Ezekɩyɛɛlɩ 17:1-24
17 Yehowa tɔm tasɩ-m talʋʋ se:
2 «Ɛyʋ pɩyalʋ, ɖʋ Izrayɛɛlɩ ɖɩɣa ɖimɖimɖa nakʋyʋ nɛ ŋtuu-kɛ eduuye naɖɩyɛ.+
3 Pɩwɛɛ se ŋyɔɔdɩ se: “Tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Kpeluu* sɔsɔʋ+ ŋgʋ kɩwɛnɩ keŋ sɔsɔŋ, keŋ hʋndʋ ndʋ tɩɖaɣlaa yɔ, nɛ hʋndʋ sakɩyɛ ndʋ tɩwɛnɩ tɔlɩm ndɩ ndɩ yɔ, kiwobi Libaŋ+ nɛ kɩpɛlɩ sɛɛdrɩ tɩʋ ñʋʋ.+
4 Kɩpɛlɩ ɛyazɩyɛ nɖɩ ɖɩwɛ ɖooo kɩ-ñʋʋ taa yɔ nɛ kiwoni-ɖɩ tadɩyɛ laɖaa ɛjaɖɛ* taa nɛ kɩsɩɩ-ɖɩ tadɩyɛ laɖaa tɛtʋ natʋyʋ taa.+
5 Pʋwayɩ lɛ, kɩkpaɣ ɛjaɖɛ nɖɩ ɖɩ-taa ɖomaɣ nakɛyɛ+ nɛ kiwoni-kɛ nɛ kiɖuu mʋzʋŋ hayɩm nabʋyʋ taa. Kiɖu-kɛ lɩm sakɩyɛ nɔɔ se pɩsa nɛ kapaɣlɩ ɛzɩ tɩʋ ŋgʋ payaɣ se soolɩ yɔ.
6 Nɛ kɔñɔ nɛ kapɩsɩ viiñi ŋgʋ kɩtɩkʋyɩ yɔ, nɛ kɩyɛzɩɣ,+ nɛ kɩ-hatʋ ha ɛsa nɛ pɩ-taa kiŋ, nɛ ki-lila paɣlɩɣ kɩ-tɛɛ. Mbʋ kɩpɩsɩ viiñi nɛ kɩyɛzɩ nɛ kɩlɩɩ pilinzi.+
7 «“‘Nɛ kpeluu* sɔsɔʋ lɛɛkʋ talɩ,+ kɩɩwɛnɩ keŋ sɔsɔŋ nɛ keŋ hʋndʋ ndʋ tɩwalaa yɔ.+ Peeɖe viiñi ŋgʋ kiposi ki-lila lɛɛ lɛɛ nɛ kpeluu ŋgʋ kɩ-yɔɔ, nɛ aposini kaɖaɣ taa ɖenɖe paasɔ-kʋ yɔ, nɛ viiñi ŋgʋ kiposi kɩ-hatʋ nɛ kpeluu yɔɔ kiŋ se pɩsa nɛ kʋkʋ mɩzɩ tɩ-yɔɔ lɩm.+
8 Ŋgʋ, paatɛm viiñi ŋgʋ sɔʋ hayɩm kɩbam nabʋyʋ taa lɩm sakɩyɛ cɔlɔ, se pɩsa nɛ kɩlɩɩ pilinzi nɛ kɩlʋlɩ pee nɛ kɩpɩsɩ viiñi sɔsɔʋ.’”+
9 «Yɔɔdɩ se: “Tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Kɩkaɣ wɛʋ camɩyɛ na? Ɛzɩ nɔɔyʋ ɛɛkaɣ kpɛzʋʋ ki-lila+ nɛ eyele nɛ ki-pee ɖazɩ nɛ ki-pilinzi nzɩ sɩhɔwa yɔ siloo?+ Kɩkaɣ wɩlʋʋ siŋŋ nɛ pɩɩkaɣ pɔzʋʋ nɩŋgbɛɛŋa ɖoŋ ñɩŋga yaa ɛyaa sakɩyɛ pʋcɔ nɛ pɛkpɛzɩ-kʋ nɛ ki-lila.
10 Pɛkpɛzɩ-kʋ nɛ paɖaɣnɩ sɔʋ, paa mbʋ yɔ ɛzɩ kɩkaɣ wɛʋ camɩyɛ na? Kɩɩkaɣ wɩlʋʋ caɣ caɣ alɩwaatʋ ndʋ wɩsɩ ɖɩlɩyɛ taa helim makɩ kɩ-yɔɔ yɔ? Kɩkaɣ wɩlʋʋ kaɖaɣ taa ɖenɖe kɩɩñɔwa yɔ.’”»
11 Nɛ Yehowa tɔm tasɩ-m talʋʋ se:
12 «Mentendi-ŋ, heyi ɖɩɣa ŋga kaañaŋ yɔ se: “Ɩɩnɩɣ pʋ-tɔbʋʋ na?” Yɔɔdɩ se: “Ɩna! Babilɔɔnɩ wiyaʋ kɔm Yeruzalɛm nɛ ɛkpaɣ ki-wiyaʋ nɛ kɩ-awumbiya nɛ ɛ nɛ wɛ papɩsɩ Babilɔɔnɩ.+
13 Pɩtasɩ lɛ, ɛkpaɣ wiyaʋ lʋlʋʋ taa tʋ* nɔɔyʋ+ nɛ ɛɖʋ-ɩ nɛ ɛgbɛyɛ nɛ eyele nɛ ɛlɛ ɖuu.+ Pʋwayɩ lɛ, ɛkpaɣ ɛjaɖɛ taa ɛyaa mba pa-hɩla sɛwa yɔ nɛ ɛɖɛna,+
14 se pɩsa nɛ kewiyaɣ tii tataa nɛ kataapɩzɩ nɛ kakʋyɩ, se pɩsa nɛ ye Izrayɛɛlɩ samaɣ ɛɖɔŋ ɛ-ɛgbɛyɛ yɔɔ kɔyɔ pi-ɖeke piiyebina nɛ kewiyaɣ ŋga kowolo pɩ-yɔɔ nɛ kɛwɛɛ.+
15 Ɛlɛ pɩtɛmna se wiyaʋ kʋyaa nɛ ɛkaɖɩnɩ-ɩ+ nɛ etiyi ɛyaa Ejipiti se paha-ɩ kpaŋnaŋ+ nɛ sɔɔjanaa sakɩyɛ.+ Ɛkaɣ pɩzʋʋ na? Weyi ɛlakɩ mbʋ yɔ, paakaɣ ɛ-nɩŋgbaŋʋʋ hɔm na? Ɛpɩzɩɣ nɛ ɛcɛ ɛgbɛyɛ nɛ ɛtɛ ɛlɩɩ pɩ-taa?”+
16 «“Mañɩtʋʋ nɛ mɛwɛɛ wezuu yɔ, ɛkaɣ sɩbʋ Babilɔɔnɩ, ɖenɖe wiyaʋ* weyi ɛpɩsɩ-ɩ* wiyaʋ yɔ ɛwɛɛ yɔ, weyi e-ɖuutu enima nɛ ɛcɛ ɛ-ɛgbɛyɛ yɔ,+ Kɩbaɣlʋ Kɩlɩm Yehowa yɔɔdʋʋna.
17 Nɛ Farawɔɔ tɛ yoyaa sakɩyɛ nɛ ɛ-sɔɔjanaa mba pɔɖɔ sakɩyɛ yɔ paakaɣ-ɩ sɩnʋʋ you taa,+ alɩwaatʋ ndʋ pesiki you wondu nɛ pɩcɔɔ pɩta nɛ pama tɛtʋ ñɛyʋʋ kolonzi se paɖɩzɩ weziŋ* sakɩyɛ yɔ.
18 Enim ɖuutu nɛ ɛcɛ ɛgbɛyɛ. Paa eeɖuwaa* yɔ, ɛlabɩ lakasɩ nzɩ sɩ-tɩŋa, nɛ ɛɛkaɣ lɩʋ pɩ-taa.”
19 «“Pʋyɔɔ lɛ, tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Mañɩtʋʋ nɛ mɛwɛɛ wezuu yɔ, enim mon-ɖuutu+ nɛ ɛcɛ mɛ-ɛgbɛyɛ nɛ mbʋ pɩlɩ pɩ-taa yɔ, mankaɣ-pʋ kɔnʋʋ ɛ-ñʋʋ taa.
20 Mankaɣ-ɩ lɔʋ piyuu, nɛ mankaɣ-ɩ kpaʋ men-piyuu taa.+ Mankaɣ-ɩ wonuu Babilɔɔnɩ nɛ mahʋʋnɩ-ɩ tɔm peeɖe, mbʋ pʋyɔɔ yɔ ɛlabɩ mbʋ pɩfɛyɩ siɣsiɣ mɛ-ɛsɩndaa yɔ.+
21 Ɛ-sɔɔjanaa taa mba payɩ pesewa yɔ pakaɣ-wɛ kʋʋ nɛ laɣɖɛ, nɛ mba pɩkazaa yɔ pakaɣ-wɛ mɩzʋʋ hɔɔlɩŋ tɩŋa taa.*+ Ðɩnɛ ɛlɛ ɩkaɣ tɩlʋʋ toovenim taa se ma Yehowa, ma-maɣmaɣ mɔyɔɔdɩna.’”+
22 «“Tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Mankaɣ kpaɣʋ ɛyazɩyɛ naɖɩyɛ sɛɛdrɩ tɩʋ ŋgʋ kɩkʋyaa yɔ kɩ-ñʋʋ taa+ nɛ mɔnsɔ-ɖɩ, nɛ mankaɣ pɛlʋʋ ki-pilinzi nɔsɩ taa ɛyazɩyɛ kɩfaɖɛ naɖɩyɛ,+ nɛ ma-maɣmaɣ mankaɣ-ɖɩ sɔʋ pʋʋ ŋgʋ kɩkʋyɩ liɣ liɣ yɔ kɩ-yɔɔ.+
23 Nɛ mankaɣ-ɖɩ sɔʋ Izrayɛɛlɩ pʋʋ kʋkʋyʋʋ nakʋyʋ yɔɔ, nɛ ɖi-pilinzi kaɣ paɣlʋʋ, nɛ ɖɩkaɣ lʋlʋʋ pee nɛ ɖɩpɩsɩ sɛɛdrɩ tɩʋ sɔsɔʋ. Nɛ sumasɩ ndɩ ndɩ kaɣ wɛʋ kɩ-tɛɛ nɛ sɩcaɣ kɩ-hatʋ kuzotuu tɛɛ.
24 Nɛ toovenim taa lɛ, ñɩtʋ taa tɩŋ tɩŋa kaɣ tɩlʋʋ se ma Yehowa, ma-maɣmaɣ moluzini tɩʋ ŋgʋ kɩkʋyaa yɔ, nɛ mankpazɩ tɩʋ ŋgʋ kɩtɩkʋyɩ yɔ;+ meyeba nɛ tɩʋ lɛŋ ñɩŋgʋ wɩlɩ nɛ tɩʋ kɩwɩlʋʋ lɩɩ hɛtʋ.+ Ma Yehowa, ma-maɣmaɣ mɔyɔɔdɩna nɛ mala mbʋ.’”»
Pɩ-tɛɛ tɔm
^ Yaa «Keziye.»
^ Piye piye, «Kanaŋ ɛjaɖɛ.»
^ Yaa «keziye.»
^ Piye piye, «ɖomaɣ.»
^ Pʋ-tɔbʋʋ se Nabukodonozɔɔrɩ.
^ Pʋ-tɔbʋʋ se Zedekiya.
^ Yaa «kalɩzasɩ.»
^ Piye piye, «ɛɛcɛlɩ e-nesi.»
^ Piye piye, «paa helim mbʋ lɛ pɩ-nɔɔ taa.»
