Ejipiti Lɩʋ 5:1-23
5 Pʋwayɩ lɛ, Moyizi nɛ Aarɔɔnɩ powolo Farawɔɔ cɔlɔ nɛ peheyi-i se: «Tɔm tʋnɛ Yehowa, Izrayɛɛlɩ tɛ Ɛsɔ yɔɔdʋʋ: “Yele man-samaɣ nɛ kɛɖɛɛ nɛ pɩsa nɛ kɔtɔɔ-m kazandʋ kañɩmbusuu taa.”»
2 Ɛlɛ Farawɔɔ cosi-wɛ se: «Anɩ lɛ Yehowa+ nɛ pɩwɛɛ se maña ɛ-nɔɔ taa tɔm nɛ meyele Izrayɛɛlɩ samaɣ nɛ kɛɖɛɛ?+ Maatɩɩsɩŋ Yehowa ɛnʋ, nɛ pɩtasɩ lɛ, maayeki Izrayɛɛlɩ samaɣ nɛ kɛɖɛɛ.»+
3 Ɛlɛ peheyi-i se: «Ebree mba tɛ Ɛsɔ yɔɔdɩnɩ-ɖʋ. Ðitendi-ŋ, ɖɩsɔɔlaa se ɖiwolo kañɩmbusuu taa; ɖɩɖɔŋ nʋmɔʋ kɩyakɩŋ 3, nɛ ɖɩpɩzɩ ɖɩlaa kɩlaʋ ɖɛ-Ɛsɔ Yehowa;+ pɩtɩkɛ mbʋ yɔ, ɛkɔŋnɩ ɖɔ-yɔɔ kʋdɔmɩŋ yaa laɣɖɛ.»
4 Ejipiti wiyaʋ kitini-wɛ se: «Moyizi nɛ Aarɔɔnɩ, pɩlabɩ ɛzɩma nɛ ɩlɩzɩɣ samaɣ ka-tʋmɩyɛ taa se ɩɖɛna? Ɩpɩsɩ mɩ-tʋmɩyɛ taa!»*+
5 Nɛ Farawɔɔ wolo pɩ-yɔɔ nɛ ɛyɔɔdɩ se: «Ɩna samaɣ ɖɔ ɖɔʋ mbʋ ɛjaɖɛ taa yɔ, nɛ ɩñɩnɩɣ se pɛhɛzɩnɩ pa-tʋmɩyɛ labʋ yaa we?»
6 Kɩyakʋ ŋgʋ ki-wiye, Farawɔɔ ɖʋ paɣtʋ tʋma ñʋndɩnaa nɛ mba paba lɩzaa se pɛkɛ tʋma yɔɔ cɔnɩyaa yɔ nɛ ɛtɔ se:
7 «Ɩtaatasɩ samaɣ cɛlʋʋ kesi se kalɩzɩnɩ filikinaa.+ Iyele nɛ ka-maɣmaɣ kowolo kañɩnɩ kesi.
8 Ɛlɛ pɩwɛɛ se ɩpɔzɩ-kɛ se kalɩzɩ filikinaa nɛ patalɩ ɛzɩma katɩɩlɩzɩɣ yɔ. Ɩtaapasɩ-kɛ pɩ-yɔɔ, mbʋ pʋyɔɔ yɔ kakɩlɩ hɛzʋʋ kɩhɛzʋ.* Pʋyɔɔ kamakɩ kubusi se: “Ðɩsɔɔlaa se ɖɩɖɛɛ, ɖɩsɔɔlaa se ɖɩlaa ɖɛ-Ɛsɔ kɩlaʋ!”
9 Iyele nɛ kala tʋmɩyɛ ɖoŋ nɛ pɩkpaɖɩ, nɛ ɩla nɛ kɛ-ɛsɩyɛ sɛɛnɩ tʋmɩyɛ nɛ pɩsa nɛ kataakemni cɛtɩm tɔm.»
10 Peeɖe tʋma ñʋndɩnaa+ nɛ mba paba lɩzaa se pɛkɛ tʋma yɔɔ cɔnɩyaa yɔ powobi samaɣ cɔlɔ nɛ peheyi-kɛ se: «Tɔm tʋnɛ Farawɔɔ yɔɔdaa: “Maatasɩɣ-mɩ cɛlʋʋ kesi.
11 Iwolo nɛ ɩñɩnɩ mi-kesi mɩ-maɣmaɣ ɖenɖe ɩpɩzɩɣ se ɩna-sɩ yɔ, ɛlɛ paapasɩɣ mɩ-tʋmɩyɛ yɔɔ paa ññɩɩ.”»
12 Ðɩnɛ ɛlɛ samaɣ mɩzɩ Ejipiti ɛjaɖɛ kpeekpe taa se kekpeɣli tɔɔnaɣ ŋga pakʋma yɔ ka-ɖaŋ nɛ kalabɩnɩ tʋmɩyɛ kesi lone taa.
13 Nɛ tʋma ñʋndɩnaa wɛɛ nɛ pañɩkɩɣ kɔ-yɔɔ nɛ pɔtɔŋ se: «Pɩwɛɛ se mɩ-taa paa weyi ɛtɛ evemiye taa tʋmɩyɛ, ɛzɩ alɩwaatʋ ndʋ pɛcɛlaɣ-mɩ kesi yɔ.»
14 Pɩtasɩ lɛ, pamakaɣ+ Izrayɛɛlɩ ñɩma tʋma yɔɔ cɔnɩyaa mba Farawɔɔ tʋma ñʋndɩnaa kaalɩzaa se pɔcɔnɩ pɔ-yɔɔ yɔ. Pɔpɔzaɣ-wɛ se: «Pɩlabɩ ɛzɩma nɛ ɩtɩlɩzɩ filikinaa nɛ pɩtalɩ ɛzɩ ɩtɩɩlɩzʋʋ yɔ? Ðeɖe mbʋ, nɛ sɔnɔ ɖɔɖɔ mbʋ.»
15 Pʋyɔɔ Izrayɛɛlɩ ñɩma mba palɩzaa se pɔcɔnɩ tʋma yɔɔ yɔ, powoba nɛ pewiini Farawɔɔ se: «Ɛbɛ yɔɔ ŋlakɩ ña-lɩmɖʋyaa mbʋ?
16 Paahaɣ ña-lɩmɖʋyaa kesi, ɛlɛ peheyiɣ-ɖʋ se: “Ɩlɩzɩ filikinaa!” Pamakɩ ña-lɩmɖʋyaa, ŋgʋ ña-maɣmaɣ ña-samaɣ cɔlɔ pɩlɩnaa.»
17 Ɛlɛ ecosi-wɛ se: «Ɩkɩlɩ hɛzʋʋ kɩhɛzʋ,* ɩkɩlɩ hɛzʋʋ kɩhɛzʋ!*+ Mbʋ yebina nɛ ɩtɔŋ se: “Ðɩsɔɔlaa se ɖɩɖɛɛ, ɖɩsɔɔlaa se ɖɩlaa Yehowa kɩlaʋ.”+
18 Pʋyɔɔ lɛ, lɛɛlɛɛyɔ iwolo, ɩpɩsɩ nɛ ɩla tʋmɩyɛ! Paahaɣ-mɩ kesi, ɛlɛ pɩwɛɛ se iwolo pɩ-yɔɔ nɛ ɩlɩzɩ filikinaa nɛ pɩtalɩ ɛzɩ ɖooo lɛ yɔ.»
19 Nɛ Izrayɛɛlɩ ñɩma mba palɩzaa se pɔcɔnɩ tʋma yɔɔ yɔ, pana se pɛwɛ kʋñɔŋ taa siŋŋ, mbʋ pʋyɔɔ yɔ, paaɖʋ paɣtʋ se: «Ɩɩpasɩɣ filikinaa mba pɩwɛɛ se ɩla paa evemiye nɖɩ yɔ pɔ-yɔɔ paa ññɩɩ.»
20 Palɩnɩ Farawɔɔ cɔlɔ lɛ, pakatɩ Moyizi nɛ Aarɔɔnɩ; paba ñaasɩŋ peeɖe nɛ paɖaŋ-wɛ.
21 Kpaagbaa mbʋ lɛ, peheyi-wɛ se: «Yehowa ɛcɔna nɛ ɛna mbʋ ɩlaba yɔ nɛ ɛhʋʋ tɔm, mbʋ pʋyɔɔ yɔ iyeba nɛ Farawɔɔ nɛ ɛ-lɩmɖʋyaa papaɖɩɣ-ɖʋ,* nɛ ɩɖʋzɩ pe-nesi taa laɣɖɛ se pakʋ-ɖʋ.»+
22 Peeɖe Moyizi pɩsɩnɩ Yehowa yɔɔ nɛ ɛpɔzɩ-ɩ se: «Yehowa, ɛbɛ yɔɔ ŋɖʋ samaɣ kanɛ kʋñɔŋ? Ɛbɛ yɔɔ ŋtiyi-m?
23 Kpaɣnɩ alɩwaatʋ ndʋ mowobi Farawɔɔ ɛsɩndaa se mɔyɔɔdɩnɩ-ɩ ña-hɩɖɛ taa yɔ,+ ɛwɛɛ nɛ ɛtɛzɩɣ wɩlʋʋ samaɣ kanɛ kʋñɔŋ,+ nɛ ŋtiholi ña-samaɣ kaaʋ.»+
Pɩ-tɛɛ tɔm
^ Yaa «mɩ-sʋʋtʋ wayɩ.»
^ Yaa «mbʋ pʋyɔɔ yɔ feendu kalakɩ.»
^ Yaa «Feendu ɩlakɩ.»
^ Yaa «feendu ɩlakɩ.»
^ Yaa «pa-taa kpɛndɩɣnɩ-ɖʋ.»
