Ezekɩyɛɛlɩ 27:1-36
-
Tiirɩ mɛlɛ ŋgʋ kɩsʋʋ lɩm tɛɛ yɔ, kɩ-yɔɔ kʋñɔwiye hendu (1-36)
27 Yehowa tɔm tasɩ-m talʋʋ se:
2 «Piyele nɛ ña yɔ, ɛyʋ pɩyalʋ, tee Tiirɩ kʋñɔwiye hendu,+
3 nɛ ŋheyi Tiirɩ se:
“Ña weyi ŋwɛ teŋgu nɔnɔsɩ taa yɔ,Ña weyi ña nɛ lɩm hɛkʋ taa tɛtʋ sakɩyɛ taa samasɩ ɩlakɩ tadɩyɛ yɔ,Tɔm tʋnɛ Kɩbaɣlʋ Kɩlɩm Yehowa yɔɔdʋʋ:
‘Oo Tiirɩ, ña-maɣmaɣ ŋyɔɔdaa se: “Men-keɖeɣa talɩ pilim.”+
4 Ña-ageeta wɛ teŋgu hɛkʋ taa,Nɛ ña-mayaa laba nɛ ñe-keɖeɣa talɩ pilim.
5 Ŋkɛ mɛlɛ, palabɩ ño-kpoŋgbolonaa tɩŋa nɛ jenevriyee tɩŋ weyi ɩwɛ Seniiri yɔ,+Nɛ pakpaɣ Libaŋ sɛɛdrɩ tɩʋ nɛ palabɩnɩ-ŋ sizika.
6 Pakpaɣ Basaanɩ tɩŋ sɔsɔŋ* nɛ palabɩnɩ ŋnaŋ* weyi pasaɣnɩ-ŋ yɔ,Nɛ palabɩ ñɔ-nɔɔ nɛ siprɛɛ tɩʋ ŋgʋ kɩ-yɔɔ pɔpɔ tukeɖe nɖɩ palɩnɩ-ɖɩ nɛ Kitim+ lɩm hɛkʋ taa tɛtʋ taa yɔ.
7 Ejipiti pɩsatʋ ndʋ pata-tʋ tɔlɩm yɔ, ndʋ palabɩnɩ ñɛ-kɛdɛɛka;Nɛ mbʋ pihuuzuu ña-ñʋʋ taa ɖenɖe ɛyaa ɖɔŋ yɔ, palabɩ-pʋ nɛ Eliisa+ lɩm hɛkʋ taa tɛtʋ pɩsatʋ ndʋ tɩwɛ pʋlɔɔ yɔ nɛ heŋ hʋndʋ pɩsaŋ kɩsɛɛmɩŋ yuulee.
8 Siidɔɔ mba nɛ Arɩvadɩ mba+ kaakɛnɩ ña-sayaa.
Oo Tiirɩ, ñɛ-ɛyaa mba paawɛ niye yɔ mba kaakɛnɩ ña-tʋmlaɖaa.+
9 Gebal abalaa+ mba paawɛ lɛɣtʋ nɛ pɛwɛɛ niye yɔ* mba taaɖaɣnɩ ñɔ-pɔŋ.+
Teŋgu yɔɔ mɛlɛnaa tɩŋa nɛ pa-taa tʋmlaɖaa kɔŋaɣ ñɔ-cɔlɔ nɛ palakɩ tadɩyɛ.
10 Pɛrɩsɩ, Ludi nɛ Puti+ abalaa kaawɛ ñɔ-sɔɔjanaa taa, ño-you laɖaa taa.
Popuzaɣ pa-kpayɩŋ nɛ pa-ñɩɣtʋ hulasɩ ña-taa, nɛ pɔkɔŋnaɣ-ŋ samtʋ.
11 Arɩvadɩ abalaa mba paawɛ ñɔ-sɔɔjanaa taa yɔ, paasɩŋ ño-kolonzi yɔɔ nɛ pɩcɔɔ pɩta,Nɛ abalaa mba paawɛ abalɩtʋ yɔ paawɛ ñe-tilima taa.
Popuzi kpayɩŋ weyi ɩwɛ kulukulu yɔ ño-kolonzi yɔɔ nɛ pɩcɔɔ pɩtaNɛ pala nɛ ñe-keɖeɣa talɩ pilim.
12 «“‘Ña-ñɩm sakɩyɛ yɔɔ lɛ,+ ña nɛ Tarɩsiisi+ ɩlakaɣ tadɩyɛ. Pakpakaɣ liidiye ñɩɣtʋ, ñɩɣtʋ kɩkpɛɛdɩtʋ, ñɩɣtʋ ndʋ payaɣ se etɛɛ yɔ nɛ ñɩɣtʋ ndʋ payaɣ se pʋlɔŋ yɔ nɛ pɛlɛɣzɩɣnɩ ño-wondu.+
13 Ña nɛ Yavaanɩ, Tubaalɩ+ nɛ Mesɛɛkɩ+ ɩlakaɣ tadɩyɛ; pakpakaɣ yomaa+ nɛ ñɩɣyʋʋ kɩsɛɛmʋʋ wondu nɛ pɛlɛɣzɩɣnɩ ña-tadɩyɛ wondu.
14 Togarɩma lʋlʋʋ taa ñɩma+ kpakaɣ kpaŋnaŋ nɛ kpaŋasɩ nɛ pɛlɛɣzɩɣnɩ ño-wondu.
15 Ña nɛ Dedaanɩ mba+ ɩlakaɣ tadɩyɛ; ŋŋmʋ tadɩyɛ laɖaa sakɩyɛ lɩm hɛkʋ taa tɛtʋ taa nɛ palakɩ-ŋ tʋmɩyɛ; pakpakaɣ tukela+ nɛ ebɛɛnɩ ɖasɩ nɛ pɛhɛyɩɣnɩ-ŋ lambuu.
16 Ño-wondu sakɩyɛ yɔɔ lɛ, ña nɛ Edom ɩlabɩ tadɩyɛ. Pakpakaɣ turikuwaazɩ pɛɛ, heŋ hʋndʋ pɩsaŋ kɩsɛɛmɩŋ yuulee, wondu ndʋ pacanɩ-tʋ nɛ tɩwɛnɩ tɔlɩm ndɩ ndɩ yɔ, pɩsaŋ kɩbaŋ, ñɩɣlɩm pɛɛ nɛ rubii pɛɛ nɛ pɛlɛɣzɩɣnɩ ño-wondu.
17 «“‘Ña nɛ Yuuda nɛ Izrayɛɛlɩ ɛjaɖɛ ɩlabɩ tadɩyɛ; pakpakaɣ Miniiti+ tɛ blee, tɔɔnasɩ kɩbanzɩ, tʋŋ num,+ num nɛ balɩsam num+ nɛ pɛlɛɣzɩɣnɩ ño-wondu.+
18 «“‘Ño-wondu sakɩyɛ nɛ ña-ñɩm tɩŋa yɔɔ lɛ, ña nɛ Damaasɩ+ ɩlabɩ tadɩyɛ; kɩpɛdaɣnɩ-ŋ Helbɔɔnɩ tɛ vɛɛ nɛ Zaarɩ heŋ hʋndʋ pɩsaŋ.
19 Uzaalɩ tɛ Vedaanɩ nɛ Yavaanɩ pakpakaɣ wondu ndʋ polubini ñɩɣtʋ yɔ, kasiya* tɩŋ nɛ sɔzɩŋ kañɩŋgbayaɣ nɛ pɛlɛɣzɩɣnɩ ño-wondu.
20 Dedaanɩ+ kɔŋnaɣ-ŋ pɩsaŋ weyi pɔpɔʋ kpaŋnaŋ yɔɔ nɛ pacakɩ yɔ* nɛ ña nɛ kʋ ɩlakɩ tadɩyɛ.
21 Ŋŋmʋ Arabii mba nɛ Kedaarɩ+ ñʋndɩnaa mba paakɛ heɣsi, ɛyaŋ nɛ pʋŋ tadɩyɛ laɖaa yɔ nɛ palakɩ-ŋ tʋmɩyɛ.+
22 Ña nɛ Seeba nɛ Raama+ tadɩyɛ laɖaa ɩlakaɣ tadɩyɛ; pakpakaɣ sɔzɩŋ num ndɩ ndɩ mbʋ pɩkɩlɩ ɖeu yɔ pɩtɩŋa, ñɩɣlɩm pɛɛ ndɩ ndɩ tɩŋa nɛ sika nɛ pɛlɛɣzɩɣnɩ ño-wondu.+
23 Ña nɛ Haraanɩ,+ Kanee, Edɛɛnɩ,+ Seeba+ tadɩyɛ laɖaa, Asuur+ nɛ Kilmaadɩ ɩlakaɣ tadɩyɛ.
24 Pɛpɛdaɣ tokonaa kɩbama, tokonaa kɩtɩnaa mba palabɩ-wɛ nɛ pɩsaŋ weyi ɩwɛnɩ tɔlɩm pʋlɔɔ nɛ wondu ndʋ pacanɩ-tʋ nɛ tɩwɛnɩ tɔlɩm ndɩ ndɩ yɔ, nɛ kuntunaa mba pɛwɛnɩ tɔlɩm ndɩ ndɩ yɔ ña-kɩyakʋ taa; pɔhɔkɩ wondu ndʋ tɩ-tɩŋa camɩyɛ nɛ nimee.
25 Tarɩsiisi mɛlɛnaa+ kpakaɣnɩ ña-tadɩyɛ wondu,Piyeba nɛ wondu su ña-taa nɛ ŋsʋʋ yuŋ* teŋgu hɛkʋ taa.
26 Ña-sayaa woni-ŋ teŋgunaa mba pa-lɩm wɛ ɖoŋ yɔ pɔ-yɔɔ;Wɩsɩ ɖɩlɩyɛ taa helim laba nɛ ŋsʋʋ lɩm tɛɛ, teŋgu hɛkʋ taa.
27 Ña-ñɩm, ño-wondu, ña-tadɩyɛ wondu nɛ ña-taa tʋmlaɖaa,Mba pataaɖaɣ ñɔ-pɔŋ yɔ, ña-tadɩyɛ wondu pɛdɩyaa+ nɛ you laɖaa tɩŋa+—Ɛyaa sakɩyɛ mba pɛwɛ ña-taa yɔ pa-tɩŋa—Pa-tɩŋa pakaɣ sʋʋ lɩm tɛɛ teŋgu hɛkʋ taa kɩyakʋ ŋgʋ ŋtɔlʋʋ yɔ.+
28 Alɩwaatʋ ndʋ ña-taa tʋmlaɖaa makɩ kubusi yɔ, teŋgu nɔɔ tɛtʋ kaɣ seluu.
29 Mɛlɛ sayaa, mɛlɛ taa tʋmlaɖaa nɛ teŋgu yɔɔ tʋmlaɖaa tɩŋaKaɣ lɩnʋʋ pɛ-mɛlɛnaa taa nɛ petii nɛ pasɩŋ tataa.
30 Pakaɣ wiu ɖoŋ nɛ laŋwɛɛkɩyɛ ñɔ-yɔɔ+Nɛ paɖʋʋ puuyuu pa-ñʋŋ taa nɛ pepilimiɣ tɔlɩma taa.
31 Pakaɣ hʋm pa-ñʋŋ koloŋgolo nɛ posuu fɔlɔtɔnaa;Pakaɣ wiu ñɔ-yɔɔ siŋŋ* nɛ wiu sɔsɔm.
32 Pa-kʋñɔŋ taa, pakaɣ teu kʋñɔwiye hendu nɛ pewii ñɔ-yɔɔ se:
“Awɛ ɛzɩ Tiirɩ, ŋgʋ kisum tamɩyɛ lɛɛlɛɛyɔ teŋgu hɛkʋ taa yɔ?+
33 Alɩwaatʋ ndʋ ño-wondu lɩɣaɣnɩ teŋgu taa nɛ tɩkɔŋ yɔ, ŋŋhaɣzɩ samasɩ sakɩyɛ.+
Ña-ñɩm sakɩyɛ nɛ ña-tadɩyɛ wondu laba nɛ tɛtʋ yɔɔ awiya pɩsɩ ñɩm tɩnaa.+
34 Lɛɛlɛɛyɔ lɛ, ŋsʋ lɩm tɛɛ teŋgu taa, lɩm cukaŋ ñɩmbʋ tɛɛ,+Ña nɛ ña-tadɩyɛ wondu tɩŋa nɛ ñɛ-ɛyaa ɩsʋ lɩm tɛɛ.+
35 Lɩm hɛkʋ taa tɛtʋ taa mba kpeekpe kaɣ-ŋ cɔnʋʋ nɛ pɩɖɩɣzɩ-wɛ,+Nɛ sɔɔndʋ kaɣ kpaʋ pa-awiya nɛ aseli+—pɛ-ɛsɩndaa kaɣ ñɩŋʋʋ.
36 Ajɛɛ taa tadɩyɛ laɖaa kaɣ hʋlʋʋ kancʋʋlaɣ mbʋ pɩtalɩ-ŋ yɔ pɩ-yɔɔ.
Ñɛ-tɛm kaɣ kɔm tuda nɛ pɩkaɣ wɛʋ sɔɔndʋ,Nɛ ŋŋkaɣ tasʋʋ wɛʋ wiɖiyi kpa.”’”»+
Pɩ-tɛɛ tɔm
^ Yaa «sɛɛnɩ tɩŋ.»
^ Pɩkɛ ɖaŋ weyi pasaɣnɩ mɛlɛ yɔ.
^ Yaa «mba paakɛ akpadɩyaa nɛ mba paawɛ niye yɔ.»
^ Pɩkɛ tɩʋ ŋgʋ kɩnɩɣzɩnɩ kanɛɛlɩ tɩʋ yɔ.
^ Yaa «kɔŋnaɣ-ŋ wondu ndʋ palʋ-tʋ yɔ.»
^ Pɩpɩzɩɣ pɩkɛ, «nɛ samtʋ wɛɛ ñɔ-yɔɔ.»
^ Yaa «Pakaɣ wiu ñɔ-yɔɔ nɛ kalɩzaɣ siziŋ.»