Ejipiti Lɩʋ 33:1-23
33 Yehowa tasɩ heyuu Moyizi se: «Kʋyɩ cɩnɛ nɛ ŋɖɛɛ, ña nɛ samaɣ ŋga ŋlɩzɩ-kɛ Ejipiti ɛjaɖɛ taa yɔ. Wolo ɛjaɖɛ nɖɩ monɖuuni Abraham, Izaakɩ, nɛ Yakɔɔb, nɛ mɔntɔ se: “Mankaɣ-ɖɩ cɛlʋʋ ña-lʋlʋʋ taa mba”*+ yɔ ɖɩ-taa.
2 Mankaɣ tiyuu tiyiyu nɔɔyʋ nɛ ɛɖɛɛ ñɔ-nɔɔ+ nɛ mankaɣ ɖɔɔnʋʋ Kanaŋ mba, Amoori mba, Hɛɛtɩ mba, Perizi mba, Hivi mba, nɛ Yebuusi mba.+
3 Iwolo ɛjaɖɛ nɖɩ ɖɩ-taa naalɩm nɛ tʋŋ num pikpeŋ yem yɔ.+ Ɛlɛ maakaɣ wɛʋ mɩ-hɛkʋ taa se ɖiwolo, mbʋ pʋyɔɔ yɔ ɩkɛ samaɣ ŋga ka-laŋɩyɛ wɛ kpɩzɩŋ* yɔ,+ nɛ pɩtaala nɛ manɖɩzɩ-mɩ nʋmɔʋ taa.»+
4 Samaɣ nɩ laŋwɛɛkɩyɛ tɔm ndʋ lɛ, kapaɣzɩ caɣʋ kʋñɔwiye, nɛ ka-taa nɔɔyʋ tɩɖʋ ɛ-yɔɔ ajana wondu.
5 Yehowa heyi Moyizi se: «Heyi Izrayɛɛlɩ mba se: “Ɩkɛ samaɣ ŋga ka-laŋɩyɛ wɛ kpɩzɩŋ* yɔ.+ Manpɩzaɣ se mansʋʋ mɩ-hɛkʋ taa nɛ manɖɩzɩ-mɩ alɩwaatʋ kʋɖʋmtʋ taa.+ Ye mbʋ lɛɛlɛɛyɔ lɛ, ɩsɩɩ mɩ-ajana wondu hɔɔlʋʋ nɛ mamaɣzɩ nɛ mana mbʋ pɩwɛɛ se malabɩ-mɩ yɔ.”»
6 Pʋyɔɔ kpaɣnɩ Orɛɛbʋ Pʋʋ cɔlɔ lɛ, Izrayɛɛlɩ mba tɩtasɩ ɖʋʋ* pɔ-yɔɔ ajana wondu.
7 Nɛ Moyizi kpaɣ e-kizinziku nɛ esiɣ-kʋ ɖigbeɣliye* wayɩ, ɖenɖe piposini ɖigbeɣliye pazɩ yɔ, nɛ ɛyaa-kʋ se kediɣzaɣ kizinziku. Ye nɔɔyʋ ɛñɩnɩɣ se ɛtɩlɩ Yehowa lɩmaɣza yɔ,+ ɛlɩɣ nɛ ewolo kediɣzaɣ kizinziku tɛɛ, ɖigbeɣliye wayɩ.
8 Moyizi tɩɩlɩɣ se ewoki kizinziku tɛɛ lɛ, samaɣ tɩŋa kʋyʋʋ nɛ kasɩŋ, paa weyi lɛ ɛ-maɣmaɣ e-kizinziku nɔnɔɔ taa, nɛ kɔcɔŋnɩ Moyizi nɛ pɩkɔɔ pɩsɩɩnɩ alɩwaatʋ ndʋ ɛsʋ kizinziku tɛɛ yɔ.
9 Moyizi tɩɩsʋʋ kizinziku tɛɛ lɛ, mɩndʋ tilimiye+ tiki nɛ ɖɩsɩŋ kizinziku nɔnɔɔ taa alɩwaatʋ ndʋ Ɛsɔ yɔɔdʋʋnɩ Moyizi yɔ.+
10 Alɩwaatʋ ndʋ samaɣ kpeekpe naɣaɣ mɩndʋ tilimiye ɖɩsɩŋ kizinziku nɔnɔɔ taa yɔ, paa weyi ɛkʋyaɣ nɛ eluŋuu ɛ-maɣmaɣ e-kizinziku nɔnɔɔ taa.
11 Yehowa kaayɔɔdʋʋnɩ Moyizi lɛ, ɛ nɛ ɩ panaɣ ɖama ɛsɩndaa,+ ɛzɩ ɛyʋ nɔɔyʋ yɔɔdʋʋnɩ ɛyʋ lɛlʋ yɔ. Alɩwaatʋ ndʋ Moyizi pɩsaɣ ɖigbeɣliye* taa yɔ, ɛ-lɩmɖʋyʋ nɛ ɛ-sɩnɩyʋ+ Yozuwee+ weyi ɛkɛ Nuuni pɩyalʋ yɔ, ɛtaalɩɣ kizinziku tɛɛ.
12 Nɛ Moyizi heyi Yehowa se: «Na, ŋwɛɛ nɛ ŋheyiɣ-m se: “Ðiyi samaɣ kanɛ nɛ ŋkpanɩ-kɛ,” ɛlɛ ŋtiyele nɛ mantɩlɩ ma nɛ weyi ŋkaɣ tiyuu yɔ. Pɩtasɩ lɛ, ŋyɔɔdaa se: “Mansɩmɩ-ŋ nɛ ña-hɩɖɛ,* nɛ ñɔ-tɔm kɛdɩnɩ-m.”
13 Mentendi-ŋ, ye mɔn-tɔm ɛkɛdɩnɩ-ŋ yɔ, yele nɛ mantɩlɩ ña-nʋmɔŋ,+ nɛ pɩsa nɛ mantɩlɩ-ŋ nɛ mɔn-tɔm wɛɛ nɛ tɩkɛdɩɣnɩ-ŋ tam. Tɔzɩ ɖɔɖɔ se ɛjaɖɛ ɖɩnɛ ɖɩkɛ ña-samaɣ.»+
14 Peeɖe eheyi-i se: «Ma-maɣmaɣ ma* nɛ ŋ ɖɩkaɣnɩ wobu,+ nɛ mankaɣ-ŋ haʋ hɛzʋʋ.»+
15 Peeɖe Moyizi cosi-i se: «Ye ña-maɣmaɣ* ŋŋtɩŋɩɣ-ɖʋ yɔ, taakʋsɩ-ɖʋ cɩnɛ.
16 Ɛbɛ kaɣ wɩlʋʋ se ma nɛ ña-samaɣ ɖɔ-tɔm kɛdɩnɩ-ŋ? Pɩtɩkɛ ɛzɩma ŋwɛɣ ɖɔ-cɔlɔ,+ se pɩsa nɛ ma nɛ ña-samaɣ ɖɩwɛɛ ndɩ nɛ tɛtʋ yɔɔ samasɩ kpeekpe yɔ?»+
17 Yehowa wolo pɩ-yɔɔ nɛ eheyi Moyizi se: «Mankaɣ ɖɔɖɔ labʋ mbʋ ŋpɔzʋʋ yɔ, mbʋ pʋyɔɔ yɔ ñɔ-tɔm kɛdɩnɩ-m nɛ mansɩmɩ-ŋ nɛ ña-hɩɖɛ.»
18 Nɛ Moyizi yɔɔdɩ se: «Mentendi-ŋ, wɩlɩ-m ña-paɣlɩka.»
19 Ɛlɛ ecosi-i se: «Mankaɣ yebu nɛ man-kɩbandʋ kpeekpe kɔɔ nɛ tɩɖɛɛ ñɛ-ɛsɩndaa, nɛ mankaɣ susuu Yehowa hɩɖɛ ñɛ-ɛsɩndaa;+ nɛ mankaɣ labʋ camɩyɛ weyi mɔnsɔɔlaa se mala camɩyɛ yɔ, nɛ weyi mɔnsɔɔlaa se mana ɛ-pʋtɔdɩyɛ yɔ, mankaɣ naʋ ɛ-pʋtɔdɩyɛ.»+
20 Ɛlɛ ɛtasɩ yɔɔdʋʋ se: «Ŋŋpɩzɩɣ nɛ ŋna mɛ-ɛsɩndaa, mbʋ pʋyɔɔ yɔ ɛyʋ ɛɛpɩzɩɣ nɛ ɛna mɛ-ɛsɩndaa nɛ ɛcaɣ wezuu.»
21 Yehowa tasɩ yɔɔdʋʋ se: «Lone naɖɩyɛ yɔ mɔn-cɔlɔ cɩnɛ. Sɩŋ kaaʋ yɔɔ.
22 Alɩwaatʋ ndʋ man-paɣlɩka ɖɛɣ yɔ, mankaɣ-ŋ ɖʋʋ kaaʋ pɔʋ taa, nɛ mankaɣ huuzuu me-nesi ñɔ-yɔɔ pɩkɔɔ nɛ pɩsɩɩnɩ alɩwaatʋ ndʋ mɛnɖɛwa yɔ.
23 Pʋwayɩ lɛ, mankaɣ kʋsʋʋ me-nesi, nɛ ŋkaɣ naʋ men-siɣye wayɩ. Ɛlɛ paapɩzɩɣ nɛ pana mɛ-ɛsɩndaa.»+
Pɩ-tɛɛ tɔm
^ Piye piye, «ño-ɖomaɣ.»
^ Piye piye, «ke-liu wɛ canjanaa.»
^ Piye piye, «ke-liu wɛ canjanaa.»
^ Piye piye, «Izrayɛɛlɩ mba lɩzɩ.»
^ Yaa «maalika.»
^ Yaa «maalika.»
^ Yaa «Malɩzɩ-ŋ.»
^ Piye piye, «Mɛ-ɛsɩndaa.»
^ Piye piye, «Ye ñɛ-ɛsɩndaa.»