Ejipiti Lɩʋ 14:1-31
14 Nɛ Yehowa heyi Moyizi se:
2 «Heyi Izrayɛɛlɩ mba se pɩwɛɛ se papɩsɩ nɛ pacaɣ Pihayirɔɔtɩ ɛsɩndaa, Migɩdɔl nɛ teŋgu pɛ-hɛkʋ taa, ɖenɖe ɛyʋ pɩzɩɣ ɛwɛɛ nɛ ɛna Baalɩ-Zefonɩ yɔ.+ Pɩwɛɛ se ɩcaɣ teŋgu cɔlɔ nɛ ɩha ɛsa nɛ Baalɩ-Zefonɩ.
3 Pʋbʋ lɛ Farawɔɔ kaɣ yɔɔdʋʋ Izrayɛɛlɩ mba tɔm se: “Pɛwɛɛ nɛ poyotuu ɛjaɖɛ taa yem nɛ paasɩŋ ɖenɖe powoki yɔ. Kañɩmbusuu kpa-wɛ nɛ kɩsɩɩ.”
4 Mankaɣ yebu nɛ Farawɔɔ laŋɩyɛ sʋʋ kpɩzɩŋ,+ nɛ ɛkaɣ kʋyʋʋ nɛ ɛɖʋ pa-wayɩ, nɛ mankaɣ Farawɔɔ nɛ ɛ-sɔɔjanaa kpeekpe yɔɔ tɩŋnʋʋ nɛ meyele nɛ ma-hɩɖɛ sɛɛ;+ nɛ pɩtʋʋ fɛyɩ se Ejipiti mba kaɣ ɖiɣzinuu se ma lɛ Yehowa.»+ Nɛ mbʋ palaba ɖɔɖɔ.
5 Pʋwayɩ lɛ powolo nɛ peheyi Ejipiti wiyaʋ se samaɣ sewa nɛ kɛɖɛɛ. Kpaagbaa mbʋ lɛ, lɩmaɣza wena Farawɔɔ nɛ ɛ-lɩmɖʋyaa paawɛnɩ samaɣ ŋga kɔ-yɔɔ yɔ alɛɣzɩ,+ nɛ pɔyɔɔdɩ se: «Ɛbɛ ɖɩlabɩ mbʋ yɔ? Ɛbɛ yɔɔ ɖiyebi Izrayɛɛlɩ mba nɛ palɩɩ ɖo-yomiye taa?»
6 Peeɖe eyeba nɛ pɔñɔɔzɩ e-you kɛɛkɛɛnaa, nɛ ɛkpɛndɩnɩ ɛ-sɔɔjanaa.+
7 Ɛkpaɣ kɛɛkɛɛnaa kɩbama 600 nɛ Ejipiti kɛɛkɛɛnaa lalaa tɩŋa, paa ŋgʋ lɛ kɩ-yɔɔ nɛ sɔɔjanaa.
8 Nɛ Yehowa yele nɛ Ejipiti wiyaʋ Farawɔɔ laŋɩyɛ sʋʋ kpɩzɩŋ, nɛ ɛkʋyɩ nɛ ɛɖʋ Izrayɛɛlɩ mba wayɩ, alɩwaatʋ ndʋ paba ɖiɣni ɖɔm nɛ abalɩtʋ* nɛ pɛɖɛɣ yɔ.+
9 Ejipiti mba ɖʋ pa-wayɩ,+ nɛ Farawɔɔ kɛɛkɛɛnaa mba kpaŋnaŋ hɔŋ yɔ pa-tɩŋa nɛ ɛ-sɔɔjanaa mba pacakɩ kpaŋnaŋ yɔɔ yɔ nɛ ɛ-sɔɔjanaa nɩŋgbanzɩ ɖɔnaa pɛwɛɛ nɛ pɔñɔtʋʋnɩ Izrayɛɛlɩ mba alɩwaatʋ ndʋ paba ñaacaɣ teŋgu cɔlɔ, Pihayirɔɔtɩ cɔlɔ, nɛ paha ɛsa nɛ Baalɩ-Zefonɩ yɔ.
10 Farawɔɔ ñɔtɩnɩ-wɛ lɛ, Izrayɛɛlɩ mba kpazɩ pɛ-ɛsa nɛ pana Ejipiti mba ɖiɣni pa-wayɩ ɖʋʋ. Sɔɔndʋ kpa Izrayɛɛlɩ mba siŋŋ nɛ papaɣzɩ kubusi mabʋ nɛ payaɣ Yehowa.+
11 Pɔpɔzɩ Moyizi se: «Ɛzɩ pɩlaŋ fɛyɩnɩ Ejipiti nɛ ŋkɔnɩ-ɖʋ cɩnɛ se ɖɩsɩ kañɩmbusuu taa?+ Ɛbɛ ŋlabɩ-ɖʋ mbʋ yɔ? Ɛbɛ yɔɔ ŋlɩzɩ-ɖʋ Ejipiti?
12 Pɩtɩkɛ tɔm tʋnɛ ɖeyi ɖeyi ɖiiheyi-ŋ Ejipiti se: “Yele-ɖʋ ɖiɣ ɖiɣ nɛ ɖɩɖʋ Ejipiti mba lɩm” yaa we? Mbʋ pʋyɔɔ yɔ pɩwɛ-ɖʋ weewee se ɖɩɖʋ Ejipiti mba lɩm nɛ pɩkɩlɩ se ɖɩsɩ kañɩmbusuu taa.»+
13 Peeɖe Moyizi heyi samaɣ se: «Sɔɔndʋ ɛtaakpa-mɩ.+ Ɩɖɔkɩ kpam nɛ ɩna ɛzɩma Yehowa kaɣ mɩ-ñʋʋ yabʋ sɔnɔ yɔ.+ Mbʋ pʋyɔɔ yɔ Ejipiti ñɩma mba ɩnaɣ-wɛ sɔnɔ yɔ, ɩɩkaɣ-wɛ tasʋʋ naʋ wiɖiyi kpa.+
14 Yehowa maɣmaɣ kaɣ you mi-lone taa,+ nɛ ɩkaɣ sum ɖiɣ ɖiɣ.»
15 Nɛ Yehowa heyi Moyizi se: «Ɛbɛ yɔɔ ŋwɛɛ nɛ ŋmakɩ kubusi nɛ ŋyaɣ-m? Heyi Izrayɛɛlɩ mba se pakʋyɩ nɛ pakpaɣ nʋmɔʋ.
16 Piyele nɛ ña yɔ, kpazɩ ña-ɖaʋ nɛ ŋsezi ñe-nesi teŋgu yɔɔ nɛ ŋtayɩ-kʋ nabʋlɛ, nɛ pɩsa nɛ Izrayɛɛlɩ mba pɩzɩ nɛ pɔɖɔ teŋgu hɛkʋ taa ɖenɖe lɩm sɔwa nɛ pɩwɩlɩ yɔ nɛ pɛtɛzɩ.
17 Piyele nɛ ma yɔ, meyeki se Ejipiti mba laŋa ɩsʋʋ kpɩzɩŋ, nɛ piyele nɛ paɖʋ pa-wayɩ teŋgu taa; nɛ mankaɣ tɩŋnʋʋ Farawɔɔ nɛ ɛ-sɔɔjanaa kpeekpe, e-you kɛɛkɛɛnaa, nɛ ɛ-sɔɔjanaa mba pacakɩ kpaŋnaŋ yɔɔ yɔ pɔ-yɔɔ nɛ meyele nɛ ma-hɩɖɛ sɛɛ.+
18 Nɛ pɩtʋʋ fɛyɩ se Ejipiti mba kaɣ tɩlʋʋ se ma lɛ Yehowa alɩwaatʋ ndʋ mantɩŋɩɣnɩ Farawɔɔ, e-you kɛɛkɛɛnaa, nɛ ɛ-sɔɔjanaa mba pacakɩ kpaŋnaŋ yɔɔ yɔ pɔ-yɔɔ nɛ meyele nɛ ma-hɩɖɛ sɛɛ yɔ.»+
19 Ðɩnɛ ɛlɛ Ɛsɔ toovenim tʋ tɛ tiyiyu+ weyi ɛɖɛɣaɣ Izrayɛɛlɩ samaɣ nɔɔ yɔ, ɛkʋyɩ nɛ ɛkɛɛ ka-wayɩ, nɛ mɩndʋ tilimiye nɖɩ ɖɩɩwɛ pɛ-ɛsɩndaa yɔ ɖɩkʋyɩ ɖɩkɛɛ nɛ ɖɩsɩŋ pa-wayɩ.+
20 Nɛ ɖɩkɔɔ ɖɩsɩŋ Ejipiti mba nɛ Izrayɛɛlɩ mba pɛ-hɛkʋ taa.+ Hɔɔlʋʋ kʋɖʋmʋʋ yɔɔ lɛ, ɖɩkɛ mɩndʋ ndʋ tiyu cɩkpɛndʋʋ yɔ. Nɛ hɔɔlʋʋ lɛɛkʋ yɔɔ lɛ, ɖɩkɛ ñalɩmɩyɛ nɛ ɖɩñandɩɣ ɖoo taa.+ Pʋyɔɔ lɛ, samaɣ lɛɛka taapɩzɩɣ se kɔñɔtɩnɩ lɛɛka ɖoo tɩŋa.
21 Nɛ Moyizi sezi e-nesi teŋgu yɔɔ;+ nɛ Yehowa yele nɛ wɩsɩ ɖɩlɩyɛ taa helim ɖoŋ ñɩmbʋ nabʋyʋ ma ɖoo pilim nɛ pɩpɩsɩnɩ teŋgu lɩm nɛ wayɩ, nɛ eyele nɛ teŋgu hɛkʋ taa lɩm sɔɔ nɛ tataa wɩlɩ,+ nɛ lɩm taa tayɩ nabʋlɛ.+
22 Peeɖe Izrayɛɛlɩ mba ɖɔm teŋgu hɛkʋ taa ɖenɖe pɩwɩlaa yɔ nɛ pɛtɛzɩ;+ alɩwaatʋ ndʋ lɛ, lɩm kaapɩsɩ koloŋa pe-nesi kɩbanzɩ yɔɔ nɛ pa-nɩmɩyɛ yɔɔ.+
23 Ejipiti mba ɖʋ pa-wayɩ, nɛ Farawɔɔ kpaŋnaŋ kpeekpe, e-you kɛɛkɛɛnaa, nɛ ɛ-sɔɔjanaa mba pacakɩ kpaŋnaŋ yɔɔ yɔ papaɣzɩ tɩŋʋʋ pa-wayɩ teŋgu hɛkʋ taa.+
24 Pɩtalɩ tɛbɩyɛ tɛɛ* lɛ, Yehowa wɛɛ miŋ nɛ mɩndʋ tilimiye taa+ nɛ ɛna Ejipiti sɔɔjanaa, nɛ eyele nɛ pisidi-wɛ.
25 Ɛlɩzaɣ kpela pɛ-kɛɛkɛɛnaa tɛɛ nɛ pa-saʋ lakɩ-wɛ kaɖɛ, nɛ Ejipiti mba yɔɔdaɣ se: «Ðise nɛ ɖɩtaañɔtɩnɩ Izrayɛɛlɩ mba, mbʋ pʋyɔɔ yɔ Yehowa wɛ pɔ-yɔɔ nɛ eyouni Ejipiti mba.»+
26 Nɛ Yehowa heyi Moyizi se: «Posi ñe-nesi teŋgu yɔɔ nɛ lɩm pɩsɩ nɛ pɩwadɩ Ejipiti mba yɔɔ, po-you kɛɛkɛɛnaa yɔɔ, nɛ pɔ-sɔɔjanaa mba pacakɩ kpaŋnaŋ yɔɔ yɔ pɔ-yɔɔ.»
27 Kpaagbaa mbʋ lɛ, Moyizi posi e-nesi teŋgu yɔɔ, nɛ tɛʋ caɣaɣ fem lɛ, teŋgu pɩsɩ ki-lone taa. Ejipiti mba seɣaɣ-kʋ lɛ, Yehowa tuzi-wɛ nɛ ɛpɛɖɩ kɩ-hɛkʋ taa.+
28 Lɩm mbʋ pɩpɩsaa yɔ, pɩwadɩ you kɛɛkɛɛnaa nɛ sɔɔjanaa mba pacakɩ kpaŋnaŋ yɔɔ yɔ nɛ Farawɔɔ tɛ you laɖaa kpeekpe, mba paaɖʋ pa-wayɩ teŋgu taa yɔ pɔ-yɔɔ.+ Pɩtɩkazɩ pa-taa paa kʋɖʋm nɛ ɛ-ɛsa.+
29 Ɛlɛ Izrayɛɛlɩ mba ɖɔ teŋgu hɛkʋ taa ɖenɖe pɩwɩlaa yɔ,+ nɛ lɩm kaapɩsɩ koloŋa pe-nesi kɩbanzɩ yɔɔ nɛ pa-nɩmɩyɛ yɔɔ.+
30 Mbʋ pɩlaba nɛ Yehowa ya Izrayɛɛlɩ ñʋʋ Ejipiti mba nesi tɛɛ kɩyakʋ ŋgʋ ki-wiye,+ nɛ Izrayɛɛlɩ na Ejipiti ñɩma mba pasɩba yɔ teŋgu kidiiliŋ yɔɔ.
31 Izrayɛɛlɩ na ɖɔɖɔ ɖoŋ sɔsɔŋ weyi* Yehowa lɩzaa nɛ ɛwɩlɩ Ejipiti mba yɔ, nɛ samaɣ paɣzɩ seu Yehowa sɔɔndʋ nɛ kapaɣzɩ wɛnʋʋ tisuu Yehowa nɛ ɛ-lɩmɖʋyʋ Moyizi pɔ-yɔɔ.+
Pɩ-tɛɛ tɔm
^ Piye piye, «nesi nɛ ɛsɔdaa.»
^ Yaa «tanaŋ tɛɛ feŋuu alɩwaatʋ.» Pʋ-tɔbʋʋ se kpaɣnɩ tɛbɩyɛ tɛɛ ñɩɣtʋ 2 mbʋ yɔ nɛ piwolo tanaŋ tɛɛ ñɩɣtʋ 6.
^ Piye piye, «nesi sɔsɔsɩ nzɩ.»
