Yohanɛɛsɩ takayaɣ naadozo ñɩŋga 1:1-14
1 Ma, abalʋ weyi ɛsʋtʋyaa yɔ,* mamaɣnɩ takayaɣ kanɛ man-kʋsɔɔlʋ Gayuusi, weyi mɔnsɔɔlɩ-ɩ siŋŋ yɔ.
2 Man-kʋsɔɔlʋ, mantɩmɩɣ se pɩwɛɛ nɛ piɖeɣni-ŋ pɩtɩŋa pɩ-taa nɛ ŋwɛɛ alaafɩya, ɛzɩ lɛɛlɛɛyɔ pɩwɛʋ nɛ piɖeɣni-ŋ* yɔ.
3 Mbʋ pʋyɔɔ yɔ man-taa labɩ leleŋ siŋŋ alɩwaatʋ ndʋ koobiya kɔma nɛ palɩzɩ aseɣɖe toovenim tɔm ndʋ ŋɖɔkaa yɔ tɩ-yɔɔ yɔ, ɛzɩ ŋwɛʋ nɛ ŋɖɔŋ toovenim taa yɔ.+
4 Nabʋyʋ fɛyɩ nɛ pɩhaɣ-m taa leleŋ siŋŋ nɛ pɩkɩlɩ* se manɩɩ se men-piya wɛɛ nɛ sɩɖɔŋ toovenim taa.+
5 Man-kʋsɔɔlʋ, ŋwɩlɩɣ ñe-siɣsiɣ wɛtʋ mbʋ ŋlakɩ koobiya yɔ pɩ-taa, paa pɛkɛ-ŋ agɔma yɔ.+
6 Palɩzɩ aseɣɖe ñɔ-sɔɔlɩm yɔɔ ɛgbɛyɛ ɛsɩndaa. Mentendi-ŋ, sɩɩ-wɛ nɛ pɔɖɔ pa-nʋmɔʋ ɛzɩ pɩmʋnaʋ Ɛsɔ ɛsɩndaa yɔ.+
7 Mbʋ pʋyɔɔ yɔ ɛ-hɩɖɛ yɔɔ palɩwa, nɛ patɩmʋ nabʋyʋ+ ajɛɛ taa mba cɔlɔ.
8 Pʋyɔɔ pɩkɛnɩ-ɖʋ kɩjɛyʋʋ se ɖɩmʋ ɛyaa mba pɔ-ɖɔndɩ ɛgɔndʋ camɩyɛ,+ se pɩsa nɛ ɖɩpɩsɩ mba pa nɛ wɛ pɛkpɛndɩɣ nɛ palakɩ tʋmɩyɛ toovenim tɔm yɔɔ yɔ.+
9 Mama tɔm natʋyʋ ɛgbɛyɛ, ɛlɛ Diyotrefɛɛsɩ weyi ɛñɩnɩɣ kajalaɣ lone pɛ-hɛkʋ taa yɔ,+ ɛɛmʋʋ mbʋ payɩ pɩlɩnɩ ɖɔ-cɔlɔ yɔ pɩ-taa nabʋyʋ nɛ ñamtʋ.+
10 Mbʋ yebina nɛ ye mɔnkɔma yɔ, mankaɣ yebu nɛ patɩlɩ ɛ-lakasɩ, ɛzɩma ɛyɛlɩɣnɩ tɔm kɩdɛkɛdɩtʋ ɖɔ-yɔɔ yɔ.+ Ɛlɛ lakasɩ nzɩ sɩtɩmaɣ-ɩ, ekiziɣ ɖɔɖɔ koobiya mʋʋ+ nɛ ñamtʋ; nɛ mba pɔsɔɔlɩ-wɛ mʋʋ yɔ, ɛñɩnɩɣ se ekizini-wɛ nɛ ɛñɩnɩɣ ɖɔɖɔ se ɛlɩzɩ-wɛ ɛgbɛyɛ taa.
11 Man-kʋsɔɔlʋ, taamaɣzɩnɩ mbʋ pɩfɛyɩ ɖeu yɔ; ɛlɛ maɣzɩnɩ mbʋ pɩwɛ ɖeu yɔ.+ Weyi ɛlakɩ mbʋ pɩwɛ ɖeu yɔ ɛlɩnɩ Ɛsɔ cɔlɔ.+ Weyi ɛlakɩ mbʋ pɩfɛyɩ ɖeu yɔ, ɛtɩna Ɛsɔ.+
12 Koobiya tɩŋa yɔɔdɩ tɔm kɩbandʋ Demetriyuusi yɔɔ, nɛ tɔm kʋɖʋmtʋ ndʋ tɩ-yɔɔ toovenim ñɩɣ niye. Toovenim taa lɛ, ɖa ɖɔɖɔ ɖiɖiɣni lɩzʋʋ aseɣɖe ɛ-yɔɔ, nɛ ŋsɩm mbʋ se aseɣɖe nɖɩ ɖɩlɩzɩɣ yɔ ɖɩkɛ toovenim.
13 Maawɛnɩ tɔm sakɩyɛ se mamaɣ-ŋ, ɛlɛ mantɩsɔɔlɩ se mama-ŋ tʋ nɛ kɩmamaʋ nɛ tɔlɩm.
14 Ɛlɛ mantaɣ liu se pɩkazɩ pazɩ lɛ mankaɣ-ŋ naʋ, ɖɩkaɣ ɖama ɛsɩndaa naʋ nɛ mɔyɔɔdɩnɩ-ŋ.
Tɛtɛ nɛ ŋwɛɛnɩ laŋhɛzɩyɛ.
Taabalaa tiyiɣni-ŋ pɛ-sɛtʋ. Yaa taabalaa hɩla kʋɖʋm kʋɖʋm nɛ ŋcɛlɩ-wɛ mɛn-sɛtʋ.
Pɩ-tɛɛ tɔm
^ Yaa «Ma, ɛgbɛyɛ taa ɛzʋtʋyʋ.»
^ Yaa «piɖeɣni ña-kalɩzaɣ.»
^ Pɩpɩzɩɣ pɩkɛ, «Nabʋyʋ fɛyɩ se mɛwɛɣnɩ ɛsɩmɩyɛ pɩ-yɔɔ nɛ pɩkɩlɩ.»
