Ezekɩyɛɛlɩ 32:1-32
32 Nɛ pɩnaɣ 12 ñɩŋga taa, fenaɣ 12 ñɩŋga taa, fenaɣ ŋga ka-kajalaɣ kɩyakʋ ñɩŋgʋ wiye, Yehowa tɔm tasɩ-m talʋʋ se:
2 «Ɛyʋ pɩyalʋ, tee kʋñɔwiye hendu Ejipiti wiyaʋ Farawɔɔ yɔɔ nɛ ŋheyi-i se:
“Ŋŋwɛ ɛzɩ ajɛɛ taa mʋʋzʋʋ ŋgʋ kɩwɛ ɖoŋ yɔ,*Ɛlɛ posuli ñɔ-nɔɔ.
Ŋŋwɛ ɛzɩ teŋgu taa coojo yɔ,+ ŋfalaɣ ñɔ-pɔsɩ taa,Ŋcʋʋdaɣ lɩm nɛ ña-nɩŋgbanzɩ nɛ ŋpisiɣ pɔsɩ.”*
3 Tɔm tʋnɛ Kɩbaɣlʋ Kɩlɩm Yehowa yɔɔdʋʋ:
“Mankaɣ tɩŋnʋʋ ajɛɛ sakɩyɛ wena akpeɣlaa yɔ a-yɔɔ nɛ mɔlɔ men-piyuu ñɔ-yɔɔ,Nɛ akaɣ-ŋ hɔm men-piyuu taa nɛ akpazɩ.
4 Mankaɣ-ŋ yebu tataa;Mankaɣ-ŋ lɔʋ hayɩm taa.
Mankaɣ labʋ nɛ ɛsɔdaa sumasɩ kpeekpe tii nɛ sɩcaɣ ñɔ-yɔɔ,Nɛ mankaɣ labʋ nɛ tɛtɛgbɩna wena awɛ tɛtʋ kpeekpe yɔɔ yɔ atɔɔ-ŋ nɛ ahaɣ.+
5 Mankaɣ lɔʋ ña-nandʋ pʋŋ yɔɔ,Nɛ mala nɛ ño-tomnaɣ hɔɔlɩŋ weyi ɩkazaa yɔ isu fɛɛŋ taa.+
6 Mankaɣ labʋ nɛ ña-calɩm mbʋ pikpeŋ yɔ pɩsʋʋ ɛjaɖɛ nɛ pɩtalɩ ɖooo pʋŋ yɔɔ,Nɛ pɩkaɣ suu lemisi taa.”
7 “Nɛ alɩwaatʋ ndʋ ŋɖɩŋ yɔ, mankaɣ huuzuu ɛsɔdaa nɛ mala nɛ tɩɩnzɩ yu cɩkpɛndʋʋ.
Mankaɣ kpaɣʋ mɩndʋ nɛ mohuuzi wɩsɩ yɔɔ,Nɛ fenaɣ ɛɛkaɣ ñandʋʋ.+
8 Ñɔ-yɔɔ lɛ, mankaɣ labʋ nɛ ɛsɔdaa mintʋsʋŋ tɩŋa yu cɩkpɛndʋʋ,Nɛ mankaɣ huuzuu ñɛ-ɛjaɖɛ yɔɔ nɛ cɩkpɛndʋʋ,” Kɩbaɣlʋ Kɩlɩm Yehowa yɔɔdʋʋna.
9 “Mankaɣ labʋ nɛ samasɩ sakɩyɛ wɛɛ laŋwɛɛkɩyɛ taa alɩwaatʋ ndʋ mowokini ño-yomaa ajɛɛ lɛɛna taa yɔ,Ajɛɛ wena ŋtɩsɩm-yɛ yɔ a-taa yɔ.+
10 Mankaɣ labʋ nɛ pɩɖɩɣzɩ samasɩ sakɩyɛ siŋŋ,Nɛ ñɔ-yɔɔ lɛ, sɔɔndʋ kaɣ kpaʋ sɩ-awiya nɛ aseli alɩwaatʋ ndʋ menfiɣdiɣ ma-laɣɖɛ a-ɛsɩndaa yɔ.
Kɩyakʋ ŋgʋ ŋtɔlʋʋ yɔ,Akaɣ seluu tam, sɔɔndʋ kaɣ kpaʋ paa weyi se ɛtaasɩ.”
11 Mbʋ pʋyɔɔ yɔ tɔm tʋnɛ Kɩbaɣlʋ Kɩlɩm Yehowa yɔɔdʋʋ:
“Babilɔɔnɩ wiyaʋ laɣɖɛ kaɣ kɔm ña-wayɩ.+
12 Mankaɣ labʋ nɛ sɔdɩŋ kʋ ña-samaɣ sɔsɔɔ nɛ laɣɖɛ,Ɩ-tɩŋa ɩkɛ mba pakɩlɩ kañatʋ ajɛɛ taa yɔ.+
Ɩkaɣ luzuu Ejipiti tɩ kpazʋʋ, nɛ ɩkaɣ ɖɩzʋʋ kɩ-samaɣ sɔsɔɔ kpeekpe.+
13 Mankaɣ ɖɩzʋʋ kɩ-kpɩna tɩŋa kɩ-lɩm sɔsɔm cɔlɔ,+Nɛ ɛyʋ naatalʋʋ yaa kpɩnɛ ɛcɛɖɛ ɛɛkaɣ-pʋ tasʋʋ cʋʋdʋʋ.”+
14 “Alɩwaatʋ ndʋ tɩ-taa, mankaɣ labʋ nɛ pa-lɩm keliti,Nɛ mankaɣ labʋ nɛ pɔ-pɔsɩ taa lɩm kpe ɛzɩ num yɔ,” Kɩbaɣlʋ Kɩlɩm Yehowa yɔɔdʋʋna.
15 “Alɩwaatʋ ndʋ malakɩ nɛ Ejipiti pɩsɩ kañɩmbusuu ŋgʋ kɩ-taa nɔɔyʋ fɛyɩ yɔ, ɛjaɖɛ nɖɩ palazɩ mbʋ payɩ piisu ɖɩ-taa yɔ,+Alɩwaatʋ ndʋ mankʋʋ ɖɩ-taa ɛyaa tɩŋa yɔ,Toovenim taa lɛ pakaɣ tɩlʋʋ se ma lɛ Yehowa.+
16 Kʋñɔwiye hendu yɔ, nɛ paa pɩɩlabɩ ɛzɩma yɔ, ɛyaa kaɣ-tʋ teu;Ajɛɛ taa pɛlaa kaɣ-tʋ teu.
Pakaɣ-tʋ teu Ejipiti yɔɔ nɛ kɩ-samaɣ sɔsɔɔ kpeekpe yɔɔ,” Kɩbaɣlʋ Kɩlɩm Yehowa yɔɔdʋʋna.»
17 Nɛ pɩnaɣ 12 ñɩŋga taa, fenaɣ kɩyakʋ 15 ñɩŋgʋ wiye, Yehowa tɔm talɩ-m se:
18 «Ɛyʋ pɩyalʋ, wii Ejipiti samaɣ sɔsɔɔ yɔɔ nɛ ŋtisi-kʋ hadɛ ɛjaɖɛ taa, kɩ nɛ ajɛɛ ɖoŋ ñɩna pɛlaa, nɛ pɔsɔzɩ mba petiki pɔʋ* taa yɔ pɔ-yɔɔ.
19 «“Ŋɖewa nɛ ŋkɩlɩ anɩ? Tii nɛ ŋhɩnɩ kɩdɩbɛlɩŋ cɔlɔ!”
20 «“Pakaɣ tɔlʋʋ mba pakʋ-wɛ nɛ laɣɖɛ yɔ pɛ-hɛkʋ taa.+ Paɖʋzɩ-kʋ laɣɖɛ nesi tɛɛ; ɩhɔ kɩ nɛ kɩ-samaɣ sɔsɔɔ kpeekpe nɛ ɩɖɛna.
21 «“Sɔdɩŋ weyi ɩkɩlɩ ɖoŋ yɔ, ɩkaɣ yɔɔdɩnʋʋ Farawɔɔ nɛ ɛ-sɩnɩyaa nɛ ɖooo Pɩlaʋ* cukaŋ taa. Paa pɩɩlabɩ ɛzɩma yɔ, pakaɣ kʋʋ Ejipiti mba nɛ laɣɖɛ nɛ pahɩnɩ ɛzɩ kɩdɩbɛlɩŋ yɔ.
22 Asiirii nɛ kɩ-samaɣ kpeekpe pɛwɛ peeɖe. Pa-pɩlaŋ cɔ-ɩ nɛ ɩta, pakʋ pa-tɩŋa nɛ laɣɖɛ.+
23 Kɩ-pɩlaŋ wɛ pɔʋ* cukaŋ taa, nɛ kɩ-samaɣ cɔ kɩ-pɩlaʋ nɛ kata, pakʋ pa-tɩŋa nɛ laɣɖɛ, mbʋ pʋyɔɔ yɔ palaba nɛ sɔɔndʋ wɛɛ ɛsadɩnaa ɛjaɖɛ taa.
24 «“Elam+ wɛ peeɖe, nɛ kɩ-samaɣ sɔsɔɔ kpeekpe cɔ kɩ-pɩlaʋ nɛ kata, pakʋ pa-tɩŋa nɛ laɣɖɛ. Petibi hadɛ ɛjaɖɛ taa, pɛkɛ kɩdɩbɛlɩŋ mbʋ, mba palaba nɛ sɔɔndʋ wɛɛ ɛsadɩnaa ɛjaɖɛ taa yɔ. Lɛɛlɛɛyɔ pɛ-fɛyɛ kaɣ wɛʋ pa nɛ mba petiki pɔʋ* taa yɔ pɔ-yɔɔ.
25 Pɔñɔɔzɩ-kʋ kaɖʋ mba pakʋ-wɛ yɔ pɛ-hɛkʋ taa, nɛ kɩ-samaɣ sɔsɔɔ kpeekpe cɔ kɩ-pɩlaŋ nɛ kata. Pa-tɩŋa pɛkɛ kɩdɩbɛlɩŋ, pakʋ-wɛ nɛ laɣɖɛ, mbʋ pʋyɔɔ yɔ palaba nɛ sɔɔndʋ wɛɛ ɛsadɩnaa ɛjaɖɛ taa; nɛ pɛ-fɛyɛ kaɣ wɛʋ pa nɛ mba petiki pɔʋ* taa yɔ pɔ-yɔɔ. Paɖʋ-ɩ mba pakʋ-wɛ yɔ, pɛ-hɛkʋ taa.
26 «“Peeɖe Mesɛɛkɩ nɛ Tubaalɩ+ nɛ pa-samasɩ* sɔsɔsɩ kpeekpe wɛɛ. Pa-pɩlaŋ* cɔ-ɩ nɛ ɩta. Pa-tɩŋa pɛkɛ kɩdɩbɛlɩŋ, pɔsɔbɩ-wɛ laɣɖɛ, mbʋ pʋyɔɔ yɔ palaba nɛ sɔɔndʋ wɛɛ ɛsadɩnaa ɛjaɖɛ taa.
27 Ɛzɩ paakaɣ hɩnʋʋ sɔdɩŋ kɩdɩbɛlɩŋ weyi ɩsɩba, weyi itibi Pɩlaʋ* taa nɛ i-you wondu yɔ ɩ-cɔlɔ? Nɛ pakaɣ ɖʋʋ pa-laɣla pa-ñʋŋ kila* nɛ paɖʋ pa-kɩwɛɛkɩm pɔ-mɔɔ yɔɔ, mbʋ pʋyɔɔ yɔ sɔdɩŋ ɛnɩ ɩlaba nɛ sɔɔndʋ kpa ɛsadɩnaa ɛjaɖɛ.
28 Ɛlɛ ña lɛ, pakaɣ-ŋ tɔyɩtʋʋ kɩdɩbɛlɩŋ hɛkʋ taa, nɛ ŋkaɣ hɩnʋʋ mba pakʋ-wɛ nɛ laɣɖɛ yɔ pɔ-cɔlɔ.
29 «“Edom+ wɛ peeɖe, kɩ-awiya nɛ kʋ-ñʋndɩnaa kpeekpe pahɩnɩ mba pakʋ-wɛ nɛ laɣɖɛ yɔ pɛ-hɛkʋ taa, paa paawɛ ɖoŋ yɔ; mba ɖɔɖɔ pakaɣ hɩnʋʋ kɩdɩbɛlɩŋ+ nɛ mba petiki pɔʋ* taa yɔ pɔ-cɔlɔ.
30 «“Hayo kiŋ awumbiya* kpeekpe wɛ peeɖe, pa nɛ Siidɔɔ mba tɩŋa,+ mba petibini fɛyɛ mba pakʋ-wɛ yɔ pɔ-cɔlɔ yɔ, paa po-ɖoŋ eyekaɣ nɛ sɔɔndʋ kpaɣ ɛyaa yɔ. Pakaɣ kɛʋ kɩdɩbɛlɩŋ mbʋ nɛ pahɩnɩ mba pakʋ-wɛ nɛ laɣɖɛ yɔ pɔ-cɔlɔ, nɛ pɛ-fɛyɛ kaɣ wɛʋ pa nɛ mba petiki pɔʋ* taa yɔ pɔ-yɔɔ.
31 «“Farawɔɔ kaɣ naʋ pa-tɩŋa mbʋ yɔ, nɛ ɛ-laŋɩyɛ kaɣ hɛʋ mbʋ payɩ pɩtalɩ ɛ-samaɣ sɔsɔɔ yɔ pɩ-yɔɔ;+ pakaɣ kʋʋ Farawɔɔ nɛ ɛ-sɔɔjanaa tɩŋa nɛ laɣɖɛ,” Kɩbaɣlʋ Kɩlɩm Yehowa yɔɔdʋʋna.
32 «“Farawɔɔ laba nɛ sɔɔndʋ wɛɛ ɛsadɩnaa ɛjaɖɛ taa, pʋyɔɔ lɛ pakaɣ hɩzʋʋ ɛ nɛ ɛ-samaɣ sɔsɔɔ kpeekpe kɩdɩbɛlɩŋ cɔlɔ, mba pakʋ-wɛ nɛ laɣɖɛ yɔ pɔ-cɔlɔ,” Kɩbaɣlʋ Kɩlɩm Yehowa yɔɔdʋʋna.»
Pɩ-tɛɛ tɔm
^ Piye piye, «pɔ-pɔsɩ.»
^ Yaa «mʋʋzʋʋ ŋgʋ kɩwɛnɩ kpɛm ki-pondone yɔɔ yɔ.» Mʋʋzʋʋ ŋgʋ kɩ nɛ ki-ɖoŋ nɛ kɩtɩkpadɩyɩ yɔ kɩ-tɔm pɔyɔɔdʋʋ.
^ Yaa «pɩlaʋ.»
^ Yaa «Sewɔɔlɩ,» pʋ-tɔbʋʋ se ɛyaa tɩŋa pɩlaʋ. Cɔnɩ Tɔm pee sɔsɔna tɔbʋʋ lɩzʋʋ.
^ Yaa «pɩlaʋ.»
^ Yaa «pɩlaʋ.»
^ Yaa «pɩlaʋ.»
^ Piye piye, «kɩ-samasɩ.»
^ Piye piye, «Kɩ-pɩlaŋ.»
^ Yaa «Sewɔɔlɩ,» pʋ-tɔbʋʋ se ɛyaa tɩŋa pɩlaʋ. Cɔnɩ Tɔm pee sɔsɔna tɔbʋʋ lɩzʋʋ.
^ Pɩtɩla you laɖaa mba pepim-wɛ nɛ pa-laɣla, mba paha-wɛ sɔɔjatʋ ñamtʋ yɔ, pɔ-tɔm pɔyɔɔdʋʋ.
^ Yaa «pɩlaʋ.»
^ Yaa «ɖiyiyaa.»
^ Yaa «pɩlaʋ.»
