakɩyɛ yɔ. Ɛsʋʋ Salomɔɔ cɔlɔ nɛ ɛyɔɔdɩ ɛlɛ cɔlɔ tɔm ndʋ payɩ tɩɩwɛ ɛ-laŋɩyɛ taa yɔ.+
2 Nɛ Salomɔɔ cosi tɔm ndʋ payɩ ɛpɔzɩ-ɩ yɔ tɩ-yɔɔ. Pɩtɩkazɩ natʋyʋ se tɩkɩlɩ Salomɔɔ kaɖɛ* nɛ ɛtɩpɩzɩ nɛ ɛlɩzɩ-ɩ tɩ-taa.
3 Seeba abiɖe na Salomɔɔ lɔŋsɩnɖɛ,+ ɖɩɣa ŋga ɛmawa yɔ,+
4 tɔɔnaɣ ŋga kɛwɛ ɛ-taabɩlɩ yɔɔ yɔ,+ ɛ-lɩmɖʋyaa cakɩ caɣʋ mbʋ yɔ, mba pasɩɣ-ɩ tɔɔnaɣ taabɩlɩ yɔɔ yɔ nɛ po-wondu suu, ɛ-sʋlʋm cɛɖaa nɛ po-wondu suu, nɛ ɛ-kɩlaŋ kɩñaɣzɩŋ weyi ɛlaɣ Yehowa ɖɩɣa taa ɖoŋ ɖoŋ yɔ lɛ,+ ɛ-yɔɔ sɩ kpɩndɩlɩm.*
5 Peeɖe eheyi wiyaʋ se: «Tɔm ndʋ manɩ ma-maɣmaɣ mɛ-ɛjaɖɛ taa pɩlɩɩnɩ ña-tʋma* nɛ ñɔ-lɔŋsɩnɖɛ yɔɔ yɔ tɩkɛ toovenim.
6 Ɛlɛ mantitisi tɔm ndʋ tɩ-yɔɔ pɩkɔɔ nɛ pɩsɩɩnɩ alɩwaatʋ ndʋ mɔnkɔm nɛ mananɩ ma-maɣmaɣ mɛ-ɛsa yɔ.+ Toovenim taa lɛ, tɔm ndʋ paaheyi-m yɔ tɩtɩtalɩ lɔŋsɩnɖɛ sɔsɔɖɛ+ nɖɩ ŋwɛna yɔ ɖɩ-hɔɔlʋʋ. Ŋcɛzɩ mbʋ pɩ-tɔm maanɩwa yɔ pɩdɩɩfɛyɩ.+
7 Ñɛ-ɛyaa nɛ ña-lɩmɖʋyaa mba pasɩŋɩɣ ñɛ-ɛsɩndaa tam nɛ pewelisiɣ ñɔ-lɔŋsɩnɖɛ tɔm yɔ, pɛkɛ koboyaɣ tɩnaa!
8 Pasa ñɛ-Ɛsɔ Yehowa, weyi ñɔ-tɔm kɛdɩnɩ-ɩ nɛ ɛsɩ-ŋ e-kewiyaɣ kpelaɣ yɔɔ se ŋkɛ ñɛ-Ɛsɔ Yehowa wiyaʋ yɔ. Ñɛ-Ɛsɔ sɔɔlɩ Izrayɛɛlɩ,+ nɛ ɛsɔɔlɩ se kɩwɛɛ tam; pʋyɔɔ lɛ, ɛlɩzɩ-ŋ se ŋkɛ Izrayɛɛlɩ wiyaʋ nɛ ŋhʋʋ tɔm siɣsiɣ nɛ ŋyele nɛ paña paa weyi lɛ ɛ-waɖɛ.»
9 Nɛ ɛha wiyaʋ sika talaŋwaa* 120+ nɛ balɩsam num sakɩyɛ nɛ ñɩɣlɩm pɛɛ. Patɩtasɩ wonuu balɩsam num nɛ pɩtalɩ mbʋ Seeba abiɖe ha Wiyaʋ Salomɔɔ yɔ wiɖiyi kpa.+
10 Pɩtasɩ lɛ, Hiram lɩmɖʋyaa nɛ Salomɔɔ lɩmɖʋyaa mba powokaɣ Ofiiri+ nɛ pɔkɔŋnɩ sika yɔ, pɔkɔŋnaɣ ɖɔɖɔ algumim kpoŋgbolonaa nɛ ñɩɣlɩm pɛɛ.+
11 Wiyaʋ kpaɣ algumim kpoŋgbolonaa nɛ ɛlabɩnɩ Yehowa ɖɩɣa nɛ wiyaʋ ɖɩɣa+ tendemee,+ nɛ ɛlabɩnɩ ɖɔɖɔ hendu teyaa cɩmɩŋ nɛ cɩmʋʋ wondu ndʋ tɩ-yɔɔ wɛ nimasɩ yɔ.+ Pataana kpoŋgbolonaa mba mbʋ wiɖiyi kpa Yuuda ɛjaɖɛ taa.
12 Wiyaʋ Salomɔɔ ha ɖɔɖɔ Seeba abiɖe mbʋ payɩ ɛlɛ kaasɔɔlaa nɛ mbʋ payɩ ɛlɛ kaapɔzaa yɔ, pɩkɩlɩ mbʋ* ɛɛkɔnɩ wiyaʋ yɔ. Pʋwayɩ lɛ, Seeba abiɖe ɖɛɛ nɛ ɛpɩsɩ ɛ-tɛtʋ taa, ɛ nɛ ɛ-lɩmɖʋyaa.+
13 Nɛ sika ŋga pɔkɔŋnaɣ Salomɔɔ pɩnaɣ kʋɖʋmaɣ taa yɔ, ko-yuŋ kaakpɛndɩ sika talaŋwaa 666,+
14 pɩtasɩnɩ sika ŋga tadɩyɛ laɖaa nɛ pɛdɩyaa nɛ Arabii awiya tɩŋa nɛ ɛjaɖɛ taa komina ñʋndɩnaa mba pɔkɔŋnaɣ Salomɔɔ sika nɛ liidiye ñɩɣtʋ yɔ pɔkɔnaa yɔ.+
15 Wiyaʋ Salomɔɔ kpaɣ sika ŋga ka-taa pesidi ñɩɣtʋ lɛɛtʋ yɔ nɛ ɛlabɩnɩ kpayɩŋ sɔsɔŋ 200+ (paa kpayʋʋ ŋgʋ lɛ, pakpaɣ sika siklinaa* 600 nɛ palabɩnɩ-kʋ)+
16 nɛ ɛkpaɣ sika ŋga ka-taa pesidi ñɩɣtʋ lɛɛtʋ yɔ nɛ ɛlabɩnɩ kpayɩŋ cikpeŋ* 300 (paa kpayʋʋ cikpeluu ŋgʋ lɛ, pakpaɣ sika miinɩwaa* 3 nɛ palabɩnɩ-kʋ). Nɛ wiyaʋ kpaɣ kpayɩŋ ɛnɩ nɛ ɛsɩɩ Libaŋ Laʋ Ðɩɣa taa.+
17 Wiyaʋ kpaɣ tukela nɛ ɛla ɖɔɖɔ kewiyaɣ kpelaɣ sɔsɔɔ nɛ ɛtaa kɔ-yɔɔ sika kele kele ñɩŋga.+
18 Tendemee 6 kaawɛɛ, nɛ ɛyʋ kpaɣ-yɛ nɛ pʋcɔ ɛtalɩ kewiyaɣ kpelaɣ, nɛ paakpaɣ sika nɛ palabɩnɩ nɩŋgbanzɩ ɖɩzɩyɛ nɛ patamnɩ kewiyaɣ kpelaɣ, nɛ kaawɛnɩ ɖɔɖɔ nuŋgolonzi ɖɩdɩnɩyɛ hɔɔlɩŋ ɛnɩ ɩ-naalɛ ɩ-yɔɔ, nɛ mʋʋzɩŋ+ 2 kaasɩŋ nuŋgolonzi ɖɩdɩnɩyɛ cɔlɔ.
19 Nɛ mʋʋzɩŋ+ 12 kaasɩŋ tendemee 6 ana a-yɔɔ, kʋɖʋmʋʋ sɩŋ paa nɖɩ lɛ ɖɩ-nɔɔ taa. Kewiyaɣ nakɛyɛ taala kewiyaɣ kpelaɣ nakɛyɛ nɛ kɛwɛɛ ɛzɩ ŋga yɔ.
20 Sika palabɩnɩ Wiyaʋ Salomɔɔ kɔpʋnaa tɩŋa, nɛ sika kele kele ñɩŋga palabɩnɩ ñanzɩ nzɩ sɩwɛ Libaŋ Laʋ Ðɩɣa taa yɔ sɩ-tɩŋa. Patɩlabɩnɩ nabʋyʋ nɛ liidiye ñɩɣtʋ, mbʋ pʋyɔɔ yɔ Salomɔɔ alɩwaatʋ taa lɛ, pataakpaɣ liidiye ñɩɣtʋ se pɩkɛ pʋyʋ.+
21 Mbʋ pʋyɔɔ yɔ wiyaʋ mɛlɛnaa nɛ Hiram lɩmɖʋyaa+ powokaɣ Tarɩsiisi.+ Tam kʋɖʋm pɩnzɩ 3 taa lɛ, Tarɩsiisi mɛlɛnaa kpakɩɣ sika nɛ liidiye ñɩɣtʋ, tukela,+ tɩgbayɩŋ nɛ sumasɩ nzɩ payaɣ se pawɔŋnaa yɔ nɛ pɔkɔŋna.
22 Mbʋ Wiyaʋ Salomɔɔ ñɩm nɛ ɛ-lɔŋsɩnɖɛ kaakpaɖɩ tɛtʋ yɔɔ awiya lɛɛna kpeekpe.+
23 Nɛ tɛtʋ yɔɔ awiya kpeekpe ñɩnaɣ se ana Salomɔɔ* nɛ awelisi ɛ-lɔŋsɩnɖɛ nɖɩ Ɛsɔ toovenim tʋ kaaɖʋ ɛ-laŋɩyɛ taa yɔ.+
24 Paa weyi ɛkɔŋnaɣ kʋjɔʋ nakʋyʋ—liidiye wondu, sika wondu, wondu kususutu,+ you wondu, balɩsam num, kpaŋnaŋ nɛ kpaŋasɩ—nɛ palakaɣ mbʋ paa pɩnaɣ ŋga.
25 Nɛ Salomɔɔ kaawɛnɩ kalakɩŋ 4 000 nɛ ɛɖʋʋ ɩ-taa ɛ-kpaŋnaŋ, nɛ ɛɛwɛnɩ kɛɛkɛɛnaa nɛ ɛwɛɛnɩ ɖɔɖɔ kpaŋnaŋ* 12 000,+ nɛ ɛsɩɩ-wɛ kɛɛkɛɛnaa tɛtʋ ndɩ ndɩ taa nɛ lona wena añɔtɩnɩ wiyaʋ yɔ a-taa Yeruzalɛm taa.+
26 Nɛ ɛtɔɔ kewiyitu awiya kpeekpe yɔɔ, kpaɣnɩ Pɔɔ* nɛ piwolo Filistii mba ɛjaɖɛ nɛ pɩɖɛɛ piwolo Ejipiti kamaɣ yɔɔ.+
27 Wiyaʋ yeba nɛ liidiye ñɩɣtʋ tɔyɩ Yeruzalɛm taa siŋŋ ɛzɩ pɛɛ yɔ, nɛ sɛɛdrɩ ɖasɩ tɔyɩ siŋŋ ɛzɩ sikomɔɔrɩ tɩŋ Seefela taa yɔ.+
28 Nɛ palɩɣaɣnɩ kpaŋnaŋ nɛ Ejipiti+ nɛ ajɛɛ lɛɛna tɩŋa taa nɛ pɔkɔŋnɩ Salomɔɔ.
29 Piyele nɛ Salomɔɔ yɔɔ tɔm ndʋ pɩkazaa yɔ,+ kpaɣnɩ kiɖe tɛɛ nɛ piwolo tɩnaɣ yɔɔ, ɛzɩ patɩma-tʋ tɔm ndʋ nayʋ Naataanɩ+ mawa yɔ tɩ-taa, Siiloo tʋ Ahiya+ natʋ tɔm taa, nɛ Ido+ weyi ɛnaɣ natʋ yɔ ɛ-natʋ ndʋ pama Nebatɩ pɩyalʋ Yerobowam+ yɔɔ yɔ tɩ-taa yaa we?
30 Salomɔɔ tɔɔ kewiyitu Yeruzalɛm, Izrayɛɛlɩ kpeekpe yɔɔ pɩnzɩ 40.
31 Nɛ Salomɔɔ sɩ* nɛ pepimi-i ɛ-caa Daviid Tɛtʋ taa;+ nɛ ɛ-pɩyalʋ Robowam pɩsɩ wiyaʋ e-lone taa.+
Pɩ-tɛɛ tɔm
^ Yaa «mba pasɩ-ɩ yɔ.»
^ Yaa «se ɛlabɩ-ɩ ɖimɖimɖanaa.»
^ Piye piye, «se tɩmɛlɩ Salomɔɔ.»
^ Piye piye, «fezuu tɩtasɩ ɛ-taa wɛʋ.»
^ Yaa «ñɔ-tɔm.»
^ Talaŋ kʋɖʋmʋʋ maɣnɩ ɛzɩ kilonaa 34 mbʋ yɔ (kilonaa 34,2). Cɔnɩ Tɔm kɩsɔzɩtʋ B14.
^ Pɩpɩzɩɣ pɩkɛ, «pɩtasɩnɩ kʋjɔŋ weyi ɩmaɣnɩ mbʋ.»
^ Sikli kʋɖʋmʋʋ maɣnɩ ɛzɩ kɩɖamnaa 11 nɛ hɔɔlʋʋ mbʋ yɔ (kɩɖamnaa 11,4). Cɔnɩ Tɔm kɩsɔzɩtʋ B14.
^ Ðoŋ ɖoŋ lɛ, tɔŋ tɔyaa ɖɔkaɣnɩ kpayɩŋ cikpeŋ.
^ Ebree Masɩ taa lɛ, miinɩ kʋɖʋmʋʋ maɣnɩ kɩɖamnaa 570. Cɔnɩ Tɔm kɩsɔzɩtʋ B14.
^ Piye piye, «awiya kpeekpe ñɩnaɣ Salomɔɔ ɛsɩndaa.»
^ Yaa «kpaŋnaŋ yɔɔ caɣyaa.»
^ Pʋ-tɔbʋʋ se Efraatɩ.
^ Piye piye, «Nɛ pahɩzɩ Salomɔɔ ɛ-cɔzɔnaa cɔlɔ.»
