Ezekɩyɛɛlɩ 18:1-32
18 Nɛ Yehowa tɔm tasɩ-m talʋʋ se:
2 «Ituki eduuye ɖɩnɛ Izrayɛɛlɩ ɛjaɖɛ taa se: “Caanaa tɔɔ viiñi pee wena awɛ ñɩmɩŋ yɔ, ɛlɛ pa-pɩyalaa kela ñɩŋna.”+ Eduuye nɖɩ ɖɩ-tɔbʋʋ lɛ suwe?
3 «“Mañɩtʋʋ nɛ mɛwɛɛ wezuu yɔ, ɩɩtasɩɣ wobu pɩ-yɔɔ nɛ ituki eduuye ɖɩnɛ Izrayɛɛlɩ taa; Kɩbaɣlʋ Kɩlɩm Yehowa yɔɔdʋʋna.
4 Ɩna! Kalɩzasɩ* tɩŋa—matɩnɩ-sɩ. Caja kalɩzaɣ nɛ ɛ-pɩyalʋ kalɩzaɣ ɖɔɖɔ—matɩnɩ-sɩ. Kalɩzaɣ* ŋga kalakɩ kɩwɛɛkɩm yɔ ŋga kaɣnɩ sɩbʋ.
5 «“Ðɩkpaɣ se ɛyʋ nɔɔyʋ wɛ siɣsiɣ nɛ ɛlakɩ mbʋ pɩtʋʋzaa nɛ pɩwɛɛ siɣsiɣ yɔ.
6 Ɛɛtɔkɩ kɩlaŋ weyi pala sɩʋ kpelisi yɔɔ pʋŋ taa yɔ;+ ɛɛtaɣ liu Izrayɛɛlɩ ɖɩɣa sɩʋ kpelisi nzɩ sɩwɛ kiniŋ yɔ;* nɛ eepisiɣ ɛ-taabalʋ halʋ+ yaa ɛɛsʋʋnɩ halʋ weyi eɖiɣni naʋ fenaɣ yɔ;+
7 ɛɛlakɩ nɔɔyʋ kañatʋ,+ ɛlɛ ɛpɩsɩɣnɩ mbʋ weyi ɛtɔɔ-ɩ kɩmɩyɛ yɔ ɛɛsɩ ɛ-cɔlɔ kɩmɩyɛ nɖɩ ɖɩ-yɔɔ yɔ;+ ɛɛmɩlɩɣ nɔɔyʋ,+ ɛlɛ ɛhaɣ ɛ-maɣmaɣ ɛ-tɔɔnaɣ weyi ñɔɔsɩ wɩɣ-ɩ yɔ+ nɛ ɛhaɣ wondu kususutu weyi ɛwɛ ndaakpeɖe yɔ;+
8 ɛɛpɔzʋʋ kɛzɛɣa mbʋ ɛkɩndɩɣ yɔ pɩ-yɔɔ+ yaa ɛɛñɩnɩɣ mulum kɛzɛɣa, ɛlɛ ɛkpaɣ ɛ-tɩ nɛ mbʋ pɩfɛyɩ siɣsiɣ yɔ pɩ-labʋ;+ ɛhʋʋ tɔm siɣsiɣ ɛyʋ lɛlʋ nɛ lɛlʋ pɛ-hɛkʋ taa;+
9 nɛ ewoki pɩ-yɔɔ nɛ ɛɖɔŋ man-kpalɩtʋ yɔɔ nɛ mɔn-tɔm hʋʋ paɣtʋ yɔɔ se pɩsa nɛ ɛla mbʋ pɩwɛ siɣsiɣ yɔ. Ɛyʋ ɛnʋ ɛwɛ siɣsiɣ, nɛ paa pɩɩlabɩ ɛzɩma yɔ ɛkaɣ wobu pɩ-yɔɔ nɛ ɛwɛɛ wezuu,”+ Kɩbaɣlʋ Kɩlɩm Yehowa yɔɔdʋʋna.
10 «“Ɛlɛ ɖɩkpaɣ se ɛpɩsɩ caja weyi ɛ-pɩyalʋ kɛ mɩlʋ+ yaa ɛyaa kʋyʋ*+ yaa weyi ɛlakɩ lakasɩ lɛɛsɩ nzɩ yɔ sɩ-taa nasɩyɩ yɔ
11 (paa caja ɛtɩla lakasɩ nzɩ sɩ-taa nasɩyɩ yɔ): ɛ-pɩyalʋ ɛnʋ ɛtɔkɩ kɩlaŋ weyi pala sɩʋ kpelisi yɔɔ pʋŋ taa yɔ, episiɣ ɛ-taabalʋ halʋ,
12 ɛlakɩ kañatʋ mba pɛwɛ kɩcɛyɩm taa yɔ nɛ kʋñɔndɩnaa,+ ɛmɩlɩɣ ɛyaa wondu, ɛɛpɩsɩɣnɩ mbʋ ɛmʋ kɩmɩyɛ yɔɔ yɔ, ɛtaɣ liu sɩʋ kpelisi nzɩ sɩwɛ kiniŋ yɔ,+ ɛlakɩ lakasɩ kɩdɛkɛdɩsɩ,+
13 ɛñɩnɩɣ mulum kɛzɛɣa nɛ ɛpɔzʋʋ kɛzɛɣa mbʋ ɛkɩndɩɣ yɔ pɩ-yɔɔ.+ Ðɩnɛ ɛlɛ ɛ-pɩyalʋ ɛnʋ ɛɛkaɣ wobu pɩ-yɔɔ nɛ ɛwɛɛ wezuu. Lakasɩ kɩdɛkɛdɩsɩ nzɩ payɩ ɛlaba yɔ sɩ-yɔɔ lɛ, paa pɩɩlabɩ ɛzɩma yɔ pakaɣ-ɩ kʋʋ. Ɛ-maɣmaɣ ɛ-calɩm kaɣ wɛʋ ɛ-yɔɔ.
14 «“Ɛlɛ ɖɩkpaɣ se caja nɔɔyʋ wɛnɩ pɩyalʋ nɛ ɛ-pɩyalʋ ɛnʋ ɛnaɣ kɩwɛɛkɩm mbʋ payɩ ɛ-caa laba yɔ, nɛ paa ɛnaɣ-pʋ yɔ, ɛɛlakɩ-pʋ.
15 Ɛɛtɔkɩ kɩlaŋ weyi pala sɩʋ kpelisi yɔɔ pʋŋ taa yɔ; ɛɛtaɣ liu Izrayɛɛlɩ ɖɩɣa sɩʋ kpelisi nzɩ sɩwɛ kiniŋ yɔ; eepisiɣ ɛ-taabalʋ halʋ;
16 ɛɛlakɩ nɔɔyʋ kañatʋ; eekiziɣ pɩsɩnʋʋ mbʋ ɛmʋ kɩmɩyɛ yɔɔ yɔ; ɛɛmɩlɩɣ nɔɔyʋ pʋyʋ; ɛhaɣ ɛ-maɣmaɣ ɛ-tɔɔnaɣ weyi ñɔɔsɩ wɩɣ-ɩ yɔ nɛ ɛhaɣ wondu kususutu weyi ɛwɛ ndaakpeɖe yɔ;
17 ɛkpaɣ ɛ-tɩ se ɛtaanazɩ kʋñɔndɩnaa; ɛɛñɩnɩɣ mulum kɛzɛɣa yaa ɛɛpɔzʋʋ kɛzɛɣa mbʋ ɛkɩndɩɣ yɔ pɩ-yɔɔ; nɛ ɛɖɔŋ mɔn-tɔm hʋʋ paɣtʋ yɔɔ nɛ man-kpalɩtʋ yɔɔ. Ɛyʋ ɛnʋ ɛɛkaɣ sɩbʋ ɛ-caa kɩwɛɛkɩm yɔɔ. Paa pɩɩlabɩ ɛzɩma yɔ ɛkaɣ wobu pɩ-yɔɔ nɛ ɛwɛɛ wezuu.
18 Ɛlɛ ɛ-caa lɛ, ɛlɛ kaɣ sɩbʋ ɛ-kɩwɛɛkɩm yɔɔ, mbʋ pʋyɔɔ yɔ ɛlabɩ mulum lakasɩ, ɛmɩlɩ e-koobu, nɛ ɛla mbʋ pɩkɛ kɩdɛkɛdɩm ɛ-samaɣ taa yɔ.
19 «“Ɛlɛ ɩkaɣ yɔɔdʋʋ se: ‘Ɛbɛ yɔɔ pɩɣa ɛɛɖɔʋ wɛɛ ka-caa kɩwɛɛkɩm yɔɔ?’ Pɩɣa ŋga, kalabɩ mbʋ pɩtʋʋzaa nɛ pɩwɛɛ siɣsiɣ yɔ, nɛ kɔɖɔkɩ man-kpalɩtʋ tɩŋa nɛ kɔɖɔ tɩ-yɔɔ; pʋyɔɔ lɛ, paa pɩɩlabɩ ɛzɩma yɔ kakaɣ wobu pɩ-yɔɔ nɛ kɛwɛɛ wezuu.+
20 Kalɩzaɣ* ŋga kalakɩ kɩwɛɛkɩm yɔ, ŋga kaɣnɩ sɩbʋ.+ Pɩɣa ɛɛkaɣ wɛɛ ɖɔʋ ka-caa kɩwɛɛkɩm yɔɔ, nɛ caja ɛɛkaɣ wɛɛ ɖɔʋ ɛ-pɩɣa kɩwɛɛkɩm yɔɔ. Pakaɣ hʋnʋʋ tɔm ɛyʋ siɣsiɣ tʋ ɛzɩ ɛ-maɣmaɣ e-siɣsiɣ wɛtʋ pɔzʋʋ yɔ, nɛ pakaɣ hʋnʋʋ tɔm kañatʋ tʋ ɛzɩ ɛ-maɣmaɣ ɛ-kañatʋ lakasɩ pɔzʋʋ yɔ.+
21 «“Nɛ ye kañatʋ tʋ nɔɔyʋ eyebi labʋ kɩwɛɛkɩm mbʋ payɩ ɛlakaɣ yɔ nɛ ɛɖɔkɩ man-kpalɩtʋ nɛ ɛlakɩ mbʋ pɩtʋʋzaa nɛ pɩwɛɛ siɣsiɣ yɔ, paa pɩɩlabɩ ɛzɩma yɔ ɛkaɣ wɛʋ wezuu. Ɛɛkaɣ sɩbʋ.+
22 Kɩwɛɛkɩm mbʋ payɩ ɛlaba yɔ paakaɣ-ɩ pɔzʋʋ akɔnta* pɩ-taa nabʋyʋ yɔɔ.+ Ɛkaɣ wobu pɩ-yɔɔ nɛ ɛwɛɛ wezuu mbʋ pʋyɔɔ yɔ ɛlabɩ mbʋ pɩwɛ siɣsiɣ yɔ.”+
23 «“Ɛzɩ man-taa lakɩ leleŋ nɛ kañatʋ tʋ sɩm na?+ Ɛzɩ pɩɩkɛdɩɣnɩ-m nɛ pɩkɩlɩ se eyele ɛ-nʋmɔʋ nɛ ɛwɛɛ wezuu na?”+ Kɩbaɣlʋ Kɩlɩm Yehowa yɔɔdʋʋna.
24 «“Ɛlɛ ye ɛyʋ siɣsiɣ tʋ nɔɔyʋ eyebi e-siɣsiɣ wɛtʋ nɛ ɛlakɩ mbʋ pɩfɛyɩ ɖeu,* nɛ ɛlakɩ lakasɩ kɩdɛkɛdɩsɩ nzɩ payɩ kañatʋ tɩnaa lakɩ yɔ, ɛkaɣ wɛʋ wezuu na? Lakasɩ siɣsiɣ ñɩnzɩ nzɩ ɛlaba yɔ, paakaɣ sɩ-taa nasɩyɩ yɔɔ tɔzʋʋ.+ Ɛkaɣ sɩbʋ, mbʋ pʋyɔɔ yɔ ɛfɛyɩ siɣsiɣ nɛ ɛlabɩ kɩwɛɛkɩm.+
25 «“Ɛlɛ ɩkaɣ yɔɔdʋʋ se: ‘Yehowa nʋmɔʋ fɛyɩ siɣsiɣ.’+ Oo Izrayɛɛlɩ ɖɩɣa, mentendi-mɩ, iwelisi! Ɛzɩ ma-nʋmɔʋ fɛyɩnɩ siɣsiɣ?+ Ɛzɩ pɩtɩkɛ mɩ-nʋmɔŋ fɛyɩnɩ siɣsiɣ?+
26 «“Ye ɛyʋ siɣsiɣ tʋ nɔɔyʋ eyebi e-siɣsiɣ wɛtʋ nɛ ɛlakɩ mbʋ pɩfɛyɩ ɖeu yɔ nɛ pʋyɔɔ lɛ ɛsɩ yɔ, ɛ-maɣmaɣ ɛ-kɩdɛkɛdɩm yɔɔ ɛsɩkɩ.
27 «“Nɛ ye kañatʋ tʋ nɔɔyʋ eyebi labʋ kañatʋ lakasɩ nzɩ ɛlakaɣ yɔ nɛ ɛpaɣzɩ labʋ mbʋ pɩtʋʋzaa nɛ pɩwɛɛ siɣsiɣ yɔ, ɛkaɣ yabʋ ɛ-maɣmaɣ e-wezuu* ñʋʋ.+
28 Alɩwaatʋ ndʋ eɖiɣziɣna nɛ eyele labʋ kɩwɛɛkɩm mbʋ payɩ ɛlakaɣ yɔ, paa pɩɩlabɩ ɛzɩma yɔ ɛkaɣ wɛʋ wezuu. Ɛɛkaɣ sɩbʋ.
29 «“Ɛlɛ Izrayɛɛlɩ ɖɩɣa kaɣ yɔɔdʋʋ se: ‘Yehowa nʋmɔʋ fɛyɩ siɣsiɣ.’ Oo Izrayɛɛlɩ ɖɩɣa, ɛzɩ toovenim taa lɛ ma-nʋmɔŋ fɛyɩnɩ siɣsiɣ?+ Ɛzɩ pɩtɩkɛ mɩ-nʋmɔŋ fɛyɩnɩ siɣsiɣ?”
30 «“Pʋyɔɔ lɛ, mankaɣ hʋnʋʋ tɔm mɩ-taa paa weyi ɛzɩ ɛ-lakasɩ* pɔzʋʋ yɔ,+ Oo Izrayɛɛlɩ ɖɩɣa. Iposi mɩ-tɩ, ɛɛɛ, iposi mɩ-tɩ kpem nɛ mɩ-kɩwɛɛkɩm tɩŋa, se pɩsa nɛ pɩtaakɛ mbʋ pituuluu nɛ piyeki nɛ ɩɖɔʋ wɛɛ yɔ; Kɩbaɣlʋ Kɩlɩm Yehowa yɔɔdʋʋna.
31 Ɩlɔ kɩwɛɛkɩm mbʋ payɩ ɩlaba yɔ+ nɛ ɩwɛɛnɩ* laŋɩyɛ kɩfaɖɛ nɛ maɣzɩm kɩfam,+ mbʋ pʋyɔɔ yɔ ɛbɛ yɔɔ pɩwɛɛ se ɩsɩ,+ Oo Izrayɛɛlɩ ɖɩɣa?”
32 «“Nɔɔyʋ sɩm ɛɛkɛdɩɣnɩ-m.+ Pʋyɔɔ lɛ, ɩpɩsɩ ɩkɔɔ nɛ ɩwɛɛ wezuu;” Kɩbaɣlʋ Kɩlɩm Yehowa yɔɔdʋʋna.»+
Pɩ-tɛɛ tɔm
^ Yaa «Weziŋ.» Cɔnɩ Tɔm pee sɔsɔna tɔbʋʋ lɩzʋʋ.
^ Yaa «Ɛyʋ.» Cɔnɩ Tɔm pee sɔsɔna tɔbʋʋ lɩzʋʋ.
^ Ebree tɔm piye nɖɩ palabɩnɩ tʋmɩyɛ yɔ, pɩtɩla yɔ nɔɔ kʋɖʋmaɣ nakɛyɛ wɛ ɖɩ nɛ Ebree tɔm piye naɖɩyɛ, nɖɩ pɛɖɛzɩɣ se «pɩndʋ» yɔ pɛ-hɛkʋ taa, nɛ palakɩnɩ-ɖɩ tʋmɩyɛ se peni nabʋyʋ.
^ Piye piye, «calɩm kpɛdɩyʋ.»
^ Yaa «Ɛyʋ.»
^ Piye piye, «paakaɣ tɔzʋʋ.»
^ Yaa «ɛlakɩ mbʋ pɩfɛyɩ siɣsiɣ.»
^ Yaa «ɛ-kalɩzaɣ.» Cɔnɩ Tɔm pee sɔsɔna tɔbʋʋ lɩzʋʋ.
^ Piye piye, «ɛ-nʋmɔŋ.»
^ Piye piye, «ɩla mɩ-tɩ.»