Eklezɩyasɩtɩ 1:1-18
1 Kpeɣliyu,+ Daviid pɩyalʋ, weyi ɛkɛ wiyaʋ Yeruzalɛm yɔ+ ɛ-tɔm yɔ:
2 «Pɩkɛ falaa kpem!» Kpeɣliyu tɔŋna,«Ɛɛɛ, pɩkɛ falaa kpem! Pɩtɩŋa pɩkɛ falaa!»+
3 Kɛzɛɣa ŋga ɛyʋ hikiɣ tʋma ɖoŋ ñɩna kpeekpe wena ɛlakɩ yɔ a-taa?
Tʋma wena ɛtɔkɩ kʋñɔŋ nɛ ɛlakɩ tɛtʋ yɔɔ cɩnɛ yɔ* a-taa?+
4 Kpaɖʋʋ nakʋyʋ ɖɛɣ, nɛ kpaɖʋʋ lɛɛkʋ kɔŋ,Ɛlɛ tɛtʋ wɛɣ* ti-ɖeɖe tam.+
5 Wɩsɩ lɩɣ,* nɛ wɩsɩ ɖʋʋ;Pʋwayɩ lɛ, sɩpɩsɩɣ lɛɛ lɛɛ sɩ-ɖɩlɩyɛ nɛ sɩɖaɣnɩɣ lɩʋ.+
6 Helim ɖɛɣ hadɛ kiŋ nɛ pɩcɔʋ kpɛɛɛ nɛ pɩkpaɣ hayo kiŋ;Pɩcɔʋ nɛ pɩcɔʋ kaahɛzaɣ; helim wɛɣ cɔʋ yɔɔ mbʋ.
7 Lemisi* kpeekpe kpeŋ teŋgu taa, ɛlɛ teŋgu eesuu.+
Ðenɖe lemisi lɩɣna nɛ sikpeŋ yɔ, peeɖe sɩpɩsɩɣ nɛ sɩɖaɣnɩɣ kpem.+
8 Pɩtɩŋa pɩnɩɣ ɛyʋ;Halɩ nɔɔyʋ ɛɛpɩzɩɣ nɛ ɛyɔɔdɩ pɩtɩŋa pɩ-tɔm.
Ɛsɩyɛ ɛɛhakɩnɩ cɔnʋʋ;Nɛ nɩŋgbaŋʋʋ ɛɛhakɩnɩ welisuu.
9 Mbʋ pɩɩwɛɛ yɔ, mbʋ kaɣnɩ wɛʋ,Nɛ mbʋ paalaba yɔ, mbʋ pakaɣ tasʋʋ labʋ;Pʋyʋ kɩfalʋ nɔɔyʋ fɛyɩ tɛtʋ yɔɔ cɩnɛ.*+
10 Ɛzɩ nabʋyʋ wɛɛ se ɛyʋ pɩzɩɣ nɛ ɛyɔɔdɩ pɩ-tɔm se: «Na wonuu kʋnɛ, kɩkɛ kɩfalʋʋ» yaa we?
Kɩɩtɛm wɛʋ ɖooo lɔŋ;Kɩɩtɛm wɛʋ pʋcɔ nɛ pɩtalɩɣ ɖa-alɩwaatʋ.
11 Nɔɔyʋ ɛɛtɔzʋʋ caanaʋ taa mba yɔɔ;Nɛ nɔɔyʋ ɛɛkaɣ tɔzʋʋ ɖɔɖɔ mba pakaɣ kɔm pʋwayɩ yɔ pɔ-yɔɔ;Nɛ mba pakaɣ tasʋʋ kɔm pʋwayɩ yɔ, paba ɖɔɖɔ ɩɩkaɣ tɔzʋʋ pɔ-yɔɔ.+
12 Ma, kpeɣliyu, mɔntɔɔ kewiyitu Izrayɛɛlɩ yɔɔ Yeruzalɛm.+
13 Mɛntɛm man-taa se mɛnkpɛlɩkɩɣ nɛ mantazɩ mbʋ mbʋ peɖiɣni labʋ tɛtʋ kpeekpe yɔɔ yɔ+ pɩ-taa nɛ lɔŋsɩnɖɛ,+ pʋ-tɔbʋʋ se kʋñɔŋ tʋma wena Ɛsɔ ɖʋ ɛyaa piya nɛ sɩwɛɛ a-labʋ yɔɔ yɔ.
14 Mana tʋma wena payɩ palakɩ tɛtʋ yɔɔ cɩnɛ yɔ,*Nɛ na, pɩtɩŋa payɩ mbʋ yɔ pɩkɛ falaa, pɩkɛ helim wayɩ seu.+
15 Mbʋ pikotaa yɔ, paapɩzɩɣ nɛ patʋʋzɩ-pʋ,Nɛ mbʋ pɩfɛyɩ yɔ, paapɩzɩɣ nɛ pakalɩ-pʋ.
16 Ðɩnɛ ɛlɛ mɔyɔɔdɩ ma-laŋɩyɛ taa se: «Na! Mañaɣ pana nɛ mɛwɛɛnɩ lɔŋsɩnɖɛ sɔsɔɖɛ nɛ pɩkɩlɩ mba payɩ pɛlɛyɩ-m wɛʋ Yeruzalɛm yɔ;+ nɛ ma-laŋɩyɛ hiɣ lɔŋsɩnɖɛ sɔsɔɖɛ nɛ sɩmtʋ sakɩyɛ.»+
17 Mɛntɛm man-taa se mantɩlɩɣ lɔŋ, se mantɩlɩɣ kpanzɩyɩtʋ* nɛ mantɩlɩ kɩmɛlɛndʋ,+ ɛlɛ pɩtɩŋa mbʋ yɔ ɖɔɖɔ pɩkɛ helim wayɩ seu.
18 Mbʋ pʋyɔɔ yɔ lɔŋsɩnɖɛ sakɩyɛ kɔŋnɩ laŋwɛɛkɩyɛ sakɩyɛ,Mbʋ yebina nɛ weyi ɛsɔzʋʋ ɛ-sɩmtʋ yɔɔ yɔ, ɛsɔzʋʋ ɖɔɖɔ ɛ-wɩzasɩ yɔɔ.+
Pɩ-tɛɛ tɔm
^ Piye piye, «ɛlakɩ wɩsɩ tɛɛ yɔ.»
^ Piye piye, «sɩŋ.»
^ Yaa «ñakɩ.»
^ Yaa «Nikaɣ alɩwaatʋ taa lemisi.»
^ Piye piye, «fɛyɩ wɩsɩ tɛɛ.»
^ Piye piye, «palakɩ wɩsɩ tɛɛ yɔ.»
^ Yaa «tulutu ndʋ tɩ-wayɩ fɛyɩ yɔ.»