Ejipiti Lɩʋ 18:1-27
18 Nɛ Madiyaŋ mba cɔjɔ Yetro, Moyizi ɛtɩ+ nɩɩ mbʋ payɩ Ɛsɔ labɩ Moyizi nɛ ɛ-samaɣ Izrayɛɛlɩ yɔ, ɛzɩma Yehowa lɩzɩ Izrayɛɛlɩ mba Ejipiti ɛjaɖɛ taa yɔ.+
2 Moyizi ɛtɩ Yetro kaamʋ Moyizi halʋ Zipora nɛ ɛcɔnɩ ɛ-yɔɔ alɩwaatʋ ndʋ Moyizi kaapɩsɩnɩ-ɩ ɖɩɣa Yetro cɔlɔ yɔ,
3 pɩkpɛndɩnɩ ɛ-pɩyalaa 2.+ Paya ɛ-pɩyalʋ kʋɖʋm se Gɛrɩsɔɔm,*+ mbʋ pʋyɔɔ yɔ Moyizi yɔɔdaa se: «Manpɩsɩ ɛgɔm ɛjaɖɛ nɖɩ ɖɩtɩkɛ ma-ñɩnɖɛ yɔ ɖɩ-taa,»
4 nɛ payaa lɛlʋ se Eliyeezɛɛrɩ,* mbʋ pʋyɔɔ yɔ ɛyɔɔdaa se: «Man-caa tɛ Ɛsɔ kɛnɩ man-sɩnɩyʋ, weyi ɛlɩzɩ-m Farawɔɔ laɣɖɛ nɔɔ taa yɔ.»+
5 Nɛ Moyizi ɛtɩ Yetro kpɛndɩnɩ Moyizi halʋ nɛ ɛlɛ pɩyalaa nɛ ɛkɔɔ Moyizi cɔlɔ kañɩmbusuu taa ɖenɖe ɛɛwɛɛ yɔ, Ɛsɔ toovenim tʋ pʋʋ cɔlɔ.+
6 Nɛ etiyi se peheyi Moyizi se: «Ma, ñɛ-ɛtɩ Yetro,+ menɖiɣni ñɔ-cɔlɔ kɔm, ma nɛ ña-halʋ nɛ ɛ-pɩyalaa 2.»
7 Kpaagbaa mbʋ lɛ, Moyizi ɖɛɛ nɛ ewolo ɛkatɩ ɛ-ɛtɩ, nɛ eluŋ nɛ ɛsɛɛ-ɩ nɛ ekpiikini-i. Nɛ pɔpɔzɩ ɖama pa-alaafɩya yɔɔ, nɛ pʋwayɩ lɛ pasʋʋ kizinziku tɛɛ.
8 Moyizi kɛdɩ ɛ-ɛtɩ mbʋ payɩ Yehowa labɩ Farawɔɔ nɛ Ejipiti ɛjaɖɛ Izrayɛɛlɩ yɔɔ yɔ,+ kala wena payɩ pakatɩ nʋmɔʋ taa yɔ,+ nɛ ɛzɩma Yehowa yabɩ pa-ñʋʋ yɔ.
9 Yetro taa la leleŋ nɛ kɩbam mbʋ payɩ Yehowa labɩ Izrayɛɛlɩ nɛ ɛya pa-ñʋʋ Ejipiti* yɔ.
10 Nɛ Yetro yɔɔdɩ se: «Pasa Yehowa, weyi ɛyabɩ mɩ-ñʋʋ Ejipiti nɛ Farawɔɔ nesi tɛɛ yɔ, nɛ ɛlɩzɩ samaɣ Ejipiti mba nesi tɛɛ yɔ.
11 Lɛɛlɛɛyɔ manawa se Yehowa kpaɖɩ ɛsɔnaa lalaa payɩ,+ mbʋ payɩ ɛlabɩ mba pakpazɩ pa-tɩ nɛ pawɩlɩ ñaŋ ɛ-samaɣ yɔ pʋyɔɔ.»
12 Pʋwayɩ lɛ, Moyizi ɛtɩ Yetro kɔnɩ kɩlaʋ kɩñaɣzʋʋ nɛ kɩlaŋ lɛɛŋ Ɛsɔ, nɛ Aarɔɔnɩ nɛ Izrayɛɛlɩ ɛzʋtʋyaa tɩŋa pɔkɔɔ se pa nɛ Moyizi ɛtɩ pɔtɔɔ tɔɔnaɣ Ɛsɔ toovenim tʋ ɛsɩndaa.
13 Tɛʋ fema lɛ, Moyizi caɣ ɛzɩ ɛtɩɩlakʋʋ yɔ se ɛhʋʋ samaɣ tɔm, nɛ samaɣ sɩŋ Moyizi ɛsɩndaa kpaɣ tanaŋ tɛɛ nɛ pɩkɔɔ pɩtalɩ ɖanaɣ.
14 Moyizi ɛtɩ na tʋmɩyɛ nɖɩ payɩ ɛlɛ wɛɛ nɛ ɛlakɩ samaɣ yɔ lɛ, ɛpɔzɩ-ɩ se: «Tʋmɩyɛ nɖɩ ŋwɛɛ nɛ ŋlakɩ samaɣ mbʋ yɔ? Ɛbɛ yɔɔ ŋcakɩ cɩnɛ ñe-ɖeke nɛ samaɣ kpeekpe sɩŋɩɣ ñɛ-ɛsɩndaa kpaɣ tanaŋ tɛɛ nɛ pɩkɔɔ pɩtalɩ ɖanaɣ?»
15 Moyizi cosi ɛ-ɛtɩ se: «Mbʋ pʋyɔɔ yɔ samaɣ wɛɛ nɛ kɔkɔŋ mɔn-cɔlɔ se kɔpɔzɩ nɛ katɩlɩ Ɛsɔ lɩmaɣza.
16 Tɔm natʋyʋ kɔŋ lɛ, pɔkɔŋnɩ-m tʋ, nɛ pɩwɛɛ se mahʋʋ tɔm ndʋ tɩkɔm ɛyʋ nɔɔyʋ nɛ lɛlʋ pɛ-hɛkʋ taa yɔ, nɛ meyele nɛ patɩlɩ Ɛsɔ toovenim tʋ lɩmaɣza nɛ ɛ-paɣtʋ.»+
17 Moyizi ɛtɩ heyi-i se: «Mbʋ ŋwɛɛ nɛ ŋlakɩ mbʋ yɔ pɩfɛyɩ ɖeu.
18 Pɩtʋʋ fɛyɩ se pɩkaɣ-ŋ nɩʋ nɛ pɩkpɛndɩnɩ samaɣ ŋga kɛwɛ ñɔ-cɔlɔ yɔ, mbʋ pʋyɔɔ yɔ sʋʋtʋ tʋnɛ tɩkɩlɩ-ŋ yuŋ nɛ ŋŋpɩzɩɣ ŋkpaɣ-tʋ ñe-ɖeke.
19 Lɛɛlɛɛyɔ welisini-m. Mancaɣ se mantasɩ-ŋ lɔŋ, nɛ Ɛsɔ kaɣ ñɔ-cɔlɔ wɛʋ.+ Ñɛkɛnɩ samaɣ lone taa caɣyʋ Ɛsɔ toovenim tʋ ɛsɩndaa,+ nɛ pɩwɛɛ se ŋwoni tɔm ndʋ tɩkɔŋ yɔ Ɛsɔ toovenim tʋ ɛsɩndaa.+
20 Pɩwɛɛ se ŋpaɣ-wɛ pɩlɩɩnɩ mbʋ Ɛsɔ lɩmaɣza nɛ ɛ-paɣtʋ kɛnaa yɔ pɩ-yɔɔ+ nɛ ŋyele nɛ patɩlɩ nʋmɔʋ ŋgʋ kɩ-taa pɩwɛɛ se pɔɖɔ yɔ nɛ tʋmɩyɛ nɖɩ pɩwɛɛ se pala yɔ.
21 Ɛlɛ pɩwɛɛ se ŋlɩzɩ samaɣ taa abalaa mba pamʋnɩ camɩyɛ+ nɛ peseɣ Ɛsɔ sɔɔndʋ yɔ, abalaa mba pataɣ-wɛ liu nɛ papaɖɩɣ mulum kɛzɛɣa yɔ,+ nɛ ŋyele nɛ pɛkɛ samaɣ ñʋndɩnaa, ɛyaa kudokiŋ ñʋndɩnaa, mɩnɩŋ ñʋndɩnaa, nɩɩnʋwawaa ñʋndɩnaa, nɛ hiŋ ñʋndɩnaa.+
22 Pɩwɛɛ se pahʋʋ samaɣ tɔm alɩwaatʋ ndʋ tɔm natʋyʋ kɔŋ yɔ,* nɛ pɩwɛɛ se pɔkɔnɩ tɔm ndʋ tɩwɛ kaɖɛ yɔ ñɔ-cɔlɔ,+ ɛlɛ pɔcɔnɩ tɔm cikpetu ɖeɖe. Yele nɛ pasɩnɩ-ŋ sʋʋtʋ kpaɣʋ nɛ pɩsa nɛ tʋmɩyɛ wɛɛ-ŋ kɛlɛʋ.+
23 Ye ŋlabɩ mbʋ yɔ, nɛ ye mbʋ Ɛsɔ ɛpɔzʋʋ-ŋ yɔ, ŋkaɣ pɩzʋʋ nɛ ŋla ña-tʋmɩyɛ camɩyɛ, nɛ paa weyi ɛkaɣ pɩsʋʋ ɛ-tɛ nɛ laŋhɛzɩyɛ.»
24 Kpaagbaa mbʋ lɛ, Moyizi welisini ɛ-ɛtɩ nɛ ɛla ndʋ payɩ eheyi-i yɔ tɩ-yɔɔ.
25 Moyizi lɩzɩ abalaa mba pamʋnaa yɔ Izrayɛɛlɩ kpeekpe taa nɛ eyele nɛ pɛkɛ samaɣ ñʋndɩnaa, ɛyaa kudokiŋ ñʋndɩnaa, mɩnɩŋ ñʋndɩnaa, nɩɩnʋwawaa ñʋndɩnaa, nɛ hiŋ ñʋndɩnaa.
26 Nɛ pahʋʋ samaɣ tɔm alɩwaatʋ ndʋ tɔm natʋyʋ kɔŋ yɔ. Tɔm kaɖɛ ñɩndʋ lɛ, powokaɣni-tʋ Moyizi cɔlɔ,+ ɛlɛ paa tɔm cikpetu ndʋ lɛ, pahʋwaɣ-tʋ.
27 Pʋwayɩ lɛ, Moyizi sɩɩ ɛ-ɛtɩ nɛ ɛlɩzɩ-ɩ nʋmɔʋ,+ nɛ ɛlɛ kpaɣ ɛ-nʋmɔʋ nɛ ɛpɩsɩ ɛ-ɛjaɖɛ taa.
Pɩ-tɛɛ tɔm
^ Pʋ-tɔbʋʋ se «Ɛgɔm peeɖe.»
^ Pʋ-tɔbʋʋ se «Mɛ-Ɛsɔ kɛ sɩnɩyʋ.»
^ Piye piye, «Ejipiti nesi tɛɛ.»
^ Piye piye, «pahʋʋ samaɣ tɔm paa ɛzɩmtaa.»
