Ezekɩyɛɛlɩ 22:1-31
22 Nɛ Yehowa tɔm tasɩ-m talʋʋ se:
2 «Nɛ ña yɔ, ɛyʋ pɩyalʋ, ŋñɔɔzɩ ña-tɩ se ŋhʋʋnɩ tɔm* tɛtʋ ndʋ tɩɖɔ calɩm kpɛdʋʋ wɛɛ yɔ+ nɛ ŋyele nɛ tɩtɩlɩ tɩ-lakasɩ kɩdɛkɛdɩsɩ tɩŋa na?+
3 Pɩwɛɛ se ŋyɔɔdɩ se: “Tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Hayɩ, tɛtʋ ndʋ tɩkpɛdɩɣ calɩm+ tɩ-taa yɔ, ndʋ tɩ-alɩwaatʋ ɖiɣni kɔm yɔ,+ ndʋ tɩlakɩ sɩʋ kpelisi nzɩ sɩwɛ kiniŋ yɔ* se tipisini tɩ-tɩ yɔ,+
4 ña-calɩm kpɛdʋʋ yeba nɛ ŋɖɔɔ wɛɛ,+ nɛ ña-sɩʋ kpelisi nzɩ sɩwɛ kiniŋ yɔ siyeba nɛ ŋfɛyɩ kele kele.+ Ŋlaba nɛ ña-kɩyakɩŋ tɛm alɩwaatʋ kɔɔ lɔŋ, nɛ ña-pɩnzɩ tɛm alɩwaatʋ talaa. Pʋyɔɔ mankaɣ labʋ nɛ ŋpɩsɩ fɛyɛ pʋyʋ ajɛɛ ɛsɩndaa nɛ woŋa pʋyʋ ajɛɛ kpeekpe ɛsɩndaa.+
5 Ajɛɛ wena añɔtɩnɩ-ŋ yɔ nɛ wena aposini-ŋ yɔ, akaɣ-ŋ woŋuu, ña weyi ña-hɩɖɛ fɛyɩ kele kele nɛ ña-taa sidi yem yem yɔ.+
6 Na! Izrayɛɛlɩ ñʋndɩnaa mba pɛwɛ ña-taa yɔ, pa-taa paa weyi lakɩnɩ e-ɖoŋ tʋmɩyɛ se ɛkpɛdɩ calɩm.+
7 Ɛyaa niŋ pa-caanaa nɛ po-ɖoonaa ña-taa.+ Pomuluu ɛgɔm, nɛ pawɩlɩɣ ñaŋ pɩɣa ŋga kɛfɛyɩ caa yɔ* nɛ lelu.’”»+
8 «“Ŋniŋ mo-lona kiɖeɖena, nɛ ŋpisiɣ man-sabaatɩwaa.+
9 Kɔlɔmɔtʋ tɩnaa wɛ ña-taa, nɛ pɛtɛm pa-taa se pɛkpɛdɩɣ calɩm.+ Pɔtɔkɩ mbʋ pala kɩlaŋ yɔ pʋŋ yɔɔ ña-taa nɛ palakɩ kʋzɔɔtʋ lakasɩ ña-taa.+
10 Pepisiɣ pa-caanaa kaɖʋnaa* ña-taa,+ nɛ pakpaɣnɩ ɖoŋ halʋ weyi ɛfɛyɩ kele kele mbʋ pʋyɔɔ yɔ ɛna fenaɣ yɔ nɛ pasʋʋnɩ-ɩ.+
11 Abalʋ nɔɔyʋ lakɩ ɛyʋ lɛlʋ halʋ yɔɔ kʋzɔɔtʋ lakasɩ ña-taa,+ lɛlʋ pisiɣ ɛ-maɣmaɣ e-wolu nɛ kʋzɔɔtʋ lakasɩ,+ nɛ lɛlʋ kpaɣnɩ ɖoŋ ɛ-caa pɛlɛ nɛ ɛsʋʋnɩ-ɩ.+
12 Pamʋʋ kʋjɔʋ ña-taa se pɛkpɛdɩ calɩm.+ Ŋkɩndɩɣ lalaa se paahɛyɩ-ŋ nɛ kɛzɛɣa+ yaa se ŋŋhiɣ pʋyʋ,* nɛ ŋmʋʋ liidiye ñɔ-cɔlɔ mba cɔlɔ nɛ ɖoŋ.+ Ɛɛɛ, ŋsɔ mɔ-yɔɔ caɣ caɣ,” Kɩbaɣlʋ Kɩlɩm Yehowa yɔɔdʋʋna.
13 «“Na! Mamakɩ me-nesi taa nɛ pɩwɩlɩ se mulum kɛzɛɣa ŋga ŋhiɣaa yɔ nɛ calɩm kpɛdʋʋ lakasɩ nzɩ sɩwɛ ña-taa yɔ sɩwɛ-m kiniŋ.
14 Ɛzɩ ŋkaɣ wɛʋ abalɩtʋ* mbʋ nɛ ñe-nesi kaɣ wɛʋ ɖoŋ mbʋ alɩwaatʋ ndʋ mankʋyʋʋ ñɔ-yɔɔ yɔ?+ Ma Yehowa, ma-maɣmaɣ mɔyɔɔdɩna, nɛ mankaɣ labʋ ɖɔɖɔ.
15 Mankaɣ-ŋ mɩzʋʋ samasɩ taa nɛ mɛyɛkɛlɩ-ŋ ajɛɛ taa,+ nɛ mankaɣ sɩnzʋʋ ña-azuluma.+
16 Nɛ pakaɣ-ŋ ɖʋʋ fɛyɛ ajɛɛ ɛsɩndaa, nɛ toovenim taa lɛ ŋkaɣ tɩlʋʋ se ma lɛ Yehowa.”»+
17 Nɛ Yehowa tɔm tasɩ-m talʋʋ se:
18 «Ɛyʋ pɩyalʋ, Izrayɛɛlɩ ɖɩɣa pɩsɩ mɛ-ɛsɩndaa ɛzɩ kʋzɔɔtʋ ndʋ poyolusuu ñɩɣtʋ nɛ tɩlɩɣ yɔ. Pa-tɩŋa pɛkɛ ñɩɣyʋʋ kɩsɛɛmʋʋ, ñɩɣtʋ ndʋ payaɣ se etɛɛ yɔ, ñɩɣtʋ kɩkpɛɛdɩtʋ nɛ ñɩɣtʋ ndʋ payaɣ se pʋlɔŋ yɔ miŋ kpou taa. Papɩsɩ kʋzɔɔtʋ ndʋ poyolusuu liidiye ñɩɣtʋ nɛ tɩlɩɣ yɔ.+
19 «Pʋyɔɔ lɛ, tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Mɩ-tɩŋa payɩ ɩpɩsɩ kʋzɔɔtʋ ndʋ poyolusuu ñɩɣtʋ nɛ tɩlɩɣ yɔ,+ pʋyɔɔ lɛ menɖiɣni-mɩ kpeɣluu Yeruzalɛm taa.
20 Ɛzɩ pekpeɣluu liidiye ñɩɣtʋ, ñɩɣyʋʋ kɩsɛɛmʋʋ, ñɩɣtʋ kɩkpɛɛdɩtʋ, ñɩɣtʋ ndʋ payaɣ se pʋlɔŋ yɔ nɛ ñɩɣtʋ ndʋ payaɣ se etɛɛ yɔ miŋ kpou taa se pɛfɛtɩ miŋ tɩ-yɔɔ nɛ poyolisi-tʋ yɔ, mbʋ ɖɔɖɔ mankaɣ-mɩ kpeɣluu man-pana nɛ mɔ-hɔpɩsɩyɛ taa, nɛ mankaɣ fɛtʋʋ mɩ-yɔɔ miŋ nɛ moyolisi-mɩ.+
21 Mankaɣ-mɩ kpeɣluu nɛ mɛnfɛtɩ mɩ-yɔɔ man-pana miŋ,+ nɛ ɩkaɣ yoluu tɛtʋ taa.+
22 Mankaɣ-mɩ yolusuu tɩ-taa ɛzɩ poyolusuu liidiye ñɩɣtʋ miŋ kpou taa yɔ; nɛ toovenim taa lɛ ɩkaɣ tɩlʋʋ se ma Yehowa, ma-maɣmaɣ mapɩyɩnɩ man-pana mɩ-yɔɔ.”»
23 Nɛ Yehowa tɔm tasɩ-m talʋʋ se:
24 «Ɛyʋ pɩyalʋ, heyi tɛtʋ ndʋ se: “Ŋkɛ tɛtʋ ndʋ paakaɣ-tʋ pɩsʋʋ kele kele yaa tɛʋ ɛɛkaɣ nɩʋ tɩ-taa pana kɩyakʋ wiye yɔ.
25 Tɩ-nayaa kpɛyɩ tɔm tɩ-taa,+ ɛzɩ mʋʋzʋʋ ŋgʋ kiɖiɣni mʋdʋʋ nɛ kɩcɩyɩɣ mbʋ kɩkpawa yɔ.+ Papʋʋtʋʋ ɛyaa.* Pamʋʋnɩ ɖoŋ ñɩm nɛ wondu ndʋ tɩmʋ ñɩm yɔ. Palaba nɛ tɩ-taa halaa sakɩyɛ pɩsɩ lelaa.
26 Tɩ-cɔjɔnaa manɩ man-paɣtʋ yɔɔ,+ nɛ patiyele pisuu mo-lona kiɖeɖena.+ Paaɖʋʋ tʋkaɣ mbʋ pɩkɛ pʋyʋ kiɖeɖeu nɛ mbʋ pɩkɛ pʋyʋ yem yɔ pɩ-hɛkʋ taa,+ nɛ paayeki se ɛyaa ɩtɩlɩ mbʋ pɩfɛyɩ kele kele nɛ mbʋ pɩwɛ kele kele yɔ,+ nɛ pekizaa se paañaŋ man-sabaatɩwaa, nɛ pepisi-m pɛ-hɛkʋ taa.
27 Tɩ-awumbiya mba pɛwɛ tɩ-taa yɔ, pɛwɛ ɛzɩ ñɩtʋ taa hasɩ* nzɩ sɩcɩyɩɣ mbʋ sɩkpawa yɔ; pɛkpɛdɩɣ calɩm nɛ pakʋʋ ɛyaa* se pañɩnɩnɩ mulum kɛzɛɣa.+
28 Ɛlɛ tɩ-nayaa ta akalʋʋ pa-lakasɩ yɔɔ. Panaɣ cɛtɩm natʋ nɛ patɩyɩɣ cɛtɩm tɩyɩtʋ+ nɛ pɔyɔɔdʋʋ se: ‘Tɔm tʋnɛ Kɩbaɣlʋ Kɩlɩm Yehowa yɔɔdʋʋ,’ ŋgʋ Yehowa maɣmaɣ tɩyɔɔdɩ natʋyʋ.
29 Ɛjaɖɛ taa ɛyaa mulaa nɛ pamɩlɩ+ ɖɔɖɔ, palabɩ kañatʋ mba pɛwɛ kɩcɛyɩm taa yɔ nɛ kʋñɔndɩnaa, pomuli ɛgɔm nɛ patɩhʋʋ ɛ-tɔm siɣsiɣ.”
30 «“Mañɩnaɣ ɛyʋ nɔɔyʋ pɛ-hɛkʋ taa, weyi ɛpɩzaɣ se ɛñɔɔzɩ pɛɛ koloŋa yaa ɛsɩŋ mɛ-ɛsɩndaa ɖenɖe patʋlɩ koloŋa pɔʋ yɔ se ɛkandɩyɩ ɛjaɖɛ yɔɔ nɛ pataayɔkɩ-ɖɩ yɔ,+ ɛlɛ mantɩna nɔɔyʋ.
31 Pʋyɔɔ lɛ, mankaɣ pɩyʋʋ man-pana pɔ-yɔɔ nɛ manɖɩzɩ-wɛ nɛ man-pana miŋ. Mankaɣ kɔnʋʋ mbʋ pa-lakasɩ lʋlaa yɔ pa-maɣmaɣ pa-ñʋŋ taa,” Kɩbaɣlʋ Kɩlɩm Yehowa yɔɔdʋʋna.»
Pɩ-tɛɛ tɔm
^ Piye piye, «ŋkaɣ hʋnʋʋ tɔm, ŋkaɣ hʋnʋʋ tɔm.»
^ Ebree tɔm piye nɖɩ palabɩnɩ tʋmɩyɛ yɔ, pɩtɩla yɔ nɔɔ kʋɖʋmaɣ nakɛyɛ wɛ ɖɩ nɛ Ebree tɔm piye naɖɩyɛ, nɖɩ pɛɖɛzɩɣ se «pɩndʋ» yɔ pɛ-hɛkʋ taa, nɛ palakɩnɩ-ɖɩ tʋmɩyɛ se peni nabʋyʋ.
^ Yaa «soliɣa.»
^ Piye piye, «Pokuluu pa-caanaa ndaakpela yɔɔ.»
^ Yaa «ŋŋhiɣ mulum kɛzɛɣa.»
^ Piye piye, «ña-laŋɩyɛ kaɣ wɛʋ.»
^ Yaa «kalɩzasɩ.»
^ Ñɩtʋ taa hasɩ kɛ kpɩna wena awɛ patʋ siŋŋ nɛ atɔkɩ kpɩna lɛɛna yɔ.
^ Yaa «kalɩzasɩ.»
