Ezekɩyɛɛlɩ 26:1-21
26 Pɩnaɣ 11 ñɩŋga taa, fenaɣ kajalaɣ kɩyakʋ ñɩŋgʋ wiye, Yehowa tɔm talɩ-m se:
2 «Ɛyʋ pɩyalʋ, Tiirɩ yɔɔdɩ Yeruzalɛm tɔm se:+ “Ahaaŋ! Pɔyɔkɩ ɛyaa samasɩ nɔnɔɔ!+ Pɩtɩŋa pɩkaɣ tɩŋnʋʋ ma-nʋmɔʋ taa, nɛ pɔyɔkʋʋ-kɛ lɛɛlɛɛyɔ yɔ, mankaɣ pɩsʋʋ ñɩm tʋ!”
3 Pʋyɔɔ lɛ, tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Oo Tiirɩ, na, mankʋyʋʋ ñɔ-yɔɔ, nɛ mankaɣ kʋsʋʋ ajɛɛ sakɩyɛ nɛ akɔɔ ña-wayɩ ɛzɩ teŋgu kʋsʋʋ kɩ-lɩm hola yɔ.
4 Akaɣ yɔkʋʋ Tiirɩ kolonzi nɛ atuzi ki-tilima,+ nɛ mankaɣ kayʋʋ kɩ-tɛtʋ nɛ mala nɛ kɩpɩsɩ kaaʋ ŋgʋ kɩ-yɔɔ fɛyɩ nabʋyʋ nɛ kiɖeɣ miŋ yɔ.
5 Kɩkaɣ pɩsʋʋ kadaɣ ŋga ka-taa peleŋ piyiŋ yɔ teŋgu hɛkʋ taa.”+
«“Mbʋ pʋyɔɔ yɔ ma-maɣmaɣ mɔyɔɔdɩna, nɛ kɩkaɣ pɩsʋʋ mbʋ ajɛɛ lazɩɣ yɔ, Kɩbaɣlʋ Kɩlɩm Yehowa yɔɔdʋʋna.
6 Nɛ ɛyaa mba pɛwɛ kɩ-tɛtʋ cikpetu ndɩ ndɩ* ndʋ tiposini lɩm yɔ tɩ-taa yɔ, pakaɣ-wɛ kʋʋ nɛ laɣɖɛ, nɛ toovenim taa lɛ ɛyaa kaɣ tɩlʋʋ se ma lɛ Yehowa.”
7 «Mbʋ pʋyɔɔ yɔ tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Na! Mankaɣ kʋsʋʋ Babilɔɔnɩ wiyaʋ Nabukodonozɔɔrɩ* nɛ hayo kiŋ nɛ mɔnkɔnɩ-ɩ nɛ eyooni Tiirɩ;+ ɛkɛ awiya taa wiyaʋ,+ ɛwɛnɩ kpaŋnaŋ,+ you kɛɛkɛɛnaa,+ kpaŋnaŋ yɔɔ caɣyaa nɛ sɔɔjanaa* sakɩyɛ.
8 Ɛkaɣ kʋʋ nɛ laɣɖɛ ɛyaa mba pɛwɛ ñɛ-tɛtʋ cikpetu ndɩ ndɩ ndʋ tiposini lɩm yɔ tɩ-taa yɔ, ɛkaɣ maʋ tɛtʋ ñɛyʋʋ koloŋa nɛ esiɣ you wondu nɛ pɩcɔ-ŋ nɛ pɩta nɛ ɛkpazɩ kpayʋʋ sɔsɔʋ ñɔ-yɔɔ.
9 Ɛkaɣ yɔkʋʋ ño-kolonzi nɛ e-you wondu ndʋ pɔyɔkʋʋnɩ kolonzi yɔ, nɛ ɛkaɣ yɔkʋʋ ñe-tilima nɛ ɛ-laɖa.*
10 Ɛ-kpaŋnaŋ kaɣ ɖɔʋ siŋŋ nɛ pʋyɔɔ lɛ, ɩkaɣ labʋ nɛ mʋzʋʋ huuzi ñɔ-yɔɔ; nɛ kpaŋnaŋ kɔkɔɖɛ, pɔbɔla kɔkɔɖɛ nɛ you kɛɛkɛɛnaa kɔkɔɖɛ kaɣ labʋ nɛ ño-kolonzi seli alɩwaatʋ ndʋ ɛsʋʋ ñɔ-nɔnɔsɩ taa, ɛzɩ ɛyaa wadʋʋ tɛtʋ ndʋ ti-kolonzi yɔkaa yɔ tɩ-taa yɔ.
11 Ɛ-kpaŋnaŋ acaa kaɣ mɩtʋʋ ña-habɛɛ tɩŋa;+ ɛkaɣ kʋʋ ñɛ-ɛyaa nɛ laɣɖɛ, nɛ ñe-tilima ɖoŋ ñɩna kaɣ ɖabʋ.
12 Pakaɣ kuu ña-ñɩm, palazɩ ña-tadɩyɛ wondu,+ potuzi ño-kolonzi nɛ pɔyɔkɩ ña-ɖɩsɩ kɩbanzɩ; pʋwayɩ lɛ, pakaɣ kpaɣʋ ñɛ-pɛɛ, ño-wondu ndʋ ŋlabɩnɩ ɖasɩ yɔ nɛ ñɛ-tɛtʋ nɛ pɛpɛɖɩ lɩm taa.”
13 «“Mankaɣ labʋ nɛ paakaɣ tasʋʋ nɩʋ ñe-hendu taŋ, nɛ paakaɣ tasʋʋ nɩʋ ña-cɩmɩŋ taŋ ɖɔɖɔ.+
14 Nɛ mankaɣ-ŋ pɩsʋʋ kaaʋ ŋgʋ kɩ-yɔɔ fɛyɩ nabʋyʋ nɛ kiɖeɣ miŋ yɔ, nɛ ŋkaɣ pɩsʋʋ kadaɣ ŋga ka-taa peleŋ piyiŋ yɔ.+ Paakaɣ-ŋ tasʋʋ maʋ kpa, mbʋ pʋyɔɔ yɔ ma Yehowa, ma-maɣmaɣ mɔyɔɔdɩna,” Kɩbaɣlʋ Kɩlɩm Yehowa yɔɔdʋʋna.
15 «Tɔm tʋnɛ Kɩbaɣlʋ Kɩlɩm Yehowa heyiɣ Tiirɩ: “Ŋtɔlʋʋ nɛ pitili lɛ, alɩwaatʋ ndʋ mba pacaɣ sɩbʋ yɔ* pɛwɛɣ nɛ pɔmɔlʋʋ yɔ, alɩwaatʋ ndʋ kʋgʋʋ wɛɣ ñɛ-hɛkʋ taa yɔ, ɛzɩ lɩm hɛkʋ taa tɛtʋ ɩɩkaɣ seluu na?+
16 Teŋgu yɔɔ awumbiya* kpeekpe kaɣ tibinuu pe-kewiyisi kpelisi yɔɔ nɛ pɔhɔzɩ po-tokonaa kɩɖaɣlaa* nɛ po-tokonaa mba pacanɩ-wɛ yɔ, nɛ pakaɣ seluu. Pakaɣ caɣʋ tataa nɛ peseliɣ kaahɛzaɣ nɛ pɔcɔŋnɩ-ŋ nɛ pɩɖɩɣzɩɣ-wɛ.+
17 Nɛ pakaɣ-ŋ teu kʋñɔwiye hendu+ nɛ pɔtɔŋ se:
‘Ŋtɛŋɩlɩ mbʋ suwe,+ ña weyi ɛyaa lɩɣaɣnɩ teŋgunaa taa nɛ pɔkɔŋ nɛ pacakɩ ña-taa yɔ, tɛtʋ ndʋ pasam-tʋ yɔ;Ña nɛ ñɛ-ɛyaa ɩɩwɛ ɖoŋ teŋgu yɔɔ,+Ɩlakaɣ nɛ sɔɔndʋ kpaɣ tɛtʋ yɔɔ ɛyaa kpeekpe pɩdɩɩfɛyɩ!
18 Lɩm hɛkʋ taa tɛtʋ ndɩ ndɩ kaɣ seluu ñɔ-tɔlʋʋ kɩyakʋ wiye,Pɩkaɣ siduu teŋgu hɛkʋ taa tɛtʋ ndɩ ndɩ alɩwaatʋ ndʋ ŋtɛŋɩlɩɣ yɔ.’”+
19 «Mbʋ pʋyɔɔ yɔ tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Alɩwaatʋ ndʋ manpʋʋtʋʋ-ŋ nɛ ŋwɛɛ ɛzɩ tɛtʋ ndɩ ndɩ ndʋ tɩ-taa ɛyaa fɛyɩ yɔ, alɩwaatʋ ndʋ malakɩ nɛ lɩm hola sɔsɔna wadɩ ñɔ-yɔɔ nɛ lɩm ɖoŋ ñɩmbʋ hu ñɔ-yɔɔ yɔ,+
20 ña nɛ mba itiki pɔʋ* taa yɔ mankaɣ-mɩ wonuu ɖooo lɔndaa mba cɔlɔ; mankaɣ labʋ nɛ ŋcaɣ lone nɖɩ ɖɩwɛ ɖooo pɩ-tɛɛ yɔ ɖɩ-taa, ɛzɩ caanaʋ taa lona wena papʋʋtɩ-yɛ yɔ, pɩkpɛndɩnɩ mba petiki pɔʋ taa yɔ,+ se pɩsa nɛ nɔɔyʋ ɛtaatasɩ caɣʋ ña-taa. Nɛ mankaɣ sam* ɛsadɩnaa ɛjaɖɛ.
21 «“Mankaɣ kɔnʋʋ ñɔ-yɔɔ sɔɔndʋ tuda, nɛ ŋŋkaɣ tasʋʋ wɛʋ.+ Pakaɣ-ŋ ñɩnʋʋ ɛlɛ paakaɣ-ŋ tasʋʋ naʋ kpa,” Kɩbaɣlʋ Kɩlɩm Yehowa yɔɔdʋʋna.»
Pɩ-tɛɛ tɔm
^ Piye piye, «Nɛ kɩ-pɛlaa.»
^ Piye piye, «Nebukadɩrezaarɩ,» mbʋ pamaɣ ɛ-hɩɖɛ ɖɔɖɔ.
^ Piye piye, «samasɩ.»
^ Yaa «ɛ-laɣla.»
^ Piye piye, «mba pakʋ-wɛ yɔ.»
^ Yaa «awiya.»
^ Yaa «po-tokonaa kɩtɩnaa mba pɛfɛyɩnɩ nɩŋgbɛɛnzɩ yɔ.»
^ Yaa «pɩlaʋ.»
^ Yaa «canʋʋ.»