Ejipiti Lɩʋ 6:1-30
6 Peeɖe Yehowa heyi Moyizi se: «Lɛɛlɛɛyɔ, ŋkaɣ naʋ mbʋ mankaɣ labʋ Farawɔɔ yɔ.+ Me-nesi ɖoŋ ñɩnzɩ kaɣ-ɩ cɛyʋʋ nɛ eyele-wɛ nɛ pɛɖɛɛ, nɛ me-nesi ɖoŋ ñɩnzɩ kaɣ-ɩ cɛyʋʋ nɛ ɛɖɔɔnɩ-wɛ nɛ palɩɩ ɛ-ɛjaɖɛ taa.»+
2 Nɛ Ɛsɔ heyi Moyizi se: «Ma lɛ Yehowa.
3 Nɛ mantɩɩlɩɣ Abraham, Izaakɩ nɛ Yakɔɔb pɔ-yɔɔ ɛzɩ Ɛsɔ Ðoŋ Tɩŋa Tʋ yɔ,+ ɛlɛ ma-hɩɖɛ Yehowa+ hɔɔlʋʋ taa lɛ, mantiyele nɛ patɩlɩ-m.+
4 Manɖʋ-wɛ ɖɔɖɔ nɛ ɛgbɛyɛ se mɛncɛlɩɣ-wɛ Kanaŋ ɛjaɖɛ nɖɩ ɖɩ-taa paacaɣ ɛgɔndʋ yɔ.+
5 Lɛɛlɛɛyɔ lɛ, ma-maɣmaɣ manɩ Izrayɛɛlɩ samaɣ ŋga kɛwɛ Ejipiti mba yomiye taa yɔ kɔ-mɔla, nɛ mɔntɔzʋʋ mɛ-ɛgbɛyɛ yɔɔ.+
6 «Pʋyɔɔ lɛ, heyi Izrayɛɛlɩ mba se: “Ma lɛ Yehowa, nɛ mankaɣ-mɩ lɩzʋʋ sʋʋtʋ ndʋ Ejipiti mba sʋʋ-mɩ yɔ tɩ-tɛɛ nɛ malɩzɩ-mɩ po-yomiye taa.+ Nɛ mankaɣ me-nesi sezuu* nɛ mankaɣ tɔm hʋʋ siŋŋ nɛ maya mɩ-ñʋʋ.+
7 Nɛ mankaɣ-mɩ mʋʋ nɛ ɩkɛ man-samaɣ, nɛ mankaɣ kɛʋ mɩ-Ɛsɔ+ nɛ ɩkaɣ tɩlʋʋ toovenim taa se ma lɛ Yehowa mɩ-Ɛsɔ weyi ɛlɩzɩɣ-mɩ sʋʋtʋ ndʋ Ejipiti mba sʋʋ-mɩ yɔ, tɩ-tɛɛ yɔ.
8 Nɛ mankaɣ-mɩ wonuu ɛjaɖɛ nɖɩ monɖuwaa* se mɛncɛlɩɣ Abraham, Izaakɩ nɛ Yakɔɔb yɔ, ɖɩ-taa; nɛ mankaɣ-mɩ ɖɩ cɛlʋʋ nɛ ɖɩpɩsɩ mɩ-pʋyʋ.+ Ma lɛ Yehowa.”»+
9 Pʋwayɩ lɛ, Moyizi heyi tɔm ndʋ Izrayɛɛlɩ mba, ɛlɛ patiwelisini-i, mbʋ pʋyɔɔ yɔ piitibi-wɛ yɔɔɔ nɛ pɛtɛ pɛwɛɛ ɖɔɖɔ yomiye sɔsɔɖɛ taa.+
10 Nɛ Yehowa yɔɔdɩnɩ Moyizi nɛ ɛtɔ se:
11 «Wolo nɛ ŋheyi Ejipiti wiyaʋ Farawɔɔ se pɩwɛɛ se eyele Izrayɛɛlɩ mba nɛ palɩɩ ɛ-ɛjaɖɛ taa nɛ pɛɖɛɛ.»
12 Ɛlɛ Moyizi cosi Yehowa se: «Na! Izrayɛɛlɩ mba tiwelisini-m;+ ɛzɩma tɩyɛ Farawɔɔ ñakaɣ-m welisinuu, ma weyi yɔɔdʋʋ wɛ-m kaɖɛ yɔ?»*+
13 Ɛlɛ, Yehowa tasɩ heyuu Moyizi nɛ Aarɔɔnɩ paɣtʋ ndʋ pɩwɛɛ se paɖʋ Izrayɛɛlɩ mba nɛ Ejipiti wiyaʋ Farawɔɔ, se pɩsa nɛ palɩzɩ Izrayɛɛlɩ mba Ejipiti ɛjaɖɛ taa yɔ.
14 Pa-caanaa ɖɩɣa taa ñʋndɩnaa kɔyɔ: Izrayɛɛlɩ kajalaɣ pɩyalʋ Rubɛɛnɩ pɩyalaa yɔ+ Hanɔɔkɩ, Paluu, Ɛsɩrɔɔnɩ nɛ Karɩmii.+ Rubɛɛnɩ hɔŋ kɛlɛ.
15 Siimeyɔɔ pɩyalaa yɔ: Yemuwɛɛlɩ, Yamiini, Ohaadɩ, Yakiini, Zohaarɩ, nɛ Kanaŋ halʋ nɔɔyʋ pɩyalʋ Sawuuli.+ Siimeyɔɔ hɔŋ kɛlɛ.
16 Leevi+ pɩyalaa hɩla yɔ, ɛzɩ palʋlʋʋ-wɛ pɔ-hɔŋ taa yɔ: Gɛrɩsɔɔnɩ, Kehaatɩ nɛ Merarii.+ Leevi caɣ wezuu pɩnzɩ 137.
17 Gɛrɩsɔɔnɩ pɩyalaa yɔ: Libinii nɛ Simeyii, ɛzɩ palʋlʋʋ-wɛ pɔ-hɔŋ taa yɔ.+
18 Kehaatɩ pɩyalaa yɔ: Amɩram, Izihaarɩ, Ebrɔŋ nɛ Uziyɛɛlɩ.+ Kehaatɩ caɣ wezuu pɩnzɩ 133.
19 Merarii pɩyalaa yɔ: Maalii nɛ Muusi.
Leevi mba hɔŋ kɛlɛ, ɛzɩ palʋlʋʋ-wɛ pɔ-hɔŋ taa yɔ.+
20 Amɩram kpaɣ ɛ-caa neu Yokebɛɛdɩ nɛ ɛpɩsɩ-ɩ ɛ-halʋ.+ Yokebɛɛdɩ lʋlɩ-ɩ Aarɔɔnɩ nɛ Moyizi.+ Amɩram caɣ wezuu pɩnzɩ 137.
21 Izihaarɩ pɩyalaa yɔ: Kora,+ Nefɛɛgɩ nɛ Zikiri.
22 Uziyɛɛlɩ pɩyalaa yɔ: Misaayɛɛlɩ, Elzafaanɩ+ nɛ Sitirii.
23 Aarɔɔnɩ kpaɣ Aminadaabɩ pɛlɛ Eliseba, Naasɔɔnɩ+ neu nɛ ɛpɩsɩ-ɩ ɛ-halʋ. Eliseba lʋlɩ-ɩ Naadaabʋ, Abihu, Eleyaazaarɩ nɛ Itamaarɩ.+
24 Kora pɩyalaa yɔ: Asiirɩ, Ɛlɩkaana nɛ Abiyasafʋ.+ Kora mba hɔŋ kɛlɛ.+
25 Aarɔɔnɩ pɩyalʋ Eleyaazaarɩ+ kpaɣ Putiyɛɛlɩ pɛlaa taa nɔɔyʋ nɛ ɛpɩsɩ-ɩ ɛ-halʋ. Ɛlɛ lʋlɩ-ɩ Fineyaasɩ.+
Leevi mba hɔŋ ñʋndɩnaa kɛlɛ, ɛzɩ palʋlʋʋ-wɛ pɔ-hɔŋ taa yɔ.+
26 Aarɔɔnɩ ɛnʋ nɛ Moyizi ɛnʋ Yehowa kaaheyaa se: «Ɩlɩzɩ Izrayɛɛlɩ samaɣ Ejipiti ɛjaɖɛ taa, tindimiye tindimiye.»*+
27 Moyizi nɛ Aarɔɔnɩ+ paayɔɔdɩnɩnɩ Ejipiti wiyaʋ Farawɔɔ se palɩzɩɣ Izrayɛɛlɩ samaɣ Ejipiti taa.
28 Kɩyakʋ ŋgʋ Yehowa yɔɔdɩnɩ Moyizi Ejipiti ɛjaɖɛ taa yɔ,
29 Yehowa heyi Moyizi se: «Ma lɛ Yehowa. Heyi Ejipiti wiyaʋ Farawɔɔ tɔm ndʋ payɩ mɛwɛɛ nɛ meheyiɣ-ŋ yɔ.»
30 Peeɖe Moyizi heyi Yehowa se: «Na! Yɔɔdʋʋ wɛ-m kaɖɛ,* ye mbʋ ɛzɩma tɩyɛ Farawɔɔ kaɣ-m welisinuu?»+
Pɩ-tɛɛ tɔm
^ Yaa «mankaɣ labɩnʋʋ tʋmɩyɛ me-nesi ɖoŋ ñɩnzɩ.»
^ Piye piye, «nɖɩ mankpazɩ me-nesi.»
^ Piye piye, «ma weyi patɩpɛlɩ mo-ndomee yɔ.»
^ Piye piye, «ɛzɩ sɔɔjanaa tindima yɔ.»
^ Piye piye, «Patɩpɛlɩ mo-ndomee.»
