Tesalooniiki mba takayaɣ naalɛ ñɩŋga 2:1-17
2 Ɛlɛ koobiya, ɖa-Kɩbaɣlʋ Yesu Krɩstʋ wɛʋ alɩwaatʋ+ nɛ ɖe-kpeɣluu ɛ-cɔlɔ+ pɔ-tɔm lɛ, ɖɩpɔzʋʋ-mɩ se
2 itaayele nɛ tɔm ndʋ tɩlɩnɩ fezuu* nakʋyʋ cɔlɔ yɔ+ yaa tɔm ndʋ pɔyɔɔdɩnɩ nɔɔ yɔ yaa takayaɣ nakɛyɛ ŋga pamaɣzɩɣ se kalɩnɩ ɖɔ-cɔlɔ yɔ, kala nɛ pisidi mɩ-maɣzɩm lɛɛ lɛɛ yaa sɔɔndʋ kpa-mɩ se Yehowa* kɩyakʋ+ talaa.
3 Itaayele nɛ nɔɔyʋ peɣzi-mɩ kaaʋ, mbʋ pʋyɔɔ yɔ kɩyakʋ ŋgʋ, kɩɩkaɣ kɔm ye tisuu yebu+ ɛtɩcalɩ kɔm nɛ pikuli paɣtʋ yɔɔ mayʋ+ yɔɔ nɛ pɩwɩlɩ yɔ, pʋ-tɔbʋʋ se ɖɩzʋʋ pɩyalʋ.+
4 Ɛkɛ koyindu nɛ ɛkpazɩɣ ɛ-tɩ mbʋ payɩ payaɣ-pʋ se ɛsɔ yɔ pɩ-yɔɔ yaa wonuu ŋgʋ poluŋuu kɩ-tɛɛ yɔ kɩ-ñʋʋ yɔɔ, nɛ ɛcakɩ Ɛsɔ tɛ templo taa, nɛ ɛwɩlɩɣ ɛ-tɩ ɛyaa ɛsɩndaa se ɛkɛ ɛsɔ nɔɔyʋ.
5 Ɩɩtɔzʋʋ se alɩwaatʋ ndʋ maawɛ mɩ-cɔlɔ yɔ, meheyaɣ-mɩ tɔm ndʋ?
6 Nɛ lɛɛlɛɛyɔ, ɩsɩm mbʋ pɩɖɩkɩ-ɩ nʋmɔʋ yɔ, se pɩsa nɛ pikuli ɛ-yɔɔ nɛ pɩwɩlɩ, ɛ-maɣmaɣ ɛ-alɩwaatʋ talɩɣ lɛ.
7 Toovenim taa lɛ, paɣtʋ yɔɔ maʋ pʋnɛ, pɩ-mɛsaɣ tɛɛ tɔm tɛm paɣzʋʋ tʋmɩyɛ labʋ,+ ɛlɛ pɩwɛɣ mbʋ nɛ pɩkɔɔ nɛ pɩsɩɩnɩ alɩwaatʋ ndʋ weyi ɛɖɩkɩ nʋmɔʋ lɛɛlɛɛyɔ yɔ ɛɛtasɩɣ wɛʋ yɔ.
8 Ðɩnɛ ɛlɛ, pɩkaɣ paɣtʋ yɔɔ mayʋ yɔɔ kuluu, ɛnʋ weyi Kɩbaɣlʋ Yesu kaɣ tɩŋnʋʋ ɛ-nɔɔ taa fezuu yɔɔ+ nɛ ɛkʋ-ɩ nɛ ɛtɩŋnɩ ɛ-wɛʋ alɩwaatʋ ndʋ tɩkaɣ naʋ kaɣlaa yɔ+ tɩ-yɔɔ nɛ ɛɖɩzɩ-ɩ yɔ.
9 Ɛlɛ Sataŋ ɖoŋ taa paɣtʋ yɔɔ mayʋ wɛɛ,+ nɛ ɛlakɩ maamaaci lakasɩ ndɩ ndɩ, nɛ cɛtɩm yʋsasɩ nɛ piti lakasɩ+
10 nɛ ɛyɔɔdʋʋ ajitu cɛtɩm tɔm tɩŋa se epeɣzi+ mba peɖiɣni lebu yɔ, se pɩkɛnɩ-wɛ kɩhɛyʋʋ, mbʋ pʋyɔɔ yɔ patitisi toovenim sɔɔlɩm yɔɔ se pɩsa nɛ paya pa-ñʋʋ.
11 Mbʋ yebina nɛ Ɛsɔ yele se ɖoŋ weyi epeɣziɣ yɔ, epeɣzi-wɛ se pɩsa nɛ petisi cɛtɩm tɔm yɔɔ,+
12 nɛ pahʋʋnɩ pa-tɩŋa tɔm; mbʋ pʋyɔɔ yɔ patitisi toovenim yɔɔ, ɛlɛ pa-taa labɩ leleŋ nɛ mbʋ pɩfɛyɩ siɣsiɣ yɔ.
13 Ɛlɛ, pɩwɛnɩ-ɖʋ se ɖɩsɛɛ Ɛsɔ tam se ɛlabaɣ lɛ mɩ koobiya mba Yehowa* sɔɔlaa yɔ mɩ-yɔɔ, mbʋ pʋyɔɔ yɔ ɖooo kiɖe tɛɛ Ɛsɔ lɩzɩ-mɩ+ se ihiɣ ñʋʋ yabʋ pɩtɩŋnɩ tisuu mbʋ ɩwɛnɩ toovenim yɔɔ yɔ, nɛ ɛzɩma ɛtɩŋnɩ e-fezuu yɔɔ nɛ ɛpɩsɩ-mɩ kele kele yɔ pɩ-yɔɔ.+
14 Ɛya-mɩ se pɩtɩŋnɩ tɔm kɩbandʋ ndʋ ɖisusuu-mɩ yɔ tɩ-yɔɔ nɛ ihiɣ ñʋʋ yabʋ, se pɩsa nɛ ihiɣ ɖa-Kɩbaɣlʋ Yesu Krɩstʋ samtʋ.+
15 Nɛ pʋyɔɔ lɛ, koobiya, ɩɖɔkɩ kpam+ nɛ ɩñɔɔnɩ sɔnzɩ nzɩ ɖɩwɩlɩ-mɩ yɔ,+ paa pɩtɩɩkɛ nzɩ ɖɩtɩŋnɩ yɔɔdaɣ nakɛyɛ yɔɔ yaa takayaɣ nakɛyɛ ŋga kalɩnɩ ɖɔ-cɔlɔ yɔ kɔ-yɔɔ nɛ ɖɩwɩlɩ-mɩ yɔ.
16 Pɩtasɩ lɛ, tɛtɛ nɛ ɖa-Kɩbaɣlʋ Yesu Krɩstʋ maɣmaɣ nɛ ɖa-Caa Ɛsɔ weyi ɛsɔɔlɩ-ɖʋ+ nɛ ɛtɩŋnɩ lootiye yɔɔ nɛ ɛha-ɖʋ tamtam laŋɩyɛ hɛzʋʋ nɛ lidaʋ kɩbaŋʋ+ yɔ,
17 pɛhɛzɩ mɩ-laŋa nɛ pakpazɩ-mɩ ɖoŋ lakasɩ kɩbanzɩ kpeekpe taa nɛ yɔɔdaɣ kɩbaŋa kpeekpe taa.