Ejipiti Lɩʋ 4:1-31
4 Paa mbʋ yɔ, Moyizi cosaa nɛ ɛtɔ se: «Ɛlɛ ɖɩkpaɣ se paatisiɣ mɔn-tɔm yɔɔ nɛ paawelisiɣni-m,+ nɛ pɔyɔɔdʋʋ se: “Yehowa tɩlɩɩ ñɔ-yɔɔ.”»
2 Peeɖe Yehowa pɔzɩ-ɩ se: «Ɛbɛ lɛ ñe-nesi taa mbʋ yɔ?» Ecosi-i se: «Ðaʋ.»
3 Eheyi-i se: «Pɛɖɩ-kʋ tataa.» Nɛ ɛlɛ pɛɖɩ-kʋ tataa, nɛ kɩpɩsɩ ɖʋm;+ nɛ Moyizi se nɛ eposi ɛ-tɩ nɛ ɩ.
4 Nɛ Yehowa heyi Moyizi se: «Sezi ñe-nesi nɛ ŋkpa-ɩ nɛ e-suu taa.» Nɛ esezi e-nesi nɛ ɛkpa-ɩ, nɛ ɛɖaɣnɩ pɩsʋʋ ɖaʋ e-nesi taa.
5 Peeɖe Ɛsɔ yɔɔdaa se: «Pʋnɛ piyekina nɛ papɩzɩ nɛ petisi se Yehowa, pɔ-cɔzɔnaa tɛ Ɛsɔ, Abraham tɛ Ɛsɔ, Izaakɩ tɛ Ɛsɔ nɛ Yakɔɔb tɛ Ɛsɔ+ lɩ ñɔ-yɔɔ.»+
6 Yehowa tasɩ-ɩ heyuu se: «Mentendi-ŋ, lɛkɩ ñe-nesi ño-toko tɛɛ, laŋɩyɛ yɔɔ kiŋ.» Nɛ ɛlɛkɩ e-nesi e-toko tɛɛ. Ɛlɩzɩ-sɩ lɛ, na, canatʋ kpa e-nesi nɛ sɩhʋlʋmɩ ɛzɩ ɖɔmbɛɛ yɔ!+
7 Peeɖe eheyi-i se: «Pɩsɩnɩ ñe-nesi ño-toko tɛɛ, laŋɩyɛ yɔɔ kiŋ.» Nɛ ɛpɩsɩnɩ e-nesi e-toko tɛɛ. Ɛlɩzɩ-sɩ nɛ toko tɛɛ lɛ, sɩɖaɣnɩ wɛʋ camɩyɛ ɛzɩ e-tomnaɣ hɔɔlɩŋ lɛɛŋ yɔ.
8 Ɛyɔɔdɩ se: «Ye patitisi ñɔ-tɔm yɔɔ yaa ye patikemni kajalaɣ yʋsaɣ yɔ, pɩtʋʋ fɛyɩ se pakaɣ kemnuu yʋsaɣ 2 ñɩŋga.+
9 Ɛlɛ, ye patitisi yʋsasɩ 2 sɩnɛ sɩ-yɔɔ nɛ pekizi se paawelisiɣni-ŋ yɔ, cozi lɩm Niili Pɔɔ taa nɛ ŋpɩyɩ-pʋ tataa ɖenɖe pɩwɩlaa yɔ, nɛ lɩm mbʋ ŋcozi Niili taa yɔ pɩkaɣ pɩsʋʋ calɩm tataa ɖenɖe pɩwɩlaa yɔ.»+
10 Nɛ Moyizi heyi Yehowa se: «Yehowa mentendi-ŋ, maapɩzɩɣ yɔɔdʋʋ, paa pɩtɩɩkɛ ɖooo lɔŋ yaa kpaɣnɩ alɩwaatʋ ndʋ ŋyɔɔdɩnɩ ña-lɩmɖʋyʋ yɔ, mbʋ pʋyɔɔ yɔ maapɩzɩɣ yɔɔdʋʋ lɛɛ lɛɛ* nɛ ma-nzʋlʋmɩyɛ ɛɛpɩsɩɣ lɔŋ.»+
11 Yehowa pɔzɩ-ɩ se: «Alabɩ ɛyʋ nɔɔ, yaa alakɩ nɛ ɛyʋ pɩsɩɣ kaayɔɔdaɣ, tandam, weyi ɛnaɣ kpayɩ kpayɩ yɔ, yaa yʋlʋm? Pɩtɩkɛ ma Yehowa yaa we?
12 Pʋyɔɔ lɛ, wolo lɛɛlɛɛyɔ, nɛ mankaɣ wɛʋ ñɔ-cɔlɔ alɩwaatʋ ndʋ ŋyɔɔdʋʋ yɔ,* nɛ mankaɣ-ŋ wɩlʋʋ tɔm ndʋ pɩwɛɛ se ŋyɔɔdɩ yɔ.»+
13 Ɛlɛ Moyizi kitina se: «Yehowa, mentendi-ŋ, tiyi nɔɔyʋ mo-lone taa, weyi ŋsɔɔlaa se ŋtiyiɣ yɔ.»
14 Peeɖe Yehowa taa wɩnɩ Moyizi, nɛ eheyi-i se: «Ña-ɖalʋ Leevi tʋ Aarɔɔnɩ+ wɛɛ, yaa we? Manawa se ɛpɩzɩɣ nɛ ɛyɔɔdɩ camɩyɛ. Nɛ lɛɛlɛɛyɔ lɛ, ɛwɛ nʋmɔʋ taa nɛ ɛkɔŋ se ɛkatɩ-ŋ. Alɩwaatʋ ndʋ ɛnaɣ-ŋ yɔ, ɛ-taa kaɣ labʋ leleŋ.+
15 Ye mbʋ, pɩwɛɛ se ŋyɔɔdɩnɩ-ɩ nɛ ŋɖʋ tɔm ɛ-nɔɔ taa,+ nɛ mankaɣ wɛʋ ña nɛ ɩ mɩ-cɔlɔ alɩwaatʋ ndʋ ɩyɔɔdʋʋ yɔ,+ nɛ mankaɣ-mɩ wɩlʋʋ mbʋ pɩwɛɛ se ɩla yɔ.
16 Ɛkaɣ yɔɔdɩnʋʋ samaɣ ño-lone taa, nɛ ɛkaɣ kɛʋ ñɔ-tɔm ɖɔkɩyʋ, nɛ ŋkaɣ-ɩ kɛʋ ɛzɩ Ɛsɔ yɔ.*+
17 Nɛ ŋkaɣ ɖɔkʋʋ ɖaʋ kʋnɛ ñe-nesi taa nɛ ŋlabɩnɩ-kʋ yʋsasɩ.»+
18 Peeɖe Moyizi pɩsɩ ɛ-ɛtɩ Yetro+ cɔlɔ nɛ eheyi-i se: «Mentendi-ŋ, mancaɣ se manpɩsɩ mon-koobiya mba pɛwɛ Ejipiti yɔ pɔ-cɔlɔ nɛ mana se pɛwɛnɩ pɛ-ɛsa na.» Yetro heyi Moyizi se: «Wobini laŋhɛzɩyɛ.»
19 Pʋwayɩ lɛ, Yehowa heyi Moyizi Madiyaŋ taa se: «Wolo, pɩsɩ Ejipiti, mbʋ pʋyɔɔ yɔ ɛyaa mba pañɩnaɣ se pakʋ-ŋ* yɔ pa-tɩŋa pasɩba.»+
20 Ðɩnɛ ɛlɛ Moyizi kpaɣ ɛ-halʋ nɛ ɛ-pɩyalaa nɛ ɛcaɣzɩ-wɛ kpaŋaɣ yɔɔ, nɛ ɛkpaɣ nʋmɔʋ nɛ ɛpɩsɩɣ Ejipiti ɛjaɖɛ taa. Pɩtasɩ lɛ, Moyizi ɖɔkɩ Ɛsɔ toovenim tʋ ɖaʋ e-nesi taa.
21 Nɛ Yehowa heyi Moyizi se: «Ŋpɩsɩɣ Ejipiti lɛ, pɩwɛɛ se ŋla Farawɔɔ ɛsɩndaa maamaaci lakasɩ nzɩ maha-ŋ ɖoŋ se ŋla yɔ sɩ-tɩŋa.+ Ɛlɛ mankaɣ yebu nɛ ɛ-laŋɩyɛ sʋʋ kpɩzɩŋ,+ nɛ ɛɛkaɣ yebu samaɣ se kɛɖɛɛ.+
22 Pɩwɛɛ se ŋheyi Farawɔɔ se: “Tɔm tʋnɛ Yehowa yɔɔdʋʋ: ‘Izrayɛɛlɩ kɛ man-pɩyalʋ, man-kajalaɣ pɩɣa.+
23 Meheyiɣ-ŋ se: Yele man-pɩyalʋ nɛ ɛɖɛɛ nɛ ɛpɩzɩ ɛsɛ-m. Ɛlɛ ye ŋkizaa se ŋŋyeki-i nɛ ɛɖɛɛ kɔyɔ, mankʋʋ ña-pɩyalʋ, ña-kajalaɣ pɩɣa.’”»+
24 Nɛ paawɛ nʋmɔʋ taa nɛ pasɩŋ lone naɖɩyɛ taa se pɛhɛzɩɣ lɛ, Yehowa+ katɩ-ɩ nɛ ɛñɩnaɣ se ɛkʋ-ɩ.+
25 Peeɖe Zipora+ kpaɣ pɩcalɩmɩyɛ* nɛ ɛpɛlɩ ɛ-pɩyalʋ nɛ ɛla nɛ ɛ-hɩnɛ nɔɔ taa huɖuu tukuni ɛ-nɩŋgbanzɩ nɛ ɛtɔ se: «Mbʋ pʋyɔɔ yɔ ŋkɛ-m calɩm walʋ.»
26 Nɛ Ɛsɔ yebi-i nɛ ɛɖɛɛ. Alɩwaatʋ ndʋ lɛ Zipora yɔɔdɩ se «calɩm walʋ,» pɛlɩtʋ yɔɔ.
27 Nɛ Yehowa heyi Aarɔɔnɩ se: «Wolo kañɩmbusuu taa nɛ ŋkatɩ Moyizi.»+ Peeɖe ewoba nɛ ɛkatɩ-ɩ Ɛsɔ toovenim tʋ pʋʋ cɔlɔ+ nɛ ɛsɛɛ-ɩ nɛ ekpiikini-i.
28 Nɛ Moyizi heyi Aarɔɔnɩ Yehowa weyi etiyi-i yɔ ɛ-tɔm tɩŋa,+ nɛ eheyi-i ɖɔɖɔ yʋsasɩ nzɩ ɛɖʋ-ɩ paɣtʋ se ɛla yɔ sɩ-tɩŋa sɩ-tɔm.+
29 Pʋwayɩ lɛ Moyizi nɛ Aarɔɔnɩ powolo nɛ pekpeɣli Izrayɛɛlɩ taa ɛzʋtʋyaa tɩŋa.+
30 Aarɔɔnɩ heyi-wɛ tɔm ndʋ payɩ Yehowa heyi Moyizi yɔ, nɛ ɛla yʋsasɩ+ samaɣ ɛsɩndaa.
31 Peeɖe samaɣ tisaa.+ Kanɩwa se Yehowa kɛzɩ ɛ-lɩmaɣza nɛ Izrayɛɛlɩ mba yɔɔ+ nɛ ɛna pa-kʋñɔŋ lɛ,+ koluŋ nɛ kapa kɛ-ɛsa nɛ tɛtʋ nɛ kɛsɛɛ Ɛsɔ.
Pɩ-tɛɛ tɔm
^ Piye piye, «mbʋ pʋyɔɔ yɔ mɔ-nɔɔ wɛ yuŋ.»
^ Piye piye, «mankaɣ wɛʋ ñɔ-nɔɔ cɔlɔ.»
^ Yaa «ŋkaɣ-ɩ kɛʋ Ɛsɔ lone taa caɣyʋ.»
^ Yaa «pañɩnaɣ ña-kalɩzaɣ.»
^ Yaa «pɩcalɩmɩyɛ sɩɣa.»
