Ezekɩyɛɛlɩ 1:1-28
1 Pɩnaɣ 30 ñɩŋga taa, fenaɣ 4 ñɩŋga tɛ kɩyakʋ 5 ñɩŋgʋ wiye, alɩwaatʋ ndʋ maawɛ mba pɛkɛzɩ-wɛ tɛtʋ yɔ+ pa-taa Kebaarɩ pɔɔ cɔlɔ yɔ,+ ɛsɔdaa tʋlaa nɛ manpaɣzɩ naʋ Ɛsɔ tɛ natʋ.
2 Fenaɣ tɛ kɩyakʋ 5 ñɩŋgʋ wiye (pʋ-tɔbʋʋ se Wiyaʋ Yehoyakin+ tɛtʋ kɛzʋʋ pɩnaɣ 5 ñɩŋga taa),
3 Yehowa tɔm talɩ cɔjɔ Buuzi pɩyalʋ Ezekɩyɛɛlɩ* Kebaarɩ pɔɔ cɔlɔ Kalɩdee mba+ ɛjaɖɛ taa. Peeɖe Yehowa nesi tibi ɛ-yɔɔ.+
4 Maawɛɛ nɛ mɔncɔŋna lɛ, mana helim sɔsɔm nabʋyʋ,+ pɩlɩnɩ hayo kiŋ nɛ pɩkɔŋ. Nɛ mana ɛsɔmɩnʋʋ sɔsɔʋ nakʋyʋ nɛ miŋ nɩɩyɩ wɛɛ nɛ ɩñɩlɩsɩɣ tɛlɛm tɛlɛm,*+ nɛ ñalɩmɩyɛ nɖɩ ɖɩnaɣ kpayɩ kpayɩ yɔ ɖɩcɔɔ pɩtɩŋa nɛ ɖɩta. Nɛ nabʋyʋ kaawɛ miŋ hɛkʋ taa, pɩnɩɣzɩnɩ ñɩɣyʋʋ ŋgʋ palabɩnɩ sika nɛ liidiye yɔ.*+
5 Nabʋyʋ kaawɛ miŋ ɛnɩ ɩ-taa nɛ pɩnɩɣzɩnɩ Ɛsɔ tiyiyaa* 4+ nɛ pa-taa paa weyi lɛ, ɛ-wɛtʋ kaawɛ ɛzɩ ɛyʋ wɛtʋ yɔ.
6 Paa weyi lɛ ɛ-ɛsɩndaa wɛ tam naanza taa nɛ ɛwɛɛnɩ keŋ naanza.+
7 Pa-nɩŋgbanzɩ tʋʋzɩ yiɣ yiɣ, nɛ pa-naataŋ taa kaawɛ ɛzɩ neɣye naataŋ taa yɔ, nɛ pañɩlɩsaɣ ɛzɩ ñɩɣyʋʋ kɩsɛɛmʋʋ ŋgʋ polozi kɩ-yɔɔ yɔ.+
8 Paawɛnɩ ɛyʋ nesi pe-keŋ tɛɛ hɔɔlɩŋ ɛnɩ ɩ-naanza ɩ-yɔɔ, nɛ pa-naanza paawɛnɩ ɛsɩndaa nɛ paawɛnɩ ɖɔɖɔ keŋ.
9 Pe-keŋ tukaɣni ɖama. Paaɖɛɣ lɛ paakɛzɩɣ pa-tɩ; paa weyi lɛ ewokaɣni ɛ-ɛsɩndaa tʋʋʋ.+
10 Pɛ-ɛsɩndaa kaawɛnɩ wɛtʋ tʋnɛ: Nɩwaŋ yɔɔ lɛ, pa-naanza pa-taa paa weyi lɛ, ɛ-ɛsɩndaa kaawɛ ɛzɩ ɛyʋ ɛsɩndaa nɛ mʋʋzʋʋ+ ɛsɩndaa yɔ; nɩmɩyɛ yɔɔ lɛ, ɛ-ɛsɩndaa kaawɛ ɛzɩ nɔ+ abalɩñɩnʋ ɛsɩndaa yɔ; nɛ pa-naanza pa-taa paa weyi lɛ, ɛ-ɛsɩndaa kaawɛ ɛzɩ kpeluu*+ ɛsɩndaa yɔ.+
11 Mbʋ pɛ-ɛsɩndaa kaawɛɛ. Paaposi pe-keŋ nɛ pa-ñʋʋ yɔɔ. Paa weyi lɛ ɛɛwɛnɩ keŋ 2 weyi itukaɣni ɖama yɔ, nɛ keŋ 2 lɛɛŋ weyi ihuuzaɣ e-tomnaɣ yɔɔ yɔ.+
12 Paa weyi lɛ ewokaɣni ɛ-ɛsɩndaa tʋʋʋ, nɛ powokaɣ ɖenɖe fezuu tuyaɣ-wɛ se powolo yɔ.+ Paaɖɛɣ lɛ paakɛzɩɣ pa-tɩ.
13 Nɛ Ɛsɔ tiyiyaa mba, pɛ-wɛtʋ kaawɛ ɛzɩ mamala wena aɖiɣni mʋʋ miŋ yɔ; nɛ nabʋyʋ kaawɛ ɛzɩ miŋ koolonzi* yɔ, piwokaɣ nɛ pɩkɔŋ Ɛsɔ tiyiyaa mba pɛ-hɛkʋ taa, nɛ tɛʋ ñɩlɩsaɣnɩ miŋ ɛnɩ ɩ-taa.+
14 Nɛ ye ŋna ɛzɩma Ɛsɔ tiyiyaa wokaɣ nɛ pɔkɔŋ yɔ, pɩwɛ ɛzɩ tɛʋ ñɩlɩsʋʋ yɔ.
15 Maawɛɛ nɛ mɔncɔŋnɩ Ɛsɔ tiyiyaa mba lɛ, mana pɔbɔɖɛ kʋɖʋmɖɩyɛ Ɛsɔ tiyiyaa mba pɛ-ɛsɩndaa wɛ tam 4 taa yɔ pa-taa paa weyi lɛ, ɛ-cɔlɔ tɛtʋ yɔɔ.+
16 Pɔbɔla ñɩlɩsaɣ ɛzɩ krizooliitɩ pɛɛ palabɩnɩ-yɛ yɔ, nɛ a-naanza anɩɣzɩnɩ ɖama. Ye ŋcɔnɩ a-wɛtʋ nɛ ɛzɩma palabɩ-yɛ yɔ, pɩwɛ ɛzɩ pɔbɔɖɛ lɛɛɖɛ wɛ lɛɛɖɛ taa yɔ.
17 Aaɖɛɣ lɛ, apɩzɩɣ nɛ aɖɛɛnɩ hɔɔlɩŋ 4 ɛnɩ ɩ-taa nɛ aakɛzɩɣ a-tɩ.
18 A-kpayasɩ kʋyɩ siŋŋ nɛ ye ŋna-sɩ yɔ, sɩcaɣ sɔɔndʋ; nɛ ɛsa kaasu kpayasɩ nzɩ sɩ-naanza sɩ-yɔɔ nɛ pɩcɔɔ pɩta.+
19 Alɩwaatʋ ndʋ Ɛsɔ tiyiyaa ɖɛɣaɣ yɔ, pɔbɔla tɩŋaɣ-wɛ nɛ a nɛ wɛ pɛɖɛɣ, nɛ alɩwaatʋ ndʋ Ɛsɔ tiyiyaa kʋyaɣ tɛtʋ yɔɔ yɔ, pɔbɔla kʋyaɣ ɖɔɖɔ.+
20 Powokaɣ ɖenɖe fezuu tuyaɣ-wɛ se powolo yɔ, ɖenɖe payɩ fezuu wokaɣ yɔ. Pa nɛ pɔbɔla pɛkpɛndaɣ nɛ pakʋyʋʋ, mbʋ pʋyɔɔ yɔ fezuu ŋgʋ kɩlakaɣ tʋmɩyɛ Ɛsɔ tiyiyaa mba pɔ-yɔɔ yɔ* kɩɩwɛ ɖɔɖɔ pɔbɔla taa.
21 Alɩwaatʋ ndʋ pɛɖɛɣaɣ yɔ, pɔbɔla ɖɛɣaɣ ɖɔɖɔ; nɛ alɩwaatʋ ndʋ pasɩŋaɣ yɔ, asɩŋaɣ ɖɔɖɔ; nɛ alɩwaatʋ ndʋ pakʋyaɣ tɛtʋ yɔɔ yɔ, pa nɛ pɔbɔla pɛkpɛndaɣ nɛ pakʋyʋʋ, mbʋ pʋyɔɔ yɔ fezuu ŋgʋ kɩlakaɣ tʋmɩyɛ Ɛsɔ tiyiyaa mba pɔ-yɔɔ yɔ kɩɩwɛ pɔbɔla taa ɖɔɖɔ.
22 Nabʋyʋ kaawɛ Ɛsɔ tiyiyaa mba pa-ñʋŋ yɔɔ ɛzɩ ɛsɔdaa ɛwaɣ* ŋga kɛwɛɛ nɛ kañɩlɩsɩɣ ɛzɩ ɖɔmbɩyɛ sɔsɔɖɛ nɖɩ ɖɩcaɣ sɔɔndʋ yɔ, kɔpɔ pa-ñʋŋ yɔɔ.+
23 Ɛsɔdaa ɛwaɣ tɛɛ lɛ, pe-keŋ kaakpanɩ ɛsɔdaa,* nɛ itukaɣni ɖama. Paa weyi lɛ ɛɛwɛnɩ keŋ 2 nɛ ehuuzuuni e-tomnaɣ hɔɔlʋʋ kʋɖʋmʋʋ yɔɔ nɛ keŋ 2 lɛɛŋ nɛ ehuuzuuni e-tomnaɣ hɔɔlʋʋ lɛɛkʋ yɔɔ.
24 Manɩ pe-keŋ mabʋ taŋ lɛ, pɩɩwɛ ɛzɩ lɩm mbʋ pikpeŋ lɛɛ lɛɛ yɔ pɩ-kɔkɔɖɛ yɔ, ɛzɩ Ðoŋ Tɩŋa Tʋ kɔkɔɖɛ yɔ.+ Alɩwaatʋ ndʋ pɛɖɛɣaɣ yɔ, pɩɩwɛ ɛzɩ sɔɔjanaa kɔkɔɖɛ yɔ. Alɩwaatʋ ndʋ pasɩŋaɣ yɔ, petisaɣ pe-keŋ.
25 Panɩɣaɣ nɔɔ nakɛyɛ taŋ ɛsɔdaa ɛwaɣ ŋga kaawɛ pa-ñʋŋ yɔɔ yɔ ka-ñʋʋ yɔɔ. (Alɩwaatʋ ndʋ pasɩŋaɣ yɔ, petisaɣ pe-keŋ.)
26 Nabʋyʋ kaawɛ ɛsɔdaa ɛwaɣ ŋga kaawɛ pa-ñʋŋ yɔɔ yɔ ka-ñʋʋ yɔɔ nɛ pɩnɩɣzɩnɩ saafiirɩ pɩyɛ,+ nɛ pɩɩwɛ ɛzɩ kewiyaɣ kpelaɣ yɔ.+ Pɩ-ñʋʋ yɔɔ lɛ, nɔɔyʋ kaacaɣ kewiyaɣ kpelaɣ yɔɔ nɛ ɛ-wɛtʋ kaanɩɣzɩnɩ ɛyʋ wɛtʋ.+
27 Kpaɣnɩ ɖenɖe pɩɩwɛ ɛzɩ ɛ-tɩnaɣ taa yɔ nɛ pɩkpaɣ lɛ, mana nabʋyʋ pɩñɩlɩsaɣ ɛzɩ ñɩɣyʋʋ ŋgʋ palabɩnɩ sika nɛ liidiye*+ nɛ kɩwɛɛ ɛzɩ miŋ weyi ɩwɛɛ nɛ ɩñandɩɣ yɔ. Nɛ kpaɣnɩ ɛ-tɩnaɣ taa nɛ pitii lɛ, mana nabʋyʋ pɩnɩɣzɩnɩ miŋ.+ Ñalɩmɩyɛ naɖɩyɛ kaacɔ-ɩ nɛ ɖɩta,
28 ɖɩɩwɛ ɛzɩ tɩŋgaɣyʋʋ+ ŋgʋ kɩlɩɣ ɛsɔmɩnʋʋ taa evemiye nɖɩ tɛʋ nɩɣ yɔ kɩ-ñalɩmɩyɛ yɔ. Mbʋ ñalɩmɩyɛ nɖɩ ɖɩñɩlɩsaɣ kpɛɛɛ yɔ ɖɩɩwɛɛ. Ðɩɩwɛ ɛzɩ Yehowa samtʋ wɛtʋ yɔ.+ Mana-ɖɩ lɛ, mɔntɔlɩ nɛ manpa mɛ-ɛsa nɛ tɛtʋ nɛ manpaɣzɩ nɩʋ nɔɔyʋ nɔɔ, ɛwɛɛ nɛ ɛyɔɔdʋʋ.
Pɩ-tɛɛ tɔm
^ Pʋ-tɔbʋʋ se «Ɛsɔ kpazɩɣ ɖoŋ.»
^ Yaa «elɛkɩtrɔɔm.»
^ Yaa «nakʋyʋ nɛ tɛʋ ñɩlɩsʋʋ.»
^ Piye piye, «wondu kɩlɩzɩtʋ ndʋ tɩwɛ wezuu yɔ.»
^ Yaa «keziye.»
^ Pɩkɛnɩ ɖaŋ weyi ɖoŋ ɖoŋ lɛ pɔɖɔkʋʋ-ɩ nesi taa nɛ paɖʋʋ miŋ ɩ-nɔsɩ taa yɔ.
^ Piye piye, «mbʋ pʋyɔɔ yɔ wonuu kɩlɩzʋʋ ŋgʋ kɩwɛ wezuu yɔ ki-fezuu.»
^ Yaa «ɛsɔ mɩnʋʋ.»
^ Pɩpɩzɩɣ pɩkɛ, «pe-keŋ kaaposini hʋyɩŋ yɔɔ.»
^ Yaa «ɛzɩ elɛkɩtrɔɔm.»
