Ezekɩyɛɛlɩ 10:1-22
10 Maawɛɛ nɛ mɔncɔŋna lɛ, mana nabʋyʋ ɛsɔdaa ɛwaɣ* ŋga kaawɛ kerebimwaa ñʋŋ yɔɔ yɔ ka-ñʋʋ yɔɔ, pɩwɛ ɛzɩ saafiirɩ pɩyɛ yɔ, pɩwɛɛ nɛ pɩlɩɣ pa-ñʋʋ yɔɔ, nɛ pɩ-wɛtʋ nɩɣzɩnɩ kewiyaɣ kpelaɣ.+
2 Nɛ eheyi abalʋ weyi esu wondu ndʋ palabɩnɩ pɩsatʋ yɔ* se:+ «Sʋʋ pɔbɔla hɛkʋ taa,+ kerebimwaa tɛɛ, nɛ ŋcozi mamala+ kerebimwaa hɛkʋ taa nɛ pisu ñe-nesi 2 taa nɛ ŋmɩzɩ-yɛ tɛtʋ yɔɔ.»+ Nɛ ɛsʋʋ alɩwaatʋ ndʋ mɛwɛɛ nɛ mɔncɔŋna yɔ.
3 Kerebimwaa kaasɩŋ ɖɩɣa nɩwaŋ yɔɔ alɩwaatʋ ndʋ abalʋ ɛnʋ ɛsʋwa yɔ, nɛ ɛsɔmɩnʋʋ su pɩ-taa kadaɣ taa.
4 Nɛ Yehowa samtʋ+ kʋyɩnɩ kerebimwaa cɔlɔ nɛ tiwolo ɖɩɣa nɔnɔɔ taa, nɛ pazɩ pazɩ lɛ, ɛsɔmɩnʋʋ su ɖɩɣa taa,+ nɛ Yehowa samtʋ ñalɩmɩyɛ kaasu kadaɣ taa.
5 Nɛ papɩzaɣ se panɩɩ kerebimwaa keŋ taŋ awayɩ kadaɣ taa; pɩɩwɛ ɛzɩ Ɛsɔ Ðoŋ Tɩŋa Tʋ nɔɔ alɩwaatʋ ndʋ ɛyɔɔdʋʋ yɔ.+
6 Nɛ ɛɖʋ paɣtʋ abalʋ weyi esu wondu ndʋ palabɩnɩ pɩsatʋ yɔ* se: «Haa miŋ pɔbɔla hɛkʋ taa, kerebimwaa hɛkʋ taa,» nɛ ɛsʋʋ nɛ ɛsɩŋ pɔbɔɖɛ cɔlɔ.
7 Peeɖe kerebimwaa taa kʋɖʋm sezi e-nesi nɛ miŋ weyi ɩɩwɛ kerebimwaa hɛkʋ taa yɔ ɩ-yɔɔ kiŋ.+ Ecozi miŋ pazɩ nɛ ɛɖʋ-ɩ abalʋ weyi esu wondu ndʋ palabɩnɩ pɩsatʋ yɔ e-nesi 2 taa,+ nɛ ɛlɛ mʋ-ɩ nɛ ɛɖɛɛ ɛlɩɩ.
8 Kerebimwaa kaawɛnɩ nabʋyʋ pe-keŋ tɛɛ, pɩɩnɩɣzɩnɩ ɛyʋ nesi.+
9 Maawɛɛ nɛ mɔncɔŋna lɛ, mana pɔbɔla 4 kerebimwaa cɔlɔ, pɔbɔɖɛ kʋɖʋmɖɩyɛ kaawɛ paa kerebim weyi lɛ ɛ-cɔlɔ, nɛ pɔbɔla ana añɩlɩsaɣ ɛzɩ krizooliitɩ pɩyɛ yɔ.+
10 Nɛ pɔbɔla ana a-naanza aanɩɣzɩnɩ ɖama, nɛ ŋna-yɛ yɔ pɩwɛ ɛzɩ pɔbɔɖɛ lɛɛɖɛ wɛ lɛɛɖɛ taa yɔ.
11 Aaɖɛɣ lɛ, apɩzɩɣ nɛ aɖɛɛnɩ hɔɔlɩŋ 4 ɛnɩ ɩ-taa nɛ aakɛzɩɣ a-tɩ, mbʋ pʋyɔɔ yɔ awokaɣ lone nɖɩ ɖɩ-taa ñʋʋ pamnɩ ɛsa yɔ nɛ aakɛzɩɣ a-tɩ.
12 Ɛsa kaawɛ kerebimwaa mba po-tomnasɩ kpeekpe, pe-siɣa, pe-nesi nɛ pe-keŋ yɔɔ ñɔɔɔ nɛ pɩcɔɔ pɩta. Pa-naanza paawɛnɩ pɔbɔla pɔ-cɔlɔ, nɛ pɔbɔla ana a-yɔɔ kaawɛ ɖɔɖɔ ɛsa ñɔɔɔ nɛ pɩcɔɔ pɩta.+
13 Piyele nɛ pɔbɔla lɛ, manɩ nɔɔ nakɛyɛ ya-yɛ nɛ kɔtɔ se: «Pɔbɔla!»
14 Paa weyi lɛ* ɛ-ɛsɩndaa wɛ tam naanza taa. Ɛ-ɛsɩndaa hɔɔlʋʋ kajalaɣ ñɩŋgʋ kaakɛ kerebim ɛsɩndaa, hɔɔlʋʋ naalɛ ñɩŋgʋ kaakɛ ɛyʋ* ɛsɩndaa, hɔɔlʋʋ naadozo ñɩŋgʋ kaakɛ mʋʋzʋʋ ɛsɩndaa, nɛ hɔɔlʋʋ naanza ñɩŋgʋ kaakɛ kpeluu* ɛsɩndaa.+
15 Nɛ kerebimwaa kʋyaɣ (Ɛsɔ tiyiyaa* mba maana Kebaarɩ pɔɔ cɔlɔ),+
16 nɛ alɩwaatʋ ndʋ kerebimwaa ɖɛɣaɣ yɔ, pɔbɔla tɩŋaɣ-wɛ nɛ a nɛ wɛ pɛɖɛɣ; nɛ alɩwaatʋ ndʋ kerebimwaa kʋsaɣ pe-keŋ se pakʋyɩ tɛtʋ yɔɔ nɛ pakpa ɖooo ɛsɔdaa yɔ, pɔbɔla taakɛɣ yaa ataaposuuni-wɛ.+
17 Alɩwaatʋ ndʋ kerebimwaa sɩŋaɣ yɔ, pɔbɔla sɩŋaɣ ɖɔɖɔ; nɛ alɩwaatʋ ndʋ pakʋyaɣ yɔ, alɛ ɖɔɖɔ kʋyaɣ; mbʋ pʋyɔɔ yɔ fezuu ŋgʋ kɩlakaɣ tʋmɩyɛ Ɛsɔ tiyiyaa mba pɔ-yɔɔ yɔ* kɩɩwɛ pɔbɔla taa.
18 Nɛ Yehowa samtʋ+ kʋyɩnɩ ɖɩɣa nɔnɔɔ ñʋʋ yɔɔ nɛ tiwolo tɩsɩŋ kerebimwaa ñʋʋ yɔɔ.+
19 Nɛ kerebimwaa kʋsɩ pe-keŋ nɛ pakʋyɩ tɛtʋ yɔɔ alɩwaatʋ ndʋ maawɛɛ nɛ mɔncɔŋna yɔ. Alɩwaatʋ ndʋ pɛɖɛɣaɣ yɔ, pɔbɔla ɖɔɖɔ tɩŋaɣ-wɛ. Pasɩŋ Yehowa ɖɩɣa tɛ wɩsɩ ɖɩlɩyɛ nɔnɔɔ taa, nɛ Izrayɛɛlɩ tɛ Ɛsɔ samtʋ kaawɛ pa-ñʋʋ yɔɔ.+
20 Mba lɛ Ɛsɔ tiyiyaa* mba maana Izrayɛɛlɩ tɛ Ɛsɔ tɛɛ Kebaarɩ pɔɔ cɔlɔ yɔ,+ nɛ menɖiɣzina se pɛkɛ kerebimwaa.
21 Pa-naanza pɛ-ɛsɩndaa kaawɛ tam naanza taa, paawɛnɩ keŋ naanza, nɛ paawɛnɩ nabʋyʋ pe-keŋ tɛɛ, pɩɩnɩɣzɩnɩ ɛyʋ nesi.+
22 Nɛ pɛ-ɛsɩndaa wɛtʋ kaawɛ ɛzɩ ndʋ maana Kebaarɩ pɔɔ cɔlɔ yɔ.+ Paa weyi lɛ ewokaɣni ɛ-ɛsɩndaa tʋʋʋ.+
Pɩ-tɛɛ tɔm
^ Yaa «ɛsɔ mɩnʋʋ.»
^ Yaa «pɩsatʋ ndʋ payaɣ se lɛɛ yɔ.» Lɛɛ kɛ ñɩtʋ ndʋ pahayaɣ-tʋ ɖooo caanaʋ taa nɛ palakɩnɩ-tʋ tʋmɩyɛ nɛ palʋʋnɩ wondu kususutu yɔ.
^ Cɔnɩ kalɩtʋ 2 tɛ pɩ-tɛɛ tɔm.
^ Pʋ-tɔbʋʋ se paa kerebim weyi lɛ.
^ Yaa «abalʋ.»
^ Yaa «keziye.»
^ Piye piye, «wonuu kɩlɩzʋʋ ŋgʋ kɩwɛ wezuu yɔ.»
^ Piye piye, «mbʋ pʋyɔɔ yɔ wonuu kɩlɩzʋʋ ŋgʋ kɩwɛ wezuu yɔ ki-fezuu.»
^ Piye piye, «Ɛnʋ kɛnɩ wonuu kɩlɩzʋʋ ŋgʋ kɩwɛ wezuu yɔ.»
