Ejipiti Lɩʋ 26:1-37
26 «Pɩwɛɛ se ŋkpaɣ kizinziku pɩsaŋ 10 weyi palabɩnɩ pɩsatʋ fɛlɛ fɛlɛ ñɩndʋ ndʋ pamɩlɩtɩ camɩyɛ yɔ, pɩsatʋ ndʋ tɩwɛ pʋlɔɔ yɔ, heŋ hʋndʋ kɩsɛɛmtʋ yuulee, nɛ pɩsatʋ kɩsɛɛmtʋ cɩɩɩ nɛ ŋlabɩnɩ Ɛsɔ sɛtʋ kɩɖanɖʋʋ.+ Pɩwɛɛ se ŋkpaɣ pɩsatʋ nɛ ŋlɩzɩnɩ+ kerebimwaa+ pɩsaŋ ɛnɩ ɩ-yɔɔ.
2 Paa kizinziku pɩsaʋ ŋgʋ lɛ, kɩ-ɖaɣlɩkɩŋ kaɣ kɛʋ nuŋgolonzi* 28 nɛ kɩ-walanzɩ ñɛkɛ nuŋgolonzi 4. Pɩwɛɛ se kizinziku pɩsaŋ ɛnɩ ɩ-tɩŋa ɩwɛɛ kɩmaŋ.+
3 Pɩwɛɛ se pɔsɔ kizinziku pɩsaŋ 5 ɖama nɔsɩ taa nɛ pɩla pɩsaʋ sɔsɔʋ kʋɖʋmʋʋ, nɛ pɔsɔ kizinziku pɩsaŋ 5 lɛɛŋ ɖama nɔsɩ taa nɛ pɩla pɩsaʋ sɔsɔʋ lɛɛkʋ.
4 Ŋkaɣ kpaɣʋ pɩsatʋ ndʋ tɩwɛ pʋlɔɔ yɔ nɛ ŋlabɩnɩ nimee wena pokoti-yɛ ɛzɩ kokoo yɔ kizinziku pɩsaʋ sɔsɔʋ yɔɔ, ŋgʋ kɩkɛ kɛdɛzaɣ ñɩŋgʋ yɔ kɩ-nɔɔ yɔɔ, nɛ pɩwɛɛ se ŋla mbʋ ɖɔɖɔ pɩsaʋ sɔsɔʋ lɛɛkʋ yɔɔ, ŋgʋ kɩkɛ kɛdɛzaɣ ñɩŋgʋ yɔ kɩ-nɔɔ yɔɔ, ɖenɖe pɩsaŋ sɔsɔŋ 2 ɛnɩ ɩkatɩɣ ɖama yɔ.
5 Ŋkaɣ labʋ nimee 50 wena pokoti-yɛ ɛzɩ kokoo yɔ kizinziku pɩsaʋ kʋɖʋmʋʋ yɔɔ nɛ nimee 50 wena pokoti-yɛ ɛzɩ kokoo yɔ kizinziku pɩsaʋ lɛɛkʋ nɔɔ yɔɔ, se pɩsa nɛ ɩha ɖama nɛ ɛsa ɖenɖe ɩkatɩɣ ɖama yɔ.
6 Pɩwɛɛ se ŋkpaɣ sika nɛ ŋlabɩnɩ kpasɩ 50 nɛ ŋkpaɣ kpasɩ nzɩ nɛ ŋtamsɩnɩ kizinziku pɩsaŋ, nɛ Ɛsɔ sɛtʋ kɩɖanɖʋʋ kaɣ pɩsʋʋ pʋyʋ kʋɖʋm.+
7 «Pɩwɛɛ ɖɔɖɔ se ŋkpaɣ pʋnʋ hʋndʋ nɛ ŋlabɩnɩ pɩsaŋ+ weyi pohuuzuuni Ɛsɔ sɛtʋ kɩɖanɖʋʋ yɔɔ yɔ. Ŋkaɣ labʋ kizinziku pɩsaŋ 11.+
8 Paa kizinziku pɩsaʋ ŋgʋ lɛ, kɩ-ɖaɣlɩkɩŋ kaɣ kɛʋ nuŋgolonzi 30 nɛ kɩ-walanzɩ ñɛkɛ nuŋgolonzi 4. Pɩwɛɛ se kizinziku pɩsaŋ 11 ɛnɩ ɩ-tɩŋa ɩwɛɛ kɩmaŋ.
9 Pɩwɛɛ se ŋkpaɣ kizinziku pɩsaŋ 5 nɛ ŋsɔ ɖama nɔsɩ taa, nɛ ŋkpaɣ kizinziku pɩsaŋ 6 lɛɛŋ nɛ ŋsɔ ɖama nɔsɩ taa, nɛ pɩwɛɛ se ŋkpiyi kizinziku pɩsaʋ 6 ñɩŋgʋ kizinziku ɛsɩndaa.
10 Nɛ pɩwɛɛ se ŋla nimee 50 wena pokoti-yɛ ɛzɩ kokoo yɔ kizinziku pɩsaʋ kʋɖʋmʋʋ nɔɔ yɔɔ, ŋgʋ kɩkɛ kɛdɛzaɣ ñɩŋgʋ pɩsaʋ sɔsɔʋ yɔɔ yɔ kɩ-nɔɔ yɔɔ, nɛ nimee 50 wena pokoti-yɛ ɛzɩ kokoo yɔ kizinziku pɩsaʋ lɛɛkʋ nɔɔ yɔɔ ɖenɖe ɩtasɩɣ ɖama katʋʋ yɔ.
11 Pɩwɛɛ se ŋkpaɣ ñɩɣyʋʋ kɩsɛɛmʋʋ nɛ ŋlabɩnɩ kpasɩ 50 nɛ ŋlɛkɩ nimee wena pokoti-yɛ ɛzɩ kokoo yɔ a-taa nɛ kizinziku kpɛndɩ, nɛ pɩkaɣ pɩsʋʋ pʋyʋ kʋɖʋm.
12 Kizinziku pɩsaŋ hɔɔlɩŋ weyi ɩkazɩɣ yɔ pakaɣ-ɩ susuu. Kizinziku pɩsaʋ hɔɔlʋʋ ŋgʋ kɩkazɩɣ yɔ, kɩkaɣ susuu Ɛsɔ sɛtʋ kɩɖanɖʋʋ wayɩ.
13 Kizinziku pɩsaŋ ɖaɣlɩkɩŋ weyi ɩkazɩɣ yɔ, ɩkaɣ susuu Ɛsɔ sɛtʋ kɩɖanɖʋʋ hʋyɩŋ yɔɔ, paa hʋyʋʋ ŋgʋ kɩ-taa lɛ nuŋgoloŋa kʋɖʋmaɣ, se pɩsa nɛ pihuuzi kɩ-yɔɔ.
14 «Ŋkaɣ kpaɣʋ ɖɔɖɔ ɛyaŋ tɔna wena pata-yɛ tɔlɩm kɩsɛɛmɩm cɩɩɩ yɔ nɛ ŋlabɩnɩ kizinziku yɔɔ kuhuuzuu, nɛ ŋkpaɣ ɖɔɖɔ kpɩnɛ nɖɩ payaɣ se fɔɔkɩ yɔ ɖɩ-tɔnɛ nɛ ŋlabɩnɩ kuhuuzuu ŋgʋ patɩnɩɣ pɩ-yɔɔ yɔ.+
15 «Ŋkaɣ kpaɣʋ akasɩya ɖaŋ nɛ ŋlabɩnɩ Ɛsɔ sɛtʋ kɩɖanɖʋʋ tɛ kpoŋgbolonaa*+ nɛ pasɩŋ yiɣ yiɣ.+
16 Paa kpoŋgbolo* ŋgʋ lɛ, pɩwɛɛ se kɩ-kʋkʋyɩŋ ɛkɛ nuŋgolonzi 10, nɛ kɩ-walanzɩ kɛ nuŋgoloŋa kʋɖʋmaɣ nɛ hɔɔlʋʋ.
17 Paa kpoŋgbolo ŋgʋ lɛ, kɩwɛnɩ nɩŋgbanzɩ* 2 nzɩ sɩwɛ ɖama yɔɔ yɔ. Mbʋ pɩwɛɛ se ŋla Ɛsɔ sɛtʋ kɩɖanɖʋʋ tɛ kpoŋgbolonaa tɩŋa.
18 Pɩwɛɛ se ŋla kpoŋgbolonaa 20 Ɛsɔ sɛtʋ kɩɖanɖʋʋ hadɛ kiŋ hɔɔlʋʋ yɔɔ, nɛ paha ɛsa nɛ hadɛ kiŋ.
19 «Ŋkaɣ kpaɣʋ liidiye ñɩɣtʋ nɛ ŋlabɩnɩ ɖɩdɩnɩyɛ lona+ 40 kpoŋgbolonaa 20 waa mba pɛ-tɛɛ: ɖɩdɩnɩyɛ lona 2 kpoŋgbolo kʋɖʋmʋʋ tɛɛ se kɩ-nɩŋgbanzɩ 2 nzɩ sɩsʋʋ pɩ-taa, nɛ ɖɩdɩnɩyɛ lona 2 paa kpoŋgbolo ŋgʋ kɩtɩŋɩɣ pʋwayɩ yɔ kɩ-tɛɛ se kɩ-nɩŋgbanzɩ 2 ɩsʋʋ pɩ-taa.+
20 Ɛsɔ sɛtʋ kɩɖanɖʋʋ hɔɔlʋʋ lɛɛkʋ yɔɔ, hayo kiŋ hɔɔlʋʋ yɔɔ lɛ, la kpoŋgbolonaa 20
21 nɛ pa-ɖɩdɩnɩyɛ lona 40 wena palabɩnɩ liidiye ñɩɣtʋ yɔ: ɖɩdɩnɩyɛ lona 2 kpoŋgbolo kʋɖʋmʋʋ tɛɛ, nɛ ɖɩdɩnɩyɛ lona 2 paa kpoŋgbolo ŋgʋ kɩtɩŋɩɣ pʋwayɩ yɔ kɩ-tɛɛ.
22 Ɛsɔ sɛtʋ kɩɖanɖʋʋ wayɩ hɔɔlʋʋ, wɩsɩ ɖɩɖʋyɛ hɔɔlʋʋ taa lɛ, ŋkaɣ labʋ kpoŋgbolonaa 6.+
23 Ŋkaɣ labʋ kpoŋgbolonaa 2 nɛ pɛkɛ Ɛsɔ sɛtʋ kɩɖanɖʋʋ wayɩ tilima 2 wena awɛɣ kɔna taa yɔ.
24 Pɩwɛɛ se pakpɩtɩ-yɛ 2 kpaɣnɩ pɩ-tɛɛ nɛ pɩkpa hayo, piwolo pɩsɩɩnɩ kajalaɣ kokooye. Pɩwɛɛ se pala mbʋ a-naalɛ nɛ akaɣ kɛʋ kɔna taa tilima ana a-naalɛ.
25 Nɛ kpoŋgbolonaa 8 kaɣnɩ wɛʋ, pa nɛ pa-ɖɩdɩnɩyɛ lona 16 wena palabɩnɩ liidiye ñɩɣtʋ yɔ: ɖɩdɩnɩyɛ lona 2 kpoŋgbolo kʋɖʋmʋʋ tɛɛ, nɛ ɖɩdɩnɩyɛ lona 2 paa kpoŋgbolo ŋgʋ kɩtɩŋɩɣ pʋwayɩ yɔ kɩ-tɛɛ.
26 «Ŋkaɣ kpaɣʋ akasɩya tɩʋ nɛ ŋlabɩnɩ ɖaŋ sɔsɔŋ. Ɛsɔ sɛtʋ kɩɖanɖʋʋ hɔɔlʋʋ kʋɖʋmʋʋ yɔɔ lɛ,+ ŋkaɣ ɖʋʋ ɖaŋ sɔsɔŋ 5 se ɩɖɔkɩ kpoŋgbolonaa,
27 nɛ ŋɖʋ ɖaŋ sɔsɔŋ 5 Ɛsɔ sɛtʋ kɩɖanɖʋʋ hɔɔlʋʋ lɛɛkʋ yɔɔ se ɩɖɔkɩ kpoŋgbolonaa mba pɛwɛ peeɖe yɔ, nɛ ŋɖʋ ɖaŋ sɔsɔŋ 5 kpoŋgbolonaa mba pɛwɛ Ɛsɔ sɛtʋ kɩɖanɖʋʋ wɩsɩ ɖɩɖʋyɛ hɔɔlʋʋ taa yɔ, hɔɔlʋʋ ŋgʋ kɩwɛnɩ wayɩ yɔ.
28 Hɛkʋ taa ɖaʋ sɔsɔʋ ŋgʋ kɩtɩŋɩɣnɩ kpoŋgbolonaa hɛkʋ taa yɔ, pɩwɛɛ se kɩlɩɩnɩ tɩnaɣ yɔɔ nɛ kiwolo tɩnaɣ lɛɛka yɔɔ.
29 «Ŋkaɣ kpaɣʋ sika nɛ ŋtaa kpoŋgbolonaa yɔɔ,+ nɛ ŋkaɣ kpaɣʋ sika nɛ ŋlabɩnɩ po-kokoo wena aɖɔkʋʋ ɖaŋ sɔsɔŋ yɔ, nɛ ŋkaɣ kpaɣʋ sika nɛ ŋtaa ɖaŋ sɔsɔŋ ɛnɩ ɩ-yɔɔ.
30 Pɩwɛɛ se ŋla Ɛsɔ sɛtʋ kɩɖanɖʋʋ nɛ kɩwɛɛ ɛzɩ ŋgʋ pawɩlɩ-ŋ pʋʋ yɔɔ yɔ.+
31 «Pɩwɛɛ se ŋkpaɣ pɩsatʋ ndʋ tɩwɛ pʋlɔɔ yɔ, heŋ hʋndʋ kɩsɛɛmtʋ yuulee, pɩsatʋ kɩsɛɛmtʋ cɩɩɩ, nɛ pɩsaŋ weyi ɩwɛ fɛlɛ fɛlɛ yɔ nɛ ŋlabɩnɩ pɩsaʋ kikenduu.+ Pɩwɛɛ se ŋkpaɣ pɩsatʋ nɛ ŋlɩzɩnɩ kerebimwaa kɩ-yɔɔ.
32 Ŋkaɣ-kʋ susuu akasɩya tɩʋ tilima 4 wena pata a-yɔɔ sika yɔ a-yɔɔ. Sika pɩwɛɛ se palabɩnɩ a-kokoo wena a-nɔsɩ howa yɔ. Pɩwɛɛ se pesiɣ tilima ana ɖɩdɩnɩyɛ lona 4 wena palabɩnɩ liidiye ñɩɣtʋ yɔ a-yɔɔ.
33 Ŋkaɣ kpaɣʋ pɩsaʋ kikenduu nɛ ŋsusi kpasɩ tɛɛ, nɛ ŋkpaɣ Aseɣɖe Lɩzʋʋ aɖakaɣ+ nɛ ŋsʋna nɛ ŋsɩɩ kɩ-wayɩ peeɖe. Pɩsaʋ kikenduu kaɣ tayʋʋ Lone Kiɖeɖeye+ nɛ Lone Kiɖeɖeye nɖɩ ɖɩkpaɖaa yɔ+ pɛ-hɛkʋ taa.
34 Pɩwɛɛ se ŋkpaɣ sulaɣ nɛ ŋsuli Aseɣɖe Lɩzʋʋ aɖakaɣ yɔɔ Lone Kiɖeɖeye nɖɩ ɖɩkpaɖaa yɔ ɖɩ-taa.
35 «Ŋkaɣ sɩʋ taabɩlɩ pɩsaʋ kikenduu ɛsɩndaa, nɛ kanɖʋnaa ɖɩzɩyɛ+ wɛɛ taabɩlɩ ɛsɩndaa Ɛsɔ sɛtʋ kɩɖanɖʋʋ hadɛ kiŋ hɔɔlʋʋ taa; nɛ ŋsɩɩ taabɩlɩ hayo kiŋ hɔɔlʋʋ taa.
36 Ŋkaɣ kpaɣʋ pɩsatʋ ndʋ tɩwɛ pʋlɔɔ yɔ, heŋ hʋndʋ kɩsɛɛmtʋ yuulee, pɩsatʋ kɩsɛɛmtʋ cɩɩɩ nɛ pɩsaŋ weyi ɩwɛ fɛlɛ fɛlɛ, weyi pɛkpɛndaa nɛ palʋʋ yɔ nɛ ŋlabɩnɩ pɩsaʋ kikenduu nakʋyʋ kizinziku ɖɩzʋyɛ nɔnɔɔ yɔɔ.+
37 Ŋkaɣ kpaɣʋ akasɩya ɖaŋ nɛ ŋlabɩnɩ tilima 5 wena a-yɔɔ pakaɣ susuu pɩsaʋ kikenduu yɔ nɛ ŋtaa a-yɔɔ sika. Sika pɩwɛɛ se palabɩnɩ a-kokoo wena a-nɔsɩ howa yɔ, nɛ ŋlabɩ-yɛ ɖɩdɩnɩyɛ lona 5 wena palabɩnɩ ñɩɣyʋʋ kɩsɛɛmʋʋ yɔ.
Pɩ-tɛɛ tɔm
^ Nuŋgoloŋa kʋɖʋmaɣ kɛ santimɛtawaa 44 nɛ hɔɔlʋʋ (santimɛtawaa 44,5). Cɔnɩ Tɔm kɩsɔzɩtʋ B14.
^ Cɔnɩ Tɔm pee sɔsɔna tɔbʋʋ lɩzʋʋ nɛ Tɔm kɩsɔzɩtʋ B5.
^ Cɔnɩ Tɔm pee sɔsɔna tɔbʋʋ lɩzʋʋ nɛ Tɔm kɩsɔzɩtʋ B5.
^ Yaa «ɖasɩ nzɩ sɩtʋʋzaa yɔ.»
