Ezekɩyɛɛlɩ 14:1-23
14 Nɛ Izrayɛɛlɩ ɛzʋtʋyaa taa nabɛyɛ kɔɔ nɛ pacaɣ mɛ-ɛsɩndaa.+
2 Peeɖe Yehowa tɔm talɩ-m se:
3 «Ɛyʋ pɩyalʋ, abalaa panɛ, pɛtɛm pa-taa se patɩŋɩɣ pa-sɩʋ kpelisi nzɩ sɩwɛ kiniŋ yɔ,* nɛ pakpaɣ mbʋ pituuluu yɔ nɛ pasɩɩ ɛyaa ɛsɩndaa se piyele nɛ ɛyaa la kɩwɛɛkɩm. Pɩwɛɛ se meyele-wɛ nɛ pɔpɔzɩ nɛ patɩlɩ ma-lɩmaɣza na?+
4 Pʋyɔɔ lɛ, yɔɔdɩnɩ-wɛ nɛ ŋheyi-wɛ se: “Tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Ye Izrayɛɛlɩ tʋ nɔɔyʋ ɛtɛm ɛ-taa se ɛtɩŋɩɣ ɛ-sɩʋ kpelisi nzɩ sɩwɛ kiniŋ yɔ, nɛ ɛsɩɩ mbʋ pituuluu yɔ ɛyaa ɛsɩndaa se pala kɩwɛɛkɩm, nɛ pʋwayɩ ɛkɔɔ se ɛpɔzɩ nayʋ nɛ ɛtɩlɩ ma-lɩmaɣza yɔ, ma Yehowa mankaɣ-ɩ cosuu ɛzɩ pɩpɔzʋʋ yɔ nɛ pɩmʋnɩ ɛ-sɩʋ kpelisi sakɩyɛ nzɩ sɩwɛ kiniŋ yɔ.
5 Mbʋ pʋyɔɔ yɔ mankaɣ yebu nɛ sɔɔndʋ wɛɛ Izrayɛɛlɩ ɖɩɣa taa mba laŋa taa,* mbʋ pʋyɔɔ yɔ pa-tɩŋa poposini-m nɛ patɩŋɩɣ pa-sɩʋ kpelisi nzɩ sɩwɛ kiniŋ yɔ.’”+
6 «Pʋyɔɔ lɛ, heyi Izrayɛɛlɩ ɖɩɣa se: “Tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Ɩpɩsɩ ɩkɔɔ nɛ iposini mɩ-sɩʋ kpelisi nzɩ sɩwɛ kiniŋ yɔ nɛ iyele mɩ-lakasɩ kɩdɛkɛdɩsɩ tɩŋa.+
7 Mbʋ pʋyɔɔ yɔ ye Izrayɛɛlɩ tʋ nɔɔyʋ yaa ɛgɔm weyi ɛwɛ Izrayɛɛlɩ taa yɔ, eposini-m nɛ ɛtɛ ɛ-taa se ɛtɩŋɩɣ ɛ-sɩʋ kpelisi nzɩ sɩwɛ kiniŋ yɔ, nɛ ɛsɩɩ mbʋ pituuluu yɔ ɛyaa ɛsɩndaa se pala kɩwɛɛkɩm, nɛ pʋwayɩ ɛkɔɔ se ɛpɔzɩ ma-nayʋ nɛ ɛtɩlɩ ma-lɩmaɣza yɔ,+ ma Yehowa, ma-maɣmaɣ mankaɣ-ɩ cosuu.
8 Mankaɣ pam ɛsa nɛ ɛyʋ ɛnʋ nɛ meyele nɛ ɛkɛ paɣʋ yʋsaɣ nɛ eduuye, nɛ mankaɣ-ɩ ɖɩzʋʋ man-samaɣ taa;+ nɛ toovenim taa lɛ ɩkaɣ tɩlʋʋ se ma lɛ Yehowa.’”
9 «“Ɛlɛ ye pipeɣzi nayʋ nɛ ecosi tɔm natʋyʋ yɔ, ma Yehowa mepeɣzini nayʋ ɛnʋ.+ Mankaɣ sezuu me-nesi ɛ-yɔɔ nɛ manɖɩzɩ-ɩ man-samaɣ Izrayɛɛlɩ taa.
10 Mbʋ pa-kɩwɛɛkɩm lʋlaa yɔ pɩkaɣ kɔm pa-maɣmaɣ pa-ñʋŋ taa; pɔzɩyʋ kɩwɛɛkɩm kaɣ kɛʋ ɖɔɖɔ nayʋ kɩwɛɛkɩm,
11 se pɩsa nɛ Izrayɛɛlɩ ɖɩɣa ɛtaatasɩ-m posinuu nɛ koyotuu, nɛ kataatasɩ ka-tɩ pisuu nɛ ka-kɩwɛɛkɩm kpeekpe. Nɛ pakaɣ kɛʋ man-samaɣ, nɛ mankaɣ kɛʋ pɛ-Ɛsɔ,”+ Kɩbaɣlʋ Kɩlɩm Yehowa yɔɔdʋʋna.»
12 Nɛ Yehowa tɔm tasɩ-m talʋʋ se:
13 «Ɛyʋ pɩyalʋ, ye ɛjaɖɛ naɖɩyɛ ɛlakɩ mbʋ pɩfɛyɩ siɣsiɣ yɔ nɛ ɖɩyʋsʋʋnɩ-m yɔ, mankaɣ sezuu me-nesi ɖɩ-yɔɔ nɛ meyele se ɖɩtaatasɩ wɛnʋʋ tɔɔnaɣ,*+ nɛ mankaɣ tiyinuu ñɔɔsɩ ɖɩ-taa+ nɛ manɖɩzɩ ɛyʋ nɛ kpɩnɛ ɖɩ-taa.»+
14 «“Paa abalaa panɛ pa-naadozo (Noowa,+ Danɩyɛɛlɩ+ nɛ Yɔɔb)+ paawɛ ɖɩ-taa yɔ, pe-siɣsiɣ wɛtʋ yɔɔ+ lɛ, pa-maɣmaɣ pa-ñʋŋ* ɖeke papɩzaɣ se paya,” Kɩbaɣlʋ Kɩlɩm Yehowa yɔɔdʋʋna.»
15 «“Yaa ɖɩkpaɣ se meyeba nɛ tɛtɛgbɩna wena awɛ patʋ yɔ asʋʋ ɛjaɖɛ taa nɛ ayɛlɩɣ nɛ piyele nɛ ɛyaa tɩtasɩ ɖɔʋ ɖɩ-taa* nɛ ɖɩpɩsɩ ɛjaɖɛ nɖɩ peyebi-ɖɩ nɛ nɔɔyʋ ɛɛtasɩɣ ɖɩ-taa tɩŋʋʋ, tɛtɛgbɩna ana a-yɔɔ yɔ.+
16 Mañɩtʋʋ nɛ mɛwɛɛ wezuu yɔ, paa abalaa mba pa-naadozo paawɛ ɖɩ-taa yɔ, pataapɩzɩɣ se paya pa-pɩyalaa nɛ pɛ-pɛlaa ñʋŋ; pa-maɣmaɣ pa-ñʋŋ ɖeke papɩzaɣ se paya, nɛ ɛjaɖɛ ñapɩsaɣ njɛyɛ;” Kɩbaɣlʋ Kɩlɩm Yehowa yɔɔdʋʋna.»
17 «“Yaa ɖɩkpaɣ se mɔnkɔnɩ laɣɖɛ ɛjaɖɛ nɖɩ ɖɩ-taa+ nɛ mɔyɔɔdɩ se: ‘Laɣɖɛ ɛcɔɔ ɛjaɖɛ taa,’ nɛ manɖɩzɩ ɛyʋ nɛ kpɩnɛ ɖɩ-taa,+
18 paa abalaa mba pa-naadozo paawɛ ɖɩ-taa yɔ, mañɩtʋʋ nɛ mɛwɛɛ wezuu yɔ, pataapɩzɩɣ se paya pa-pɩyalaa nɛ pɛ-pɛlaa ñʋŋ; pa-maɣmaɣ pa-ñʋŋ ɖeke papɩzaɣ se paya,” Kɩbaɣlʋ Kɩlɩm Yehowa yɔɔdʋʋna.»
19 «“Yaa ɖɩkpaɣ se mentiyini kɩzɩkʋ ɛjaɖɛ nɖɩ ɖɩ-taa+ nɛ manpɩyɩ man-pana ɖɩ-yɔɔ nɛ mɛnkpɛdɩ calɩm sakɩyɛ nɛ manɖɩzɩ ɛyʋ nɛ kpɩnɛ ɖɩ-taa,
20 paa Noowa,+ Danɩyɛɛlɩ+ nɛ Yɔɔb+ paawɛ ɖɩ-taa yɔ, mañɩtʋʋ nɛ mɛwɛɛ wezuu yɔ, pataapɩzɩɣ se paya pa-pɩyalaa nɛ pɛ-pɛlaa ñʋŋ; pe-siɣsiɣ wɛtʋ yɔɔ+ lɛ, pa-maɣmaɣ pa-ñʋŋ* ɖeke papɩzaɣ se paya,” Kɩbaɣlʋ Kɩlɩm Yehowa yɔɔdʋʋna.»
21 «Mbʋ pʋyɔɔ yɔ tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Mbʋ pɩkaɣ labʋ, alɩwaatʋ ndʋ mentiyiɣni kʋñɔmɩŋ 4+ (laɣɖɛ, ñɔɔsɩ, tɛtɛgbɩna wena awɛ patʋ yɔ nɛ kɩzɩkʋ)+ se mɔhɔmnɩ Yeruzalɛm nɩŋgbaŋʋʋ* nɛ manɖɩzɩ ɛyʋ nɛ kpɩnɛ kɩ-taa yɔ.+
22 Ɛlɛ mba pɩkazɩ kɩ-taa yɔ pa-taa nabɛyɛ kaɣ hiɣu ñʋʋ yabʋ nɛ pakpaɣ-wɛ nɛ palɩna,+ evebiya nɛ pɛlaa. Pɔkɔŋ mɩ-cɔlɔ, nɛ alɩwaatʋ ndʋ ɩnaɣ pa-nʋmɔŋ nɛ pa-lakasɩ lɛ, pɩtʋʋ fɛyɩ se pɩkaɣ mɩ-laŋɩyɛ hɛzʋʋ asɛyʋʋ ŋgʋ mɔnkɔnɩ Yeruzalɛm yɔɔ yɔ kɩ-yɔɔ, mbʋ payɩ malabɩ-kʋ yɔ pɩ-yɔɔ.”»
23 «“Pakaɣ mɩ-laŋɩyɛ hɛzʋʋ alɩwaatʋ ndʋ ɩnaɣ pa-nʋmɔŋ nɛ pa-lakasɩ yɔ, nɛ ɩkaɣ ɖiɣzinuu se pɩtɩkɛ yem nɛ malabɩ-kʋ mbʋ malabɩ-kʋ yɔ,”+ Kɩbaɣlʋ Kɩlɩm Yehowa yɔɔdʋʋna.»
Pɩ-tɛɛ tɔm
^ Ebree tɔm piye nɖɩ palabɩnɩ tʋmɩyɛ yɔ, pɩtɩla yɔ nɔɔ kʋɖʋmaɣ nakɛyɛ wɛ ɖɩ nɛ Ebree tɔm piye naɖɩyɛ, nɖɩ pɛɖɛzɩɣ se «pɩndʋ» yɔ pɛ-hɛkʋ taa, nɛ palakɩnɩ-ɖɩ tʋmɩyɛ se peni nabʋyʋ.
^ Piye piye, «mankaɣ kpaʋ Izrayɛɛlɩ ɖɩɣa pa-laŋɩyɛ taa.»
^ Piye piye, «mankaɣ pɛlʋʋ ɖɩ-kpɔnɔ ɖaŋ.» Pɩkɛɣnɩ ɖaŋ weyi ɩ-yɔɔ patʋʋ kpɔnɔnaa nɛ pasɩɣ yɔ.
^ Yaa «pa-kalɩzaɣ.»
^ Yaa «nɛ akʋ piya nzɩ sɩwɛ ɖɩ-taa yɔ.»
^ Yaa «pa-kalɩzaɣ.»
^ Yaa «se mahʋʋnɩ tɔm Yeruzalɛm.»
