Ejipiti Lɩʋ 2:1-25
2 Alɩwaatʋ ndʋ tɩ-taa lɛ, Leevi ɖɩɣa taa abalʋ nɔɔyʋ kpaɣ Leevi pɛlɛ nɔɔyʋ nɛ ɛpɩsɩ-ɩ ɛ-halʋ.+
2 Nɛ halʋ ɛnʋ ɛhaɣ hoɣa nɛ ɛlʋlɩ abalɩbɩɣa. Ɛna ɛzɩma keɖewa pɩdɩɩfɛyɩ yɔ lɛ, ɛmɛsɩ-kɛ fenasɩ naadozo.+
3 Alɩwaatʋ ndʋ ɛtaatasɩɣ pɩzʋʋ se ɛmɛsɩ-kɛ lɛ,+ ɛkpaɣ papiruusi ɖɔkʋ* nɛ ɛtaa-kʋ aŋwɔ nɛ ketu nɛ ɛɖʋ pɩɣa ŋga kɩ-taa nɛ ɛsɩɩ-kʋ kañɩŋgbayɩsɩ taa Niili Pɔɔ kidiiliŋ yɔɔ.
4 Ɛlɛ kɔ-kɔɔ+ sɩŋ poliŋ taa pazɩ se ɛna mbʋ pɩkaɣ-kɛ tɛmnʋʋ yɔ.
5 Farawɔɔ pɛlɛ tibi Niili taa se ɛsɔ lɩm lɛ, ɛ-lɩmɖʋyaa halɩñɩma wɛɛ nɛ pɔɖɔŋ Niili kidiiliŋ yɔɔ. Nɛ elosi ɖɔkʋ kañɩŋgbayɩsɩ hɛkʋ taa. Kpaagbaa mbʋ lɛ, etiyi e-yom halɩñɩnʋ se ɛkpaɣ-kʋ nɛ ɛkɔna.+
6 Ekuli-kʋ lɛ, ɛna pɩɣa abalɩbɩɣa, kaawɛɛ nɛ kewiɣ. Nɛ ɛtɔ se: «Pɩkɛ Ebree mba piya taa pɩɣa nakɛyɛ.» Paa mbʋ yɔ, kɔ-tɔm labɩ-ɩ pʋtɔdɩyɛ.
7 Peeɖe kɔ-kɔɔ pɔzɩ Farawɔɔ pɛlɛ se: «Mowolo nɛ mayaa Ebree mba taa halʋ asɔnʋʋ nakʋyʋ nɛ kɩcɔnɩ-ŋ pɩɣa ŋga kɔ-yɔɔ yaa we?»
8 Farawɔɔ pɛlɛ cosi-i se: «Wolo!» Kpaagbaa mbʋ lɛ, halɩbɩɣa ŋga kowolo nɛ kayaa pɩɣa ŋga ko-ɖoo.+
9 Nɛ Farawɔɔ pɛlɛ heyi-i se: «Mʋ pɩɣa kanɛ nɛ ŋha-kɛ hɩɖɛ nɛ ŋcɔnɩ-m kɔ-yɔɔ, nɛ mankaɣ-ŋ hɛyʋʋ.» Peeɖe halʋ mʋ pɩɣa nɛ ɛha-kɛ hɩɖɛ nɛ ɛcɔnɩ kɔ-yɔɔ.
10 Pɩɣa paɣlaa lɛ, ewoni-kɛ nɛ ɛcɛlɩ Farawɔɔ pɛlɛ, nɛ kapɩsɩ ɛlɛ pɩyalʋ.+ Ɛyaa-kɛ se Moyizi* nɛ ɛtɔ se: «Mbʋ pʋyɔɔ yɔ malɩzɩ-kɛ nɛ lɩm taa.»+
11 Nɛ kɩyakɩŋ ɛnɩ ɩ-taa, Moyizi kɔm nɛ ɛla ɛyʋ sɔsɔ lɛ,* ɛlɩɩ nɛ ewolo e-koobiya cɔlɔ se ɛna tʋma ɖoŋ ñɩna wena paawɛɛ nɛ palakɩ yɔ,+ nɛ elosi Ejipiti tʋ nɔɔyʋ, ɛwɛɛ nɛ ɛmakɩ Ebree tʋ nɔɔyʋ, e-koobiya taa nɔɔyʋ.
12 Peeɖe ɛcɔnɩ kpɛɛɛ nɛ ɛtɩna nɔɔyʋ lɛ, ɛkʋ Ejipiti tʋ nɛ ɛmɛsɩ-ɩ kañɩŋa tɛɛ.+
13 Ɛlɛ tɛʋ fema lɛ, ɛlɩɩ nɛ ɛna Ebree abalaa 2 peɖiɣni you. Nɛ ɛpɔzɩ weyi ɛca tɔm yɔ se: «Ɛbɛ yɔɔ ŋmakɩ ña-taabalʋ?»+
14 Peeɖe ɛlɛ kitini-i se: «Alɩzɩ-ŋ se ŋkɛ ɖa-ñʋʋdʋ* nɛ ɖɔ-tɔm hʋyʋ? Ŋcaɣ se ŋkʋ-m ɛzɩ ŋkʋʋ Ejipiti tʋ yɔ?»+ Ðɩnɛ ɛlɛ sɔɔndʋ kpa Moyizi nɛ ɛtɔ se: «Ye mbʋ, ɛyaa tɛm tɔm ndʋ nɩʋ!»
15 Pʋwayɩ lɛ, Farawɔɔ nɩɩ tɔm ndʋ, nɛ ɛñɩnɩ se ɛkʋ Moyizi; ɛlɛ Moyizi se Farawɔɔ cɔlɔ nɛ ɛɖɛɛ ɖooo poliŋ nɛ ewolo se ɛcaɣ Madiyaŋ ɛjaɖɛ taa,+ nɛ ɛtalɩ nɛ ɛcaɣ lɩm lɔkɔ nakʋyʋ cɔlɔ.
16 Nɛ Madiyaŋ+ cɔjɔ kaawɛnɩ pɛlaa 7, nɛ pɔkɔɔ se polu lɩm nɛ papɩyɩ pulona taa nɛ pisu nɛ pa-caa kpɩna ñɔɔ.
17 Ɛlɛ ninɖiɣyaa kɔɔ nɛ pɔɖɔɔnɩ-wɛ ɛzɩ patɩɩlakʋʋ yɔ. Peeɖe Moyizi kʋyaa nɛ ɛsɩnɩ halaa mba* nɛ ɛha pa-kpɩna lɩm nɛ añɔɔ.
18 Papɩsaa nɛ pɔkɔɔ pa-caa Rewuwɛɛlɩ*+ cɔlɔ ɖɩɣa lɛ, pɩɖɩɣzɩ-ɩ nɛ ɛpɔzɩ-wɛ se: «Pɩlabɩ ɛzɩma nɛ ɩpɩsɩ ɖɩɣa lɔŋ sɔnɔ mbʋ?»
19 Pocosi-i se: «Ejipiti tʋ nɔɔyʋ+ holini-ɖʋ ninɖiɣyaa nesi tɛɛ, nɛ halɩ elu-ɖʋ lɩm nɛ ɛha kpɩna nɛ añɔɔ.»
20 Ɛpɔzɩ ɛ-pɛlaa se: «Nɛ le ɛwɛɛ yɔ? Ɛbɛ yɔɔ iyebi abalʋ ɛnʋ peeɖe? Ɩyaa-ɩ nɛ ɛkɔɔ nɛ ɖa nɛ ɩ ɖɩtɔɔ tɔɔnaɣ.»
21 Pʋwayɩ lɛ, Moyizi tisi se ɛcakɩ abalʋ ɛnʋ ɛ-cɔlɔ, nɛ ɛlɛ cɛlɩ-ɩ ɛ-pɛlɛ Zipora+ se ɛkɛ ɛ-halʋ.
22 Pʋwayɩ lɛ, Zipora lʋlɩ abalɩbɩɣa nɛ Moyizi yaa-kɛ se Gɛrɩsɔɔm,*+ mbʋ pʋyɔɔ yɔ ɛtɔm se: «Manpɩsɩ ɛgɔm ɛjaɖɛ nɖɩ ɖɩtɩkɛ ma-ñɩnɖɛ yɔ ɖɩ-taa.»+
23 Alɩwaatʋ sakɩyɛ* wayɩ lɛ, Ejipiti wiyaʋ sɩ;+ ɛlɛ yomiye yɔɔ lɛ, Izrayɛɛlɩ mba wɛɛ mɔlʋʋ yɔɔ nɛ pamakɩ kubusi nɛ pañaɣlɩɣ, nɛ kubusi nzɩ pamakaɣ se pasɩnɩ-wɛ mbʋ pʋyɔɔ yɔ pɛwɛ yomiye taa yɔ, sɩwɛɛ nɛ sɩkpaɣ Ɛsɔ toovenim tʋ cɔlɔ.+
24 Pɩtalɩ alɩwaatʋ natʋyʋ lɛ, Ɛsɔ nɩɩ pɔ-mɔla,+ nɛ Ɛsɔ tɔzɩ ɛgbɛyɛ nɖɩ ɛɛɖʋnɩ Abraham, Izaakɩ nɛ Yakɔɔb yɔ ɖɩ-yɔɔ.+
25 Nɛ Ɛsɔ cɔnɩ Izrayɛɛlɩ mba, nɛ Ɛsɔ na wɛtʋ ndʋ tɩ-taa pɛwɛɛ yɔ.
Pɩ-tɛɛ tɔm
^ Yaa «aɖakaɣ.»
^ Pʋ-tɔbʋʋ se «Palɩzɩ-ɩ,» pɩwɩlɩɣ se palɩzɩ-ɩ nɛ lɩm taa.
^ Yaa «Moyizi kaawɛɛ nɛ ɛkpaɣ ɖoŋ lɛ.»
^ Piye piye, «ɖa-awumbu.»
^ Yaa «nɛ ɛlʋ halaa mba pɔ-yɔɔ.»
^ Pʋ-tɔbʋʋ se Yetro.
^ Pʋ-tɔbʋʋ se «Ɛgɔm peeɖe.»
^ Piye piye, «Kɩyakɩŋ sakɩyɛ.»
