Ezekɩyɛɛlɩ 30:1-26
30 Nɛ Yehowa tɔm tasɩ-m talʋʋ se:
2 «Ɛyʋ pɩyalʋ, yɔɔdɩ natʋ tɔm nɛ ŋtɔ se: “Tɔm tʋnɛ Kɩbaɣlʋ Kɩlɩm Yehowa yɔɔdʋʋ:
‘Iwii nɛ ɩyɔɔdɩ se: “Hayɩ, kɩyakʋ ŋgʋ kiɖiɣni kɔm!”
3 Mbʋ pʋyɔɔ yɔ kɩyakʋ ŋgʋ kɩñɔtaa, ɛɛɛ, Yehowa kɩyakʋ nakʋyʋ ñɔtaa.+
Kɩkaɣ kɛʋ mɩndʋ kɩyakʋ,+ alɩwaatʋ ndʋ paɖʋwa se pahʋʋnɩ ajɛɛ tɔm yɔ.+
4 Laɣɖɛ kaɣ kɔm Ejipiti wayɩ, nɛ sɔɔndʋ kaɣ kpaʋ Etiyoopii alɩwaatʋ ndʋ pakʋʋ ɛyaa nɛ pɔtɔlʋʋ Ejipiti taa yɔ;Poku kɩ-ñɩm nɛ pɔyɔkɩ ki-tigila.+
5 Etiyoopii,+ Puti,+ Ludi nɛ ajɛɛ lɛɛna taa ñɩma kpeekpe,Nɛ Kuub, pɩkpɛndɩnɩ ɛgbɛyɛ ɖʋʋ ɛjaɖɛ piya,*Pakaɣ kʋʋ pa-tɩŋa nɛ laɣɖɛ.’”
6 Tɔm tʋnɛ Yehowa yɔɔdʋʋ:
“Mba patɩnɩɣ Ejipiti yɔɔ yɔ, mba ɖɔɖɔ pakaɣ tɔlʋʋ,Nɛ ki-ɖoŋ weyi ɩ-yɔɔ kɩkpazɩɣ kɩ-tɩ yɔ, pakaɣ-ɩ tisuu hadɛ.”+
«“Pakaɣ-wɛ kʋʋ nɛ laɣɖɛ ɛjaɖɛ taa, kpaɣnɩ Migɩdɔl+ nɛ piwolo Siyɛɛnɩ,”+ Kɩbaɣlʋ Kɩlɩm Yehowa yɔɔdʋʋna.
7 “Pɛ-ɛjaɖɛ kaɣ kɛʋ ɛjaɖɛ nɖɩ ɖɩkɩlɩ pɩsʋʋ njɛyɛ ajɛɛ taa yɔ, nɛ ɖɩ-tɛtʋ ndɩ ndɩ kaɣ kɛʋ tɛtʋ ndʋ pakɩlɩ-tʋ yɔkʋʋ yɔ.+
8 Nɛ toovenim taa lɛ pakaɣ tɩlʋʋ se ma lɛ Yehowa, alɩwaatʋ ndʋ mɔnsɔkɩ miŋ Ejipiti taa nɛ mɔntɔyɩtɩ mba ɛ nɛ wɛ palabɩ nɔɔ yɔ pe-kpeekpe yɔ.
9 Kɩyakʋ ŋgʋ ki-wiye, mankaɣ tiyuu ɛyaa nɛ pasʋʋ mɛlɛnaa nɛ powolo pala nɛ Etiyoopii ŋgʋ kɩtaɣ kɩ-tɩ liu yɔ kiseli; sɔɔndʋ kaɣ-kʋ kpaʋ kɩyakʋ ŋgʋ kiɖiɣni kɔm Ejipiti yɔɔ yɔ ki-wiye, mbʋ pʋyɔɔ yɔ paa pɩɩlabɩ ɛzɩma yɔ kɩkaɣ kɔm.”
10 «Tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Mankaɣ tɩŋnʋʋ Babilɔɔnɩ wiyaʋ Nabukodonozɔɔrɩ* yɔɔ+ nɛ manɖɩzɩ Ejipiti samaɣ sɔsɔɔ.
11 Ɛ nɛ ɛ-sɔɔjanaa, pakaɣ sʋʋ ɛjaɖɛ taa nɛ pɔyɔkɩ-ɖɩ; pɛkɛ mba pakɩlɩ kañatʋ ajɛɛ taa yɔ.+ Pakaɣ kpɛʋ pa-laɣla nɛ poyooni Ejipiti nɛ pakʋ ɛyaa nɛ pisu ɛjaɖɛ taa ɖo.+
12 Mankaɣ labʋ nɛ Niili+ lɔɔŋ sɔɔ nɛ ɩ-taa wɩlɩ waɣwaɣ, nɛ mankaɣ pɛdɩnʋʋ ɛjaɖɛ kañatʋ tɩnaa. Mankaɣ tɩŋnʋʋ agɔma yɔɔ nɛ manɖɩzɩ ɛjaɖɛ nɛ mbʋ payɩ pɩwɛ ɖɩ-taa yɔ.+ Ma Yehowa, ma-maɣmaɣ mɔyɔɔdɩna.”
13 «Tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Mankaɣ ɖɩzʋʋ ɖɔɖɔ sɩʋ kpelisi nzɩ sɩwɛ kiniŋ yɔ* nɛ manɖɩzɩ Nof* ɛsɔnaa mba paawazɩɣ pʋyʋ yɔ.+ Awumbu* nɔɔyʋ ɛɛkaɣ tasʋʋ wɛʋ Ejipiti ɛjaɖɛ taa wiɖiyi, nɛ mankaɣ labʋ nɛ sɔɔndʋ wɛɛ Ejipiti ɛjaɖɛ taa.+
14 Mankaɣ yɔkʋʋ Patroosɩ+ nɛ mɔnsɔ miŋ Zowaanɩ taa nɛ mahʋʋnɩ No*+ tɔm.
15 Mankaɣ pɩyʋʋ man-pana Ejipiti tɛtʋ ɖoŋ ñɩndʋ Sinɩ yɔɔ, nɛ manɖɩzɩ mba pɛwɛ No yɔ.
16 Mankaɣ sɔbʋ miŋ Ejipiti taa; nɛ sɔɔndʋ kaɣ kpaʋ Sinɩ, nɛ pakaɣ sʋʋ No taa nɛ ɖoŋ, nɛ pakaɣ yonuu Nof* wɩsɩ taa kaɣlaa!
17 Pakaɣ kʋʋ Oni* nɛ Pibesɛɛtɩ evebiya nɛ laɣɖɛ; nɛ pakaɣ ɖɛnʋʋ tɛtʋ ndʋ tɩ-taa mba yomiye taa.
18 Cɩkpɛndʋʋ kaɣ yuu wɩsɩ taa Tapanɛɛsɩ taa, alɩwaatʋ ndʋ mɛnpɛlɩɣ Ejipiti sʋʋtʋ ɖaŋ peeɖe yɔ.+ Ki-ɖoŋ weyi ɩ-yɔɔ kɩkpazɩɣ kɩ-tɩ yɔ ɩkaɣ tɛm,+ mɩndʋ kaɣ huu kɩ-yɔɔ, nɛ pakaɣ ɖɛnʋʋ kɩ-tɛtʋ ndɩ ndɩ taa mba yomiye taa.+
19 Mankaɣ hʋnʋʋ Ejipiti tɔm, nɛ toovenim taa lɛ pakaɣ tɩlʋʋ se ma lɛ Yehowa.”»
20 Nɛ pɩnaɣ 11 ñɩŋga taa, kajalaɣ fenaɣ taa, fenaɣ ŋga ka-kɩyakʋ 7 ñɩŋgʋ wiye, Yehowa tɔm talɩ-m se:
21 «Ɛyʋ pɩyalʋ, mɛnpɛlɩ Ejipiti wiyaʋ Farawɔɔ nesi; paakaɣ-sɩ tam se sɩwaa, yaa paakaɣ-sɩ hɔkʋʋ kɩtamʋʋ se sɩkpa ɖoŋ nɛ sɩɖɔkɩ laɣɖɛ.»
22 «Pʋyɔɔ lɛ, tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Na! Mankʋyʋʋ Ejipiti wiyaʋ Farawɔɔ yɔɔ,+ nɛ mankaɣ pɛlʋʋ e-nesi, nzɩ sɩwɛ ɖoŋ yɔ nɛ nzɩ pɛpɛlɩ-sɩ yɔ,+ nɛ mankaɣ labʋ nɛ laɣɖɛ lɩɩnɩ e-nesi taa nɛ ɖɩtɔlɩ.+
23 Ðɩnɛ ɛlɛ, mankaɣ mɩzʋʋ Ejipiti mba samasɩ taa nɛ mɛyɛkɛlɩ-wɛ ajɛɛ taa.+
24 Mankaɣ kpazʋʋ ɖoŋ Babilɔɔnɩ wiyaʋ nesi*+ nɛ manɖʋzɩ ma-laɣɖɛ e-nesi taa,+ nɛ mankaɣ pɛlʋʋ Farawɔɔ nesi, nɛ ɛkaɣ mɔlʋʋ ɖoŋ ɛ-ɛsɩndaa* ɛzɩ ɛyʋ weyi eɖiɣni sɩbʋ yɔ.
25 Mankaɣ kpazʋʋ ɖoŋ Babilɔɔnɩ wiyaʋ nesi, ɛlɛ Farawɔɔ nesi kaɣ tibu yɔbɩ; nɛ toovenim taa lɛ pakaɣ tɩlʋʋ se ma lɛ Yehowa, alɩwaatʋ ndʋ manɖʋzʋʋ ma-laɣɖɛ Babilɔɔnɩ wiyaʋ nesi taa nɛ ɛkpazɩ-ɖɩ Ejipiti ɛjaɖɛ yɔɔ yɔ.+
26 Nɛ mankaɣ mɩzʋʋ Ejipiti mba samasɩ taa nɛ mɛyɛkɛlɩ-wɛ ajɛɛ taa,+ nɛ toovenim taa lɛ pakaɣ tɩlʋʋ se ma lɛ Yehowa.”»
Pɩ-tɛɛ tɔm
^ Pɩtɩla Izrayɛɛlɩ ñɩma mba powoba nɛ pala nɔɔ nɛ Ejipiti yɔ pɔ-tɔm pɔyɔɔdʋʋ.
^ Piye piye, «Nebukadɩrezaarɩ,» mbʋ pamaɣ ɛ-hɩɖɛ ɖɔɖɔ.
^ Yaa «Wiyaʋ.»
^ Yaa «Mɛmfiis.»
^ Ebree tɔm piye nɖɩ palabɩnɩ tʋmɩyɛ yɔ, pɩtɩla yɔ nɔɔ kʋɖʋmaɣ nakɛyɛ wɛ ɖɩ nɛ Ebree tɔm piye naɖɩyɛ, nɖɩ pɛɖɛzɩɣ se «pɩndʋ» yɔ pɛ-hɛkʋ taa, nɛ palakɩnɩ-ɖɩ tʋmɩyɛ se peni nabʋyʋ.
^ Pʋ-tɔbʋʋ se Tɛɛb.
^ Yaa «Mɛmfiis.»
^ Pʋ-tɔbʋʋ se Heliyopolisi.
^ Yaa «Mankaɣ sɔzʋʋ Babilɔɔnɩ wiyaʋ ɖoŋ.»
^ Pʋ-tɔbʋʋ se Babilɔɔnɩ wiyaʋ ɛsɩndaa.